Bíblia nunka temi kona-ba fuma a ka dalan seluk atu uza tabaku. Maski nuneʼe, Bíblia iha prinsípiu neʼebé hatudu katak Maromak la kontente ho toman sira neʼebé la moos no la diʼak ba saúde. Tan neʼe, tuir Maromak nia haree fuma mak sala.

•   Hafolin moris. “Maromak . . . mak fó iis, fó moris no buat hotu ba ema.” (Apóstolu 17:24, 25) Moris mak prezente husi Maromak, tan neʼe ita lakohi halo buat ruma neʼebé bele habadak ita-nia moris, hanesan fuma. Fuma oho ema barak iha mundu tomak no tuir loloos ita bele prevene neʼe.

•   Hadomi ema seluk. “Imi tenke hadomi imi-nia maluk hanesan imi-nia an rasik.” (Mateus 22:39) Fuma mak hahalok neʼebé la hatudu domin ba ema seluk. Ema neʼebé horon beibeik sigarru suar husi ema neʼebé fuma besik sira mós bele hetan moras hanesan ho fumadór sira.

•   Tenke santu ka moos. “Fó imi-nia isin nuʼudar sakrifísiu neʼebé moris, santu no Maromak simu.” (Roma 12:1) “Mai ita hamoos ita-nia an husi buat hotu neʼebé hafoʼer isin no neon, no sai santu loloos hodi hamtaʼuk Maromak.” (2 Korinto 7:1) Ema neʼebé fuma labele sai santu ka moos iha tempu hanesan, tanba ema neʼebé fuma hatama ba sira-nia isin buat foʼer neʼebé bele estraga sira-nia isin.

 Bíblia la temi kona-ba ganja (marijuana) ka droga seluk. Maibé Bíblia fó sai prinsípiu sira neʼebé hatudu katak labele uza ai-moruk ka droga oioin hodi sai lanu no sente kontente. Prinsípiu neʼebé temi iha leten no tuirmai bele ajuda ita.

•   Presiza kontrola ita-nia neon. “Imi tenke hadomi Jeová, imi-nia Maromak . . . ho imi-nia neon tomak.” (Mateus 22:37, 38) “Kontinua matan-moris kona-ba buat hotu.” (1 Pedro 1:13) Ema ida labele hanoin loos bainhira uza droga, no susar ba ema barak atu husik droga. Sira-nia hanoin mak fokus deʼit atu buka no uza droga, sira la hanoin kona-ba buat neʼebé lori benefísiu.​—Filipe 4:8.

•   Halo tuir lei sira. “Halo tuir governu no autoridade sira.” (Tito 3:1) Iha rai barak, iha lei kona-ba uza droga. Se ita hakarak halo Maromak kontente, ita presiza halo tuir lei iha ita-nia rai.​—Roma 13:1.