Adão no Eva nia oan-mane primeiru, Caim, kaben ho ninia alin-feto ida, ka ninia família seluk neʼebé besik. Hodi haree buat neʼebé Bíblia hatete kona-ba Caim no ninia família mak ita hatene ida-neʼe.

Informasaun neʼebé Bíblia fó sai kona-ba Caim

•   Ema hotu iha mundu neʼe mai husi Adão no Eva. Bíblia hatete kona-ba Maromak: “Husi ema ida deʼit [Adão] mak nia halo nasaun hotu atu hela iha mundu tomak.” (Apóstolu 17:26) Adão nia feen, Eva, sai “inan ba ema hotu”. (Génesis 3:​20) Tan neʼe mak ita hatene katak Caim kaben ho ninia família ida.

•   Adão no Eva iha oan sira seluk. (Génesis 4:1, 2) Bainhira Maromak duni sai Caim tanba oho ninia alin, Caim dehan: “Ema naran deʼit neʼebé hetan haʼu sei oho duni haʼu.” (Génesis 4:​14) Caim taʼuk ba sé? Bíblia hatete katak Adão “iha oan-mane no oan-feto sira seluk”. (Génesis 5:4) Nuneʼe, Adão no Eva nia oan no bei-oan sira seluk bele sai nuʼudar ameasa ba Caim.

•   Iha tempu uluk, kaben ho família mak buat neʼebé normál. Porezemplu, mane fiar-naʼin ida Abraão, kaben ho ninia alin-feto husi inan neʼebé la hanesan. (Génesis 20:12) Karik iha tempu neʼebá, se ema kaben ho família neʼebé besik, no iha oan, oan neʼe la hetan moras ka aleijadu hanesan ohin loron. Dala primeiru neʼebé Bíblia fó sai ukun-fuan atu bandu hodi labele kaben ho família neʼebé besik mak iha Moisés nia Ukun-Fuan, neʼebé hakerek tinan atus ba atus liutiha Caim nia tempu.​—Levítico 18:9, 12, 13.

•   Bíblia hatudu katak istória kona-ba Adão no Eva mak tebes. Iha livru Génesis, Moisés hakerek lista kona-ba Adão nia jerasaun. Bele mós hetan Adão nia lista jerasaun husi livru neʼebé Ezras no Lucas hakerek. (Génesis 5:​3-5; 1 Krónikas 1:​1-4; Lucas 3:​38) Bainhira Bíblia nia hakerek-naʼin sira konta kona-ba Caim, sira konta nuʼudar istória neʼebé tebes duni.​—Ebreu 11:4; 1 João 3:​12; Judas 11.