1. Kwa nini Yehova ndiye aliye na haki ya kuwa mmiliki wa vitu vyote? (Tazama picha mwanzoni mwa makala hii.)

VITU vyote ni mali ya Yehova! Anamiliki “mbingu, hata mbingu za mbingu, . . . na dunia na vitu vyote vilivyomo.” (Kum. 10:14; Ufu. 4:11) Hivyo, kwa kuwa tuliumbwa na Yehova, wanadamu wote ni mali yake. (Zab. 100:3) Ingawa hivyo, tangu wanadamu walipoumbwa, Mungu amekuwa akichagua vikundi fulani vya watu kuwa mali yake katika njia ya pekee.

2. Ni nani ambao wanatajwa katika Biblia kuwa mali ya Yehova katika njia ya pekee?

² Kwa mfano, katika Zaburi 135 waabudu waaminifu wa Yehova katika Israeli la kale wanaitwa “mali yake ya pekee.” (Zab. 135:4) Pia, kitabu cha Hosea kilitabiri kwamba baadhi ya watu ambao hawakuwa Waisraeli wangekuwa watu wa Yehova. (Hos. 2:23) Unabii wa Hosea ulitimizwa Yehova alipowachagua baadhi ya watu ambao hawakuwa Wayahudi ili watawale pamoja na Kristo wakati ujao. (Mdo. 10:45; Rom. 9:23-26) ‘Taifa hilo takatifu’ ni “mali ya pekee” ya Yehova katika njia ya pekee, kwa sababu washiriki wake wametiwa mafuta kwa roho takatifu na kuchaguliwa ili wakaishi mbinguni. (1 Pet. 2:9, 10) Vipi kuhusu idadi kubwa ya Wakristo waaminifu leo ambao wana tumaini la kuishi  duniani? Yehova anawaita “watu” wake na pia watu ‘aliowachagua.’—Isa. 65:22.

3. (a) Ni nani leo wanaofurahia uhusiano mzuri pamoja na Yehova? (b) Tutachunguza nini katika makala hii?

³ Leo, “kundi dogo,” walio na tumaini la kwenda mbinguni, na “kondoo wengine,” walio na tumaini la kuishi duniani, ni “kundi moja” ambalo Yehova anathamini na kuwaona kuwa watu wake. (Luka 12:32; Yoh 10:16) Kwa hakika, tunataka kumwonyesha Yehova kwamba tunathamini sana pendeleo la kuwa na uhusiano mzuri pamoja naye. Katika makala hii, tutachunguza njia mbalimbali ambazo tunaweza kumwonyesha Yehova kwamba tunathamini heshima ya pekee ambayo ametupatia.

4. Tunaweza kumwonyeshaje Yehova kwamba tunamshukuru kwa kutusaidia kuwa na uhusiano mzuri pamoja naye, na Yesu alifanya jambo gani linalofanana na hilo?

⁴ Tunaonyesha kwamba tunathamini mambo ambayo Yehova ametufanyia kwa kujiweka wakfu kwake kwa moyo wote. Tunapobatizwa, tunakiri rasmi na waziwazi kwamba Yehova ndiye mmiliki wetu na kwamba tuko tayari kujitiisha kwake. (Ebr. 12:9) Yesu alifanya jambo linalofanana na hilo alipobatizwa. Kwa njia hiyo ni kana kwamba alimwambia hivi Yehova: “Ee Mungu wangu, ninatamani kufanya mapenzi yako.” (Zab. 40:7, 8, maelezo ya chini) Yesu alijitoa ili kufanya mapenzi ya Yehova hata ingawa tangu alipozaliwa alikuwa sehemu ya taifa lililokuwa wakfu kwa Mungu.

5, 6. (a) Yehova alitendaje Yesu alipobatizwa? (b) Toa mfano unaoonyesha kwamba Yehova anafurahi sana tunapojiweka wakfu kwake hata ingawa yeye ndiye mmiliki wa vitu vyote.

⁵ Yehova alitendaje Yesu alipobatizwa? Biblia inasema hivi: “Baada ya kubatizwa, mara moja Yesu akainuka kutoka katika maji; na tazama! mbingu zikafunguliwa, naye akaona roho ya Mungu ikishuka kama njiwa, ikija juu yake. Tazama! Pia, sauti ikasikika kutoka mbinguni ikisema: ‘Huyu ni Mwanangu, mpendwa, ambaye nimemkubali.’” (Mt. 3:16, 17) Ingawa tayari Yesu alikuwa mali ya Baba yake wa mbinguni, Yehova alifurahi sana kuona jinsi Mwana wake alivyokuwa tayari kufanya mapenzi ya Baba yake kikamili. Vivyo hivyo, Yehova hufurahi sana tunapojiweka wakfu, naye atatubariki.—Zab. 149:4.

⁶ Fikiria mfano huu: Wazia kwamba mwanamume fulani amepanda maua mengi maridadi katika bustani yake. Siku moja binti yake mdogo anachuma mojawapo ya maua hayo na kumpa kama zawadi. Je, si kweli kwamba tayari maua hayo ni ya mwanamume huyo? Inawezekanaje kwamba binti yake akampa kitu ambacho tayari ni mali yake? Baba yeyote mwenye upendo hawezi kamwe kujiuliza maswali kama hayo. Badala yake, atafurahi sana kuipokea zawadi hiyo ikiwa ishara inayoonyesha kwamba binti yake anampenda sana. Kwa hakika, atathamini sana ua hilo kuliko maua mengine yote katika bustani yake. Hivyo ndivyo Yehova anavyohisi tunapojitoa kwa moyo wote ili kumtumikia.—Kut. 34:14.

7. Malaki alionyeshaje jinsi Yehova anavyohisi kuelekea wale wanaomtumikia kwa hiari?

⁷ Soma Malaki 3:16. Ikiwa bado hujajiweka wakfu na kubatizwa, hebu fikiria umuhimu wa kuchukua hatua hiyo. Ni kweli kwamba tangu ulipokuwa kwenye tumbo la uzazi, wewe ni mali ya Yehova, wewe pamoja na wanadamu wengine. Lakini tafakari jinsi ambavyo Yehova angefurahi sana ikiwa ungejiweka wakfu kwake na kufanya mapenzi yake kwa sababu unatambua enzi yake kuu. (Met. 23:15) Kwa upande wake, Yehova huwatambua wale wanaomtumikia kwa kupenda, naye huyaandika majina yao kwenye “kitabu cha kumbukumbu.”

8, 9. Yehova anataka wale ambao majina yao yameandikwa kwenye “kitabu cha kumbukumbu” wafanye nini?

 ⁸ Ili jina letu liandikwe kwenye “kitabu cha kumbukumbu” cha Yehova, tunahitaji kutimiza wajibu fulani. Malaki alitaja kihususa kwamba tunapaswa ‘kumwogopa Yehova na kulitafakari jina lake.’ Tunapojitoa ili kumwabudu mtu mwingine au kitu kingine chochote, jina letu litaondolewa kwenye kitabu cha mfano cha Yehova cha uzima.—Kut. 32:33; Zab. 69:28.

⁹ Hivyo, kujiweka wakfu kwa Yehova kunahusisha mengi zaidi ya kutoa nadhiri nzito kwamba utafanya mapenzi yake au kuchukua hatua ya kubatizwa. Matukio hayo hupita haraka, na baada ya muda mfupi huwa historia. Hata hivyo, ili tuwe upande wa Yehova tukiwa watu wake, tunahitaji kuonyesha kwamba tunamtii yeye sasa, na tutaendelea kumtii kwa muda wote wa maisha yetu.—1 Pet. 4:1, 2.

10. Ni tofauti gani inayopaswa kuonekana wazi kati ya watu wanaomtumikia Yehova na wasiomtumikia?

¹⁰ Katika makala iliyotangulia, tulichunguza masimulizi ya Biblia kuhusu Kaini, Sulemani, na Waisraeli. Wote walidai kuwa wanamwabudu Yehova, lakini hawakumtumikia kwa moyo wote. Mifano hiyo inaonyesha wazi kwamba ni lazima wale ambao kwa kweli ni mali ya Yehova wachukue msimamo thabiti upande wa uadilifu na kupinga uovu. (Rom. 12:9) Hivyo, baada ya Malaki kutaja “kitabu cha kumbukumbu,” Yehova anataja kuhusu “tofauti kati ya mtu mwadilifu na mtu mwovu, kati ya yule anayemtumikia Mungu na yule asiyemtumikia.”—Mal. 3:18.

11. Kwa nini wengine wanapaswa kuona wazi kwamba sisi tumejitoa ili kumtumikia Yehova kwa moyo wote?

¹¹ Kuna njia nyingine tunayoweza kuonyesha kuwa tunathamini kwamba Yehova ametuchagua kuwa watu wake. Ni lazima maendeleo yetu ya kiroho “yaonekane wazi kwa watu wote.” (1 Tim. 4:15; Mt. 5:16) Jiulize hivi: ‘Je, wengine wanaona wazi kwamba mimi niko upande wa Yehova kikamili? Je, mimi hutafuta fursa za kujitambulisha kwamba mimi ni Shahidi wa Yehova?’ Yehova atahuzunika sana ikiwa baada ya kutuchagua kuwa watu wake, tunasitasita kuwaambia wengine kwamba sisi ni mali yake.—Zab. 119:46; soma Marko 8:38.

12, 13. Baadhi ya ndugu na dada wamefanyaje iwe vigumu kwa wengine kutambua kwamba wao ni Mashahidi wa Yehova?

 ¹² Inasikitisha kwamba baadhi ya ndugu na dada wamefanya wengine washindwe kuona ‘tofauti kati yao na wale wasiomtumikia Mungu’ kwa sababu wanaiga “roho ya ulimwengu.” (1 Kor. 2:12) Roho hiyo huwachochea watu watosheleze ‘tamaa zao za mwili.’ (Efe. 2:3) Kwa mfano, licha ya mashauri yote ambayo tumepokea kuhusiana na suala la mavazi na kujipamba, baadhi ya ndugu na dada bado wanapendelea mitindo iliyopita kiasi. Wao huvaa nguo zenye kubana na zinazoonyesha mwili, hata kwenye mikutano na makusanyiko ya Kikristo. Au huamua kuiga mitindo iliyopita kiasi ya kunyoa nywele au kusuka na kupamba nywele. (1 Tim. 2:9, 10) Hivyo, wanapokuwa kwenye umati wa watu, inaweza kuwa vigumu kutofautisha ni nani ambaye anamtumikia Yehova na ni nani aliye “rafiki ya ulimwengu.”—Yak. 4:4.

¹³ Baadhi ya Mashahidi wameshindwa kukataa kwa uthabiti mwenendo wa ulimwengu katika mambo mengine pia. Jinsi wanavyocheza dansi na wanavyojiendesha wanapokuwa kwenye sherehe ni kinyume na mambo yanayomfaa Mkristo. Maelezo na picha wanazoweka kwenye mitandao ya kijamii zinafunua kwamba hawana hali nzuri ya kiroho. Huenda hawajawahi kutiwa nidhamu katika kutaniko la Kikristo kwa sababu ya dhambi nzito, lakini huenda wakawaathiri wengine wanaojitahidi kudumisha mwenendo mzuri miongoni mwa watu wa Yehova.—Soma 1 Petro 2:11, 12.

14. Tunapaswa kufanya nini ili tulinde urafiki wetu wa pekee pamoja na Yehova?

¹⁴ Ulimwengu unaendeleza kwa bidii “tamaa ya mwili na tamaa ya macho na mtu kujionyesha mali zake maishani.” (1 Yoh 2:16) Ingawa hivyo, kwa kuwa sisi ni mali ya Yehova tunahimizwa “kukataa matendo yasiyompendeza Mungu na tamaa za ulimwengu na kuishi kwa utimamu wa akili, uadilifu, na ujitoaji-kimungu katika mfumo huu wa mambo.” (Tito 2:12) Usemi wetu, mazoea yetu ya kula na kunywa, mavazi na jinsi tunavyojipamba, mazoea yetu ya kufanya kazi, naam, mambo yote tunayofanya yanapaswa kuwaonyesha watu wanaotutazama kwamba tumejitoa kikamili ili kumtumikia Yehova.—Soma 1 Wakorintho 10:31, 32.

15. Kwa nini tunapaswa kuwatendea waabudu wenzetu kwa fadhili na upendo?

¹⁵ Tunaonyesha kwamba tunathamini urafiki wetu wa pekee pamoja na Yehova kupitia jinsi tunavyowatendea waabudu wenzetu. Wao pia ni mali ya Yehova. Ikiwa sikuzote tutakumbuka jambo hilo, basi tutawatendea ndugu na dada zetu kwa fadhili na upendo nyakati zote. (1 The. 5:15) Yesu aliwaambia hivi wafuasi wake: “Kwa jambo hili wote watajua kwamba ninyi ni wanafunzi wangu—mkiwa na upendo miongoni mwenu.”—Yoh. 13:35.

16. Ni jambo gani lililotajwa na Sheria ya Musa linaloonyesha jinsi Yehova anavyohisi kuelekea watu wake?

¹⁶ Ili kujua jinsi tunavyopaswa kuwatendea wengine kutanikoni, fikiria jambo hili. Vyombo vilivyotumiwa katika hekalu la Yehova vilikuwa vimewekwa wakfu, yaani, vilitengwa kwa ajili ya ibada safi pekee. Sheria ya Musa ilitaja kihususa jinsi ambavyo vyombo hivyo vilipaswa kutunzwa, na wale ambao wangevunja sheria hiyo walipaswa kuuawa. (Hes. 1:50, 51) Ikiwa Yehova alilinda kwa bidii hivyo vyombo visivyo na uhai vilivyotumiwa katika ibada yake, sembuse waabudu wake washikamanifu waliojiweka wakfu kwake ambao amewachagua kuwa watu wake! Yehova aliwaambia hivi watu wake: “Yeyote anayewagusa ninyi anaigusa mboni ya jicho langu.”—Zek. 2:8.

17. Yehova “[anakazia] uangalifu na kusikiliza” nini?

¹⁷ Jambo linalovutia ni kwamba Malaki anamtaja Yehova “[akikazia] uangalifu na kusikiliza” watu Wake wanapozungumza pamoja. (Mal. 3:16) Kwa hakika Yehova “anawajua walio wake.” (2 Tim. 2:19) Anajua vizuri sana kila jambo tunalofanya na kusema. (Ebr. 4:13) Tunapowatendea waabudu wenzetu kwa njia isiyo ya fadhili, Yehova “[anakazia] uangalifu na kusikiliza.” Tunapokuwa wakaribishaji wageni, wakarimu, wenye kusamehe, na wenye fadhili, tunaweza kuwa na hakika kwamba Yehova anaona mambo hayo pia.—Ebr. 13:16; 1 Pet. 4:8, 9.

18. Tunaweza kufanya nini ili kumwonyesha Yehova kwamba tunathamini heshima ya kuwa watu wake?

¹⁸ Kwa kweli, tunataka kumwonyesha Yehova kwamba tunathamini sana heshima ya kuwa watu wake. Tunajionea jinsi lilivyo jambo la hekima kukubali kwamba yeye ndiye mmiliki wetu kwa kujiweka wakfu kwake kwa hiari. Ingawa tunaishi “katikati ya kizazi kilicho kombo na kilichopotoka,” tungependa watu waone kwamba hatuna “lawama wala hatia, . . . [na tunaangaza] kama mianga katika ulimwengu.” (Flp. 2:15) Tunachukua msimamo thabiti kupinga uovu. (Yak. 4:7) Na tunawapenda na kuwaheshimu waabudu wenzetu, tukitambua kwamba wao pia ni mali ya Yehova.—Rom. 12:10.

19. Yehova huwathawabishaje wale ambao ni mali yake?

¹⁹ Biblia inaahidi hivi: “Yehova hatawaacha watu wake.” (Zab. 94:14) Ahadi hiyo thabiti itatimizwa hata tupatwe na matatizo makubwa kadiri gani. Hata kifo chenyewe hakiwezi kututenganisha na upendo wa Yehova. (Rom. 8:38, 39) “Tukiishi, tunaishi kwa ajili ya Yehova, na tukifa, tunakufa kwa ajili ya Yehova. Basi tukiishi na tukifa, sisi ni wa Yehova.” (Rom. 14:8) Kwa kweli tunatazamia kwa hamu siku ambayo Yehova atawafufua marafiki zake wote washikamanifu ambao wamekufa. (Mt. 22:32) Pamoja na hayo, tunafurahia baraka nyingi hata sasa. Na kama Biblia inavyosema, “lenye furaha ni taifa ambalo Mungu wake ni Yehova, watu ambao amewachagua kuwa miliki yake mwenyewe.”—Zab. 33:12.