Oktoba 24, 2021, Ndugu Douglas Little, ambaye ni mshiriki wa Halmashauri ya Tawi ya Bolivia alitoa Biblia Takatifu—Tafsiri ya Ulimwengu Mpya katika Kikwechua (cha Bolivia). Biblia hiyo ilitolewa katika mfumo wa kielektroni katika programu iliyorekodiwa mapema na kuwekwa kwenye Intaneti na ilitazamwa na watu zaidi ya 4,000 nchini Bolivia. Tunatarajia kwamba nakala zilizochapishwa za Biblia hiyo zitapatikana Aprili 2022.

Kikwechua (cha Bolivia) kina maneno mengi yanayotumiwa katika njia tofauti katika maeneo mbalimbali na hivyo maana ya maneno hayo inabadilika ikitegemea eneo hususa. Ili kukabiliana na changamoto hiyo, Tafsiri ya Ulimwengu Mpya ina maelezo mengi ya chini yanayoeleza maana ya maneno kama hayo.

Biblia za Kikwechua (cha Bolivia) zimekuwepo tangu 1880. Hata hivyo, mara nyingi tafsiri hizi zinataja jina la Mungu, Yehova, katika maelezo ya chini tu au wanatumia jina la cheo “Baba Mungu.” Mtafsiri mmoja alisema hivi: “Ninafurahi sana kwamba sasa tuna Biblia yenye jina la Mungu.”

Kazi ya kutafsiri Biblia hiyo ilipokuwa ikifanyika, watafsiri wengi walikabiliana na changamoto nyingi tofauti, kama vile kuwatunza watu wa familia waliokuwa wakiugua. Kwa kuongezea, janga la COVID-19 lilisababisha changamoto ambazo zilifanya mradi huo uwe mgumu zaidi. Mtafsiri mmoja alisema: “Ni kwa msaada wa Yehova tu kwamba kazi hiyo iliisha na kutolewa hata kabla ya muda uliokuwa umewekwa.”

Tunatarajia kwamba Biblia Takatifu—Tafsiri ya Ulimwengu Mpya katika Kikwechua (cha Bolivia) itawasaidia watu wengi wanaozungumza lugha hiyo “waokolewe na kupata ujuzi sahihi wa kweli.”—1 Timotheo 2:4.