WAKTU urang Ibrani aya di Nagri Perjangjian, taun nu anyar téh dimimitian waktu ngawuluku jeung nebar binih. Mun ayeuna mah éta téh kira-kira bulan Séptémber atawa Oktober.

Jalma-jalma nangtukeun sabulan téh aya sabaraha poé ku cara nuturkeun siklus bulan. Biasana, dina sabulan téh aya 29 atawa 30 poé. Terus, maranéhna nangtukeun sataun téh sabaraha lila ku cara nuturkeun panonpoé. Tapi, sataun nuturkeun siklus bulan téh bakal leuwih sakeudeung ti batan sataun nuturkeun panonpoé. Jadi, maranéhna kudu néangan cara supaya sataun nuturkeun siklus bulan sarua lilana jeung sataun nuturkeun panonpoé. Kumaha carana? Dina sataun, maranéhna kudu nambahan sababaraha poé atawa sakapeung bisa nambahan nepi ka sabulan. Bisa jadi, éta téh dilakukeun dina ahir taun. Ku kituna, kalénder maranéhna bakal cocog jeung waktu melak sarta panén.

Dina jaman Musa, Allah méré nyaho bangsa Israél yén kalénder pikeun parayaan kaagamaan téh dimimitian ti bulan Abib atawa Nisan. Dina jaman ayeuna mah, éta téh kira-kira dina bulan Maret atawa April. (Bud. 12:2; 13:4) Dina bulan éta aya parayaan panén barli.​—Bud. 23:15, 16.

Ceuk buku The History of the Jewish People in the Age of Jesus Christ, (175 B.C.–A.D. 135) karya Emil Schürer, ”Pikeun nangtukeun bakal aya bulan ka-13 atawa henteu téh gampang. Jamuan Paskah kudu diayakeun pas bulan purnama dina bulan Nisan (14 Nisan). Parayaan ieu kudu dirayakeun sanggeus ekuinoks musim semi (lilana beurang jeung lilana peuting sarua) . . . Jadi, mun urang Israél ningali Jamuan Paskah taun hareup bakal datang saacan ekuinoks musim semi, maranéhna bakal nambahkeun bulan ka-13 saacan bulan Nisan.”

Saksi-Saksi Yéhuwa ngagunakeun cara ngitung ieu pikeun nangtukeun iraha Jamuan Wengi Jungjunan bakal diayakeun. Ari dina kalénder Ibrani mah éta téh diayakeun dina musim semi tanggal 14 Nisan. Jauh saacan acara ieu diayakeun, sidang-sidang di sakuliah dunya bakal dibéré nyaho heula iraha tanggalna. *

Tapi kumaha carana urang Ibrani nangtukeun waktuna pikeun ganti bulan? Ari ayeuna mah urang tinggal ningali kalénder atawa HP. Tapi, dina jaman Alkitab mah can aya nu kararitu.

Basa Caah Gedé, sabulan téh lilana 30 poé. (Kaj. 7:11, 24; 8:3, 4) Tapi ka dieunakeun, dina kalénder Ibrani, sabulan can tangtu 30 poé. Ku naon? Sabab, bulan nu anyar téh dimimitian waktu bulan sabit geus katingali. Ku kituna, sabulan téh lilana bisa 29 atawa 30 poé.

Hiji waktu, Daud ngomong kieu ka Yonatan, ”Enjing teh pesta bulan anyar.” (1 Sam. 20:5, 18) Jadi ti abad ka-11 SM gé, katingalina urang Israél geus bisa nyaho iraha bulan anyar dimimitian. Ti mana maranéhna nyaho? Misnah, nyaéta kumpulan hukum jeung tradisi urang Yahudi, méré nyaho jawabanana. Di ditu disebutkeun, sanggeus urang Yahudi balik ti Babilon, Sanhédrin (mahkamah agung urang Yahudi) boga tugas pikeun nangtukeun hal éta. Salila tujuh bulan waktu parayaan-parayaan dirayakeun, Sanhédrin bakal ngumpul subuh-subuh dina poé nu ka-30 dina unggal bulan éta. Maranéhna nangtukeun iraha bulan anyar bakal dimimitian. Naon anu jadi dasarna?

Peuting saacanna, aya jalma-jalma anu ditugaskeun ka gunung-gunung di sakuriling Yérusalém. Maranéhna kudu ningalian langit. Lamun di langit aya bulan, maranéhna bakal langsung méré laporan ka Sanhédrin. Sanggeus narima laporan jeung ngarasa yakin, para anggota Sanhédrin bakal ngumumkeun yén poé éta téh geus asup ka bulan nu anyar. Tapi kumaha lamun bulanna teu katingali lantaran katutupan ku awan atawa kabut? Mun kitu, Sanhédrin bakal nangtukeun bulan éta téh lilana 30 poé.

Misnah ngajelaskeun, aya nu ditugaskeun ku Sanhédrin pikeun nguarkeun putusanana ku cara ngahurungkeun seuneu di puncak gunung Zaitun deukeut Yérusalém. Terus, aya ogé nu ditugaskeun  pikeun ngahurungkeun seuneu di tempat-tempat séjénna anu luhur di Israél. Ka dieunakeun, sababaraha jalma ditugaskeun pikeun nguarkeun putusanana ka urang Yahudi. Ku kituna, urang Yahudi nu aya di Yérusalém, Israél, jeung tempat-tempat séjénna bisa nyaho bulan nu anyar téh geus dimimitian. Jadi, maranéhna bisa ngarayakeun parayaan-parayaan dina waktu anu sarua.

Sadérék bisa ningali bagan di handap ieu. Ieu téh bulan-bulan, parayaan-parayaan, jeung usum-usum dina kalénder Ibrani.