Oktoba 23, 2020, a Mahakama ya Wilaya ya Oktyabrsky huko Kirov inakusudia kutangaza uamuzi wake katika kesi kumhusu Ndugu Anatoliy Tokarev. Anaweza kufungwa kwa miaka mitatu na nusu gerezani.

Anatoliy Tokarev

• Alizaliwa: 1958 (Baranovskaya, Eneo la Kirov)

• Maisha Yake: Alilelewa na mama yake. Alifanya kazi ya kubuni programu za kidijitali kabla ya kustaafu. Anapenda kupiga picha na anafurahia kucheza chesi na kupiga kodiani. Mwaka wa 1979 alifunga ndoa na Margarita. Wana watoto wawili

• Baada ya kusomea sayansi alianza kuamini kwamba hakuna Mungu. Alipokuwa na umri wa miaka 27, alianza kujifunza Biblia na Mashahidi wa Yehova na akatambua kwamba imani za Kikristo hazipingani na sayansi

Mei 24, 2019, maofisa wa Kituo cha Urusi cha Kupambana na Msimamo Mkali walivamia nyumba ya akina Tokarev. Maofisa hao walimhoji hasa Ndugu Tokarev. Walimtisha kwamba wataifungulia familia ya Ndugu Tokarev mashtaka ikiwa hatakubali kwamba ameshiriki katika utendaji wenye “msimamo mkali.” Ndugu Tokarev alipelekwa kwenye ofisi za kituo hicho ili akahojiwe.

Miezi mitano hivi baadaye, Ndugu Tokarev alifunguliwa mashtaka ya uhalifu kwa msingi wa vifungu viwili vya Sheria ya Uhalifu ya Shirikisho la Urusi. Ameshtakiwa kwa kutegemeza kifedha shirika lenye “msimamo mkali.” Mwendesha-mashtaka pia anatumia rekodi zilizorekodiwa kisiri nyumbani kwa akina Tokarev kudai kwamba Anatoliy alipanga mikutano ambapo machapisho yaliyopigwa marufuku kuwa yenye “msimamo mkali” yalizungumziwa.

Tunasali kwa ajili ya Ndugu Tokarev na familia yake. Tuna uhakika kwamba Yehova ataendelea ‘kutenda kwa ushikamanifu’ kuwaelekea.—Zaburi 18:25.