Sin, nia sei hatán Ita-nia orasaun. Ezemplu sira iha Bíblia no esperiénsia iha tempu modernu hatudu katak Maromak hatán duni ema nia orasaun. Bíblia hatete: “[Maromak] halo kontente sira neʼebé hamtaʼuk nia hodi fó buat neʼebé sira hakarak; nia rona sira-nia halerik atu husu ajuda, no nia salva sira.” (Sal 145:19) Maibé Ita presiza halo orasaun tuir Maromak nia hakarak se Ita hakarak nia atu hatán Ita-nia orasaun.

Maromak hakarak ema halo orasaun ba nia iha dalan oinsá?

•   Halo orasaun ba Maromak deʼit, laʼós ba Jesus, Maria, santu sira, anju sira ka estátua. Jeová deʼit mak “rona ba orasaun”.​—Salmo 65:2.

•   Halo orasaun tuir Maromak nia hakarak ka matadalan neʼebé fó sai iha Bíblia laran.​—1 João 5:14.

•   Halo orasaun liuhusi Jesus nia naran. Neʼe hatudu katak ita rekoñese Jesus nia podér. Jesus hatete: “Ema ida labele hakbesik ba Aman se la liu husi haʼu.”​—João 14:6.

•   Halo orasaun ho fiar. Se presiza, ita mós bele halo orasaun atu husu Maromak ajuda ita hodi iha fiar liután.​—Mateus 21:22; Lucas 17:5.

•   Hatudu haraik an no laran-moos. Bíblia hatete: “Maski Jeová hela iha fatin neʼebé aas, nia haree ema haraik an.”​—Salmo 138:6.

•   Halo orasaun beibeik. Jesus hatete: “Kontinua husu, no imi sei simu.”​—Lucas 11:9.

Maromak la preokupa kona-ba saida?

•   Ita-nia rasa no nasionalidade. “Maromak la todan ba sorin, no iha nasaun hotu, Maromak simu ema hotu neʼebé hamtaʼuk nia no halo buat neʼebé loos.”​—Apóstolu 10:34, 35.

•   Dalan neʼebé Ita halo orasaun. Ita bele halo orasaun ba Maromak hodi tuur, hakruʼuk, hakneʼak ka hamriik.​—1 Krónikas 17:16; Neemias 8:6; Daniel 6:10; Marcos 11:25.

•   Halo orasaun ho lian makaʼas ka iha laran. Maromak hatán ba Ita-nia orasaun maski Ita halo iha laran deʼit no ema seluk la hatene.​—Neemias 2:1-6.

•   Maski Ita-nia problema mak boot ka kiʼik deʼit. Maromak hakarak Ita atu ‘entrega Ita-nia laran-susar hotu ba nia, tanba nia hanoin Ita’.​—1 Pedro 5:7.