Kaa Macho, Kama Yeremia Alivyofanya

‘Mimi Yehova niko macho kuhusu neno langu ili kulitimiza.’—YER. 1:12.

1, 2. Kwa nini ‘kukaa macho’ kwa Yehova kunalinganishwa na mti wa mlozi?

 KWENYE vilima vya Lebanoni na Israeli, mti wa mlozi ni kati ya miti ambayo inachanua maua kwanza. Maua yake maridadi ya rangi ya waridi au rangi nyeupe yanaweza kuonekana mapema kuanzia mwisho wa mwezi wa Januari (Mwezi wa 1) au mwanzo wa mwezi wa Februari (Mwezi wa 2). Jina la Kiebrania la mti huo linamaanisha kihalisi “anayeamka.”

² Yehova alipomweka rasmi Yeremia awe nabii wake, sifa hiyo ya mti wa mlozi ilitumiwa kwa kufaa kueleza ukweli fulani wa maana. Mwanzoni mwa huduma yake, nabii huyo alionyeshwa katika maono chipukizi la mti huo. Chipukizi hilo lilimaanisha nini? Yehova alieleza hivi: “Niko macho kuhusu neno langu ili kulitimiza.” (Yer. 1:11, 12) Kama vile tu mti wa mlozi ‘ulivyoamka’ mapema, vivyo hivyo, kwa njia ya mfano Yehova alikuwa ‘akiamka mapema’ ili kuwatuma manabii wake wawaonye watu wake kuhusu matokeo ya kutotii. (Yer. 7:25) Naye hangepumzika—‘angekaa macho’—mpaka neno lake la kinabii litimie. Mwaka wa 607 K.W.K., wakati kamili uliowekwa ulipofika, hukumu ya Yehova ilikuja juu ya taifa la Yuda lililoasi imani.

3. Tunaweza kuwa na uhakika gani kumhusu Yehova?

³ Vivyo hivyo leo, Yehova yuko macho, yuko tayari kabisa kutimiza mapenzi yake. Hawezi kamwe kupuuza kutimizwa kwa neno lake. Utayari  wa Yehova unakuchochea jinsi gani? Je, unaamini kwamba mwaka huu wa 2011, Yehova ‘yuko macho’ ili kutimiza ahadi zake? Ikiwa kwa njia fulani tunatilia shaka ahadi za Yehova zilizo hakika, huu ndio wakati wa kuamka kutoka katika usingizi wowote wa kiroho. (Rom. 13:11) Akiwa nabii wa Yehova, Yeremia alijitahidi kukaa macho. Kuchunguza jinsi gani na kwa nini Yeremia alikaa macho kuhusiana na mgawo aliopewa na Mungu kutatusaidia kuona jinsi tunavyoweza kuvumilia katika kazi ambayo Yehova ametupatia.

Ujumbe wa Haraka

4. Yeremia alipatwa na matatizo gani alipokuwa akitangaza ujumbe wake, na ni nini kilichofanya ujumbe huo uwe wa haraka?

⁴ Huenda Yeremia alikuwa na umri wa karibu miaka 25 alipopewa na Yehova mgawo wa kuwa mlinzi. (Yer. 1:1, 2) Lakini alijiona kuwa mvulana tu, asiyestahili kabisa kuzungumza na wazee wa taifa hilo, wanaume wenye umri mkubwa na ambao walikuwa na vyeo vya mamlaka. (Yer. 1:6) Alipaswa kutangaza maonyo makali na hukumu zenye kuogopesha, hasa kwa makuhani, manabii wa uwongo, na watawala, vilevile kwa wale waliofuata ‘mwendo uliopendwa na wengi’ na kusitawisha “ukosefu wa uaminifu unaodumu.” (Yer. 6:13; 8:5, 6) Hekalu lenye utukufu la Mfalme Sulemani, ambalo lilikuwa kitovu cha ibada ya kweli kwa karibu karne nne, lingeharibiwa. Yerusalemu na Yuda zingeachwa ukiwa, na wakaaji wake wangepelekwa utekwani. Kwa kweli, ujumbe ambao Yeremia aliagizwa atangaze ulikuwa wa haraka!

5, 6. (a) Yehova anatumia jamii ya Yeremia jinsi gani leo? (b) Funzo letu litakazia nini?

⁵ Katika nyakati zetu, kwa upendo Yehova amewaandalia wanadamu kikundi cha Wakristo watiwa-mafuta ambao kwa njia ya mfano wanatenda kama walinzi wanaowaonya watu kuhusu hukumu yake juu ya ulimwengu huu. Kwa makumi ya miaka, jamii hiyo ya Yeremia imekuwa ikiwahimiza watu wakazie fikira nyakati tunamoishi. (Yer. 6:17) Biblia inakazia kwamba Yehova, ambaye ni Mtunza-Wakati Mkuu, hachelewi. Siku yake itafika kwa wakati kamili, saa ambayo wanadamu hawatazamii.—Sef. 3:8; Marko 13:33; 2 Pet. 3:9, 10.

⁶ Kumbuka kwamba Yehova yuko macho na ataleta ulimwengu wake mpya wenye uadilifu kwa wakati kamili. Kujua jambo hilo kunapaswa kuwachochea washiriki wa jamii ya Yeremia na kuwasaidia waandamani wao waliojiweka wakfu wakae macho na kutambua kuwa ujumbe wao ni wenye uharaka mkubwa sana. Jambo hilo linakuchochea jinsi gani? Yesu alionyesha kwamba watu wote wanahitaji kuchukua msimamo upande wa Ufalme wa Mungu. Acheni tuchunguze sifa tatu ambazo zilimsaidia Yeremia kukaa macho na kutimiza mgawo aliopewa na ambazo zitatusaidia kufanya hivyo pia.

Kuwapenda Watu

7. Eleza jinsi upendo ulivyomchochea Yeremia kuhubiri ingawa alipata hali ngumu.

⁷ Ni nini kilichomchochea Yeremia kuhubiri hata ingawa alipatwa na hali ngumu? Aliwapenda watu. Yeremia alijua kwamba wachungaji wa uwongo walikuwa wakisababisha matatizo mengi ambayo watu walikabiliana nayo. (Yer. 23:1, 2) Ujuzi huo ulimsaidia kufanya kazi yake kwa upendo na huruma. Alitaka Wayahudi wenzake wasikie neno la Mungu na kuishi. Alihangaika sana hivi kwamba alilia kwa sababu ya msiba ambao ungewapata. (Soma Yeremia 8:21; 9:1.) Kitabu cha Maombolezo kinaonyesha waziwazi jinsi Yeremia alivyopenda na kuhangaikia sana jina la Yehova na watu wake. (Omb. 4:6, 9) Leo unapoona watu wakiwa “wamechunwa ngozi na kutupwa huku na huku kama kondoo wasio na mchungaji,” je, huchochewi kuwapelekea ujumbe wenye kufariji kuhusu Ufalme wa Mungu?—Mt. 9:36.

8. Ni nini kinachoonyesha kwamba kuteseka hakukumfanya Yeremia akasirike?

⁸ Watu ambao Yeremia alitaka kuwasaidia ndio waliomtesa, hata hivyo, hakulipiza kisasi wala kukasirika. Alikuwa mvumilivu na mwenye fadhili, hata kuelekea Mfalme Sedekia  aliyekuwa mwovu! Baada ya Sedekia kumkabidhi kwa maadui ili wamuue, bado Yeremia alimsihi atii sauti ya Yehova. (Yer. 38:4, 5, 19, 20) Je, upendo wetu kuelekea watu ni wenye nguvu kama wa Yeremia?

Ujasiri Kutoka kwa Mungu

9. Tunajua jinsi gani kwamba Mungu ndiye aliyempa Yeremia ujasiri?

⁹ Yehova alipozungumza naye kwa mara ya kwanza, Yeremia alijaribu kutoa visingizio. Hilo linatuonyesha kwamba Yeremia hakuzaliwa na ujasiri na uthabiti ambao alionyesha baadaye. Hapana, kwa kweli Yeremia alikuwa na nguvu zisizo za kawaida wakati wa kazi yake ya kutoa unabii kwa sababu alimtegemea Mungu kikamili. Kwa hakika, Yehova alikuwa pamoja na nabii huyo “kama mwenye nguvu anayetisha” hivi kwamba alimtegemeza Yeremia na kumpa nguvu ili atimize mgawo wake. (Yer. 20:11) Sifa ya Yeremia ya kuwa jasiri na imara ilijulikana sana hivi kwamba wakati wa huduma ya Yesu hapa duniani, watu fulani walifikiri kwamba Yesu ni Yeremia aliyefufuliwa!—Mt. 16:13, 14.

10. Kwa nini inaweza kusemwa kwamba mabaki ya watiwa-mafuta wako ‘juu ya mataifa na falme’?

¹⁰ Akiwa “Mfalme wa mataifa,” Yehova alimwagiza Yeremia atangaze ujumbe wa hukumu kwa mataifa na falme. (Yer. 10:6, 7) Lakini mabaki ya watiwa-mafuta wako “juu ya mataifa na juu ya falme” katika njia gani? (Yer. 1:10) Kama nabii huyo wa zamani, jamii ya Yeremia imepewa mgawo na Mwenye Enzi Kuu ya ulimwengu wote mzima. Kwa hiyo, watumishi wa Mungu waliotiwa mafuta wamepewa mamlaka rasmi ya kutangaza ujumbe wa hukumu ulimwenguni pote juu ya mataifa na falme. Wakiwa wamepewa mamlaka na Mungu Aliye Juu Zaidi na wakitumia lugha iliyo wazi ya Neno lake lililoongozwa na roho takatifu, jamii ya Yeremia inatangaza kwamba mataifa na falme za leo zitang’olewa na kuharibiwa kwa njia ya Mungu wakati wake barabara utakapofika. (Yer. 18:7-10; Ufu. 11:18) Jamii ya Yeremia imeazimia kutopunguza bidii katika kazi waliyopewa na Mungu ya kutangaza duniani pote ujumbe wa hukumu ya Yehova.

11. Ni nini kitakachotusaidia kuendelea kuhubiri bila kuacha tunapokabili hali ngumu?

¹¹ Ni jambo la kawaida kuvunjika moyo nyakati fulani watu wasipopendezwa na ujumbe wetu, tunapopatwa na upinzani, au hali ngumu. (2 Kor. 1:8) Lakini kama Yeremia, na tuendelee kuhubiri. Usife moyo. Kila mmoja wetu na aendelee kutoa dua kwa Mungu, kumtegemea, na ‘kujipa ujasiri’ tunapotafuta msaada wake. (1 The. 2:2) Tukiwa waabudu wa kweli, ni lazima tuendelee kukaa macho ili kutimiza madaraka ambayo Mungu ametupatia. Tunahitaji kuazimia kuendelea kuhubiri bila kuacha kuhusu uharibifu wa dini zinazodai kuwa za Kikristo, ambao ulionyeshwa kimbele na uharibifu wa jiji la Yerusalemu lililokosa uaminifu. Jamii ya Yeremia haitatangaza tu “mwaka wa nia njema upande wa Yehova” bali pia “siku ya kisasi upande wa Mungu wetu.”—Isa. 61:1, 2; 2 Kor. 6:2.

Shangwe ya Moyoni

12. Kwa nini tunaweza kukata kauli kwamba Yeremia aliendelea kuwa na shangwe, na ni jambo gani kuu lililomsaidia kufanya hivyo?

¹² Yeremia alipata shangwe katika kazi yake. Alimwambia Yehova hivi: “Maneno yako yalipatikana, nami nikayala; na neno lako linakuwa kwangu furaha na kushangilia kwa moyo wangu; kwa maana jina lako limeitwa juu yangu, Ee Yehova.” (Yer. 15:16) Yeremia aliona kuwa ni pendeleo kumwakilisha Mungu wa kweli na kuhubiri neno lake. Tunaona kwamba Yeremia alipokazia fikira dhihaka kutoka kwa watu, alipoteza shangwe yake. Alipoanza kukazia fikira uzuri na umuhimu wa ujumbe wake, alipata shangwe tena.—Yer. 20:8, 9.

13. Kwa nini ni jambo la maana kujilisha kweli nzito zaidi za kiroho ili tuendelee kuwa na shangwe?

¹³ Ili tuendelee kuwa na shangwe katika kazi ya kuhubiri siku hizi, tunahitaji kujilisha “chakula kigumu,” kweli nzito za Neno la Mungu. (Ebr. 5:14) Kujifunza mambo mazito zaidi kunajenga  imani. (Kol. 2:6, 7) Kunatusaidia kuelewa jinsi matendo yetu yanavyogusa kikweli moyo wa Yehova. Ikiwa ni vigumu kupata wakati wa kusoma na kujifunza Biblia, tunapaswa kuchunguza tena ratiba au programu yetu. Kujifunza na kutafakari hata kwa dakika chache tu kila siku kunaweza kutuvuta karibu zaidi na Yehova na kutaongeza ‘furaha na kushangilia kwa moyo,’ kama ilivyokuwa kumhusu Yeremia.

14, 15. (a) Kulikuwa na matokeo gani Yeremia aliposhikamana kwa uaminifu na mgawo wake? (b) Watu wa Mungu wanaelewa jambo gani leo kuhusu kazi ya kuhubiri?

¹⁴ Yeremia alitangaza bila kuacha ujumbe wa maonyo na hukumu kutoka kwa Yehova, lakini bado alikazia fikira mgawo wake wa “kujenga na kupanda.” (Yer. 1:10) Kazi yake ya kujenga na kupanda ilizaa matunda. Wayahudi fulani na vilevile watu wasio Waisraeli waliokoka kuharibiwa kwa Yerusalemu mwaka wa 607 K.W.K. Tunajua kuhusu Warekabu, Ebed-meleki, na Baruku. (Yer. 35:19; 39:15-18; 43:5-7) Marafiki hao wa Yeremia waliokuwa washikamanifu na wenye kumwogopa Mungu wanafananisha vizuri leo wale walio na tumaini la kuishi duniani ambao wanasitawisha urafiki na jamii ya Yeremia. Jamii ya Yeremia inafurahia sana kuujenga kiroho ‘umati huo mkubwa.’ (Ufu. 7:9) Vivyo  hivyo, waandamani hao washikamanifu wa watiwa-mafuta wanafurahi sana kuwasaidia watu wenye mioyo minyoofu kupata ujuzi juu ya kweli.

¹⁵ Watu wa Mungu wanaelewa kwamba kuhubiri habari njema si huduma tu ya hadharani kwa wale wanaosikia ujumbe huo bali pia ni tendo la ibada kwa Mungu wetu. Iwe watu watatusikiliza au hawatatusikiliza, kumtolea Yehova utumishi mtakatifu kupitia kazi yetu ya kuhubiri kunatuletea shangwe kubwa.—Zab. 71:23; soma Waroma 1:9.

‘Kaa Macho’ na Utimize Mgawo Wako!

16, 17. Maandiko ya Ufunuo 17:10 na Habakuki 2:3 yanaonyesha jinsi gani uharaka wa nyakati zetu?

¹⁶ Uharaka wa nyakati tunamoishi unakaziwa tunapochunguza unabii ulioongozwa na roho ya Mungu katika Ufunuo 17:10. Mfalme wa saba ametokea, yaani, Serikali Kuu ya Ulimwengu ya Uingereza na Amerika. Tunasoma hivi kumhusu: “Atakapofika [serikali kuu ya saba ya ulimwengu] lazima adumu kwa muda mfupi.” Kufikia sasa, ni lazima ‘muda huo mfupi’ uwe unakaribia kwisha. Nabii Habakuki anatuhakikishia hivi kuhusu mwisho wa mfumo huu mwovu: “Maono hayo bado ni ya wakati uliowekwa . . . Endelea kuyatarajia; kwa maana bila shaka yatatimia. Hayatachelewa.”—Hab. 2:3.

¹⁷ Jiulize hivi: ‘Je, kweli maisha yangu yanaonyesha uharaka wa nyakati zetu? Je, njia yangu ya maisha inaonyesha kwamba ninatazamia mwisho utakuja hivi karibuni? Au je, maamuzi na mambo ninayotanguliza yanaonyesha kwamba sitazamii mwisho unaweza kuja wakati wowote hivi karibuni au hata kwamba sina hakika ikiwa kwa kweli utakuja?’

18, 19. Kwa nini huu si wakati wa kupunguza bidii?

¹⁸ Kazi ya jamii ya mlinzi bado haijakwisha. (Soma Yeremia 1:17-19.) Tunapata shangwe kama nini kwa kujua kwamba mabaki ya watiwa-mafuta wanasimama bila kutikisika, kama “nguzo ya chuma” na “jiji lenye ngome”! ‘Viuno vyao vimefungwa kwa ile kweli,’ yaani, wanaruhusu Neno la Mungu liwatie nguvu mpaka wamalize kazi waliyopewa. (Efe. 6:14) Wakiwa wameazimia vivyo hivyo, wale wa umati mkubwa wanaunga mkono kwa bidii jamii ya Yeremia katika kutimiza mgawo waliopewa na Mungu.

¹⁹ Huu si wakati wa kupunguza bidii katika kazi ya Ufalme, badala yake ni wakati wa kuchunguza maana ya andiko la Yeremia 12:5. (Soma.) Sisi sote tunapatwa na majaribu ambayo ni lazima tuvumilie. Majaribu hayo ya imani yanaweza kulinganishwa na “watu wanaoenda kwa miguu” ambao ni lazima tukimbie pamoja nao. Ingawa hivyo, ile “dhiki kuu” inapokaribia, tunaweza kutazamia kwamba matatizo yataongezeka. (Mt. 24:21) Kupambana na matatizo makubwa zaidi yaliyo mbele kunaweza kulinganishwa na “kushindana mbio na farasi.” Mwanadamu anahitaji nguvu nyingi za kuvumilia ili ashindane na farasi wanaokimbia mbio sana. Kwa hiyo, tunafaidika kwa kuvumilia majaribu tunayopata sasa, kwa kuwa yanaweza kututayarisha kuvumilia majaribu yaliyo mbele.

20. Umeazimia kufanya nini?

²⁰ Sote tunaweza kumwiga Yeremia na kufanikiwa kutimiza mgawo wetu wa kuhubiri! Sifa kama vile upendo, ujasiri, na shangwe zilimsaidia Yeremia kutimiza kwa uaminifu huduma yake ya miaka 67. Maua maridadi ya mti wa mlozi yanatukumbusha kwamba Yehova ‘atakaa macho’ kuhusiana na neno lake ili alitimize. Basi, tuna sababu nzuri za kufanya hivyo pia. Yeremia ‘alikaa macho,’ sisi pia tunaweza.

Je, Unakumbuka?

• Upendo ulimsaidia jinsi gani Yeremia ‘kukaa macho’ katika mgawo wake?

• Kwa nini tunahitaji ujasiri unaotoka kwa Mungu?

• Ni nini kilichomsaidia Yeremia kuendelea kuwa na shangwe?

• Kwa nini unataka ‘kukaa macho’?

[Maswali ya Funzo]

[Picha katika ukurasa wa 31]

Je, utaendelea kuhubiri hata ukipata upinzani?