Miguel neʼebé relijiaun balu bolu nuʼudar “São Miguel” mak Jesus nia naran antes no depois nia moris iha rai. a Miguel haksesuk malu ho Diabu kuandu Moisés mate. Miguel mós ajuda anju ida atu hatoʼo Maromak nia mensajen ba profeta Daniel. (Daniel 10:13, 21; Judas 9) Miguel nia naran signifika “Se mak hanesan Maromak?” no nia moris tuir ninia naran hodi defende Maromak nia Ukun no kontra Maromak nia inimigu sira.​—Daniel 12:1; Apokalipse 12:7.

 Hanoin toʼok razaun balu tanbasá ita bele dehan katak Jesus mak arkanju Miguel.

•   Miguel mak “arkanju”. (Judas 9) Títulu “arkanju” signifika “xefe ba anju sira”. Títulu neʼe mosu dala rua deʼit iha Bíblia laran. Iha eskritura rua neʼe, liafuan neʼebé tradús nuʼudar “arkanju” mak liafuan singulár. Neʼe katak iha anju ida deʼit ho títulu neʼe. Eskritura ida hatete katak Naʼi Jesus neʼebé moris hiʼas ona “sei tun husi lalehan no nia sei fó mandamentu ho arkanju nia lian”. (1 Tesalónika 4:16) Jesus iha “arkanju nia lian” tanba nia mak arkanju Miguel.

•   Miguel mak xefe ba tropa lalehan nian. “Miguel no ninia anju sira halo funu hasoru samea boot” katak Satanás. (Apokalipse 12:7) Miguel iha podér boot iha lalehan tanba Bíblia bolu nia nuʼudar “ulun-naʼin boot ida”. (Daniel 10:13, 21; 12:1) Matenek-naʼin ida kona-ba Testamentu Foun naran David E. Aune hatete katak Miguel nia títulu sira-neʼe hatudu katak nia mak xefe ba tropa lalehan nian.

   Bíblia mós temi naran ida tan neʼebé iha podér atu ukun tropa lalehan nian. Bíblia temi kona-ba “tempu neʼebé Naʼi Jesus mosu mai husi lalehan hamutuk ho ninia anju sira neʼebé iha kbiit boot ho ahi neʼebé lakan, no nia sei fó-kastigu”. (1 Tesalónika 1:7, 8; Mateus 16:27) Jesus “saʼe ona ba lalehan; anju no sira neʼebé iha podér no kbiit, tenke hakruʼuk ba nia”. (1 Pedro 3:21, 22) Klaru katak Maromak sei la hili xefe rua atu ukun tropa lalehan neʼebé kompete malu. Ita bele fiar katak Jesus no Miguel mak ema ida deʼit.

•   Miguel “sei hamriik” durante “tempu susar neʼebé ema seidauk hasoru”. (Daniel 12:1) Iha livru Daniel, baibain liafuan “hamriik” refere ba liurai neʼebé hamriik atu halo buat espesiál ruma. (Daniel 11:2-4, 21) Bíblia mós bolu Jesus Kristu nuʼudar “Maromak nia Liafuan” no nuʼudar “Liurai ba liurai”, nia sei halo buat espesiál ruma hodi halakon Maromak nia inimigu hotu no proteje Maromak nia povu. (Apokalipse 19:11-16) Nia sei halo ida-neʼe durante tempu “terus boot” no “toʼo agora seidauk mosu terus hanesan neʼe”.​—Mateus 24:21, 42.