Eneo la lugha ya kigeni nchini Ujerumani limeongezeka sana kutokana na idadi kubwa ya watu wanaoingia nchini humo. Katika kipindi cha miezi tisa iliyopita, vikundi 229 vya lugha za kigeni vimeanzishwa. Wahubiri 800 hivi wanahudhuria madarasa 30 ya kozi za lugha katika lugha 13.

Ndugu zetu wanawahubiria watu katika kambi za wakimbizi. Wakitumia vigari katika maeneo zaidi ya 200, akina ndugu wamegawanya machapisho mbalimbali 640,000.

Baraza Linaloongoza liliidhinisha kampeni ya pekee ya kuhubiri kuanzia mwezi Mei hadi Julai 2016. Baadhi ya wahubiri 700 wanaozungumza lugha ya Kiarabu kutoka nchi  saba walitembelea maeneo kumi nchini Austria na Ujerumani, ili kuhubiria idadi kubwa sana ya watu wanaozungumza Kiarabu wanaoishi katika nchi hizo.

Wahubiri 50 wa Kutaniko la Faber Road Kriol nchini Belize kwa kawaida wanahubiri katika eneo lao kwa kutembea kwa miguu. Ndugu wengi hawana uwezo mkubwa wa kifedha, lakini wanatafuta nafasi ya kuonyesha ukarimu. Miaka michache iliyopita, akina ndugu walianza kukusanya sarafu walizookota barabarani walipokuwa wakihubiri nyumba kwa nyumba. Mwishoni mwa kila mwaka, wao hukusanyika ili kuziosha, kuzitenganisha, na kuhesabu sarafu walizokusanya.

Ingawa sarafu nyingi zina thamani ndogo (sawa na nusu ya senti ya Marekani), kila mwaka ndugu hao hukusanya sarafu zenye thamani sawa na dola 225 za (Marekani) Akina ndugu hutumia nusu ya pesa hizo kulipia Gharama za Kutaniko, na nusu ile nyingine, huitumia ili kutegemeza kazi ya ulimwenguni pote.

Tukio moja la pekee la kihistoria nchini Burundi lilitukia mnamo Machi 5, 2016, katika ziara ya tawi iliyofanywa na Anthony Griffin, mwakilishi kutoka makao makuu. Programu nzima ya pekee kwa ajili ya makutaniko ilitangazwa katika maeneo yote nchini kupitia kituo cha redio cha taifa. Inakadiriwa kwamba watu milioni nne walisikiliza!

Matangazo hayo ya redio yalitoa ushahidi mkubwa sana, na watu wengi walisifu jambo hilo. Fundi mitambo mmoja aliyekuwa akifanya kazi wakati wa matangazo, alisema hivi: “Mnapaswa kuandaa programu nyingine nyingi kama hizi!” Na msimamizi wa matangazo ya redio aliandika  hivi: “Ninawatia moyo kuendelea [kuandaa programu kama hii], ambayo bila shaka itawaokoa watu wengi.” Mabasi na teksi nyingi zilifungulia redio ili kusikiliza programu hiyo.

Siku moja kabla ya Ukumbusho wa mwaka wa 2016, ndugu katika kikundi kidogo kilicho kijijini nchini Nepal walikuwa na mkazo kwa sababu kungekuwa na tamasha kubwa la muziki katika shule iliyokuwa karibu na ukumbi waliokodi.

Kwa kawaida, tamasha kama hilo huwa na kelele kubwa sana. Asubuhi akina ndugu walipokuwa wakifanya usafi katika ukumbi wa Ukumbusho, mwandaaji wa tamasha hilo alisema, “Hamtaweza kusikiliza chochote isipokuwa muziki.”

Tamasha hilo lilianza alasiri, na kulikuwa na sauti kubwa kama ilivyotarajiwa. Ingawa akina ndugu walikodisha kikuza sauti chenye uwezo mkubwa kuliko walichopanga kutumia awali, hawakuweza kusikia sauti yoyote walipokuwa wakijaribu vikuza sauti. Ndugu walichanganyikiwa, lakini walisali kwa bidii kuhusu jambo hilo. Kisha, dakika 30 kabla ya Ukumbusho kuanza, ndugu wengi walipokuwa wakifika, muziki ulizimwa ghafla. Ugomvi ulianza miongoni mwa watu ambao walikuwa wamelewa waliokuwako katika tamasha hilo, na polisi wakalifunga. Akina ndugu waliweza kuadhimisha Ukumbusho katika mazingira tulivu, yenye amani na heshima.

Giuseppe ni painia wa kawaida nchini Italia. Yeye ni mfanyakazi katika kampuni ya kutoa huduma za Intaneti, lakini hufanyia kazi zake nyumbani. Mwezi wa Mei  alihudhuria mkutano na wafanyakazi wenzake 70 hivi ili kujadili mbinu mpya za kuboresha huduma za kampuni. Meneja mkuu wa kampuni alianza kwa kusema kwamba kuna mambo wanayoweza kujifunza kwa tovuti fulani zinazofanya vizuri. Kisha, akaonyesha mfano katika skrini. Giuseppe alishangaa kuona ukurasa wa mwanzo wa tovuti ya jw.org kwenye skrini. Kisha, Meneja huyo akasema “Hii ndio tovuti bora zaidi duniani!” Halafu akafafanua kitaalamu kuhusu sehemu mbalimbali za jw.org. Alizungumzia jinsi ambavyo tovuti hiyo ina viunganishi vinavyokuwezesha kupata kwa urahisi kile unachotafuta na kuhusu picha zake maridadi.

Giuseppe anasema hivi: “Wafanyakazi wenzangu walishangaa kujua idadi kubwa ya lugha ambazo hupatikana katika tovuti hiyo. Mwishoni mwa maonyesho hayo, msimamizi wangu aliuambia hivi umati na Meneja: ‘Giuseppe  ni Shahidi wa Yehova.’ Meneja akaniambia: ‘Shirika lenu linapaswa kusifiwa. Mmeunda Tovuti yenye mpangilio mzuri, ambayo makampuni na mashirika mengine duniani yangependa kuiga. Ninajua kwamba jitihada kubwa inahusika kuiboresha na kufanya iwe rahisi kutumia, pia umakini unaohusika ili kushugulikia habari na mambo mengine.’ Niliona aibu kupokea pongezi hizo nyingi hasa kwa kitu ambacho mimi mwenyewe sikuwa nimekifanya. Lakini nilifurahi sana kwa kuwa ushahidi ulitolewa hasa kwa wengi ambao hawakuwajua Mashahidi wa Yehova. Sasa nimekuwa na mazungumzo ya kawaida na baadhi ya wafanyakazi wenzangu, na hata nimeanza kujifunza Biblia na watatu kati yao.” Kampuni ambayo Giuseppe anafanyia kazi inaendelea “kijifunza” kutoka kwenye tovuti ya jw.org, na Giuseppe anaendelea kufanya mazungumzo kuhusu Biblia na wafanyakazi wenzake watatu.

Jorge ni kijana anayeishi nchini Argentina. Mwanzoni mwa mwaka wa 2010, Jorge alipata habari njema kutoka kwa mwanafunzi mwenzake. Kisha, akaanza kujifunza Biblia kwa kutumia kitabu Biblia Inafundisha Nini Hasa? Wakati huo, alikuwa mchezaji wa mpira wa miguu. Alikuwa mchezaji mzuri na alipata nafasi ya kuchezea katika klabu kubwa ya soka. Mnamo Aprili 2014, alipata nafasi nzuri ya kuchezea timu moja nchini Ujerumani. Alifurahi sana kwa kuwa fursa hiyo ingemfanya awe mchezaji mashuhuri, hivyo akakubali. Siku chache kabla hajaondoka kwenda Ulaya, kocha wake alimwambia hivi: “Wewe ni Shahidi wa Yehova sivyo? Usiharibu maisha yako kwa kwenda Ulaya. Nilipokuwa mdogo mimi pia nilikuwa Shahidi. Nilialikwa kujiunga na timu katika nchi fulani ya bara la Asia.  Waliniahidi mambo mengi ambayo yalinivutia sana. Nilienda huko na familia yangu, hata hivyo, tulirudi tukiwa tumevunjika moyo sana.” Jorge anasema hivi: “Maneno yake yalinigusa moyo sana, hivyo nikaamua kutokwenda Ulaya. Mwaka wa 2015, nilibatizwa na kuwa mhubiri wa habari njema.”

Septemba 2015, Kusanyiko la Eneo lenye kichwa “Mwigeni Yesu!” lilifanywa Kampala, nchini Uganda. Wahudhuriaji walifurahi sana, Mark Sanderson wa Baraza Linaloongoza alipotangaza kutolewa kwa Biblia Takatifu—Tafsiri ya Ulimwengu Mpya katika lugha ya Luganda.

Mwanafunzi mmoja wa Biblia alieleza hivi: “Nilifurahi sana kupokea Biblia hii nzuri! Wakati huo, watu nchini humo walikuwa wakijiandaa kwa ajili ya ziara ya papa. Ili kupata michango mingi, Kanisa liliuza rozari ya ‘baraka’ kwa dola 30 (za Marekani). Watu walitaka sana baraka, lakini hawakuwa na pesa za kununua rozari. Hata hivyo, mimi nilipata baraka halisi bila gharama yoyote. Yehova aliwapa baraka wahudhuriaji wote kusanyikoni, na kila mmoja angeweza kutoa mchango wake kwa hiari. Kila siku ninaposoma Neno la Yehova katika lugha yangu ya asili na kumjua vizuri zaidi, ninahisi kwamba hiyo ni baraka. Ninamshukuru Yehova kwa kunipa nakala ya Biblia.”

Ili kuichafua tovuti ya www.ps8318.com, baadhi ya viongozi wa kidini katika eneo fulani nchini Kongo (Kinshasa) waliwaambia waumini wao kwamba machapisho ya Mashahidi wa Yehova huchapishwa katika ulimwengu wa roho. Ili kutegemeza madai yao, walisema kwamba herufi tatu za kwanza, yaani, “www,” zinalingana na namba 666 zinazotajwa  katika kitabu cha Ufunuo. (Ufu. 13:18) Kwa sababu hiyo, baadhi ya watu waliokuwa wakijifunza Biblia waliacha kujifunza.

Baada ya kusali kuhusu jambo hilo, wenzi fulani ambao ni mapainia waliwaalika nyumbani kwao watu wanaojifunza nao Biblia pamoja na wenzi wao. Familia tatu zilikubali mwaliko huo, na baada ya kula, Mashahidi hao waliwaonyesha video yenye kichwa Mashahidi wa Yehova—Tengenezo Linalohubiri Habari Njema. Kile ambacho wageni hao walijifunza kiliondoa kabisa mawazo ya uwongo waliyokuwa nayo kuhusu chanzo cha machapisho yetu. Juma lililofuata, mume wa mwanafunzi mmoja, alisisitiza kwamba mapainia hao wakubali mchango wake wa dola 100 za Marekani na kuutuma kwa ajili ya kazi ya ulimwenguni pote, ingawa yeye mwenyewe alikuwa bado hajaanza kujifunza Biblia.

Ingawa akina ndugu katika eneo fulani la kijijini nchini Papua New Guinea hawapati huduma ya Intaneti, wana hamu kubwa sana ya kujifunza nyimbo mpya za Ufalme. Hivyo Kutaniko la Mundip humtuma ndugu katika mji ulio jirani, ili kufika huko anahitaji kutembea kwa saa mbili, na kisha, kusafiri kwa basi saa mbili nyingine. Anapofika mjini ambako Intaneti inapatikana, huandika nyimbo hizo katika daftari na kisha kusafiri kurudi nyumbani, huko huandika nyimbo hizo kwenye ubao ulio katika Jumba la Ufalme, mahali ambapo kila mtu anaweza kusoma. Wahubiri wengine hunakili nyimbo hizo mpya kwa ajili ya mikutano. Kwa kweli wanathamini sana kuimba nyimbo pamoja na makutaniko mengine duniani kote ikiwa ni sehemu ya ibada yao kwa Yehova.