Bíblia koʼalia kona-ba oinsá atu hatene ema neʼebé tuir relijiaun neʼebé loos no ema neʼebé la tuir relijiaun neʼebé loos, hodi dehan: “Imi bele hatene sira liuhusi sira-nia hahalok. Ema nunka kuʼu uvas-fuan ka figeira-fuan husi ai-hun tarak, loos ka lae?” (Mateus 7:16) La susar atu hatene uvas nia hun husi ai-tarak nia hun liuhusi sira-nia fuan. Hanesan neʼe mós, ita bele hatene relijiaun ida neʼebé loos no relijiaun ida neʼebé falsu liuhusi sira-nia fuan, ka hahalok neʼebé sira hatudu. Se nuneʼe, ema neʼebé halaʼo relijiaun loos hatudu hahalok saida deʼit?

1.   Relijiaun neʼebé loos hanorin lia-loos husi Bíblia, laʼós ema nia doutrina. (João 4:24; 17:17) Buat balu neʼebé relijiaun loos hanorin mak lia-loos kona-ba ema iha klamar ka lae no esperansa kona-ba moris rohan-laek iha mundu neʼebé furak. (Salmo 37:29; Isaias 35:5, 6; Ezequiel 18:4) Relijiaun neʼebé loos mós la dada an atu fó sai katak relijiaun falsu hanorin lia-bosok.—Mateus 15:9; 23:27, 28.

2.   Relijiaun neʼebé loos ajuda ema atu hatene didiʼak Maromak, neʼe inklui hanorin ema kona-ba ninia naran, Jeová. (Salmo 83:18; Isaias 42:8; João 17:3, 6) Relijiaun neʼebé loos la hanorin katak ita ema labele hakbesik Maromak, ka katak nia dook husi ita, maibé hanorin katak Maromak hakarak ita sai ninia belun.—Tiago 4:8.

3.   Relijiaun neʼebé loos hanorin katak liuhusi Jesus deʼit mak Maromak fó salvasaun ba ema. (Apóstolu 4:10, 12) Ema sira neʼebé tuir relijiaun neʼebé loos halo tuir Jesus nia ukun-fuan sira no hakaʼas an atu halo tuir ninia ezemplu.—João 13:15; 15:14.

4.   Relijiaun neʼebé loos hanorin katak Maromak nia Reinu, ka Ukun deʼit mak bele lori esperansa ba ema. Ema sira neʼebé tuir relijiaun neʼebé loos badinas haklaken kona-ba Maromak nia Ukun neʼe.—Mateus 10:7; 24:14.

5.   Relijiaun neʼebé loos anima ema atu hatudu domin ba ema seluk, maski ema labele fó fali buat ida ba sira. (João 13:35) Relijiaun neʼebé loos hanorin ema atu hatudu respeitu ba ema hotu, no ema husi rasa, kultura no língua hotu bele tama relijiaun neʼe. (Apóstolu 10:34, 35) Tanba hadomi ema, ema neʼebé tuir relijiaun neʼebé loos la envolve an iha funu.—Miqueias 4:3; 1 João 3:11, 12.

6.   Relijiaun neʼebé loos la iha ema ida neʼebé simu osan tanba tau matan ba kongregasaun, no la iha ema ida mak iha títulu espesiál ruma.—Mateus 23:8-12; 1 Pedro 5:2, 3.

7.   Relijiaun neʼebé loos sempre neutrál kona-ba buat polítiku. (João 17:16; 18:36) Ema neʼebé tuir relijiaun neʼebé loos hatudu respeitu ba governu no halo tuir governu nia lei, tanba sira hatene Bíblia nia ukun-fuan neʼebé dehan: “Fó ba César buat neʼebé César nian, no fó ba Maromak buat neʼebé Maromak nian.”—Marcos 12:17; Roma 13:1, 2.

8.   Ema neʼebé tuir relijiaun neʼebé loos, moris tuir buat neʼebé sira hanorin, laʼós ho ibun-tutun deʼit. Sira halo tuir Bíblia nia morál sira neʼebé aas iha sira-nia moris tomak. (Éfeso 5:3-5; 1 João 3:18) Tanba sira adora “Maromak neʼebé kontente”, sira mós haksolok iha sira-nia adorasaun.—1 Timóteo 1:11.

9.   Ema neʼebé tuir relijiaun neʼebé loos mak ema uitoan deʼit. (Mateus 7:13, 14) Ema seluk hatún, goza no fó terus ba sira neʼebé halo tuir Maromak nia hakarak.—Mateus 5:10-12.

Labele hili deʼit relijiaun neʼebé ita gosta

 Perigu atu tuir relijiaun ida tan deʼit ita gosta relijiaun neʼe. Bíblia fó-hatene nanis kona-ba tempu neʼebé ema sei “halibur mestre sira neʼebé koʼalia deʼit buat neʼebé sira hakarak atu rona”. (2 Timóteo 4:3) Maibé tuir Bíblia, ita presiza tuir relijiaun neʼebé “moos no la foʼer tuir ita-nia Aman Maromak nia hanoin”, maski ema barak la gosta relijiaun neʼe.—Tiago 1:27; João 15:18, 19.