Vijana Huuliza

Marafiki Wangu wa Kweli ni Nani?

“Cori amenifunza mambo mengi ambayo sikujua. Tunapokuwa pamoja, mimi huanzisha urafiki na watu wengine wapya, ninajifunza kufanya mambo mapya, nami hufurahia chochote tunachofanya pamoja. Kwa kweli, urafiki wangu na Cori umebadilisha kabisa maisha yangu!”—Tara. *

Je, unahisi kwamba haiwezekani kuwa na urafiki wa aina hiyo? Ikiwa ndivyo, usivunjike moyo. Umezungukwa na watu wanaoweza kuwa rafiki zako. Habari hii itakusaidia kuwatambua.

‘NIMEZUNGUKWA na marafiki wengi lakini hakuna yeyote aliye rafiki wa kweli.’ Hivyo ndivyo Shayna, mwenye umri wa miaka 21 anavyosema. Anaona kwamba amezungukwa na watu wengi, lakini anahisi kwamba hana uhusiano wa karibu na yeyote kati yao. Hisia kama hizo zinaweza kuwapata hasa wale wanaotumia vituo vya mawasiliano. Serena, mwenye umri wa miaka 22 anasema, “Unaweza kuwa na ‘orodha ndefu ya marafiki’ na hivyo uonekane kuwa maarufu, lakini ukweli wa mambo ni kwamba huenda orodha hiyo ikawa imejaa watu ambao huna uhusiano wa karibu nao.” *

Ungependelea kuwa na nini—majina mengi katika orodha yako ya marafiki au marafiki wachache tu lakini wa kweli? Ingawa kuna faida ya kuwa na watu wengi kwenye orodha yako ya marafiki, rafiki wa kweli anaweza kukusaidia unapokabiliana na matatizo na hata anaweza kukutia moyo uwe mtu bora zaidi. (1 Wakorintho 16:17,18) Tumia madokezo yafuatayo ili uamue ni nani kati ya watu unaowafahamu ambaye ameonyesha anaweza kuwa rafiki wa kweli.

RAFIKI WA KWELI ANATEGEMEKA

“Rafiki yangu alikuwa akiniambia siri zake, na hivyo nikafikiri kwamba ninaweza kumtumaini kwamba atatunza siri zangu pia. Kwa hiyo, siku moja nikamwambia kwamba ninavutiwa na kijana fulani. Kumbe nilikuwa nimefanya kosa kubwa sana! Mara moja alieneza habari hiyo!”—Beverly.

“Ninaweza kumwambia rafiki yangu Allan kila kitu, na ninajua hatawaambia wengine.”—Calvin.

Kati ya vijana hao waliotajwa ni nani aliye na rafiki wa kweli? Ni nani kati ya rafiki zako unayejihisi huru kumwambia siri zako? * Biblia inasema kwamba “rafiki wa kweli anapenda nyakati zote.”—Methali 17:17.

 Andika hapa chini majina ya rafiki wawili ambao unaweza kuwatumaini.

1 ․․․․․

2 ․․․․․

RAFIKI WA KWELI HUJIDHABIHU

“Pindi fulani katika urafiki wowote, mtu mmoja huwa mwenye nguvu zaidi kuliko yule mwingine. Rafiki wa kweli hutambua unapokuwa dhaifu na mara moja anakusaidia. Kwa kweli, rafiki huyo anatumaini kwamba utafanya vivyo hivyo pia anapohitaji msaada.”—Kellie.

“Mama yangu alipokufa, nilikuwa na rafiki mpya. Bado hatukuwa na uhusiano wa karibu sana, lakini tulikuwa tumepanga kuhudhuria arusi fulani pamoja. Lakini ikawa kwamba siku ambayo hotuba ya mazishi ya mama yangu ilikuwa itolewe ndiyo iliyokuwa siku ya arusi hiyo. Nilishangaa sana kumwona rafiki yangu kwenye hotuba ya mazishi badala ya kwenda kwenye arusi. Hapo ndipo nilipojua kwamba alikuwa rafiki wa kweli!”—Lena.

Ni nani kati ya rafiki zako ambaye huonyesha roho ya kujidhabihu? Rafiki wa kweli ‘ataendelea kutafuta, si faida yake mwenyewe, bali ile ya yule mtu mwingine.’—1 Wakorintho 10:24.

Andika hapa chini majina ya rafiki wawili ambao wamejidhabihu kwa ajili yako.

1 ․․․․․

2 ․․․․․

RAFIKI WA KWELI HUBORESHA UTU WAKO

“Watu fulani hutazamia niwe mshikamanifu kwao na nikubali maoni yao hata kama kufanya hivyo kutamaanisha kutenda kinyume na viwango vyangu na hata kuipuuza dhamiri yangu. Hao si rafiki wa kweli.”—Nadeine.

“Dada yangu ndiye rafiki yangu wa karibu zaidi. Yeye hunisukuma nifanye mambo ambayo ninaona kuwa magumu, naye hunisaidia niwe mwenye urafiki zaidi. Yeye huniambia ukweli wa mambo hata kama haunifurahishi.”—Amy.

“Nilipokuwa nikipitia hali fulani ngumu, rafiki zangu wa karibu zaidi hawakuniendekeza; walinipa mashauri yanayofaa. Lakini watu wengine walingoja nitatue matatizo yangu mwenyewe au hata walijaribu kunikengeusha fikira ili nipuuze tatizo hilo. Hawakuniambia nina tatizo.”—Miki.

“Rafiki yangu anatambua uwezo wangu vizuri zaidi kuliko mtu mwingine yeyote, naye hunitia moyo niweze kufikia miradi yangu. Inapohitajika, yeye hunipa mashauri ya moja kwa moja—nami hufurahi sana anapofanya hivyo!”—Elaine.

Je, rafiki zako hukusaidia kufikia miradi yako, au unalazimika kushusha viwango vyako ili ukubalike kwao? Methali 13:20 inasema hivi: “Anayetembea na watu wenye hekima atakuwa na hekima, lakini anayeshirikiana na wajinga atapatwa na mabaya.”

Andika hapa chini majina ya rafiki wawili ambao wamekusaidia uboreshe utu wako.

1 ․․․․․

2 ․․․․․

Tazama majina uliyoandika katika sehemu tatu zilizozungumziwa. Ikiwa jina la mtu mmoja linapatikana katika sehemu zote tatu, basi huyo  ni rafiki wa kweli! Kwa upande mwingine, ikiwa hungeweza kufikiria jina la mtu yeyote aliye na sifa zilizotajwa hapo juu, usivunjike moyo. Huenda ukawa umezungukwa na watu ambao wanaweza kuwa marafiki wa kweli. Huenda ukahitaji muda zaidi wa kuwatambua. * Kwa sasa, jitahidi sana kuwa rafiki mzuri. “Mimi hujaribu sana kuwasaidia rafiki zangu,” anasema Elena, mwenye umri wa miaka 20. “Wanapohitaji msaada, mimi huwa tayari kuwasaidia. Wanapohitaji kuzungumza, ninawasikiliza. Wanapohitaji kulia, mimi huwafariji.”

Ni kweli kwamba huenda unawajua watu wengi, na hilo ni afadhali kuliko kujifungia katika kikundi cha marafiki wachache. (2 Wakorintho 6:13) Lakini, je, hungependa kuwa na marafiki wachache wa kweli ambao ‘walizaliwa kwa ajili ya wakati wa taabu’? (Methali 17:17) Jean, mwenye umri wa miaka 20, anasema, “Ni vizuri kuwajua watu wengi, lakini hilo ni kama kuwa na kabati lililojaa nguo zinazopendeza tu zinaponing’inia humo lakini hazikutoshi. Hivyo kila mara unapokuwa na uhitaji, unachukua vazi unalojua litakufaa. Na hivyo ndivyo ilivyo na marafiki wa karibu.”

[Maelezo ya Chini]

[Sanduku katika ukurasa wa 20]

JINSI YA KUPATA MARAFIKI WA KWELI

1. Usitafute marafiki wengi, tafuta marafiki wa kweli. “Ni vizuri kujua watu wengi, lakini hata katika kikundi cha watu wengi, unajihisi huru zaidi kunapokuwa na watu wachache unaoweza kuwasiliana nao kwa uhuru.”—Karen.

2. Uwe rafiki wa kweli. “Mimi hutarajia rafiki zangu wawe washikamanifu na wenye kutegemeka, kwa hiyo mimi pia hujaribu kuwa hivyo.”—Evelyn.

3. Onyesha uthamini. “Ninapothamini urafiki wa mtu fulani, mimi humwonyesha kwa kumtumia kadi au zawadi.”—Kellie.

[Sanduku katika ukurasa wa 20]

MBONA USIWAULIZE WAZAZI WAKO?

Mlipokuwa na umri wangu, mlijifunza mambo gani kuhusu marafiki? Mliwahi kusalitiwa na rafiki? Ikiwa ndivyo, mlijifunza mambo gani kutokana na kisa hicho? Ni nani waliokuwa marafiki wa kweli, na mlianzisha urafiki huo jinsi gani?

[Sanduku katika ukurasa wa 21]

MSINGI WA URAFIKI WA KWELI

Ili uanzishe urafiki mzuri lazima nyote wawili mwe na viwango sawa. Yaani rafiki yako anapaswa kufuata kanuni kama zako kuhusu mambo ya kiroho na ya maadili.

Jambo la pili ni kuwa na sifa zinazofanana, lakini hilo halipaswi kuwa jambo kuu.

Na jambo linalofuata ni kuwa na mapendezi yanayopatana, lakini hilo si jambo la maana sana. Unaweza kuwa rafiki ya mtu ambaye ana mapendezi na vipawa vilivyo tofauti na vyako.

Tahadhari: Uwe mwangalifu usianzishe urafiki ambao msingi wake tu ni mapendezi yanayopatana. Ikiwa rafiki yako haongozwi na viwango sawa na vyako, urafiki wenu hautadumu—na hata unaweza kukuletea matatizo.

[Sanduku/​Picha katika ukurasa wa 21]

VIJANA WENZAKO WANASEMA NINI?

“Ikiwa utajiwekea viwango vya juu kupita kiasi, hutakuwa na marafiki kwa sababu utatazamia mengi sana kutoka kwao. Ikiwa utakuwa na viwango vya chini kupita kiasi, utakubali kuanzisha urafiki na mtu yeyote—na hilo si jambo zuri pia.”

“Watu fulani wanaotumia vituo vya mawasiliano hupendezwa zaidi na kuwa na marafiki wengi katika orodha yao ya marafiki kuliko kuwa na uhusiano mzuri pamoja nao. Ni muhimu kuwa na marafiki wachache wa kweli kuliko kuwa na marafiki wengi ambao huna uhusiano wa karibu nao.”

“Mtu fulani anapopiga porojo kuhusu rafiki zake, mimi hujua kwamba huenda pia yeye hupiga porojo kunihusu. Hilo hunitia wasiwasi. Rafiki wa kweli hapigi porojo.”

[Picha]

Dominique

Lianne

Brieanne