Apóstolu João esplika kona-ba Jesus nia moris neʼebé nia hakerek iha Evanjellu hodi dehan: “Ema neʼebé haree ona ida-neʼe mak fó sasin neʼe, no ninia sasin mak loos. No ema neʼe hatene katak buat neʼebé nia koʼalia mak loos, atu nuneʼe imi mós bele fiar.”—João 19:35.

 Razaun ida tanbasá ita bele fiar Evanjellu Mateus, Marcos, Lucas no João mak tanba livru sira-neʼe hakerek durante tempu neʼebé ema neʼebé haree rasik akontesimentu sira-neʼe moris hela. Matenek-naʼin balu fiar katak Mateus hakerek ninia Evanjellu maizumenus tinan ualu depois Kristu mate, neʼe mak maizumenus tinan 41 EC. Maski iha mós matenek-naʼin sira neʼebé hanoin katak livru neʼe hakerek depois tinan 41 EC, maibé sira barak hanoin katak livru hotu husi Eskritura Lian Gregu hakerek ona antes tinan 100 EC.

 Ema neʼebé haree rasik Jesus, sai sasin ba Jesus nia mate, no haree mós ninia moris-hiʼas, sira bele konfirma buat neʼebé hakerek iha Evanjellu. Se iha pontu ruma neʼebé hakerek sala, sira bele dehan katak informasaun neʼe la loos. Profesór F.F. Bruce dehan: “Pontu importante ida husi apóstolu sira-nia haklaken mak sira ho konfiansa husu rona-naʼin atu hanoin kona-ba buat neʼebé sira hatene ona; apóstolu sira la dehan deʼit, ‘Ami mak sai sasin ba buat sira-neʼe’, maibé dehan, ‘hanesan imi rasik hatene’ (Apóstolu 2:22).”