Ibrani 4:1-16
4 Jadi, lantaran jangji pikeun asup ka poé reureuh Anjeunna téh aya kénéh, urang kudu waspada* ngarah teu kaleungitan jangji éta.
2 Urang gé geus ngadéngé warta hadé siga maranéhna, tapi maranéhna mah teu taat, jadi teu narima mangpaatna. Éta téh lantaran iman maranéhna teu sarua siga iman jalma-jalma nu taat.
3 Urang nu geus boga iman mah bener-bener asup ka poé reureuh éta. Tapi, ngeunaan maranéhna mah disebutkeun, ”Bakating ku ambek, Kuring sumpah, ’Maranéhna moal asup ka poé reureuhna Kuring,’” sanajan pagawéan Anjeunna geus réngsé ti mimiti ayana dunya.*
4 Di hiji ayat, Anjeunna nyebutkeun ngeunaan poé nu katujuh, ”Dina poé nu katujuh, Allah reureuh tina sagala pagawéana-Na,”
5 jeung sakali deui Anjeunna nyebutkeun, ”Maranéhna moal asup ka poé reureuhna Kuring.”
6 Jalma-jalma nu mimiti ngadéngé warta hadé éta teu bisa asup lantaran teu taat, tapi aya kénéh nu bisa asup.
7 Éta sababna, lila sanggeusna dina jabur Daud, Anjeunna netepkeun deui hiji poé nu disebut ”Poé ieu”, sakumaha nu disebutkeun tadi, nyaéta, ”Poé ieu, lamun maranéh ngadéngé sora Kuring, ulah neuaskeun haté.”
8 Upama Yosua geus mawa maranéhna ka tempat reureuh éta, Allah moal nyebutkeun deui poé séjén sanggeusna.
9 Jadi, keur umat Allah mah masih kénéh aya poé reureuh siga poé sabat.
10 Jalma nu asup ka poé reureuhna Allah, reureuh tina pagawéanana, sakumaha Allah gé reureuh.
11 Ku kituna, hayu urang ngupayakeun satékah polah sangkan asup ka poé reureuh éta, supaya ulah aya nu nuturkeun conto maranéhna nu teu taat.
12 Firman Allah téh nya hirup, nya gedé kawasana, jeung leuwih seukeut tibatan pedang nu seukeut dua sisina, sanggup nusuk nepi ka misahkeun jiwa* jeung roh,* bisa misahkeun sendi jeung sumsum, sarta bisa nyingkabkeun eusi pikiran jeung niat haté.
13 Teu aya ciptaan nu bisa nyumput ti Anjeunna, tapi sagala hal téh kabuka jeung katingali jelas ku Anjeunna. Nya ka Anjeunna, urang kudu tanggung jawab.
14 Ku kituna, lantaran urang boga imam agung nu geus asup ka sorga, nyaéta Isa Putra Allah, hayu urang terus nyarita di hareupeun umum ngeunaan iman urang ka manéhna.
15 Imam agung urang téh lain imam agung nu teu bisa paham* kana kalemahan urang. Sabalikna, manéhna téh geus diuji dina sagala hal siga urang, tapi teu boga dosa.
16 Jadi, hayu urang ngadeukeutan tahta Allah, nu méré welas asih nu taya bandingna,* sarta laluasa ngadoa, supaya Anjeunna némbongkeun welas asih jeung kahadéan* waktu urang butuh bantuan.
Catetan Tambihan
^ As. ”sieun”.
^ Maksudna, ti saprak turunan Adam jeung Hawa dilahirkeun.
^ Tingali Daptar Istilah.
^ Tingali Daptar Istilah.
^ Atawa ”rasrasan”.
^ Tingali Daptar Istilah.
^ Atawa ”welas asih nu taya bandingna”. Tingali Daptar Istilah.
