Sebe ke ho etsa, ho nahana kapa ho ikutloa ka tsela e khahlanong le thato ea Molimo. Se boetse se akarelletsa ho tlola molao oa Molimo ka ho etsa ntho e fosahetseng kapa ho etsa ntho e sa lokang mahlong a Jehova. (1 Johanne 3:4; 5:​17) Bibele e boetse e hlalosa sebe e le ho hloleha ho etsa ntho e nepahetseng.​—Jakobo 4:17.

 Lipuong tse sebelisitsoeng ha ho ne ho ngoloa Bibele, lentsoe sebe le bolela “ho fosa moo u korisitseng.” Ka mohlala, sehlopha se seng sa masole a mehleng ea Baiseraele se ne se ipabola haholo ka ho tjeketjela majoe hoo ba neng ‘ba sa fose’ letho. Polelo ena e reng ‘ba sa fose,’ ha e fetoleloa lentsoe ka lentsoe e ka bolela “ho se etse sebe.” (Baahloli 20:​16) Kahoo, ho etsa sebe ke ho hloleha ho etsa se nepahetseng ho latela litekanyetso tsa Molimo.

 Kaha Molimo ke ’Mopi oa rona, o na le tokelo ea ho re behela litekanyetso. (Tšenolo 4:​11) Re ikarabella ho eena ka liketso tsa rona.​—Baroma 14:12.

Na hoa khoneha hore re se ke ra etsa sebe ho hang?

 Che. Bibele e re “bohle ba entse sebe ’me ba haelloa ke khanya ea Molimo.” (Baroma 3:​23; 1 Marena 8:​46; Moeklesia 7:​20; 1 Johanne 1:8) Ke hobane’ng ha ho le joalo?

 Batho ba pele e leng Adama le Eva qalong e ne e se baetsalibe hobane ba ne ba bopiloe ba phethahetse ka setšoantšo sa Molimo. (Genese 1:​27) Leha ho le joalo, e ile ea e-ba baetsalibe ka mor’a hore ba se ke ba mamela Molimo. (Genese 3:​5, 6, 17-19) Ha ba e-ba le bana ba ile ba fetisetsa sebe le ho se phethahale baneng ba bona. (Baroma 5:​12) Ke kahoo Morena Davida oa Iseraele a ileng a re: ‘Ke tsoaletsoe phosong.’​—Pesaleme ea 51:5.

Na ho na le libe tse kholo ho tse ling?

 E, li teng. Ka mohlala Bibele e re banna ba Sodoma e ne “e le baetsalibe ba baholo” ’me sebe sa bona se ne se le “boima haholo.” (Genese 13:​13; 18:​20) Bona lintho tse tharo tse re thusang ho bona boima kapa botebo ba sebe.

1.   Botebo. Bibele e re re qobe ho etsa libe tse tebileng tse kang bohlola, borapeli ba litšoantšo, bosholu, botahoa, ho qhekella, ho bolaea le ho sebelisana le meea. (1 Bakorinthe 6:​9-11; Tšenolo 21:8) Bibele e bontša phapang lipakeng tsa libe tsena le libe tse sa etsoeng ka boomo tse kang ho utloisa batho ba bang bohloko ka mantsoe kapa ka liketso. (Liproverbia 12:​18; Baefese 4:​31, 32) Leha ho le joalo, Bibele e re khothalletsa hore re se ke ra nyenyefatsa liphoso tsa rona hobane li ka qetella li entse hore re tlole melao ea Molimo.​—Matheu 5:​27, 28.

2.   Sepheo. Ka linako tse ling batho ba etsa sebe hobane ba sa tsebe ntho e nepahetseng. (Liketso 17:​30; 1 Timothea 1:​13) Le hoja ho sa bolele hore libe tsena li lokile, Bibele e bontša phapang lipakeng tsa tsona le tse etsoang ka boomo ho tlola molao oa Molimo. (Numere 15:​30, 31) Libe tsa ka boomo li tsoa pelong e mpe.​—Jeremia 16:12.

3.   Ho etsa sebe hangata. Bibele e bontša phapang lipakeng tsa sebe se le seng le sebe se etsoang hangata nako e telele. (1 Johanne 3:​4-8) “Haeba re tloaela ho etsa sebe ka boomo,” le ka mor’a ho ithuta se nepahetseng, Molimo o tla re ahlola.​—Baheberu 10:​26, 27.

 Batho ba entseng libe tse tebileng ba ka ikutloa ba imetsoe ka lebaka la botebo ba liphoso tsa bona. Mohlala, Morena Davida o ile a re: “Liphoso tsa ka li fetile holim’a hlooho ea ka, Joaloka mojaro o boima li nkimetse haholo.” (Pesaleme ea 38:4) Leha ho le joalo, Bibele e re fa tšepo ena: “Motho ea khopo a tlohele tsela ea hae, le motho ea kotsi a tlohele menahano ea hae; a ke a khutlele ho Jehova, ea tlang ho mo hauhela, le ho Molimo oa rona, etsoe o tla tšoarela ka tsela e kholo.”​—Esaia 55:7.