Mei 28,2023, Biblia—Kitabu cha Mathayo kilitolewa katika Kiasame kwenye programu ya pekee iliyofanywa Duliajan, Assam, India. Programu hiyo ilihudhuriwa na watu 279, kutia ndani watu 96 waliotazama programu hiyo kupitia video iliyounganishwa mtandaoni. Punde tu baada ya kitabu hicho cha Biblia kutolewa, watu waliohudhuria uso kwa uso walipata nakala zilizochapishwa na nakala za kielektroni zilipatikana mtandaoni kwa ajili ya kupakuliwa.

Kiasame ambacho pia kinaitwa Kiaxomiya, ndiyo lugha rasmi ya jimbo la Assam, lililo kaskazini mashariki mwa India. Watu wa jimbo la Assam wanaitwa Waaxomiya. Wanajulikana kwa sababu ya chai yao na pia kwa ukarimu wao.

Kutaniko la kwanza la Kiasame lilianzishwa mwaka wa 1987. Tangu mwaka huo na kuendelea, idadi ya wahubiri imekuwa ikiongezeka. Sasa hivi, kuna makutaniko manane ya Kiasame yenye jumla ya wahubiri 162.

Kuna tafsiri mbili maarufu za Biblia ya Kiasame. Hata hivyo, wahubiri wamejionea kwamba si rahisi kusoma na kuelewa tafsiri hizo kwa sababu zinatumia lugha ya zamani na isiyojulikana. Tafsiri ya kitabu cha Mathayo ambayo imetolewa hivi karibuni inaeleweka kwa urahisi.

Tuna uhakika kwamba ndugu na dada zetu, pamoja na wengine ambao wanalipenda Neno la Mungu, watamkaribia Yehova na kushangilia wanaposoma kitabu cha Mathayo katika Kiasame.​—Nehemia 8:12.