“Sikuwahi kufikiria ningeweza kumtumikia Yehova kikamili hivi.” Maneno hayo yanaeleza hisia za Gwen, kutoka Uingereza, kuhusu kutumikia katika eneo lenye uhitaji huko Albania. a

 Gwen ni moja kati ya Mashahidi wengi ambao wamehamia Albania ili kusaidia kukusanya “vitu vyenye thamani vya mataifa yote.” (Hagai 2:7) Ni nini huwachochea waeneza-injili hao? Walifanya mabadiliko gani ili wafaulu kuhamia eneo lingine? Na wamepata mambo gani yanayowaletea shangwe ambayo yamewasaidia kuvumilia changamoto?

 Wahubiri wote wanaokuja kusaidia hapa Albania wanafanya hivyo kwa sababu moja, yaani, wote wanampenda Yehova na wanataka kuwasaidia wengine kumjua.

 Kabla ya kuhama, walifanya mabadiliko ili wamtumikie Yehova kwa njia mpya, na hilo liliwasaidia kukabiliana na changamoto za kutumikia katika nchi nyingine. Gwen anasema hivi: “Kwanza, nilijiunga na kikundi cha lugha ya Kialbania katika mji wetu. Kisha nilihudhuria kusanyiko nchini Albania. Baadaye, nilirudi Albania kwa muda mfupi ili nijifunze lugha vizuri zaidi.”

 Manuela, kutoka Italia, alihamia eneo tofauti katika nchi hiyo, ili kusaidia kuanzisha kutaniko dogo, alipokuwa na umri wa miaka 23. Anasema hivi: “Nilitumikia katika eneo hilo kwa miaka minne. Kisha nilipata habari kwamba kulikuwa na kazi nyingi ya kufanya huko Albania. Basi nikafanya mipango ili nitumikie huko kwa miezi kadhaa nikiwa painia.

 Federica alikuwa na umri wa miaka saba tu aliposikia ripoti kuhusu Albania katika kusanyiko. Anasema: “Ndugu aliyekuwa akitoa ripoti hiyo alisema kwamba wahubiri nchini Albania walikuwa wakianzisha mafunzo mengi ya Biblia, na watu waliopendezwa walihudhuria mikutano. Nikaanza kuwaambia wazazi wangu kwamba ningependa kwenda Albania. Walishangaa nilipowaeleza tamaa yangu, lakini baba yangu aliniambia, ‘Sali kuhusu jambo hilo, na kama ni mapenzi ya Yehova, atakusikiliza.’ Miezi kadhaa baadaye, tulialikwa tukiwa familia kutumikia nchini Albania!” Hayo yalifanyika miaka mingi iliyopita, na sasa Federica ameolewa na Orges. Wote wawili ni watumishi wa wakati wote nchini Albania.

 Gianpiero alipostaafu, alihamia nchini Albania akiwa pamoja na Gloria, mke wake. Anasema hivi: Tuliwalea wana wetu tukiwa Italia. Watatu kati yao walihamia nchi nyingine kutumikia mahali penye uhitaji. Tuliguswa moyo na makala ya Mnara wa Mlinzi yenye kichwa ‘Je, Unaweza Kuvuka na Kuingia Makedonia?’ Basi tukafanya bajeti ya jinsi ya kutumia malipo yangu ya kustaafu, ili tuweze kutumikia nchini Albania.”

 Wahubiri wanaojitolea katika nchi nyingine wanahitaji kupanga mambo mapema kwa uangalifu na kufanya mabadiliko yatakayowawezesha kuhama. (Luka 14:28) Vilevile, wanahitaji kuwa na pesa kwa ajili ya mahitaji yao. Akiwa bado huko Uingereza, Gwen, aliyetajwa awali, alianza kuishi pamoja na dada yake, ili afaulu kuweka akiba. Sophia na Christopher, ambao pia wanatoka Uingereza wanasema hivi: “Tuliuza gari letu na baadhi ya fanicha. Tulitarajia kwamba tungeweza kuishi nchini Albania kwa angalau mwaka mmoja.” Inapendeza kwamba walifaulu kubaki kwa muda mrefu zaidi.

 Baadhi ya wahubiri huishi Albania kwa miezi kadhaa, kisha wanarudi katika nchi zao ili kufanya kazi na kuweka akiba, halafu wanarudi Albania. Eliseo na Miriam walifanya hivyo pia. Eliseo anaeleza hivi: “Miriam ametoka katika eneo ambalo hutembelewa na watalii wengi huko Italia, na hivyo ni rahisi sana kupata kazi za muda huko. Wakati wa majira ya kiangazi, tulienda kwenye eneo hilo na kufanya kazi kwa miezi mitatu, kisha tulirudi Albania na kwa miezi tisa iliyobaki tulitumia akiba tuliyokuwa tumepata. Tulifanya hivyo kwa miaka mitano.”

 Wanapohamia eneo lingine, wajitoleaji hao wanahitaji kukabiliana na hali mpya, lakini Mashahidi wenyeji wanawasaidia kukabiliana na changamoto kwa kuwapa ushauri na kuweka mfano mzuri. Sophia aliyetajwa hapo awali, anasema hivi: “Wakati wa majira ya baridi nchini Albania, kunakuwa na baridi zaidi ndani ya nyumba, kuliko nilivyozoea huko nyumbani. Nilijifunza kuvaa kwa njia tofauti kwa kuwatazama akina dada wa eneo hili walivyovaa.” Grzegorz na Sona, mke wake, wanaotoka Poland, walikuja kusaidia katika mji maridadi wa Prizren, huko Kosovo. b Grzegorz anasema hivi: “Wahubiri wa eneo hili ni wanyenyekevu sana, na pia ni wenye fadhili na subira. Wanatusaidia kujifunza lugha yao na mambo mengine mengi pia. Kwa mfano, walituonyesha maduka yanayouza vitu kwa bei nafuu na pia wakatuelekeza jinsi ya kununua chakula sokoni.

 Wale wanaohamia mataifa mengine huanzisha urafiki wa karibu na Mashahidi wenyeji na wanajifunza kuhusu tamaduni zao. Sona anaeleza hivi: “Nimeona jinsi upendo wa Yehova unavyoweza kubadili maisha ya watu. Akina ndugu hao wanaimarisha imani yangu kwa sababu ninaona jinsi walivyobadili kabisa imani yao na maisha yao, walipojifunza kumhusu Yehova. Kutanikoni, tunahisi tunathaminiwa, na tunaona mambo tunayoweza kufanya ili kusaidia. Tunatumikia pamoja na ndugu na dada ambao wamekuwa rafiki zetu.” (Marko 10:29, 30) Gloria anasema hivi: “Ninawajua akina dada wengi ambao walivumilia mateso makali kutoka kwa watu wa jamii yao ambao wanawachukia Mashahidi. Ninapoona jinsi wanavyompenda Yehova, ninatiwa moyo sana.”

 Wahubiri wanaojitolea katika maeneo mengine wanapata fursa ya kujifunza mambo muhimu ambayo huenda hawangejifunza nyumbani. Kwa mfano, wametambua kwamba wanapofanya jambo gumu, au jambo linalowatia wasiwasi, kwa ajili ya Yehova, wanapata shangwe. Stefano anasema hivi: “Nikiwa nyumbani, mara nyingi nilihubiri langoni kupitia kamera na mazungumzo yalikuwa mafupi. Waalbania wanapenda kuwa na mazungumzo marefu, hasa wakinywa kahawa. Kwa kuwa mimi ni mwenye haya sana, mwanzoni nilikuwa na aibu na hata sikujua niseme nini. Hata hivyo, baada ya muda nilijifunza kupendezwa na watu na sasa ninafurahia kuzungumza nao. Ninafurahia zaidi kazi ya kuhubiri.”

 Leah, pamoja na William, mume wake, walihamia Albania kutoka Marekani. Leah anasema hivi: “Kutumikia hapa kumetufundisha njia mpya za kufikiri na kuishi. Tumejifunza mengi kuhusu ukarimu, heshima na urafiki! Tumejifunza njia mpya za kuhubiri, kujadiliana kuhusu Maandiko na kujieleza.” William anasema: “Watu wengi wanaotembelea Albania wanapenda sana fuo maridadi za bahari. Mimi binafsi ninapenda kutembelea milima ya Alps ya Albania yenye mawe mengi. Hata hivyo ninachopenda zaidi ni watu wa Albania. Watu katika vijiji vingi vya eneo letu wamehubiriwa kidogo tu katika kampeni za pekee. Tunapowatembelea, mara nyingi siku nzima huisha kwa kuzungumza na familia chache tu.”

 Wahubiri hao wanaojitolea katika maeneo mengine hupata shangwe nyingi wanapowaona watu wakikubali habari njema. (1 Wathesalonike 2:19, 20) Kwa mfano, Laura, aliyehamia Albania akiwa binti mseja anasema hivi: “Nilitumikia kwa muda mjini Fier. Katika muda wa miaka miwili na nusu, tulipata wahubiri wapya 120! Nilijifunza na 16 kati yao!” Dada mwingine anayeitwa Sandra, anakumbuka hivi: “Nilimhubiria mwanamke aliyekuwa akifanya kazi sokoni. Alibatizwa na kuwa Shahidi kisha akarudi kijijini kwao. Mara ya mwisho tulipozungumza, alikuwa ameanzisha mafunzo 15 ya Biblia.

 Baadhi ya wahubiri waliohamia Albania miaka ya zamani, bado wako huko na wanafurahia sana utumishi wao. Wanashangaa wanapoona kwamba watu waliowahubiria muda mrefu uliopita, baadaye walikubali kweli. (Mhubiri 11:6) Christopher, aliyetajwa awali, anasema: “Nilikutana na mwanamume ambaye hapo awali nilimhubiria na tukaanza kujifunza Biblia pamoja, mara tu nilipohamia Albania. Niliguswa moyo na jinsi alivyokumbuka kihususa mazungumzo yetu ya awali ya Biblia. Sasa, yeye na mke wake ni Mashahidi wa Yehova waliobatizwa.” Federica, aliyetajwa hapo juu, anasema: “Katika kutaniko moja, dada fulani alikuja na kuniuliza ikiwa ninamkumbuka. Aliniambia kwamba nilikuwa nimemhubiria miaka tisa iliyopita. Baada ya muda, nilihamia mji mwingine, naye akaanza kujifunza Biblia na akafanya maendeleo na kubatizwa. Nilidhani kwamba hatukupata matokeo yoyote katika miaka yetu ya kwanza nchini Albania. Nilikuwa nimekosea!”

 Akina ndugu na dada waliohamia Albania au Kosovo, wameshukuru kuona jinsi Yehova amebariki jitihada zao na kuwapa maisha yenye kuridhisha. Baada ya kuishi Albania miaka mingi Eliseo anasema hivi kuhusu mambo aliyoona: “Sisi wanadamu hupumbazika kwa urahisi kwamba tunaweza kupata usalama kwa kutegemea vitu ambavyo ulimwengu huu unasema vinaleta usalama. Lakini hilo si kweli. Kwa kweli, ni kanuni za Yehova tu zinatupatia usalama na kusudi maishani. Kutumikia kwenye eneo lenye uhitaji kunanisaidia kukumbuka jambo hilo. Ninafurahi kufanya yote niwezayo na ninahisi ninathaminiwa. Nimezungukwa na marafiki wa kweli ambao wanajitahidi kufikia malengo kama yangu. Sandra anakubaliana na maneno hayo, anasema: “Nilipohamia eneo lenye uhitaji, nilihisi kana kwamba Yehova amenipa fursa na kutimiza ndoto yangu ya muda mrefu ya kuwa mmishonari. Sijawahi kujuta kuhamia Albania. Nina furaha tele.”