“Siku ya Uvumiliano wa Kidini”

BAADA ya mazungumzo yenye kuvutia pamoja na Mashahidi wa Yehova, mwanamke mmoja mkuu wa shule huko Poland alitenga “Siku ya Uvumiliano wa Kidini” katika shule yake. Alipendekeza kwamba wajitoleaji fulani miongoni mwa wanafunzi—Wakatoliki, Wabudha, na Mashahidi wa Yehova—watayarishe hotuba fupi ili kuwaeleza wanafunzi wenzao imani na matendo yao. Mashahidi wa Yehova watatu vijana walijitolea mara moja.

Siku hiyo ilipofika, Malwina, mwenye umri wa miaka 15, ndiye aliyekuwa wa kwanza kuzungumza. Alisema hivi kwa sehemu: “Wengi wenu walitujua hata kabla hatujajiunga na shule hii kwa sababu tuliwatembelea nyumbani kwenu. Labda hamjui ni kwa nini sisi hufanya hivyo. Ni kwa sababu sisi hufuata mfano wa Yesu Kristo, Mwanzilishi wa Ukristo. Alihubiri habari njema za Ufalme wa Mungu popote pale watu wangeweza kupatikana. Mitume na Wakristo wengine wa mapema walifanya hivyo pia. Katika maeneo mengi, Mashahidi wa Yehova huvumilia majaribu makali ya imani, lakini tunafurahi kwamba katika shule yetu tuna amani ambayo kila mmoja wenu anachangia. Tunawashukuru kwa jambo hilo!”

Malwina alisema hivi kumalizia hotuba yake: “Kuna sababu nyingine inayofanya tuwatembelee nyumbani kwenu. Tunawajali. Biblia inasema kwamba karibuni wanadamu watapatwa na matukio yenye kuogofya. Hivyo, tutakapowatembelea wakati ujao, tunawaomba tafadhali mtusikilize. Tutataka kuwaeleza jinsi tunavyoweza kuishi pamoja milele katika paradiso duniani.”

Mateusz, mwenye umri wa miaka 15, ndiye aliyekuwa wa pili kuzungumza. Mateusz aliwaambia wasikilizaji wake kwamba kwa miaka mingi, Mashahidi wa Yehova wametumia njia nyingi ili kueneza habari njema. Kwa mfano, katika mwaka wa 1914—wakati wa sinema zilizoonyeshwa bila sauti—Mashahidi wa Yehova walikuwa wakionyesha “The Photo-Drama of Creation” (“Drama-Picha ya Uumbaji”), ambayo ilikuwa sinema na slaidi zilizoambatana na sauti.

 Mateusz alizungumzia fungu ambalo redio ilitimiza katika kueneza ujumbe wa Ufalme, kisha akaeleza kuhusu mfumo wa Multilanguage Electronic Phototypesetting System (MEPS) uliobuniwa na Mashahidi wa Yehova. Alisimulia pia jinsi ambavyo Mashahidi wa Yehova wamesaidia kuwajulisha madaktari mbinu za kutibu bila kutumia damu. “Sasa, madaktari mashuhuri wa Poland wanasifu msimamo wetu na wanakazia kwamba kila mwaka wagonjwa wengi ambao si Mashahidi hufanyiwa upasuaji bila kutumia damu,” akasema.

Mateusz alimalizia kwa kutaja ujenzi wa Majumba ya Ufalme na kusema: “Je, ungependa kutembelea Jumba letu la Ufalme? Hakuna malipo ya kuingia humo, wala hakuna sadaka zinazokusanywa.” Akizungumza kuhusu jengo ambalo mikusanyiko ya wilaya inafanyiwa huko Sosnowiec, Mateusz alisema hivi: “Mwapaswa kuona jengo hili kubwa lililojengwa ifaavyo kwa ajili ya mikusanyiko. Mbona tusiende huko pamoja? Tuna dokezo fulani tunalotaka kuwaambia, na rafiki yetu Katarzyna atawaeleza.”

Kisha, Katarzyna mwenye umri wa miaka 15 akasema hivi kwa shauku: “Mnakaribishwa kwenye mkusanyiko wa wilaya wa Mashahidi wa Yehova huko Sosnowiec. Mambo yanayohusu vijana yatazungumziwa.” Katarzyna pia alitaja mwadhimisho ulio mkuu zaidi kwa Wakristo—Ukumbusho wa kifo cha Yesu Kristo. Aliwatia moyo wasikilizaji wake akisema: “Mwaka uliopita watu zaidi ya milioni 14 ulimwenguni kote walihudhuria mwadhimisho huo. Mbona msijiunge nasi wakati ujao?”

Baada ya hotuba zao, Malwina, Mateusz, na Katarzyna waliwapa walimu kitabu Mashahidi wa Yehova—Wapiga-Mbiu wa Ufalme wa Mungu pamoja na video-kaseti mbili zinazozungumzia imani na utendaji wa Mashahidi wa Yehova. * Walimu walizipokea kwa shukrani na kuahidi kuzitumia wakati wa somo la historia.

Baada ya hotuba hizo, Martyna mwenye umri wa miaka 12 aliwaimbia wote waliokuwepo wimbo “Asante, Yehova.” Mashahidi hao vijana ‘walijipa ujasiri kwa njia ya Mungu,’ na kutoa ushahidi mzuri. (1 Wathesalonike 2:2) Ni kielelezo bora kama nini kwa Mashahidi wachanga kila mahali!

[Maelezo ya Chini]

[Picha katika ukurasa wa 26]

Malwina akitayarisha hotuba yake siku chache kabla ya kuitoa shuleni

[Picha katika ukurasa wa 26]

Katarznya akichagua maandiko kwa ajili ya hotuba yake