உலக சமாதானத்திற்காக மனிதர்கள் எடுத்திருக்கும் முயற்சிகள் படுதோல்வி அடைந்திருக்கின்றன, இனிமேலும் படுதோல்விதான் அடையப்போகின்றன. இதற்குப் பல காரணங்கள் இருக்கின்றன:

•   “மனுஷனுக்கு . . . தன் காலடிகளை நடத்தும் அதிகாரம் இல்லை.” (எரேமியா 10:23) தங்களைத் தாங்களே ஆட்சி செய்துகொள்கிற திறமையுடனோ உரிமையுடனோ மனிதர்கள் படைக்கப்படவில்லை, அதனால் நிலையான சமாதானத்தை அவர்களால் அடைய முடியாது.

•   “அதிகாரிகளை நம்பாதீர்கள், மற்ற மனிதர்களையும் நம்பாதீர்கள். அவர்களால் உங்கள் உயிரைக் காப்பாற்ற முடியாது. அவர்களுடைய உயிர்சக்தி போய்விடுகிறது, அவர்கள் மண்ணுக்குத் திரும்புகிறார்கள். அதே நாளில் அவர்களுடைய யோசனைகள் அழிந்துபோகின்றன.” (சங்கீதம் 146:3, 4) மிகச் சிறந்த நோக்கத்தோடு செயல்படுகிற அரசாங்கத் தலைவர்களால்கூட, போருக்கான அடிப்படைக் காரணங்களுக்கு நிரந்தர தீர்வைக் கண்டுபிடிக்க முடியாது.

•   “கடைசி நாட்களில், சமாளிக்க முடியாத அளவுக்கு நிலைமை படுமோசமாக இருக்கும் . . . ஏனென்றால், மனிதர்கள் . . . கொடூரமானவர்களாக, நல்ல காரியங்களை விரும்பாதவர்களாக, நம்பிக்கைத் துரோகிகளாக, அடங்காதவர்களாக, தலைக்கனம் பிடித்தவர்களாக” இருப்பார்கள். (2 தீமோத்தேயு 3:1-4) இந்தப் பொல்லாத உலகத்தின் “கடைசி நாட்களில்” நாம் வாழ்ந்துவருகிறோம்; இந்தக் காலப்பகுதியில் இருக்கிற ஜனங்களுடைய மனப்பான்மை இந்தளவு மோசமாக இருப்பதால் சமாதானம் கிடைப்பது ரொம்பவே கஷ்டம்.

•   “பூமிக்கும் கடலுக்கும் ஐயோ, கேடு! ஏனென்றால், பிசாசு தனக்குக் கொஞ்சக் காலம்தான் இருக்கிறது என்று தெரிந்து பயங்கர கோபத்தோடு உங்களிடம் வந்திருக்கிறான்.” (வெளிப்படுத்துதல் 12:12) கடவுளுடைய எதிரியான பிசாசு பூமிக்குத் தள்ளப்பட்டிருக்கிறான், தன்னுடைய கொடூர குணங்களைப் பின்பற்றுவதற்கு மக்களை அவன் தூண்டிவிடுகிறான். அவன் ‘இந்த உலகத்தை ஆளுகிறவனாக’ இருக்கும்வரை நாம் சமாதானத்தோடு வாழவே முடியாது.—யோவான் 12:31.

•   “[கடவுளுடைய அரசாங்கம்] மற்ற எல்லா ராஜ்யங்களையும் [அதாவது, கடவுளை எதிர்க்கிற எல்லா அரசாங்கங்களையும்] நொறுக்கி, அடியோடு அழித்துவிட்டு, அது மட்டும் என்றென்றும் நிலைத்திருக்கும்.” (தானியேல் 2:44) நிரந்தர உலக சமாதானம் வேண்டுமென்ற நம்முடைய ஆசையை எந்த மனித அரசாங்கமும் நிறைவேற்றாது, கடவுளுடைய அரசாங்கம்தான் நிறைவேற்றி வைக்கும்.—சங்கீதம் 145:16.