‘Buka ea bophelo,’ eo hape e bitsoang “moqolo oa bophelo,” kapa “buka ea khopotso,” e na le mabitso a batho ba lebeletseng ho fumana mpho ea bophelo bo sa feleng. (Tšenolo 3:5; 20:12; Malakia 3:16) Molimo ke eena ea etsang qeto ea hore na ke mabitso a bo-mang a tla ngoloa a itšetlehile ka hore na ke mang ea mo mamelang.​—Johanne 3:16; 1 Johanne 5:3.

 Ho tloha “ho thehoeng ha lefatše” la moloko oa batho, Molimo o ’nile a hopola bahlanka ba hae ba tšepahalang joalokaha eka o ngola mabitso a bona bukeng. (Tšenolo 17:8) Ho bonahala hore motho ea tšepahalang Abele ke eena oa pele eo lebitso la hae le ileng la ngoloa bukeng ea bophelo. (Baheberu 11:4) Leha ho le joalo, mabitso a lethathamong leo hase a batho bao e seng ba bohlokoa, hobane buka ea bophelo e re bontša hore Jehova ke Molimo ea lerato ea ‘tsebang ba hae.’​—2 Timothea 2:19; 1 Johanne 4:8.

Na mabitso a ka hlakoloa “bukeng ea bophelo”?

 E. Ha Molimo a bua ka batho ba Iseraele ea boholo-holo ba sa mameleng o ile a re: “Mang kapa mang ea ntšitetsoeng, ke tla mo hlakola bukeng ea ka.” (Exoda 32:33) Empa ha re tšepahala, re ke ke ra hlakoloa ‘moqolong oa bophelo.’​—Tšenolo 20:12.