Lae. Maski ba tinan atus ba atus ema kopia tutan Bíblia iha materiál neʼebé fasil atu sai aat, maibé kuandu ita kompara manuskritu antigu ho Bíblia, ita bele haree katak la iha mudansa.

 Ema hetan ona Bíblia nia manuskritu antigu rihun ba rihun. No manuskritu sira-neʼe balu iha diferensa uitoan. Neʼe hatudu katak ema balu halo sala kuandu sira kopia tutan. Maski nuneʼe, diferensa barak mak kiʼik deʼit no la troka signifikadu husi testu. Maibé iha mós diferensa balu neʼebé boot. Kleur liubá, karik ema halo mudansa sira-neʼe ho neon atu troka Bíblia nia mensajen. Hanoin toʼok kona-ba ezemplu rua:

1.   Iha 1 João 5:7, Bíblia tradusaun balu neʼebé tuan hatete: “iha lalehan, Aman, Liafuan no Espíritu Santu: no sira naʼin-tolu mak ida deʼit.” Maibé manuskritu antigu sira neʼebé ita bele tau fiar, hatudu katak liafuan sira-neʼe la mosu iha testu orijinál. Neʼe katak liutiha tempu ruma, ema mak inventa liafuan sira-neʼe. a Tan neʼe, ohin loron Bíblia tradusaun neʼebé diʼak la temi liafuan sira-neʼe.

2.   Maromak nia naran rasik mosu dala rihun ba rihun iha Bíblia nia manuskritu antigu. Maski nuneʼe, Bíblia tradusaun barak troka naran neʼe ho títulu “Naʼi” ka “Maromak”.

 Toʼo ohin loron, ema deskobre ona manuskritu barak, tan neʼe fasil liu agora atu hetan sala sira. b Bainhira ita kompara manuskritu sira-neʼe, ida-neʼe hatudu saida kona-ba Bíblia ohin loron?

•   Matenek-naʼin ida naran William Henry Green koʼalia kona-ba Eskritura Lian Ebraiku (“Testamentu Tuan”) hodi dehan: “La iha livru antigu seluk neʼebé ema kopia tutan ho loloos hanesan ho Bíblia.”

•   Matenek-naʼin ida naran Frederick Fyvie Bruce hakerek kona-ba Eskritura Lian Gregu ka “Testamentu Foun”, hodi dehan: “Iha evidénsia neʼebé hatudu katak ema kopia Testamentu Foun ho loloos husi testu orijinál. Evidénsia ba Testamentu Foun barak liu fali evidénsia ba livru antigu seluk, no la iha ema ida mak duvida kona-ba livru sira-neʼe.”

•   Sir Frederic Kenyon, matenek-naʼin kona-ba Bíblia nia manuskritu sira, hatete katak ita “bele kaer Bíblia no fiar metin katak ida-neʼe mak Maromak nia Liafuan duni neʼebé ema fó tutan husi jerasaun ba jerasaun durante tinan atus ba atus no nafatin la lakon mensajen importante ruma”.

•   Ema Judeu no ema Kristaun neʼebé kopia Bíblia la hasai istória neʼebé hatudu sai sala sériu neʼebé Maromak nia povu halo. c (Números 20:12; 2 Samuel 11:​2-4; Galásia 2:​11-​14) Sira la hasai parte neʼebé koʼalia kona-ba nasaun Izraél nia hahalok sala neʼebé kontra Maromak. Liután neʼe, sira mós la hasai parte husi Bíblia neʼebé hatudu sai katak doutrina neʼebé ema inventa mak sala. (Oseias 4:​2; Malaquias 2:​8, 9; Mateus 23:​8, 9; 1 João 5:​21) Hodi kopia istória sira-neʼe ho loloos, sira hatudu katak ema bele tau fiar ba sira no sira hafolin tebes Maromak nia Liafuan neʼebé sagradu.

•   Maromak uza ninia espíritu santu atu book ema atu hakerek Bíblia. Entaun ita mós bele fiar katak Maromak sei proteje Ninia Liafuan atu ema bele kopia tutan ida-neʼe ho loloos. d (Isaias 40:8; 1 Pedro 1:​24, 25) Maromak hakarak ema hotu atu hetan benefísiu husi ninia Liafuan, neʼe inklui ema neʼebé moris iha tempu uluk no mós ita ohin loron. (1 Korinto 10:11) Tuir loloos, “buat hotu neʼebé hakerek ona horiuluk kedas, hakerek hodi hanorin ita. Neʼe fó ita esperansa tanba Eskritura sira-neʼe ajuda ita atu tahan no fó kmaan mai ita”.​—Roma 15:4.

•   Jesus no ninia dixípulu sira temi liafuan husi Eskritura Lian Ebraiku nia kópia sira no sira la duvida katak kópia antigu sira-neʼe mak loos.​—Lucas 4:16-21; Apóstolu 17:1-3.