Sikiliza Neno la Mungu la Kiunabii
Sikiliza Neno la Mungu la Kiunabii
“Tuna neno la unabii likiwa limefanywa hakika zaidi; na mnafanya vema kulikazia uangalifu.”—2 PETRO 1:19.
1, 2. Unaweza kusimulia mfano gani wa mesiya asiye wa kweli?
KWA karne nyingi, mesiya wasio wa kweli wamejaribu kutabiri wakati ujao. Katika karne ya tano W.K., mtu mmoja aliyejiita Musa aliwasadikisha Wayahudi waliokuwa katika kisiwa cha Krete kwamba yeye ndiye mesiya na angewaweka huru kutokana na uonevu. Siku ile ambayo wangewekwa huru, walimfuata mtu huyo kwenda mahali palipoinuka juu ya Bahari ya Mediterania. Alisema kwamba walipaswa tu kujitupa baharini, nayo bahari ingetenganika mbele zao. Wengi waliotumbukia baharini walikufa, na yule mesiya asiye wa kweli akatoroka.
2 Katika karne ya 12, “mesiya” mmoja alitokea Yemeni. Khalifa, au mtawala, akamwomba aonyeshe ishara ya umesiya wake. “Mesiya” huyo akapendekeza kwamba khalifa aagize akatwe kichwa. Alitabiri kwamba ufufuo wake wa haraka ungekuwa ishara hiyo. Khalifa huyo akakubali mpango huo wa kumkata kichwa “mesiya”—na huo ukawa mwisho wa “mesiya” huyo.
3. Mesiya wa kweli ni nani, na huduma yake ilithibitisha nini?
3 Mesiya wasio wa kweli wameshindwa kabisa na unabii wao umekosa kutimia, lakini kusikiliza neno la Mungu la kiunabii hakuwezi kututamausha. Mesiya wa kweli, Yesu Kristo, alitimiza kihalisi unabii mwingi wa Biblia. Kwa mfano, mwandikaji wa Gospeli, Mathayo, aliandika hivi akinukuu unabii wa Isaya: “‘Ewe nchi ya Zebuloni na nchi ya Naftali, kando ya barabara ya bahari, katika upande ule mwingine wa Yordani, Galilaya ya mataifa! watu wenye kuketi katika giza waliona nuru kubwa, na kwa habari ya wale wenye kuketi katika mkoa wa kivuli cha kifo, nuru iliwazukia.’ Kutoka wakati huo na kuendelea Yesu alianza kuhubiri na kusema: ‘Tubuni, nyinyi watu, kwa maana ufalme wa mbingu umekaribia.’” (Mathayo 4:15-17; Isaya 9:1, 2) Yesu ndiye ‘nuru hiyo kubwa,’ na huduma yake ilithibitisha kwamba yeye ndiye Nabii aliyetabiriwa na Musa. Wale wanaokataa kumsikiliza Yesu wataharibiwa.—Kumbukumbu la Torati 18:18, 19; Matendo 3:22, 23.
4. Yesu alitimizaje andiko la Isaya 53:12?
4 Pia Yesu alitimiza maneno ya kiunabii ya Isaya 53:12: “Alimwaga nafsi yake hata kufa, akahesabiwa pamoja na hao wakosao. Walakini alichukua dhambi za watu wengi, na kuwaombea wakosaji.” Akijua kwamba karibuni angetoa uhai wake wa kibinadamu ukiwa fidia, Yesu aliimarisha imani ya wanafunzi wake. (Marko 10:45) Alifanya hivyo katika njia yenye kutokeza ya mgeuko-umbo.
Mgeuko-Umbo Wajenga Imani
5. Kwa maneno yako mwenyewe, ungefafanuaje mgeuko-umbo?
5 Mgeuko-umbo ulikuwa tukio la kiunabii. Yesu alisema: “Mwana wa binadamu akusudiwa kuja katika utukufu wa Baba yake pamoja na malaika zake . . . Kwa kweli nawaambia nyinyi kwamba kuna baadhi ya wale ambao wamesimama hapa ambao hawataonja kifo hata kidogo mpaka kwanza wamwone Mwana wa binadamu akija katika ufalme wake.” (Mathayo 16:27, 28) Je, kweli baadhi ya mitume walimwona Yesu akija katika Ufalme wake? Mathayo 17:1-7 yasema: “Siku sita baadaye Yesu alichukua pamoja naye Petro na Yakobo na Yohana ndugu yake akawaleta juu katika mlima ulioinuka sana wakiwa peke yao wenyewe. Naye akageuka umbo mbele yao.” Ni tukio lenye kutokeza kama nini! “Uso wake ukang’aa kama jua, na mavazi yake ya nje yakawa maangavu kama nuru. Na, tazama! kukaonekana kwao Musa na Eliya, wakiongea naye.” Pia, “wingu jangavu liliwafunika kivuli,” wakasikia sauti ya Mungu mwenyewe ikisema: “‘Huyu ni Mwana wangu, mpendwa, ambaye mimi nimemkubali; msikilizeni yeye.’ Waliposikia hilo wanafunzi wakaanguka kifudifudi na kuwa wenye kuogopa sana. Ndipo Yesu akaja karibu na, akiwagusa, akasema: ‘Inukeni na msiwe na hofu.’”
6. (a) Kwa nini Yesu aliuita mgeuko-umbo ono? (b) Mgeuko-umbo ulitangulia kuonyesha nini?
6 Yamkini jambo hilo lenye kutia kicho lilitukia katika kilima kimoja kwenye Mlima Hermoni, ambako Yesu na mitume wake watatu walipisha usiku huo. Yaonekana kwamba mgeuko-umbo huo ulitukia usiku, jambo lililofanya uonekane dhahiri kabisa. Sababu moja iliyofanya Yesu aliite tukio hilo ono ni kwamba Musa na Eliya hawakuwepo kihalisi. Kristo peke yake ndiye aliyekuwapo kihalisi. (Mathayo 17:8, 9) Wonyesho huo mwangavu sana ulimpa Petro, Yakobo, na Yohana mwono wa kimbele wenye kutokeza wa kuwapo kwa Yesu kwenye utukufu katika uweza wa Ufalme. Musa na Eliya walifananisha warithi watiwa-mafuta wanaoshirikiana na Yesu, na ono hilo liliimarisha sana ushuhuda wake kuhusu Ufalme na utawala wake wa baadaye.
7. Tunajuaje kwamba Petro aliukumbuka vizuri ule mgeuko-umbo?
7 Huo mgeuko-umbo ulisaidia kuimarisha imani ya mitume hao watatu ambao wangekuwa na madaraka makubwa katika kutaniko la Kikristo. Uso wa Kristo wenye kung’aa kwa uangavu, mavazi yake meupe pe, na sauti ya Mungu mwenyewe ikitangaza kwamba Yesu ni Mwana Wake mpendwa wanayepaswa kumsikiliza—yote hayo yalitimiza ifaavyo kabisa kusudi la mgeuko-umbo. Lakini mitume hawakupaswa kumwambia mtu yeyote ono hilo mpaka Yesu afufuliwe. Miaka 32 baadaye, bado Petro alikumbuka vizuri ono hilo. Akilirejezea ono hilo na maana yake, aliandika: “Sivyo, haikuwa kwa kufuata hadithi zisizo za kweli zilizotungwa kwa usanifu mwingi kwamba tuliwafahamisha nyinyi juu ya nguvu na kuwapo kwa Bwana wetu Yesu Kristo, lakini ilikuwa kwa kupata kuwa mashahidi wa kujionea fahari yake. Kwa maana alipokea kutoka kwa Mungu Baba heshima na utukufu, wakati maneno ya namna hii yalipopelekwa kwake kwa utukufu wenye fahari: ‘Huyu ni mwana wangu, mpendwa wangu, ambaye mimi mwenyewe nimemkubali.’ Ndiyo, maneno haya tuliyasikia yakipelekwa kutoka mbinguni tulipokuwa tungali pamoja naye katika mlima mtakatifu.”—2 Petro 1:16-18.
8. (a) Maneno ya Mungu kuhusu Mwana wake yalikazia nini? (b) Wingu lililotokea katika mgeuko-umbo lilionyesha nini?
8 Jambo lililokuwa muhimu zaidi ni tangazo hili la Mungu: “Huyu ni Mwana wangu, mpendwa, ambaye mimi nimemkubali; msikilizeni yeye.” Taarifa hii yamkazia fikira Yesu akiwa Mfalme aliyetawazwa wa Mungu, ambaye uumbaji wote wapaswa kumtii. Wingu lililowafunika lilionyesha kwamba utimizo wa ono hilo haungeonekana. Ungetambuliwa tu kwa macho ya uelewevu ya wale wanaotambua “ishara” ya kuwapo kusikoonekana kwa Yesu katika mamlaka ya Ufalme. (Mathayo 24:3) Kwa hakika, maagizo ya Yesu kwamba wasimwambie mtu awaye yote ono hilo hadi afufuliwe kutoka katika wafu yaonyesha kwamba kukwezwa na kutukuzwa kwake kungetukia baada ya kufufuliwa kwake.
9. Kwa nini mgeuko-umbo unapaswa kuimarisha imani yetu?
9 Baada ya kurejezea mgeuko-umbo, Petro alisema: “Kwa sababu hiyo tuna neno la unabii likiwa limefanywa hakika zaidi; na mnafanya vema kulikazia uangalifu kama vile kwa taa yenye kung’aa mahali penye giza, hadi siku ipambazuke na nyota ya mchana izuke, katika mioyo yenu. Kwa maana mwajua hili kwanza, kwamba hakuna unabii wa Andiko uchipukao kutokana na fasiri yoyote ya faragha. Kwa maana unabii haukuletwa wakati wowote kamwe kwa mapenzi ya binadamu, bali wanadamu walisema kutoka kwa Mungu walipokuwa wakichukuliwa na roho takatifu.” (2 Petro 1:19-21) Huo mgeuko-umbo wakazia kutegemeka kwa neno la Mungu la kiunabii. Ni lazima tulisikilize neno hilo na si kusikiliza “hadithi zisizo za kweli zilizotungwa kwa usanifu mwingi” ambazo hazitokani na Mungu wala hazina kibali chake. Imani yetu katika neno la kiunabii yapaswa kuimarishwa na mgeuko-umbo kwa sababu ono hilo la kimbele la utukufu wa Yesu na mamlaka ya Ufalme zimekuwa halisi. Ndiyo, tuna ushuhuda thabiti kwamba Kristo yupo wakati huu akiwa Mfalme mwenye nguvu mbinguni.
Jinsi Nyota ya Mchana Inavyozuka
10. “Nyota ya mchana” iliyotajwa na Petro ni nani au ni nini, na kwa nini unajibu hivyo?
10 Petro aliandika: “Mnafanya vema kulikazia uangalifu [neno la kiunabii] kama vile kwa taa yenye kung’aa mahali penye giza, hadi siku ipambazuke na nyota ya mchana izuke.” “Nyota ya mchana” ni nani au ni nini? Maneno “nyota ya mchana” yapatikana mara moja tu katika Biblia, nayo yana maana sawa na “nyota ya asubuhi.” Ufunuo 22:16 humwita Yesu Kristo “nyota nyangavu ya asubuhi.” Katika majira fulani ya mwaka, nyota hizo huwa za mwisho kuzuka kwenye upeo wa mashariki. Hizo huzuka kabla tu ya jua kutokea, na basi hizo hutangaza kupambazuka kwa siku mpya. Petro alitumia maneno “nyota ya mchana” kumrejezea Yesu baada ya Yeye kupokea mamlaka ya Ufalme. Wakati huo, Yesu alizuka ulimwenguni kote, kutia ndani dunia yetu! Akiwa Nyota ya Mchana ya Kimesiya, anatangulia kuonyesha kupambazuka kwa siku mpya, muhula mpya, kwa ajili ya wanadamu watiifu.
11. (a) Kwa nini andiko la 2 Petro 1:19 halimaanishi kwamba “nyota ya mchana” huzuka katika moyo halisi wa wanadamu? (b) Unaweza kuelezaje andiko la 2 Petro 1:19?
11 Tafsiri nyingi za Biblia huendeleza dhana ya kwamba maneno ya mtume Petro yaliyoandikwa kwenye 2 Petro 1:19 hurejezea moyo halisi wa mwanadamu. Moyo wa mtu mzima una uzito wa kati ya gramu 250 hadi 300. Yesu Kristo—ambaye sasa yuko mbinguni akiwa kiumbe wa roho mtukufu na asiyeweza kufa—angewezaje kuzuka katika viungo hivyo vidogo vya wanadamu? (1 Timotheo 6:16) Bila shaka, mioyo yetu ya mfano inahusika katika jambo hilo, kwa kuwa tunaitumia kusikiliza neno la Mungu la kiunabii. Lakini chunguza kwa makini 2 Petro 1:19, na utaona kuwa Tafsiri ya Ulimwengu Mpya ina alama zinazotenganisha fungu lisemalo “hadi siku ipambazuke na nyota ya mchana izuke” kutokana na maneno yaliyotangulia katika mstari huo na usemi “katika mioyo yenu.” Mstari huo waweza kumaanisha hivi: ‘Tuna neno la unabii likiwa limefanywa hakika zaidi; na mnafanya vema kulikazia uangalifu kama vile kwa taa yenye kung’aa mahali penye giza, yaani, katika mioyo yenu, hadi siku ipambazuke na nyota ya mchana izuke.’
12. Kwa ujumla, hali ya mioyo ya wanadamu ikoje, lakini namna gani Wakristo wa kweli?
12 Kwa ujumla, hali ya mioyo ya mfano ya wanadamu wenye dhambi ikoje? Mioyo yao imo katika giza la kiroho! Lakini ikiwa sisi ni Wakristo wa kweli, ni kana kwamba tuna taa ing’aayo katika mioyo yetu, ambayo kama si hivyo ingekuwa giza. Kama ionyeshwavyo na maneno ya Petro, ni kwa kusikiliza neno la Mungu la kiunabii lenye kunurisha ndipo Wakristo wa kweli wangekuwa macho na kunurishwa kuhusu kupambazuka kwa siku mpya. Wangetambua kwamba Nyota ya Mchana imezuka, si katika mioyo halisi ya wanadamu, bali kwa uumbaji wote.
13. (a) Kwa nini tunaweza kuwa na hakika kwamba tayari Nyota ya Mchana imezuka? (b) Kwa nini Wakristo wanaweza kuvumilia hali ngumu ambazo Yesu alitabiri kwamba zitatokea wakati wetu?
13 Tayari Nyota ya Mchana imezuka! Tunaweza kuwa na hakika ya jambo hilo kwa kusikiliza unabii mkuu wa Yesu kuhusu kuwapo kwake. Leo, twajionea utimizo wake katika vita visivyo na kifani, njaa kuu, matetemeko ya dunia, na kuhubiriwa kwa habari njema ulimwenguni pote. (Mathayo 24:3-14) Ingawa zile hali ngumu ambazo Yesu alitabiri hutuathiri sisi pia tukiwa Wakristo, tunaweza kuvumilia tukiwa na amani na shangwe ya moyoni. Kwa nini? Kwa sababu tunasikiliza neno la Mungu la kiunabii na tuna imani katika ahadi zake za wakati ujao. Twajua kwamba tumekaribia nyakati bora zaidi kwa kuwa twaishi ndani sana katika “wakati wa mwisho”! (Danieli 12:4) Ulimwengu umo taabani kama ilivyotabiriwa katika Isaya 60:2: “Tazama, giza litaifunika dunia, na giza kuu litazifunika kabila za watu.” Mtu awaye yote awezaje kuona njia katika giza hili? Ni lazima asikilize neno la Mungu la kiunabii kwa unyenyekevu sasa, kabla haijawa kuchelewa mno. Watu wenye mioyo minyofu wanahitaji kumgeukia Yehova Mungu, Chanzo cha Uhai na nuru. (Zaburi 36:9; Matendo 17:28) Ni kwa kufanya hivyo tu ndipo mtu awaye yote awezapo kupata nuru ya kweli na tumaini la kufurahia wakati ujao mzuri ambao Mungu amekusudia wanadamu watiifu.—Ufunuo 21:1-5.
“Nuru Imekuja Ulimwenguni”
14. Ni lazima tufanye nini ili tujionee utimizo wa unabii mzuri ajabu wa Biblia?
14 Maandiko huonyesha wazi kwamba Yesu Kristo sasa anatawala akiwa Mfalme. Kwa kuwa alipata mamlaka mwaka wa 1914, unabii mzuri ajabu bado utatimia. Ili tujionee utimizo huo, lazima tuwe watu wasikivu wanaodhihirisha imani katika Yesu Kristo, wenye kutubu matendo yenye dhambi na dhambi zifanywazo kwa kutojua. Bila shaka, wale wanaopenda giza hawatapata uhai udumuo milele. Yesu alisema hivi: “Huu ndio msingi wa hukumu, kwamba nuru imekuja ulimwenguni lakini watu wamependa giza kuliko nuru, kwa maana kazi zao zilikuwa mbovu. Kwa maana yeye ambaye huzoea kufanya mambo maovu huchukia nuru na haji kwenye nuru, ili kazi zake zisipate kukaripiwa. Lakini yeye ambaye hufanya lililo la kweli huja kwenye nuru, ili kazi zake zipate kudhihirishwa kuwa zilikwisha kufanywa kwa kupatana na Mungu.”—Yohana 3:19-21.
15. Ni nini kitakachotokea tukipuuza wokovu ambao Mungu amefanya uwezekane kupitia Mwana wake?
15 Nuru ya kiroho imekuja ulimwenguni kupitia Yesu, na ni muhimu kumsikiliza. Paulo aliandika: “Mungu, ambaye zamani za kale katika vipindi vingi na katika njia nyingi alisema na baba zetu wa zamani kwa njia ya manabii, mwishoni mwa siku hizi amesema nasi kwa njia ya Mwana, aliyemweka rasmi kuwa mrithi wa vitu vyote.” (Waebrania 1:1, 2) Ni nini kitakachotokea tukipuuza wokovu ambao Mungu amefanya uwezekane kupitia Mwana wake? Paulo aliongezea kusema: “Ikiwa neno lililosemwa kupitia malaika lilithibitika kuwa imara, na kila mkiuko-sheria na tendo la kutotii lilipokea malipo kwa kupatana na haki; sisi tutaponyokaje ikiwa tumepuuza wokovu wa ukubwa wa namna hii kwa kuwa ulianza kusemwa kupitia Bwana wetu na ulithibitishwa kwa ajili yetu na wale waliomsikia, wakati Mungu alipojiunga katika kutoa ushahidi kwa ishara nyingi na vilevile mambo ya ajabu na kazi za namna mbalimbali zenye nguvu na kwa ugawanyaji wa roho takatifu kulingana na mapenzi yake?” (Waebrania 2:2-4) Naam, Yesu ni nguzo muhimu katika kulitangaza neno la kiunabii.—Ufunuo 19:10.
16. Kwa nini tunaweza kuwa na imani kamili katika unabii wote wa Yehova Mungu?
16 Kama ilivyotajwa, Petro alisema: “Hakuna unabii wa Andiko uchipukao kutokana na fasiri yoyote ya faragha.” Wanadamu wenyewe hawawezi kutokeza unabii wa kweli, lakini twaweza kuwa na imani kamili katika unabii wote wa Mungu. Huo watokana na Yehova Mungu mwenyewe. Kupitia roho takatifu amewawezesha watumishi wake waelewe jinsi unabii wa Biblia unavyotimizwa. Kwa kweli twamshukuru Yehova kwa sababu tumeona utimizo wa unabii mwingi kama huo tangu mwaka wa 1914. Na tuna hakika kabisa kwamba unabii wote uliosalia kuhusu mwisho wa huu mfumo mwovu utatimizwa. Ni muhimu kwamba tuendelee kusikiliza matabiri ya Mungu huku tukiacha nuru yetu ing’ae. (Mathayo 5:16) Twashukuru kama nini kwamba Yehova asababisha ‘nuru itupambazukie katika giza’ kubwa linaloifunika dunia leo!—Isaya 58:10.
17. Kwa nini tunahitaji nuru ya kiroho kutoka kwa Mungu?
17 Nuru ya kawaida hutuwezesha kuona. Pia nuru hiyo hufanya iwezekane kukuza mimea inayotuandalia vyakula mbalimbali. Hatuwezi kuishi bila nuru ya kawaida. Vipi juu ya nuru ya kiroho? Hiyo hutuongoza na kutuonyesha wakati ujao kama ulivyotabiriwa katika Neno la Mungu, Biblia. (Zaburi 119:105) Kwa upendo Yehova Mungu ‘hutuletea nuru yake na kweli yake.’ (Zaburi 43:3) Kwa kweli twapaswa kuthamini sana maandalizi hayo. Basi na tufanye yote tuwezayo ili kuitwaa nuru ya “ujuzi wenye utukufu juu ya Mungu” ili iangaze moyo wetu wa mfano.—2 Wakorintho 4:6; Waefeso 1:18.
18. Nyota ya Mchana ya Yehova sasa yu tayari kufanya nini?
18 Tumebarikiwa kama nini kujua kwamba mwaka wa 1914, Yesu Kristo, Nyota ya Mchana, alizuka ulimwenguni kote na kuanza kutimiza ono la mgeuko-umbo! Nyota ya Mchana ya Yehova yupo sasa, akiwa tayari kutekeleza kusudi la Mungu ili kutimiza hata zaidi mgeuko-umbo huo—“vita ya siku kubwa ya Mungu Mweza-Yote.” (Ufunuo 16:14, 16) Baada ya mfumo huu wa kale kufagiliwa mbali, Yehova atatimiza ahadi yake ya “mbingu mpya na dunia mpya” ambamo twaweza kumsifu milele akiwa Bwana Mwenye Enzi Kuu ya ulimwengu na Mungu wa unabii wa kweli. (2 Petro 3:13) Na tuendelee kutembea katika nuru ya Mungu kwa kusikiliza neno la Mungu la kiunabii mpaka wakati huo mtukufu ufike.
Ungejibuje?
• Ungefafanuaje mgeuko-umbo wa Yesu?
• Mgeuko-umbo unajengaje imani?
• Nyota ya Mchana ya Yehova ni nani au ni nini, nayo inazuka lini?
• Kwa nini tusikilize neno la Mungu la kiunabii?
[Maswali ya Funzo]
[Picha katika ukurasa wa 13]
Je, unaweza kueleza maana ya mgeuko-umbo?
[Picha katika ukurasa wa 15]
Nyota ya Mchana tayari imezuka. Je, wajua ilizukaje na lini?