SABABU INAYOFANYA WATU FULANI WAWE NA MASHAKA: Kulingana na uchunguzi uliofanywa hivi karibuni, galaksi yetu peke yake ao kikundi chetu cha nyota kinaweza kuwa na sayari miliare 100 hivi. Kwa sababu ya ukubwa wa ulimwengu, watu wengi wanajiuliza, ‘Sababu gani Muumbaji mweza-yote anaweza kuangalia mambo wanadamu wa hali ya chini wanafanya katika sayari ndogo?’

MAMBO NENO LA MUNGU LINAFUNDISHA: Mungu hakutupatia tu Biblia na kisha akaacha kutuhangaikia. Lakini, anatuhakikishia hivi: “Nitakupa shauri jicho langu likiwa linakutazama.”—Zaburi 32:8.

Fikiria Hagari, mwanamuke Mumisri aliyeishi kati ya mwaka wa 1901 na 2000 mbele ya kuzaliwa kwa Yesu. Hagari hakuwa anamuheshimu Sarai, mukubwa wake wa kazi, kwa hiyo Sarai akamufezehesha, na Hagari akakimbilia katika jangwa. Mungu aliacha kumuhangaikia Hagari kwa sababu alifanya makosa? Biblia inaeleza hivi: ‘Malaika wa Yehova akamukuta.’ Malaika huyo alimutia Hagari moyo kwa kusema hivi: “Yehova ameyasikia mateso yako.” Kisha Hagari akamuambia Yehova hivi: “Wewe ni Mungu mwenye kuona.”—Mwanzo 16:4-13.

“Mungu mwenye kuona” anakutazama wewe pia. Kwa mufano: Mama mwenye upendo anatazama kwa uangalifu watoto wake wadogo, ikiwa mutoto ni mudogo sana, ana lazima zaidi ya kuhangaikiwa na wazazi wake. Vilevile, Mungu anatutazama kwa uangalifu zaidi sana wakati sisi ni wa hali ya chini na tuko wazaifu. Yehova anasema hivi: ‘Mimi ninakaa kileleni [ao juu sana] na katika mahali patakatifu, pia pamoja na mutu aliyepondwa na mwenye roho ya unyenyekevu, ili kuipa uhai roho ya watu wa hali ya chini na kuupa uhai moyo wa wale wanaopondwa.’—Isaya 57:15.

Hata hivyo, unaweza kujiuliza hivi: ‘Mungu ananiona namna gani? Ananihukumu kwa kuona tu hali yangu ya inje, ao anaangalia ndani ya moyo wangu na kuelewa kabisa namna niko?’