MAISHA YANGU YA ZAMANI: Nilizaliwa Moundsville, mji mtulivu ulio kando ya Mto Ohio kaskazini mwa West Virginia, Marekani. Nilikuwa mtoto wa pili katika familia yenye watoto wanne, watatu kati yao wakiwa wavulana, na hivyo tuliishi maisha yenye furaha. Wazazi wangu walifanya kazi kwa bidii, walikuwa wanyoofu, na waliwapenda watu. Hatukuwa matajiri, lakini sikuzote tulipata tulichohitaji. Tukiwa Mashahidi wa Yehova, wazazi wetu walijitahidi kadiri wawezavyo ili kutufundisha kanuni za Biblia tulipokuwa wachanga.

Hata hivyo, nilipoanza kubalehe, tayari moyo wangu ulikuwa umeanza kutamani mambo yasiyofaa. Nilitilia shaka ikiwa maisha yanayoongozwa na kanuni za Biblia yanaweza kuwa yenye maana au kuridhisha. Nilifikiri kwamba njia pekee ya kupata furaha ya kweli ni kuwa na uhuru wa kufanya jambo lolote nililotaka. Muda si muda, nikaacha kuhudhuria mikutano ya Kikristo. Kaka yangu na dada yangu mdogo walijiunga nami kuasi. Wazazi wetu walifanya kila walichoweza ili kutusaidia, lakini tulikataa.

Pole kwa pole nikatambua kwamba uhuru niliotamani ungeniongoza katika utumwa wa uraibu. Siku moja nilipokuwa nikitembea kutoka shuleni kwenda nyumbani, rafiki yangu alinipa sigara. Nikakubali. Tangu siku hiyo na kuendelea, nilikubali mazoea mengine mengi yasiyofaa. Muda si muda, nikaanza kutumia dawa za kulevya, kunywa pombe, na kuishi maisha mapotovu. Kwa miaka kadhaa, nilitumia dawa kali za kulevya na kuwa mraibu wa dawa hizo. Uraibu wangu ulipozidi kuongezeka, nilianza kuuza dawa za kulevya ili kutegemeza maisha yangu.

Kadiri nilivyojaribu kuipuuza dhamiri yangu, ndivyo ilivyozidi kunikumbusha kuwa mwenendo wangu haukuwa sawa. Hata hivyo, nilihisi kwamba nilikuwa nimechelewa sana kubadili mwenendo wangu. Licha ya kuzungukwa na watu kwenye sherehe na maonyesho ya muziki, mara nyingi nilijihisi mpweke na nilishuka moyo. Wakati fulani, ningefikiria jinsi wazazi wangu walivyokuwa wenye kuheshimika na wenye tabia nzuri na kujiuliza, kwa nini nilipotea?

 JINSI BIBLIA ILIVYOBADILI MAISHA YANGU: Ingawa nilikuwa nimekata tamaa, wengine hawakuchoka kunisaidia. Katika mwaka wa 2000, wazazi wangu walinialika kuhudhuria kusanyiko la wilaya la Mashahidi wa Yehova. Nilihudhuria lakini shingo upande. Jambo lililonishangaza ni kwamba kaka na dada yangu, walioasi, walialikwa pia.

Nilipokuwa kusanyikoni, nilikumbuka kwamba nilikuwa mahali hapo kwa ajili ya maonyesho ya muziki wenye mdundo mzito karibu mwaka mmoja uliopita. Tofauti niliyoona ilinigusa sana moyo. Wakati wa maonyesho ya muziki, mahali hapo palijaa takataka na moshi wa sigara. Watu wengi waliohudhuria maonyesho hayo hawakuwa na urafiki, na ujumbe wa muziki ulikuwa wenye kuvunja moyo. Lakini kwenye kusanyiko, nilizungukwa na watu wenye furaha ya kweli—walionikaribisha kwa uchangamfu, ingawa sikuwa nimewaona kwa miaka kadhaa. Mahali hapo palikuwa safi, na ujumbe uliotolewa ulikuwa wenye tumaini. Kuona matokeo mazuri ya kweli za Biblia kulinifanya nijiulize kwa nini nilikataa kweli hizo!—Isaya 48:17, 18.

Mara moja baada ya kusanyiko, niliamua kurudi kwenye kutaniko la Kikristo. Vilevile, kaka na dada yangu walichochewa na mambo waliyojionea kusanyikoni, nao wakaamua pia kurudi. Sote watatu tulikubali funzo la Biblia.

Andiko lililonichochea sana ni Yakobo 4:8 linalosema: “Mkaribieni Mungu, naye atawakaribia ninyi.” Nilitambua kwamba ikiwa nilitaka kumkaribia Mungu, nilipaswa kusafisha maisha yangu. Miongoni mwa mabadiliko niliyohitaji kufanya ni kuacha kuvuta sigara, kutumia dawa za kulevya, na kunywa pombe kupita kiasi.—2 Wakorintho 7:1.

Niliacha kushirikiana na marafiki wangu wa zamani na nikatafuta marafiki wapya, miongoni mwa waabudu wa Yehova. Hasa mzee Mkristo aliyenifundisha Biblia alinisaidia sana. Alinipigia simu kwa ukawaida na kunitembelea ili kunijulia hali. Mpaka leo hii, mzee huyo ni mmoja kati ya marafiki wangu wa karibu.

Katika majira ya kuchipua ya mwaka wa 2001, nilionyesha kwamba nimejitoa kumtumikia Mungu kwa kubatizwa katika maji, pamoja na kaka na dada yangu. Unaweza kuwazia jinsi wazazi wetu pamoja na ndugu yetu mdogo aliyebaki mwaminifu walivyoshangilia familia yetu ilipoungana tena katika kumwabudu Yehova.

JINSI AMBAVYO NIMEFAIDIKA: Nilikuwa nikifikiri kwamba kanuni za Biblia zilikuwa zikinizuia kufanya mambo mengi, lakini sasa ninaziona kuwa ulinzi wenye thamani. Biblia ilinisaidia kuacha kutumia na kuuza dawa za kulevya na kuwa raia mwema.

Nina pendeleo la kuwa sehemu ya udugu wa ulimwenguni pote wa waabudu wa Yehova. Kwa kweli, watu hawa wanapendana, na wameungana katika kumtumikia Mungu. (Yohana 13:34, 35) Kati ya udugu huo, nimepata baraka ya pekee sana—mke wangu, Adrianne, ambaye ninampenda na kumthamini sana. Tunapata shangwe nyingi sana kwa kumtumikia Muumba wetu tukiwa pamoja.

Badala ya kuishi maisha ya kibinafsi, sasa mimi ni mhudumu wa wakati wote, ninayefundisha watu jinsi wanavyoweza pia kufaidika kutokana na Neno la Mungu. Kazi hii inanipa furaha kubwa sana. Ninaweza kusema kwa usadikisho mkubwa kwamba Biblia imebadili maisha yangu. Hatimaye nimepata uhuru wa kweli. ▪