Molimo o batla hore u Mo tsebe, u be motsoalle oa hae, ’me u mo rate le ho mo sebeletsa ka pelo ea hao eohle. (Matheu 22:37, 38; Jakobo 4:8) U ka ithuta kamoo u ka etsang thato ea Molimo bophelong ba Jesu le lithutong tseo a neng a li ruta. (Johanne 7:16, 17) Jesu ha aa ka a bua ka thato ea Molimo feela—empa o ne a e phelela, ha e le hantle o ile a re morero oa hae bophelong hase ‘ho etsa thato ea ka, empa ho etsa thato ea ea nthomileng.’—Johanne 6:38.

Na ke lokela ho fumana pontšo e khethehileng, pono, kapa ho ba le neo hore ke tsebe hore na Molimo o batla hore ke etse eng?

 Che, hobane Bibele e na le molaetsa oa Molimo o eang ho batho. E na le seo u se hlokang e le hore u ‘hlomelloe ka ho feletseng bakeng sa mosebetsi o mong le o mong o molemo.’ (2 Timothea 3:16, 17) Molimo o batla hore u sebelise Bibele le ‘matla a hao a ho nahana’ e le hore u ithute seo a se batlang ho uena.—Baroma 12:1, 2; Baefese 5:17.

Na kannete nka khona ho etsa thato ea Molimo?

 E, u ka khona hobane Bibele e re: “Litaelo tsa Molimo ha li thata haholo hore re ka li etsa.” (1 Johanne 5:3, Easy-to-Read Version) Seo hase bolele hore ho lula ho le bonolo ho phetha litaelo tsa Molimo. Empa re tla rua molemo haholo ha re leka ho li mamela. Jesu o ile a re: “Ba thaba hakaakang ba utloang lentsoe la Molimo ’me ba le phetha!”—Luka 11:28, Good News Translation.