Karik Ita hatene ona katak han ai-han neʼebé la diʼak bele estraga Ita-nia saúde. Joven sira neʼebé iha toman atu han buat neʼebé la diʼak, bainhira sira sai boot, sira la husik toman neʼe. Tan neʼe diʼak atu haburas toman diʼak kona-ba saida mak Ita han kuandu sei joven.

•  Saida mak ai-han neʼebé diʼak ba saúde?

•  Oinsá mak Ita bele sai toman atu han ai-han neʼebé diʼak ba saúde?

•  Ita-nia kolega hanoin saida?

 Bíblia haruka ita atu ‘kontrola ita-nia hahalok’ no neʼe inklui ita-nia toman kona-ba han. (1 Timóteo 3:11) Hanoin prinsípiu neʼe, no mós importante atu hatene buat tuirmai . . .

•   Ai-han neʼebé diʼak ba saúde inklui hahán oioin. Ai-han fahe ba grupu lima, neʼe inklui produtu leiteriu, proteína, ai-fuan, modo no musan ka fini sira. Dala ruma ema para atu han ai-han husi grupu balu tanba sira hanoin katak neʼe bele ajuda sira hatún isin. Maibé se Ita halo nuneʼe Ita-nia isin sei falta buat diʼak neʼebé Ita presiza.

   Sujestaun: Halo riset no koʼalia ho Ita-nia doutór atu buka-hatene kona-ba benefísiu husi ai-han oioin. Porezemplu:

   Bainhira Ita han karboidrata neʼe ajuda Ita atu iha enerjia. Proteína sira ajuda Ita-nia isin atu luta hasoru infesaun no mós hametin no hadiʼa Ita-nia uat sira. Bokur balu mak diʼak no bele hamenus risku atu hetan ataka fuan no mós ajuda Ita atu iha enerjia. Maibé Ita presiza han bokur neʼebé natoon.

   “Haʼu koko atu han ai-han neʼebé diʼak husi ai-han grupu lima. No haʼu hanoin, dala ruma la sala atu han xokolate ka ai-han sira husi restaurante. Maibé Ita labele han deʼit hahán sira-neʼe. Diʼak atu kontrola buat neʼebé Ita han, labele han buat ida barak liu fali buat seluk.”​—Brenda.

•   Ai-han neʼebé diʼak ba saúde katak iha hanoin neʼebé loos kona-ba hahán. Neʼe katak Ita la hamenus demais Ita-nia hahán toʼo Ita sempre hamlaha no tuirmai Ita han barak demais. No mós Ita la bandu Ita-nia an atu la han buat ruma neʼebé Ita gosta.

   Sujestaun: Durante fulan ida, tau atensaun ba buat neʼebé Ita han. Dala hira mak Ita halo buat neʼebé la diʼak ba saúde neʼebé temi iha leten? Ita bele halo mudansa saida atu bele han ai-han neʼebé diʼak ba saúde?

   “Dala ruma, ba loron balu haʼu han barak demais, no tuirmai haʼu han uitoan deʼit. Ikusmai, haʼu deside atu la sura tan kaloria iha hahán neʼebé haʼu han. Haʼu mós deside atu la han barak demais no para han kuandu haʼu sente bosu. Presiza tempu maibé agora haʼu iha toman diʼak no han ai-han neʼebé diʼak ba saúde.”​—Hailey.

•   Deside nanis saida mak Ita sei han. Bíblia hatete: “Ema badinas nia planu sei hetan duni susesu.” (Provérbios 21:5) Se Ita hakarak haburas toman diʼak atu han ai-han neʼebé diʼak ba saúde, Ita presiza halo planu.

   “Ita presiza halo planu atu bele sai toman atu han ai-han neʼebé diʼak ba saúde, no baibain Ita presiza prepara rasik hahán neʼebé diʼak ba saúde. Maski dala ruma neʼe susar, maibé Ita-nia hakaʼas la saugati deʼit. No dala ruma neʼe mós bele ajuda Ita poupa osan.”​—Thomas.

•   Troka buat neʼebé Ita han. Bíblia hatete: “Proteje matenek.” (Provérbios 3:21) Matenek bele ajuda Ita atu hanoin kona-ba dalan oioin atu bele prepara ai-han neʼebé diʼak ba saúde no ajuda Ita haburas toman neʼebé diʼak kona-ba buat neʼebé Ita han.

   “Loroloron, haʼu troka buat neʼebé haʼu han. Haʼu troka buat ida neʼebé la diʼak ho buat ruma neʼebé diʼak. Porezemplu, duké han xokolate, haʼu han masán. Lakleur deʼit haʼu konsege troka buat barak neʼebé haʼu han loroloron.”​—Kia.

•   Iha hanoin neʼebé loos. Bíblia hatete: “Han ó-nia ai-han ho haksolok.” (Eclesiastes 9:7) Han ai-han neʼebé diʼak ba saúde la dehan katak Ita labele han ho kontente no neʼe mós la dehan katak Ita tenke hanoin barak kona-ba buat hotu neʼebé Ita han. Maski Ita presiza hatún isin, maibé hanoin-hetan Ita-nia objetivu mak atu iha saúde neʼebé diʼak. Iha hanoin neʼebé loos kona-ba buat neʼebé Ita hakarak atu kumpre.

   “Foin lalais haʼu hatún isin kilograma 13. Maibé durante tempu neʼe haʼu nunka para han, para atu han hahán balu husi grupu lima ka fó sala ba haʼu-nia an se haʼu han dose. Haʼu rekoñese katak hatún isin la akontese lalais deʼit no haʼu presiza troka haʼu-nia toman kona-ba buat neʼebé haʼu han.”​—Melanie.