Ceuk Nabi Musa, mun urang nurut kana paréntah Gusti, urang bakal diberkahan. (Pamindo 10:13; 11:27) Urang nurut téh lain pedah sieun dihukum ku Gusti, tapi lantaran ngahargaan sipat-sipat hadé Gusti. Urang jadi nyaah jeung hayang nurut ka Gusti. Urang gé embung nguciwakeun Gusti. ”Tandana nyaah ka Allah teh nurut kana parentah Mantenna.”​—1 Yohanes 5:3.

Urang bakal meunang berkah naon mun nurut ka Gusti? Perhatikeun dua hal ieu.

”Kami teh PANGERAN Allah maraneh, anu ngawurukan ka maraneh keur kapentingan maraneh keneh, nungtun kana jalan anu samistina.”​—YESAYA 48:17.

Yéhuwa, Gusti nu nyiptakeun urang, kenal pisan ka urang. Gusti gé nyadiakeun bingbingan supaya urang bisa nyieun putusan nu bijaksana. Jadi, urang kudu diajar tina Kitab Suci ngeunaan naon nu dipiharep ku Gusti ti urang, tuluy ngajalankeunana.

”Leuwih bagja deui jelema anu ngadenge jeung nurut kana timbalan Allah!”​—LUKAS 11:28.

Kiwari, jutaan jalma bagja pisan lantaran nuturkeun naséhat ti Gusti nu aya dina Kitab Suci. Misalna, perhatikeun conto saurang lalaki ti Spanyol. Manéhna téh gedé ambek jeung kasar ka batur, kaasup ka pamajikanana. Hiji poé, manéhna maca tulisan Nabi Musa ngeunaan Yusup, putrana Yakub. Yusup dijual sabagé budak beulian, terus dipanjara padahal teu salah nanaon. Sanajan kitu, manéhna tetep lemah lembut, sabar, jeung hampuraan. (Kajadian pasal 37-45) Ceuk lalaki tadi, ”Basa mikirkeun conto Yusup, abdi jadi hayang leuwih bageur ka batur, lemah lembut, jeung bisa nahan diri. Ayeuna, abdi jadi leuwih bagja.”

Kitab Suci méré nyaho kumaha sakuduna sikep urang ka batur. Bagian saterusna bakal ngabahas hal ieu leuwih jéntré.