Budalan 21:1-36
21 ”Ieu hukum nu kudu ditepikeun ka maranéhna:
2 ”Mun manéh meuli urang Ibrani pikeun dijadikeun budak beulian, manéhna bakal jadi budak beulian salila genep taun. Tapi dina taun nu katujuh, manéhna kudu dibébaskeun jeung teu kudu mayar nanaon.
3 Mun pas dibeuli téh manéhna can kawin, nu dibébaskeun ngan manéhna sorangan. Tapi mun pas dibeuli téh manéhna geus boga pamajikan, pamajikanana kudu milu jeung manéhna.
4 Mun manéhna dikawinkeun ku dununganana, tuluy pamajikanana ngalahirkeun anak lalaki atawa awéwé, nu dibébaskeun téh ngan manéhna hungkul. Pamajikanana sarta anak-anakna bakal jadi milik dununganana.
5 Tapi mun éta budak beulian embung indit terus ngomong, ’Abdi nyaah ka dunungan, pamajikan, jeung anak-anak abdi. Abdi embung dibébaskeun,’
6 dununganana kudu nitah manéhna nyarandé kana panto atawa kusén panto. Tuluy ceulina bakal ditindik ku dununganana di hareupeun Allah nu bener. Manéhna bakal jadi budak beulian saumur hirupna.
7 ”Mun aya bapa nu ngajual anak awéwéna pikeun dijadikeun budak beulian, anak awéwé éta moal dibébaskeun cara budak beulian lalaki dibébaskeun.
8 Lamun dununganana teu resepeun ka manéhna sarta moal ngajadikeun manéhna selir, tuluy hayang ngajual manéhna ka batur, dijualna teu meunang ka urang asing lantaran dununganana geus ingkar tina jangjina.
9 Lamun dununganana hayang ngawinkeun éta budak beulian jeung anak lalakina, éta budak beulian kudu dianggap anakna sorangan.
10 Lamun anak dununganana kawin deui, manéhna kudu tetep nyadiakeun dahareun, baju, jeung ngajalankeun kawajibanana* ka pamajikanana nu mimiti.
11 Lamun tilu hal éta teu dicumponan ku salakina, budak beulian éta bisa bébas jeung teu kudu mayar nanaon.
12 ”Saha waé nu neunggeul batur nepi ka maot kudu dipaéhan.
13 Tapi lamun kajadianana teu dihaja sarta teu dihalangan ku Allah nu bener, manéhna meunang kabur ka tempat nu bakal ditangtukeun ku Kuring.
14 Mun aya jalma nu ambek pisan nepi ka ngahaja maéhan batur, manéhna kudu dipaéhan sanajan manéhna kabur ka mézbah Kuring.
15 Jalma nu neunggeul bapana atawa indungna kudu dipaéhan.
16 ”Mun aya jalma nu nyulik batur tuluy nahan atawa ngajual manéhna, jalma éta kudu dipaéhan.
17 ”Mun aya jalma nu nyumpahan bapana atawa indungna, manéhna kudu dipaéhan.
18 ”Mun aya nu paséa tuluy salah saurang neunggeul maké batu atawa nonjok lawanna,* sarta lawanna teu maot tapi kapaksa nambru dina kasur, ieu nu kudu dilakukeun:
19 Lamun lawanna bisa hudang sarta leumpang maké iteuk, nu neunggeulna teu kudu dihukum, tapi kudu nganapkahan lawanna salila manéhna teu bisa digawé nepi ka manéhna cageur.
20 ”Mun aya dunungan nu neunggeul budak beulianana nu lalaki atawa awéwé maké tongkat nepi ka maot, dununganana kudu dihukum.
21 Tapi, mun budak beulian éta kakara maot isukna atawa pagétona, dununganana teu kudu dihukum, sabab manéhna geus kaleungitan budak beulian nu dibeuli maké duitna sorangan.
22 ”Mun aya nu gelut tuluy teu ngahaja nyilakakeun awéwé nu keur ngandung nepi ka ngalahirkeun saacan waktuna, tapi indung jeung orokna salamet, nu neunggeulna kudu mayar ganti rugi sapaménta salakina, tapi jumlahna kudu cocog jeung putusan para hakim.
23 Tapi lamun awéwé éta atawa orokna maot, nyawa kudu dibayar ku nyawa.
24 Lamun aya anu kumaonam, panon bayar panon, huntu bayar huntu, leungeun bayar leungeun, suku bayar suku.
25 Lamun aya nu kaduruk, bohak, atawa geuneuk, jalma nu ngalakukeunana kudu dikitukeun ogé.
26 ”Mun aya dunungan nu neunggeul panon budak beulianana nu lalaki atawa awéwé nepi ka lolong, manéhna kudu ngabébaskeun budak beulianana keur ganti rugi panonna.
27 Atawa lamun neunggeul budak beulianana nu lalaki atawa awéwé nepi ka huntuna coplok, manéhna kudu ngabébaskeun budak beulianana keur ganti rugi huntuna.
28 ”Mun aya sapi nubruk saurang lalaki atawa awéwé nepi ka maot, sapina kudu dibalédogan ku batu nepi ka paéh. Dagingna teu meunang didahar. Anu bogana teu kudu dihukum.
29 Tapi lamun sapina mémang sok tutubruk baé sarta nu bogana geus diingetan, jeung sapina tetep dikencarkeun tuluy nubruk saurang lalaki atawa awéwé nepi ka maot, sapina kudu dibalédogan ku batu nepi ka paéh sarta nu bogana gé kudu dipaéhan.
30 Tapi lamun nu bogana dititah mayar pikeun nebus nyawana, manéhna kudu mayar saharga nu dipénta.
31 Lamun nubrukna ka anak lalaki atawa awéwé, hukumna gé sarua.
32 Lamun nubrukna ka budak beulian lalaki atawa awéwé, nu bogana kudu mayar 30 syékel* ka dunungan budak beulian éta, ari sapina mah kudu dibalédogan ku batu nepi ka paéh.
33 ”Mun aya nu muka panutup lombang atawa aya nu ngagali lombang tapi teu ditutup deui, tuluy aya sapi atawa kaldé nu tigebrus ka dinya,
34 manéhna kudu mayar ganti rugi ka nu boga satona, ari sato nu paéh éta bakal jadi milikna.
35 Mun aya sapi nubruk sapi batur nepi ka paéh, sapi nu hirup kénéh kudu dijual tuluy duitna dibagi dua. Sapi nu paéh gé kudu dibagi dua.
36 Lamun nu bogana nyahoeun sapina téh sok tutubruk baé tapi tetep dikencarkeun, manéhna kudu ngagantian sapi nu paéh ku sapi deui, tuluy sapi nu paéhna bakal jadi milikna.
Catetan Tambihan
^ Maksudna, kawajiban séksual.
^ Atawa bisa jadi ”neunggeul lawanna maké alat”.
^ 1 syékel = 11,4 g. Tingali Lamp. B14.
