“KE HOBANE’NG ha Molimo a lumeletse hore ke hlaheloe ke ntho e tjee?” Ena ke potso eo Sidnei ea lilemo li 24 ea lulang Brazil a neng a lula a ipotsa eona. O ile a lemala ha a bapala thelelisaneng ea ka metsing ’me ka mor’a moo a tsamaea ka setulo sa likooa.

Ha batho ba utloisitsoe bohloko ke likotsi, lintoa, ho kula, ho shoeloa ke motho eo ba mo ratang le ho oeloa ke koluoa ea tlhaho, ho ka ba bonolo hore ba halefele Molimo. Eo hase ntho e ncha. Mopatriareka Jobo oa mehleng ea boholo-holo, o ile a hlaheloa ke litlokotsi tse latellanang. Ka phoso o ile a beha Molimo molato ’me a re: “Ke hoeletsa ho uena ho kōpa thuso, empa ha u nkarabe; ke eme, e le hore u ka nkela hloko. U iphetola hore u be ea sehlōhō ho ’na; u nkoetlela lehloeo ka matla a feletseng a letsoho la hao.”—Jobo 30:20, 21.

Jobo o ne a sa tsebe hore na ke mang ea mo bakelang mahlomola ebile o ne a sa tsebe hore na ke hobane’ng ha a ne a mo hlahela. Se thabisang ke hore Bibele ea re bolella hore na ke hobane’ng ha lintho tse joalo li etsahala le hore na re lokela ho itšoara joang ha li re hlahela.

Ha Bibele e bua ka Molimo e re: “Litsela tsohle tsa hae ke toka. Molimo oa botšepehi, eo ho eena ho se nang ho hloka toka. O lokile ’me o khabane.” (Deuteronoma 32:4) Ka lebaka leo, na ke ho utloahalang hore Molimo ‘ea lokileng ea bileng a leng khabane’ a rere hore batho ba utloe bohloko kapa a sebelise mahlomola ho ba otla kapa ho ba hloekisa?

Bibele e araba ka ho re: “Ha a le tlas’a teko, ho se ke ha e-ba le ea reng: ‘Ke ntse ke lekoa ke Molimo.’ Etsoe Molimo a ke ke a lekoa ka lintho tse mpe kapa hona hore o leka leha e le mang ka tsona.” (Jakobo 1:13) Ha e le hantle, Bibele e re Molimo o ile a bōpa batho ba phethahetse. O ile a fa batho ba pele, e leng, Adama le Eva lehae le letle, lintho tsohle tseo ba neng ba li hloka le mosebetsi o khotsofatsang. Molimo o ile a re ho bona: “Atang le ngatafale le tlale lefatše ’me le le buse.” Ka sebele, Adama le Eva ba ne ba se na lebaka la ho halefela Molimo.—Genese 1:28.

Empa lefatše la rōna le senyehile haholo kajeno. Ha e le hantle, batho ba ’nile ba e-ba mahlomoleng ka lilemo tse ngata. Bibele e bua ’nete ha e re: “Pōpo eohle e ntse e tsoela pele ho bobola hammoho le ho ba bohlokong hammoho ho fihlela joale.” (Baroma 8:22) Ho etsahetse’ng?

E le hore re fumane karabo, re lokela ho nahana ka se ileng sa etsahala nakong e fetileng. Lengeloi la lerabele leo hamorao le ileng la bitsoa Satane Diabolose, le ile la susumelletsa Adama le Eva hore ba tlōle melao ea Molimo mabapi le se nepahetseng le se fosahetseng, e bontšoang ke taelo eo a ileng a ba fa eona ea hore ba se ke ba ja litholoana tsa “sefate sa tsebo ea botle le bobe.” Diabolose o ile a re ho Eva ba ke ke ba shoa ha ba tlōla molao oa Molimo, kahoo a qosa Molimo ka hore o leshano. Satane o ile a boela a qosa Molimo ka hore o timme bafo ba hae tokelo ea ho khetha se setle ho se sebe. (Genese 2:17; 3:1-6) Satane o ile a re batho ba ka phela hamonate ha ba sa busoe ke Molimo. Sena sohle se ile sa hlahisa tseko ea bohlokoa ea hore na Molimo o na le bokhoni ba ho busa batho kapa che.

Diabolose o ile a hlahisa tseko e ’ngoe hape. O ile a qosa batho ka ho re ba sebeletsa Molimo ka mabaka a boithati. Ha Diabolose a bua ka Jobo ea tšepahalang, o ile a re ho Molimo: “Na ha ua hloma lekhoakhoa ho mo potoloha ka hohle le ho potoloha ntlo ea hae le ho potoloha ntho e ’ngoe le e ’ngoe eo a nang le eona? . . . Empa, ho fapana le hoo, ka kōpo, otlolla letsoho, u ame ntho e ’ngoe le e ’ngoe eo a nang le eona ’me u bone hore na a ke ke a u rohaka sefahla-mahlo.” (Jobo 1:10, 11) Le hoja Satane a ne a bua ka Jobo, o ile a fana ka maikutlo a hore batho bohle ba sebeletsa Molimo ka mabaka a boithati.

Litseko tseo tsa bohlokoa li ne li ka rarolloa joang ka tsela e molemo ka ho fetisisa? Molimo ea bohlale  bo ke keng ba lekanngoa o na le tharollo e re fang tšepo. (Baroma 11:33) O ile a etsa qeto ea ho lumella batho hore ba ipuse ka nakoana, e le hore ho bonahale hore na ke mang eo puso ea hae e leng molemo ka ho fetisisa.

Boemo bo sithabetsang ba lefatše, bo bontša ka ho hlaka hore puso ea motho e hlōlehile ka ho feletseng. Mebuso ea lefatše e hlōlehile ho tlisa khotso, tšireletseho le thabo ebile e sentse lefatše haholo. Sena se lumellana le mantsoe a Bibele a reng: “Ha ho matleng a motho ea tsamaeang hore a tsamaise mehato ea hae.” (Jeremia 10:23) Ke puso ea Molimo feela e ka etsang hore batho ba lule ba e-na le khotso le thabo ba be ba atlehe e le kannete hobane oo ke morero oa Molimo.—Esaia 45:18.

Molimo o tla phethahatsa morero oa hae joang ka batho? Jesu o ile a ruta balateli ba hae hore ba rapele ba re: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Matheu 6:10) Ka nako e loketseng, Molimo o tla felisa lintho tsohle tse bakang mahlomola ka ’Muso oa hae. (Daniele 2:44) Bofutsana, maloetse le lefu li tla fela. Bibele e re Molimo “o tla lopolla ea futsanehileng ea hoeletsang ho kōpa thuso.” (Pesaleme ea 72:12-14) E boetse e re: “Ha ho moahi ea tla re: ‘Kea kula.’” (Esaia 33:24) Ha Jesu a bua ka bafu ba mohopolong oa Molimo o ile a re: “Hora ea tla eo ka eona bohle ba mabitleng a khopotso ba tla utloa lentsoe la hae ’me ba tsoe.” (Johanne 5:28, 29) Ruri litšepiso tsena lia thabisa!

Ka mor’a lilemo tse 17 Sidnei a hlahetsoe ke kotsi, o ile a re: “Ha ho mohla nkileng ka beha Jehova Molimo molato, empa ho bua ’nete ke ne ke se ke sa mo tšepe. Ka linako tse ling ke nyahama haholo ’me kea lla ha ke nahana ka ho holofala ha ka. Leha ho le joalo, Bibele e nthusitse ho utloisisa hore kotsi ena e ne e se kotlo e tsoang ho Molimo. E re: ‘Bohle ba hlaheloa ke nako le ketsahalo e sa lebelloang.’ Ho rapela Jehova hammoho le ho bala mangolo a itseng ho matlafalitse kamano ea ka le Molimo ’me ho entse hore ke thabe.”—Moeklesia 9:11; Pesaleme ea 145:18; 2 Bakorinthe 4:8, 9, 16.

Ha re nahana ka mabaka a entseng hore Molimo a lumelle mahlomola le kamoo a tla a felisa kateng, seo se tla re thusa hore re se ke ra khaotsa ho mo tšepa. Re kholisehile hore Molimo ke “moputsi oa ba mo batlang ka tieo.” Ha ho motho ea behileng tumelo ho eena le ho Mora oa hae ea tla soetseha.—Baheberu 11:6; Baroma 10:11.