Baibain ita bolu ema neʼebé prontu atu ajuda ema seluk neʼebé iha susar laran nuʼudar “ema Samaria neʼebé diʼak”. Naran neʼe mai husi Jesus nia istória ka ai-knanoik ida neʼebé nia konta katak ema neʼebé diʼak sei hatudu laran-sadiʼa ba ema seluk maski husi nasaun ka rasa neʼebé la hanesan.

Iha informasaun neʼe

•  “Ema Samaria neʼebé diʼak” mak ai-knanoik kona-ba saida?

•  Tanbasá mak Jesus konta ai-knanoik neʼe?

•  Ita aprende saida husi ai-knanoik neʼe?

•  Sé mak ema Samaria?

•  Istória kona-ba “ema Samaria neʼebé diʼak” akontese duni ka lae?

Tuirmai mak esplikasaun badak ba ai-knanoik neʼebé Jesus konta: Ema Judeu ida laʼo-rai husi Jeruzalein bá Jerikó. Iha dalan, ema naʼok ninia sasán, baku nia toʼo besik mate no husik hela nia.

Amlulik Judeu ida no tuirmai ulun-naʼin relijiaun Judeu seluk laʼo liu husi dalan neʼe no haree mane neʼe, maibé sira laʼo liu deʼit. Maski sira naʼin-rua mak ema Judeu hanesan ho mane neʼe, maibé sira la para atu fó ajuda.

Ikusmai, mane ida husi nasaun seluk laʼo iha dalan neʼe. Nia mak ema Samaria. (Lucas 10:33; 17:16-18) Tanba hanoin tebes mane neʼe, mane Samaria neʼe kurativu mane neʼe nia kanek. Tuirmai nia lori mane neʼe ba uma ida atu deskansa. Nia tau matan mane neʼe kalan tomak. Loron tuirmai, nia selu uma-naʼin atu tau matan ba mane neʼebé kanek no nia oferese atu selu tan se presiza.—Lucas 10:30-35.

Jesus konta ai-knanoik neʼe ba mane Judeu ida neʼebé hanoin katak nia presiza hatudu laran-diʼak ba deʼit ema ho rasa no relijiaun neʼebé hanesan ninian. Jesus hakarak hanorin nia pontu importante ida katak “maluk” bele refere ba ema hotu, laʼós deʼit ba ema Judeu. (Lucas 10:36, 37) Ai-knanoik neʼe hakerek iha Bíblia laran atu ajuda ema hotu neʼebé hakarak halo Maromak kontente.—2 Timóteo 3:16, 17.

Ai-knanoik neʼe hanorin ita katak ema neʼebé diʼak hatudu laran-sadiʼa liuhusi hahalok. Nia sei fó ajuda ba ema neʼebé iha susar laran, maski sira-nia situasaun moris, rasa ka nasaun la hanesan. Ema neʼebé diʼak sei halo ba ema seluk buat neʼebé nia hakarak ema atu halo ba nia.—Mateus 7:12.

Ema Samaria hela iha parte norte husi rai-Judeia. Sira balu mak jerasaun husi inan-aman neʼebé kaben kahur entre ema Judeu no nasaun seluk.

Iha Jesus nia tempu, ema Samaria iha ona sira-nia relijiaun rasik. Sira fiar ba livru lima primeiru husi Eskritura Lian Ebraiku, maibé baibain la fiar ba livru sira seluk.

Iha Jesus nia tempu, ema Judeu barak odi ema Samaria no lakohi ransu ho sira. (João 4:9) Ema Judeu balu uza liafuan “ema Samaria” atu goza.—João 8:48.

Bíblia la fó sai katak istória kona-ba ema Samaria mak akontese duni ka lae. Maibé bainhira Jesus hanorin, dala barak nia temi kostume no fatin sira neʼebé ema barak hatene hodi rona-naʼin bele komprende lalais pontu neʼebé nia hanorin.

Informasaun barak husi istória neʼe mak loos. Porezemplu:

• Dalan husi Jeruzalein ba Jerikó mak kilómetru 20 liu no Jeruzalein aas liu kilómetru ida husi Jerikó, tan neʼe dalan tun makaʼas husi Jeruzalein ba Jerikó. Istória neʼe koʼalia loos bainhira dehan katak ema neʼebé laʼo bá Jerikó “tun husi Jeruzalein”.—Lucas 10:30.

• Amlulik no ulun-naʼin relijiaun sira neʼebé hela iha Jerikó liu beibeik dalan neʼe atu bá Jeruzalein.

• Naʼok-teen sira sempre subar besik dalan neʼebé ema la iha hodi hein atu ataka ema neʼebé halo viajen, liuliu ema neʼebé laʼo mesak.