Mamilioni ya watu wametumia kanuni zilizotajwa katika makala zilizotangulia, na zimewasaidia kwa kiwango kikubwa kuondoa ubaguzi moyoni mwao. Hata hivyo, hatuwezi kuondoa hisia zote za ubaguzi kwa jitihada zetu wenyewe. Je, hilo linamaanisha hatuwezi kuushinda ubaguzi?

Serikali za wanadamu zimeshindwa kuondoa ubaguzi. Lakini je, hilo linamaanisha kwamba hakuna serikali iliyo na uwezo wa kuondoa ubaguzi?

Ili serikali ifaulu kuondoa ubaguzi, inapaswa:

1. 1. Kuwachochea raia wabadili jinsi wanavyohisi na kuwaona wengine

2. 2. Kuwasaidia watu waliobaguliwa na hivyo wanashindwa kuwatendea wengine kwa haki

3. 3. Kuwa na viongozi wazuri ambao hawana ubaguzi

4. 4. Kuwaunganisha watu wa mataifa yote

Biblia inatuhakikishia kwamba Mungu ameazisha serikali inayokidhi matakwa hayo. Serikali hiyo ni “Ufalme wa Mungu.”​—Luka 4:43.

Serikali hiyo itatimiza mambo gani?

“Wakaaji wa nchi [watajifunza] kuhusu uadilifu.”​—ISAYA 26:9.

“Matokeo ya uadilifu wa kweli yatakuwa amani, na mazao ya uadilifu wa kweli yatakuwa utulivu wa kudumu na usalama wa kudumu.”​—ISAYA 32:17

Maandiko hayo yanamaanisha nini? Ufalme wa Mungu utawafundisha wanadamu mambo yanayofaa. Watu wanapojifunza kutofautisha mambo yanayofaa na yasiyofaa, haki na ukosefu wa haki, mtazamo wao kuelekea watu wengine hubadilika. Kila mtu atatambua kwamba jambo bora ni kuwapenda watu wote.

Mungu “atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena. Mambo ya zamani yamepitilia mbali.”​—UFUNUO 21:4.

Andiko hilo linamaanisha nini? Ufalme wa Mungu utaondoa maumivu yote yaliyosababishwa na ukosefu wa haki. Wale waliotendewa isivyo haki hawatakuwa na sababu ya kuendelea kuwa na kinyongo.

“Hatahukumu kwa mambo anayoona kwa macho yake, wala kukaripia kulingana tu na mambo anayosikia kwa masikio yake. Atawahukumu kwa haki watu wa hali ya chini, na kwa unyoofu atakaripia kwa ajili ya wapole wa dunia.”​—ISAYA 11:3, 4.

Andiko hilo linamaanisha nini? Yesu Kristo, Mfalme wa Ufalme wa Mungu atatawala dunia yote kwa haki na bila ubaguzi. Yesu haoni taifa moja kuwa bora kuliko lingine, na anaweza kufanya watu wote watii sheria zake za uadilifu.

Ufalme wa Mungu huwafundisha watu kuwa na ‘akili ileile na kuwa na upendo uleule, wakiwa wameunganishwa kabisa, wakiwa na wazo moja akilini.’​—WAFILIPI 2:2.

Andiko hilo linamaanisha nini? Raia wa Ufalme wa Mungu hawatajifanya kwamba wana umoja. Watakuwa “wameunganishwa kabisa” kwa sababu watapendana kikweli.