Dina awal taun 1930-an, can pernah aya Saksi-Saksi Yéhuwa nu ngawawar ka Indonesia, Malaysia, jeung Papua. Kumaha warta hadé bisa nepi ka nagri-nagri éta? Ngarah bisa nepi ka ditu, kantor cabang Australia (ayeuna kantor cabang Australasia) meuli kapal mesin nu panjangna 16 méter. Kapal nu boga dua tihang layar éta dingaranan Lightbearer (Nu Mawa Caang), lantaran awak kapalna nu kabéhanana panaratas a bakal maké éta kapal pikeun mencarkeun caang bebeneran ka nagri-nagri jauh.—Mateus 5:14-16.

 Dina bulan Pébruari 1935, katujuh awak kapal éta balayar ti Sydney, di basisir wétan Australia, ka kalér, nyaéta ka Port Moresby, Papua. Sajajalan maranéhna ngala lauk jang dahareun. Maranéhna gé eureun di sababaraha palabuhan pikeun ngeusi minyak, meuli dahareun, jeung ngoméan bagian kapal nu ruksak. Dina tanggal 10 April 1935, maranéhna indit balayar ti Cooktown, Queensland. Harita, mesin kapalna kudu dihirupan lantaran maranéhna ngaliwatan jalur Karang Penghalang Besar nu bahaya. Ari pék téh mesinna ngaluarkeun sora nu teu biasa, jadi kudu dipareuman. Naha maranéhna rék balik atawa terus balayar ka Papua? Eric Ewins nu jadi kaptén kapal ngomong, ”Euweuh nu hayang balik.” Jadi, Lightbearer terus balayar. Maranéhna salamet nepi ka Port Moresby dina tanggal 28 April 1935.

 Sabari mesin kapalna dioméan ku tukang mesin, maranéhna ngawawar di Port Moresby, kajaba Frank Dewar. Frank, nu katelah panaratas nu sumanget ngomong, ”Abdi mawa loba buku tuluy leumpang kira-kira 32 kilométer ti basisir pikeun nginjil ka daérah pamukiman.” Balikna, Frank milih jalur nu béda jeung kudu meuntasan walungan nu loba buhayana. Tapi, manéhna ati-ati jadi bisa salamet nepi ka kota. Upaya maranéhna teu cumah, sababaraha jalma nu narima publikasi Alkitab ka dieunakeun jadi Saksi Yéhuwa.

 Sanggeus mesinna bérés dioméan, Lightbearer balayar ti Port Moresby ka Pulo Jawa di Hindia Timur Belanda (ayeuna kalolobaan daérahna asup wilayah Indonesia). Sanggeus sababaraha kali nyimpang pikeun meuli kaperluan, tanggal 15 Juli 1935 kapal éta eureun di Batavia (ayeuna Jakarta).

 Pas nepi, Charles Harris teu milu Lightbearer deui, tapi tuluy matuh di Jawa. Di dinya manéhna terus sumanget ngawawarkeun warta hadé. b Manéhna nyarita, ”Harita, kagiatan utama urang téh nempatkeun publikasi Alkitab tuluy pindah ka kota séjén. Abdi mawa publikasi dina basa Arab, Indonesia, Inggris, Mandarin, jeung Walanda. Loba nu resep kana publikasi urang, jadi dina sataun abdi nempatkeun nepi ka 17.000 publikasi.”

 Kagiatan Charles di Jawa Timur diperhatikeun ku para pajabat Walanda. Salah sahiji pajabat nanyakeun aya sabaraha Saksi nu ngawawar di Jawa Timur ka saurang Saksi séjén nu ngawawar di Jawa. Sadérék éta ngajawab, ”Ngan saurang.” Tuluy pajabat éta ngomong bari ambek, ”Mémangna aing bisa dibobodo? Sakitu lobana bacaan nu disebarkeun, pasti aya loba nu ngagawékeunana.”

 Ti Indonesia, Lightbearer balayar ka Singapura, tuluy nepi ka dinya tanggal 7 Agustus. Unggal eureun, sadérék-sadérék ieu nyetélkeun rekaman hutbah maké sepéker nu sorana tarik. Cara ngawawar siga kieu narik perhatian loba jalma. Malah, koran Singapore Free Press ngawartakeun yén ”jalma-jalma ngadéngékeun sora tarik ti laut . . . poé Rebo peuting”. Koran éta gé nyebutkeun, ”Hutbahna unik . . . disetél . . . tina kapal ’Lightbearer’, nu nyetél hutbah-hutbah ti Lembaga Menara Pengawal ti saprak maranéhna nepi ka Singapura ti Australia.” Koran éta gé ngalaporkeun ”mun cuacana keur alus, acara-acara éta bisa jelas kadéngé nepi ka . . . tilu atawa opat kilométer”.

 Basa kapal Lightbearer aya di Singapura, Frank Dewar indit pikeun tugas anyar. Manéhna nyaritakeun kajadianana, ”Urang mulai ngawawar di Singapura bari matuh di kapal. Basa Lightbearer rék balayar deui, teu disangka-sangka Eric Ewins ngomong kieu, ’Frank, cenah manéh rék ngawawar ka Siam (ayeuna Thailand). Urang ngan bisa nganteur nepi ka dieu. Sok wé indit sorangan ka ditu!’ Abdi reuwas, bari aga eugeu ngajawab, ’Tapi abdi teu nyaho jalan ka dituna!’” Eric méré nyaho yén Frank bisa ka ditu maké karéta api ti Kuala Lumpur. Frank ngagugu jeung nepi ka Thailand sababaraha bulan ti harita. c

 Basa Lightbearer balayar ka basisir kulon Malaysia, kapal éta eureun di Johor Bahru, Muar, Malacca, Klang, Port Swettenham (ayeuna Port Klang), jeung Penang. Di unggal palabuhan, maranéhna nyetél hutbah-hutbah Alkitab tina kapal maké sepéker. ”Saupama aya piring terbang gé, jalma-jalma leuwih panasaran kana kapal éta,” ceuk Jean Deschamp, saurang Saksi nu harita ngawula di Indonesia. Sanggeus nyetél hutbah-hutbah éta, maranéhna nyisi tuluy nempatkeun publikasi ka nu minat.

 Ti Penang, maranéhna balayar meuntasan Selat Melaka ka Medan, Sumatra (ayeuna bagian ti Indonesia). Eric Ewins nyebutkeun, ”Urang resep jeung betah di daérah Medan. Loba nu daék ngadéngékeun warta hadé.” Di dinya, sadérék-sadérék nempatkeun kira-kira 3.000 publikasi.

 Sabari balayar ka kidul, maranéhna ngawawar ka palabuhan-palabuhan utama di sisi wétan Sumatra. Dina Nopémber 1936, kapal balik deui ka Singapura. Eric Ewins teu milu deui lantaran sababaraha minggu ti harita, manéhna kawin jeung Irene Struys, saurang Saksi nu cicing di Singapura. Maranéhna duaan terus naratas di Sumatra. Ku kituna, Lightbearer butuh kaptén nu anyar.

 Kaptén nu anyar téh Norman Senior. Manéhna geus dilatih jadi palaut jeung balayar ti Sydney nepi ka Singapura dina bulan Januari 1937. Tuluy kapal éta balayar ti Singapura ka Borneo jeung Celebes (ayeuna Kalimantan jeung Sulawesi). Di ditu, maranéhna ngawawar ka mamana, nepi ka sajauh 480 kilométer ti basisir.

 Waktu Lightbearer nepi ka palabuhan Samarinda di Borneo, kapala palabuhan ngalarang maranéhna ngawawar di dinya. Tapi, waktu Norman ngajelaskeun ngeunaan pangwawaran urang, manéhna jadi leuleuy malah nyokot sababaraha publikasi.

 Hiji waktu, aya pendéta nu ngondang Norman pikeun hutbah di garéjana. Lainna hutbah, Norman kalah ka nyetél lima rekaman hutbah tina fonograf. Pendéta éta resepeun, malah nyokot sababaraha publikasi pikeun dibikeun ka babaturanana. Tapi ngan manéhna sorangan nu siga kitu. Kalolobaan pendéta mah teu resepeun kana kagiatan Saksi-Saksi Yéhuwa. Maranéhna ambek kana kasaksian ti sadérék-sadérék urang nu wanian, malah ngadesek para pajabat pikeun ngalarang kapal Lightbearer asup ka palabuhan séjén.

 Lantaran larangan éta, kapal Lightbearer balik ka Australia dina bulan Désémber 1937. Awak kapalna nurunkeun jangkar di Palabuhan Sydney teu lila saacan diayakeunana kongrés Saksi-Saksi Yéhuwa dina bulan April 1938. Kapal Lightbearer balik sanggeus leuwih ti tilu taun ninggalkeun Sydney. Kapal éta dijual dina awal 1940-an, teu lila sanggeus kagiatan Saksi di Australia dilarang. ”Kapal ieu geus loba jasana,” ceuk Sadérék Ewins, nu nyebutkeun yén dinesna dina kapal Lightbearer téh ”mangsa nu pangéndahna salila hirup abdi”.

 Awak kapal Lightbearer geus nebarkeun binih Karajaan di daérah nu lega jeung loba pendudukna. Sanajan aya tentangan, kagiatan éta tungtungna mawa loba hasil. (Lukas 8:11, 15) Ayeuna, di nagri-nagri nu diwawaran ku para panaratas ieu aya leuwih ti 40.000 pawarta Karajaan. Éta bener-bener warisan nu luar biasa ti sababaraha priya nu wanian jeung tina kapal Lightbearer!