Loba jalma ngomong yén urang moal bisa nyaho saha nu sabenerna nulis Alkitab. Tapi, dina Alkitab sok disebutkeun saha nu nulisna téh. Misalna, sababaraha bukuna dimimitian ku kekecapan ”laporan Nehemia”, ”kitab . . . anu diwahyukeun ka Yesaya”, jeung ”pangandika PANGERAN ka Yoel”.—Nehemia 1:1; Yesaya 1:1; Yoel 1:1.

 Kalolobaan jalma nu nulis Alkitab nyebutkeun yén nu ditulisna téh Firman ti Yéhuwa, Allah nu sajati. Nu nulis ogé nyebutkeun yén maranéhna dibingbing ku Allah. Leuwih ti 300 kali, para nabi nu nuliskeun Kitab-Kitab Ibrani nyebutkeun yén pesen nu ditulisna téh sabda ti Allah.. (Amos 1:3; Mika 2:3; Nahum 1:12) Nu séjénna narima sabda Allah liwat para malaikat.—Jakaria 1:7, 9, NW.

 Alkitab téh ditulis ku kira-kira 40 lalaki salila leuwih ti 1.600 taun. Sababaraha lalaki dipilih pikeun nulis leuwih ti hiji buku dina Alkitab. Jadi, sabenerna Alkitab téh siga perpustakaan leutik nu ngamuat 66 buku. Alkitab téh eusina 39 Kitab-Kitab Ibrani nu disebut Perjangjian Lawas jeung 27 Kitab-Kitab Yunani nu disebut Perjangjian Anyar.