Néfilim téh para raksasa nu perkasa jeung telenges, turunan ti malaikat-malaikat jahat nu kawin jeung awéwé-awéwé dina jaman Nuh. a

 Alkitab nyaritakeun yén ’putra-putra surgawi barogoheun ka barudak awewe, kawantu gareulis’. (Kajadian 6:2) Sabenerna ”putra-putra surgawi” éta téh ngamaksudkeun para malaikat nu barontak ka Allah. Maranéhna ”naringgalkeun tempat maranéhna nu sakuduna” di sawarga, barobah wujud jadi manusa, jeung ”tuluy bae nyarokot hiji sewang, sakabogohna-sakabogohna”, dijadikeun pamajikan.—Yudas 6, Terjemahan Dunia Baru [NW]; Kajadian 6:2.

 Perkawinan campuran ieu ngahasilkeun turunan nu teu wajar. (Kajadian 6:4) Néfilim téh raksasa nu sok ngaganggu batur jeung kejem. Maranéhna nyieun bumi pinuh ku katelengesan. (Kajadian 6:13) Alkitab nyebutkeun yén maranéhna téh ”jelema anu kacida garagahna tur kamashur” di jaman baheula. (Kajadian 6:4) Malah sanggeus Néfilim dibinasakeun gé, jalma-jalma masih telenges jeung loba nu kasieunan.—Kajadian 6:5; Bilangan 13:33. b

Kasalahpahaman ngeunaan Néfilim

 Kasalahpahaman: Néfilim téh para malaikat nu barontak.

 Fakta: Kajadian 6:4 nunjukkeun yén Néfilim téh lain malaikat, tapi turunan nu dihasilkeun tina hubungan séksual antara awéwé jeung malaikat nu barobah wujud jadi manusa. Sanggeus para malaikat ”nyarokot [awéwé] hiji sewang, sakabogohna-sakabogohna”, Yéhuwa ngomong yén dina 120 taun, Mantenna bakal ngahukum dunya jahat di jaman éta. (Kajadian 6:1-3) Ayat sanggeusna nyebutkeun yén ”di jaman eta”, para malaikat nu barobah wujud jadi manusa teterusan ngayakeun hubungan jeung awéwé-awéwé manusa, tuluy ngahasilkeun ”jelema anu kacida garagahna tur kamashur”, nyaéta para Néfilim.—Kajadian 6:4.