“La iha ema ida mak iha domin boot liu fali ema neʼebé entrega nia moris tanba ninia belun sira.”—João 15:13, Tradusaun Mundu Foun.

 “Ema ida la bele hadomi liu fali ema neebe saran nia moris tan nia belun sira.”—Joao 15:13, Liafuan diak ba imi, segunda edisaun.

 Jesus ajuda ninia dixípulu sira atu komprende katak sira presiza hadomi malu tebes toʼo prontu mate ba sira-nia maluk.

 Foin antes neʼe, Jesus dehan ba ninia apóstolu sira: “Haʼu-nia ukun-fuan mak neʼe: Imi tenke hadomi malu hanesan haʼu hadomi imi.” (João 15:12) Jesus hatudu domin hanesan saida ba sira? Jesus prontu atu sakrifika an no la hanoin an deʼit. Durante nia halaʼo ninia knaar iha rai, nia tau uluk ninia dixípulu sira-nia presiza no sira-nia diʼak duké buka nia rasik nia diʼak. Nia kura ema neʼebé moras no hanorin kona-ba Maromak nia Ukun. a Nia mós halo serbisu kiʼik tanba hanoin ema seluk nia diʼak. (Mateus 9:35; Lucas 22:27; João 13:3-5) Maibé iha João 15:13, Jesus refere ba domin neʼebé boot liu fali ida-neʼe. Tuir loloos oras balu liu tiha, nia hatudu domin hanesan neʼe bainhira “fó ninia moris hodi sosa fali ema barak”. (Mateus 20:28; 22:39) Liuhusi dalan espesiál neʼe, nia hatudu katak nia hadomi ema seluk liu fali ninia an rasik.

 Jesus hadomi ema hotu. Maibé nia hadomi liuliu ema neʼebé halo tuir ninia hanorin. Nia haree ninia dixípulu sira nuʼudar ninia belun tanba sira halo tuir ninia hanorin no laran-metin ba nia iha ninia tempu susar. (Lucas 22:28; João 15:14, 15) Neʼe motiva duni Jesus atu fó ninia an nuʼudar sakrifísiu.

 Ema Kristaun iha apóstolu nia tempu aplika duni Jesus nia liafuan neʼe iha sira-nia moris, no sira prontu mate ba sira-nia maluk Kristaun. (1 João 3:16) Tuir loloos, domin neʼebé la hanoin an deʼit hanesan Jesus hatudu mak sinál ba ema Kristaun neʼebé loos.—João 13:34, 35.

 Evanjellu João kapítulu 13 toʼo 17 fó sai Jesus nia konsellu ikus ba ninia apóstolu naʼin-11 neʼebé laran-metin, no mós ninia orasaun ikus hamutuk ho sira iha oras balu antes nia mate. Iha kapítulu 15, Jesus hanorin katak ninia dixípulu sira presiza iha unidade ho nia atu bele prova katak sira mak ninia dixípulu. Nia kompara ninia dixípulu sira ho uvas-sanak neʼebé fó fuan, no haruka sira atu “kontinua fó fuan barak”. (João 15:1-5, 8) Dalan ida mak hodi hatudu domin neʼebé tau uluk ema seluk nia diʼak, neʼe inklui haklaken “liafuan diʼak kona-ba Maromak nia Ukun” hanesan buat neʼebé Jesus halo.—Lucas 4:43; João 15:10, 17.

 Haree vídeo badak neʼe hodi komprende kona-ba livru João.