Orasaun Ami Aman fó ezemplu mai ita oinsá atu halo orasaun no saida deʼit mak ita bele temi iha ita-nia orasaun. Jesus hanorin orasaun neʼe bainhira ninia dixípulu sira husu: “Naʼi, hanorin ami atu halo orasaun.” (Lucas 11:1) Maski nuneʼe, neʼe laʼós dehan katak Maromak simu deʼit Orasaun Ami Aman. a Jesus hanorin ida-neʼe nuʼudar ezemplu ida kona-ba orasaun neʼebé Maromak rona.

Iha informasaun neʼe

•  Orasaun Ami Aman temi buat saida deʼit?

•  Liafuan sira iha Orasaun Ami Aman signifika saida?

•  Maromak rona deʼit Orasaun Ami Aman ka lae?

•  Ita presiza halo orasaun oinsá?

•  Orasaun seluk iha Bíblia

 Ita bele lee Orasaun Ami Aman iha Mateus 6:9-13, no tradusaun oioin husi Bíblia uza liafuan neʼebé la hanesan kona-ba orasaun neʼe. Mai ita haree ezemplu rua.

 Tradusaun Mundu Foun: “Ami Aman iha lalehan, halo Ita-nia naran sai santu. Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan. Fó mai ami ai-han ba ohin nian, no fó perdua ba ami-nia sala, hanesan ami mós fó perdua ona ba ema neʼebé halo sala hasoru ami. Keta husik ami monu ba tentasaun, maibé salva ami husi aat-naʼin.”

 Liafuan diak ba imi, segunda edisaun: “Ami aman iha lalehan, halo Ita naran santo. Halo Ita-nia reinu toʼo mai ami; halo tuir Ita nia hakarak ba iha rai nudar iha lalehan. Haraik aihan loron loron nian mai ami. Haraik perdua ba ami nia tusan, nudar ami perdua sira nebe iha tusan ho ami. Keta husik ami monu ba tentasaun, maibé hasai ami housi buat aat.”

 Jesus nia hanorin liga malu ho eskritura seluk, entaun eskritura oioin husi Bíblia bele ajuda ita atu komprende diʼak liután Orasaun Ami Aman.

“Ami Aman iha lalehan”

 Maromak merese duni atu ita bolu nuʼudar “Ami Aman”, tanba nia mak kria ita no fó moris mai ita.—Isaias 64:8.

“Halo Ita-nia naran sai santu”

 Kriatura hotu tenke fó hahiʼi no halo santu Maromak nia naran Jeová. Ema bele hola parte atu halo santu Maromak nia naran hodi fó-hatene ema seluk kona-ba ninia hahalok furak sira no ninia objetivu.—Salmo 83:18; Isaias 6:3.

“Halo Ita-nia Ukun toʼo mai rai”

 Maromak nia Ukun mak governu ida iha lalehan neʼebé Jesus mak ukun nuʼudar liurai. Jesus hanorin ita atu halo orasaun hodi husu governu neʼe atu ukun mundu tomak.—Daniel 2:44; Apokalipse 11:15.

“Halo Ita-nia hakarak sai loos iha rai, hanesan iha lalehan”

 Iha lalehan, la iha susar no mate. Hanesan neʼe mós Maromak hakarak halo rai neʼe sai fatin neʼebé ema bele moris ho dame no hakmatek ba nafatin.—Salmo 37:11, 29.

“Fó mai ami ai-han ba ohin nian”

 Ita presiza hanoin-hetan katak ita-nia moris depende ba Kriadór, tanba nia mak fó buat hotu neʼebé ita presiza atu moris.—Apóstolu 17:24, 25.

“Fó perdua ba ami-nia sala, hanesan ami mós fó perdua ona ba ema neʼebé halo sala hasoru ami”

 Liafuan orijinál neʼebé tradús nuʼudar “sala” bele mós tradús nuʼudar “tusan”. (Lucas 11:4) Ema hotu halo sala no presiza hetan perdua. Maibé se ita hakarak hetan perdua husi Maromak, ita tenkesér prontu atu perdua ema seluk neʼebé halo sala hasoru ita.—Mateus 6:14, 15.

“Keta husik ami monu ba tentasaun, maibé salva ami husi aat-naʼin”

 Maromak Jeová nunka tenta ita atu halo buat aat. (Tiago 1:13) Maibé ita hetan tentasaun husi “aat-naʼin” Diabu Satanás, neʼebé Bíblia bolu nuʼudar “Tentadór”. (1 João 5:19; Mateus 4:1-4, nota-rodapé) Kuandu ita hetan tentasaun atu halo buat aat, ita husu Jeová atu la husik ita monu ba tentasaun neʼe.

 Jesus hanorin Orasaun Ami Aman nuʼudar ezemplu oinsá atu halo orasaun, laʼós atu dekór no repete deʼit liafuan hotu. Antes Jesus hanorin Orasaun Ami Aman, nia fó avizu hodi dehan: “Kuandu ó halo orasaun, keta repete beibeik liafuan neʼebé hanesan.” (Mateus 6:7) Kuandu Jesus hanorin kona-ba orasaun iha tempu seluk, nia fó ezemplu hodi uza liafuan neʼebé la hanesan.—Lucas 11:2-4.

 Dalan diʼak liu atu halo orasaun mak fó sai ita-nia hanoin no sentimentu husi ita-nia laran—Salmo 62:8.

 Orasaun Ami Aman mak ezemplu diʼak ida kona-ba oinsá atu halo orasaun iha dalan neʼebé Maromak rona. Mai ita haree oinsá mak eskritura seluk mós apoia ida-neʼe.

•   Halo orasaun ba Maromak deʼit

   Eskritura: “Iha situasaun hotu husu ajuda husi Maromak liuhusi orasaun no harohan no mós fó agradese.”—Filipe 4:6.

   Neʼe katak: Ita presiza halo orasaun ba Maromak, laʼós ba Jesus, Maria, ka santu-santa sira. Liafuan “Ami Aman” hanorin ita atu halo orasaun ba Maromak Jeová deʼit.

•   Halo orasaun hodi tuir Maromak nia hakarak

   Eskritura: “Buat naran deʼit neʼebé ita husu hodi tuir ninia hakarak, nia rona ita.”—1 João 5:14.

   Neʼe katak: Ita bele halo orasaun kona-ba buat naran deʼit neʼebé tuir Maromak nia hakarak. Hodi dehan “halo Ita-nia hakarak sai loos”, Jesus hanorin ita katak Maromak nia hakarak mak importante tebes. Ita bele aprende kona-ba Maromak nia hakarak ba mundu no ema liuhusi estuda Bíblia.

•   Halo orasaun kona-ba buat pesoál

   Eskritura: “Entrega ó-nia laran-susar ba Jeová, no nia sei apoia ó.”—Salmo 55:22.

   Neʼe katak: Maromak hanoin ita kuandu ita sente laran-susar. Jesus husu buat pesoál balu iha Orasaun Ami Aman, entaun ita bele husu kona-ba buat neʼebé ita presiza iha loron neʼe, matadalan kuandu halo desizaun importante, ajuda iha tempu susar, no perdua ba ita-nia sala. b