Feen-laʼen neʼebé haree malu la diʼak hanoin katak divórsiu sei lori diʼak mós ba sira-nia oan, tanba diʼak liu sira la moris ho inan-aman neʼebé hirus malu. Maibé realidade mak saida?

•  Divórsiu fó impaktu saida deʼit ba oan sira?

•  Haʼu-nia oan sei kontente se haʼu divórsiu ka lae?

•  Saida deʼit mak haʼu presiza hatene kona-ba tau matan ba oan depois divórsiu ona?

•  Iha dalan neʼebé diʼak liu atu rezolve problema neʼe ka lae?

 Peskiza fó sai katak divórsiu bele fó impaktu aat tebes ba labarik sira. Divórsiu bele afeta labarik sira atu:

•   hirus lalais, hanoin barak, no depresaun

•   iha hahalok neʼebé bele halo susar ba ninia an no ema seluk

•   la fokus aprende iha eskola ka lakohi eskola tan

•   lalais sai moras

 No mós, labarik barak fó sala ba sira-nia an tanba inan-aman divórsiu. Sira hanoin katak sira mak hun ba problema ka sira bele hapara sira-nia inan-aman atu la divórsiu.

 Divórsiu bele fó impaktu ba oan sira toʼo sira boot, karik neʼe halo susar ba sira atu hafolin sira-nia an no susar tau fiar ba ema seluk. Kuandu sira kaben, sira mós karik sei divórsiu se sira hasoru problema iha sira-nia moris kaben.

 Pontu importante: Maski ema balu hanoin katak divórsiu sei lori diʼak ba sira-nia oan, maibé peskiza la apoia hanoin hanesan neʼe. Espesialista ida kona-ba tau matan ba labarik, naran Penelope Leach hatete: “Divórsiu harahun labarik sira-nia moris.” a

 Bíblia nia prinsípiu: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.

 Ema balu sei dehan sin. Maibé hanoin-hetan, buat neʼebé inan-aman sente la hanesan ho buat neʼebé oan sira sente. Inan-aman neʼebé hanoin atu halo divórsiu, hakarak atu halaʼo moris foun. Maibé, oan sira baibain la gosta mudansa no hakarak nafatin hela hamutuk ho sira-nia inan-aman.

 Autór sira ba livru The Unexpected Legacy of Divorce entrevista labarik rihun ba rihun neʼebé sira-nia inan-aman divórsiu, no hakerek: “Oan sira-neʼe la hatete katak sira kontente liu maibé sira dehan: ‘Kuandu haʼu-nia inan-aman divórsiu, haʼu-nia tempu kiʼik neʼebé kontente mós remata.’” Livru neʼe mós fó sai katak divórsiu halo oan sira hanoin katak mundu mak “fatin neʼebé perigu liu no labele tau fiar”. Sira hanoin hanesan neʼe “tanba relasaun entre ema naʼin-rua neʼebé besik tebes iha sira-nia moris neʼebé tuir loloos forte maibé naksobu”.

 Pontu importante: Posibilidade boot ba oan sira atu la sente kontente kuandu sira-nia inan-aman divórsiu.

 Bíblia nia prinsípiu: “Laran-triste halakon ema nia forsa.”—Provérbios 17:22.

 Inan-aman balu neʼebé divórsiu ona koko atu fahe didiʼak sira-nia responsabilidade atu haboot sira-nia oan hanesan ho inan-aman neʼebé la divórsiu. Maibé peskiza hatudu katak ema neʼebé divórsiu ona dala ruma:

•   ladún iha tempu ba sira-nia oan

•   hanorin sira-nia oan iha dalan neʼebé la hanesan

•   halo maña sira-nia oan tanba sente sala ka kole

 Oan sira mós bele sente katak sira la presiza rona ba sira-nia inan-aman, tanba inan-aman sira-neʼe la moris tuir sira-nia promesa, porezemplu atu laran-metin ka tau fiar ba malu. Tan neʼe, oan sira hanoin: ‘Tanbasá presiza rona ba sira?’

 Pontu importante: Baibain susar ba inan-aman neʼebé divórsiu ona atu tau matan ba oan hamutuk. Maibé situasaun hanesan neʼe halo susar liután ba oan sira.

 Bíblia nia prinsípiu: “Imi aman sira, keta halo imi-nia oan sai laran-hirus, atu nuneʼe sira la sai laran-triste.”—Koloso 3:21.

 Dala barak, diʼak liu se feen no laʼen hakaʼas an atu hadiʼa sira-nia moris kaben nian duké buka atu halaʼo moris foun. Livru The Case for Marriage hatete: “Ema barak karik hanoin katak labele salva moris kaben neʼebé iha problema. Maibé, neʼe la loos. . . . Kaben-naʼin neʼebé hakaʼas an atu hametin sira-nia moris kaben maski difisil, ikusmai bele iha moris kaben neʼebé kontente liu.” Tuir loloos, oan sira sei moris kontente liu se sira-nia inan-aman la divórsiu.

 Maibé neʼe la dehan katak ema ida labele halo divórsiu. Bíblia hatete katak ema ida bele divórsiu ninia pár kuandu sira ida halo sala seksuál. (Mateus 19:9) Maibé, Bíblia mós hatete katak “ema neʼebé matenek hanoin didiʼak kona-ba ninia hakat ida-idak”. (Provérbios 14:15) Feen-laʼen sira neʼebé iha hanoin atu halo divórsiu presiza tetu didiʼak kona-ba buat oioin, inklui oinsá mak divórsiu afeta oan sira.

 Klaru, kaben-naʼin neʼebé iha problema iha moris kaben nian presiza hakaʼas an atu hadiʼa problema. Sira labele rende an deʼit. Bíblia iha matadalan diʼak tebes neʼebé bele ajuda feen no laʼen atu iha hahalok neʼebé sira presiza hodi halaʼo moris kaben nian ho kontente no dura ba tempu kleur. Neʼe la halo ita hakfodak, tanba Autór ba Bíblia mak Maromak Jeová neʼebé arranju moris kaben.—Mateus 19:4-6.

 Bíblia nia prinsípiu: “Haʼu, Jeová, mak imi-nia Maromak, Haʼu hanorin imi kona-ba buat neʼebé diʼak liu ba imi.”—Isaias 48:17.