Fikiria mfano mmoja wa uhusiano wa karibu sana ambao wanadamu wanaweza kuwa nao—ule wa mapacha wanaofanana. Uhusiano wao ni wa pekee sana. Nancy Segal, mkurugenzi wa kituo cha uchunguzi wa watoto mapacha (Twin Studies Center), ambaye pia ana pacha wake, anasema kwamba baadhi yao “wanaelewa jinsi mtu anavyohisi anapomweleza mwingine jambo na likaeleweka kabisa bila hata kutoa ufafanuzi wowote.” Mwanamke mmoja aliye na pacha anayefanana naye, alisema hivi kuhusu uhusiano wao: “Kila mmoja wetu anamjua mwenzake kikamili.”

Ni nini hufanya waelewane kiasi hicho? Utafiti unaonyesha kwamba, ingawa mazingira na malezi huchangia kwa kiasi fulani, chembe za urithi za mapacha wanaofanana zinaendana sana na inaelekea hilo hutimiza sehemu kubwa zaidi.

FIKIRIA HILI: Muumba wa chembe hizo za urithi zinazostaajabisha, lazima awe anamjua kila mmoja wetu kwa njia ya pekee sana. Mtunga zaburi Daudi alisema hivi: “Ulinisitiri katika tumbo la mama yangu. Mifupa yangu haikufichwa kwako nilipoumbwa sirini . . . Macho yako hata yaliniona nikiwa kiinitete; sehemu zake zote ziliandikwa katika kitabu chako.” (Zaburi 139:13, 15, 16) Mungu pekee ndiye anayeweza kujua na kuelewa kikamili jinsi ambavyo chembe zetu za urithi na mambo tuliyopitia maishani yamefanya tuwe jinsi tulivyo. Kwa kuwa Mungu anatujua na anazijua chembe zetu za urithi vizuri sana, tuna uhakika kwamba anaelewa kila kitu kutuhusu.

Daudi alisali hivi: “Ee Yehova, umenichunguza kabisa, nawe unanijua. Unajua wakati ninapoketi na wakati ninaposimama. Unatambua mawazo yangu kutoka mbali. Kabla sijatamka neno lolote kwa ulimi wangu, tazama! Ee Yehova, tayari unalijua vizuri.” (Zaburi 139:1, 2, 4) Kwa kuongezea, Yehova anazijua hisia zetu za ndani kabisa na hata anaweza ‘kutambua kila mwelekeo wa fikira.’ (1 Mambo ya Nyakati 28:9; 1 Samweli 16:6, 7) Mistari hiyo ya Biblia inatufundisha nini kumhusu Mungu?

Nyakati nyingine huenda tukashindwa kueleza mawazo na hisia zetu katika sala. Hata hivyo, tunajua kwamba, zaidi ya kuona kila kitu tunachofanya, Muumba wetu anaelewa kwa nini tumetenda kwa njia hiyo. Na si hilo tu, anatambua pia mambo mazuri ambayo tungependa kufanya hata ikiwa hali zinatuzuia kutimiza tamaa ya moyo wetu. Kwa kuwa Mungu ndiye aliyeweka sifa ya upendo mioyoni mwetu, tuna uhakika kwamba yupo tayari na ana hamu ya kuona na kuelewa nia na mawazo tuliyo nayo yanayochochewa na sifa hiyo.—1 Yohana 4:7-10.

Maandiko yanatuhakikishia kwamba . . .

• “Macho ya Yehova yanawatazama waadilifu, na masikio yake yanasikiliza dua yao.”​—1 PETRO 3:12.

• Mungu anaahidi: “Nitakupa ufahamu na kukufundisha njia unayopaswa kufuata. Nitakupa ushauri jicho langu likikutazama.”​—ZABURI 32:8.

Je, kujua kwamba Mungu anaelewa hali na hisia zetu kunaweza kutusaidia kukabiliana na changamoto tulizo nazo? Fikiria kisa cha Anna, anayeishi Nigeria. Anasema: “Hali ngumu nilizokuwa nikikabili zilifanya nijiulize ikiwa maisha yana maana yoyote. Nikiwa mjane, nilikuwa nikimtunza mtoto wangu aliyekuwa amelazwa hospitalini kwa sababu ya kuwa na tatizo la umajimaji mwingi kwenye ubongo. Wakati huohuo niligunduliwa kuwa na saratani ya matiti na nilihitaji kufanyiwa upasuaji na kupata matibabu ya kemikali na ya mionzi. Ilikuwa vigumu sana kwangu kuwa hospitalini kipindi kilekile ambacho binti yangu alikuwa amelazwa.”

Ni nini kilimsaidia Anna kukabiliana na hali hiyo? “Nilitafakari kuhusu maandiko kama vile Wafilipi 4:6, 7. Andiko hilo linasema kwamba ‘amani ya Mungu inayozidi uelewaji wote itailinda mioyo yenu na nguvu zenu za akili.’ Kila mara nilipofikiria andiko hilo, nilihisi nikiwa karibu sana na Yehova, nikijua kwamba ananielewa vizuri kuliko jinsi ninavyojielewa. Pia, ndugu na dada zangu wapendwa katika kutaniko letu la Kikristo walinitia moyo sana.

“Ingawa bado afya yangu inanisumbua, hali yetu imeboreka. Kwa sababu Yehova yuko upande wetu, tumejifunza kuwa na mtazamo chanya tunapokabili changamoto. Andiko la Yakobo 5:11 linatuhakikishia hivi: ‘Tunawaona wale ambao wamevumilia kuwa wenye furaha. Mmesikia kuhusu uvumilivu wa Ayubu na mmeona matokeo ambayo Yehova alileta, kwamba Yehova ni mwenye upendo mwororo sana [au, “ni mwenye huruma sana,” maelezo ya chini] na mwenye rehema.’” Yehova alielewa hali ya Ayubu kikamili, na tunaweza kuwa na uhakika kwamba anaelewa vizuri sana hali yoyote ngumu tunayopitia.