“Buat naran deʼit neʼebé imi halo, halo ida-neʼe ho laran tomak hanesan imi halo ba Jeová, laʼós ba ema.”—Koloso 3:23, Tradusaun Mundu Foun.

 “Buat hotu nebe imi halo, halo ho laran hanesan imi halo tuir Maromak nia hakarak, laʼos ema nia hakarak.”—Koloso 3:23, Liafuan diak ba imi, segunda edisaun.

 Ema Kristaun tenke hakaʼas an atu serbisu ho badinas tanba ninia atitude kona-ba serbisu liga ho ninia adorasaun ba Maromak Jeová.

 “Buat naran deʼit neʼebé imi halo.” Ema neʼebé hakarak adora Jeová hakaʼas an atu halo tuir Bíblia nia matadalan iha buat hotu neʼebé sira halo. Sira hakaʼas an atu serbisu badinas, laran-moos, no hatudu hahalok neʼebé ema bele tau konfiansa iha sira-nia atividade loroloron iha uma, serbisu-fatin, no eskola.—Provérbios 11:13; Roma 12:11; Ebreu 13:18.

 “Halo ida-neʼe ho laran tomak.” Fraze “ho laran tomak” tradús husi lian Gregu neʼebé fó ideia kona-ba “ema nia laran-metin atu halo ka kumpre Maromak nia hakarak ho ninia forsa tomak”. a Ema hanesan neʼe uza ninia abilidade no kbiit tomak kuandu halaʼo ninia knaar.

 “Ba Jeová, laʼós ba ema.” Ema Kristuan hanoin katak serbisu hotu mak importante tanba ida-neʼe bele afeta sira-nia relasaun ho Maromak Jeová. Importante liu ba sira atu halo Maromak kontente, laʼós patraun ka ema seluk. Kuandu ema Kristuan ida serbisu ho badinas no hatudu atitude neʼebé pozitivu, nia sei iha naran diʼak no bele book ema seluk atu hahiʼi Maromak neʼebé nia adora. Nia hatudu katak nia halo buat hotu neʼebé nia bele hodi ‘ema la koʼalia aat kona-ba Maromak nia naran’.—1 Timóteo 6:1; Koloso 3:22.

 Apóstolu Paulo mak hakerek livru Koloso ba ema Kristaun iha sidade antigu Koloso. b Karik nia hakerek karta neʼe maizumenus tinan 60-61 EC, bainhira nia moris nuʼudar dadur ba dala primeiru iha sidade Roma no besik ona atu sai livre.

 Livru Koloso iha konsellu neʼebé ajuda ema Kristaun husi kultura no situasaun moris oioin atu adora Maromak ho unidade. (Koloso 3:11) Livru neʼe anima sira atu banati-tuir Maromak nia hahalok hanesan domin, laran-diʼak, no laran-sadiʼa. (Koloso 3:12-14) Livru neʼe mós esplika oinsá mak adorasaun ba Maromak bele afeta buat hotu iha ema nia moris.—Koloso 3:18–4:1.

 “No iha buat saida deit nebee imi halo, halo ho laran tomak, hanesan ba Nai, no laos ba ema.”—Bíblia Kadi Kapasidade.

 Haree vídeo badak neʼe hodi komprende kona-ba livru Koloso.