Bíblia hatete katak la sala atu hadomi ita-nia an rasik iha dalan neʼebé loos. Ita hadomi ita-nia an hodi tau matan ita-nia isin-lolon, hatudu respeitu ba ita-nia an no mós iha dignidade. (Mateus 10:31) Maski nuneʼe, Bíblia la hanorin ita atu sai hanoin an deʼit, Bíblia fó-hatene ita dalan neʼebé loos atu hadomi ita-nia an rasik.

Ita tenke hadomi uluk sé?

1.   Ita tenke hadomi uluk Maromak. Bíblia hanorin katak mandamentu neʼebé importante liu hotu mak: “Imi tenke hadomi Jeová imi-nia Maromak, ho imi-nia laran tomak.”​—Marcos 12:28-30; Deuteronómio 6:5.

2.   Mandamentu segundu neʼebé importante mak: “Imi tenke hadomi imi-nia maluk hanesan imi-nia an rasik.”​—Marcos 12:31; Levítico 19:18.

3.   Maski la iha mandamentu espesífiku husi Bíblia kona-ba hadomi an rasik. Maibé mandamentu “hadomi imi-nia maluk hanesan imi-nia an rasik” hatudu katak se ita hadomi ita-nia an rasik iha dalan neʼebé loos, neʼe normál no bele lori benefísiu.

Sé mak Jesus hadomi ulukliu?

 Jesus hatudu oinsá atu bele hadomi Maromak, hadomi ema seluk, no mós hadomi ita-nia an rasik. Jesus mós haruka ninia dixípulu sira atu banati-tuir ninia ezemplu.​—João 13:34, 35.

1.   Jesus hadomi tebes Maromak Jeová no Jesus fó ninia moris atu kumpre Maromak nia hakarak. Jesus dehan: “Haʼu halo tuir daudaun buat neʼebé Aman haruka haʼu atu halo, hodi nuneʼe mundu bele hatene katak haʼu hadomi Aman.”​—João 14:31.

2.   Jesus hadomi ema seluk. Nia hatudu ninia domin liuhusi ajuda ema seluk, liután neʼe nia mós fó ninia moris ba ema barak.​—Mateus 20:28.

3.   Jesus hatudu katak nia hadomi ninia an liuhusi tau matan ba ninia an hodi buka tempu atu deskansa, han, no ransu ho ninia dixípulu no mós ema sira neʼebé bele sai ninia dixípulu.​—Marcos 6:31, 32; Lucas 5:29; João 2:1, 2; 12:2.

Se Ita hadomi liu ema seluk, Ita bele nafatin sente kontente no iha dignidade ka lae?

 Sin. Maromak kria ita tuir ninia ilas, no Maromak nia hahalok neʼebé kmanek liu mak domin neʼebé la hanoin an deʼit. (Génesis 1:27; 1 João 4:8) Entaun, neʼe katak Maromak kria ita atu hadomi ema seluk. Hadomi ita-nia an rasik la sala, maibé buat neʼebé halo ita sente kontente liu mak hadomi Maromak no tau fokus hodi halo buat diʼak ba ema seluk. Hanesan buat neʼebé Bíblia hatete: “Kontente liu atu fó duké simu.”​—Apóstolu 20:35.

 Ohin loron, ema barak hanoin katak sira bele sente kontente se sira hanoin uluk sira-nia an rasik. Sira hadomi liu sira-nia an duké hadomi ema seluk. Maski nuneʼe, ema barak nia esperiénsia hatudu katak sira sente kontente no iha saúde diʼak bainhira sira aplika Bíblia nia matadalan: “Ema ida-idak tenke kontinua buka uluk ema seluk nia diʼak, laʼós buka diʼak deʼit ba ninia an.”​—1 Korinto 10:24.