A B C D E F G H I J K L M N O P R S T U V X Z

A

• Aat-naʼin.

  Títulu ba Diabu Satanás, ida neʼebé kontra Maromak no ninia ukun-fuan sira.​—Mt 6:13; 1Jo 5:19.

• Ab, fulan.

  Bainhira ema Judeu sai livre ona husi dadur iha Babilónia, neʼe mak naran ba fulan-5 tuir ema Judeu nia kalendáriu sagradu no fulan-11 tuir kalendáriu sekulár. Hahú husi fulan-Jullu nia klaran toʼo fulan-Agostu nia klaran. Naran neʼe la temi iha Bíblia; naran neʼe temi deʼit nuʼudar “fulan-lima”. (Núm 33:38; Ezr 7:9)​—Haree Ap. B15.

• Abadon.

  Liafuan Ebraiku neʼe signifika “halakon” no bele refere mós ba “fatin halakon nian”. Maibé neʼe laʼós fatin neʼebé tebes. Tuir loloos, neʼe katak bainhira ema mate, ninia isin sai dodok no sai fali rai-rahun. (Job 26:6; 28:22; Sal 88:11; Prv 15:11) Maibé iha Apokalipse 9:11, liafuan “Abadon” mak naran ba “anju neʼebé hein rai-kuak neʼebé kleʼan tebes”.

• Abib, fulan.

  Naran orijinál ba fulan-primeiru tuir ema Judeu nia kalendáriu sagradu no fulan-7 tuir kalendáriu sekulár. Naran neʼe katak “Fulin matak”. Hahú husi fulan-Marsu nia klaran toʼo fulan-Abríl nia klaran. Bainhira ema Judeu fila fali ona husi Babilónia, fulan neʼe hanaran Nisan. (Deu 16:1)​—Haree Ap. B15.

• Abisos.

  Liafuan Gregu neʼe signifika “la iha rohan, la iha limite” ka “kleʼan tebes”. Iha Eskritura Lian Gregu, liafuan neʼe refere ba fatin ka kondisaun neʼebé hanesan prizaun. Neʼe bele refere ba rate no bele inklui mós buat seluk.​—Lc 8:​31; Rom 10:7; Apk 20:3.

• Adar, fulan.

  Bainhira ema Judeu sai livre ona husi dadur iha Babilónia, neʼe mak naran ba fulan-12 tuir ema Judeu nia kalendáriu sagradu no fulan-6 tuir kalendáriu sekulár. Hahú husi fulan-Fevereiru nia klaran toʼo fulan-Marsu nia klaran. (Est 3:7)​—Haree Ap. B15.

• Administradór.

  Iha versíkulu balu, liafuan neʼe refere ba ema neʼebé simu knaar atu tau matan ba uma ka sasán neʼebé ema seluk nian. Karik administradór mak ema livre ka atan neʼebé hetan konfiansa.​—Lc 12:42; 16:1, nota.

• Adultériu.

  Neʼe mak kaben-naʼin ida neʼebé ho hakarak rasik halo relasaun seksuál ho ema neʼebé laʼós ninia kaben. (Éx 20:14; Mt 5:27, nota; Mt 19:9) Halo adultériu iha dalan espirituál signifika katak ema neʼebé hola parte ona iha aliansa ho Jeová maibé la laran-metin.​—Jer 3:8, 9; 9:2; Os 7:4.

• Ahi-anar fatin.​—

  Haree FATIN BA AHI-OAN NIA KABAS.

• Ahi-matan; Fornu.

  Fatin ida neʼebé uza atu halo nabeen besi oioin. Dala ruma mós uza atu tunu sanan-rai no buat seluk neʼebé halo husi rai-mean. Iha Bíblia nia tempu, fornu sira halo husi tijolu ka fatuk. Ema mós uza fornu atu sunu fatuk-ahu.​—Gén 15:17; Dan 3:​17; Apk 9:2.

• Ai neʼebé meik.

  Neʼe refere ba ai naruk neʼebé iha besi tutun neʼebé kroʼat no uza atu kontrola animál. Bíblia kompara ai neʼebé meik hanesan ema matenek nia liafuan neʼebé book rona-naʼin sira atu halo tuir konsellu diʼak. Liafuan “tebe hasoru ai neʼebé meik” uza atu kompara ema ulun-toos hanesan karau-aman neʼebé lakohi halo tuir ninia naʼin. Hodi tebe ai neʼebé meik, nia hakanek nia an rasik.​—Aps 26:14; Juí 3:​31.

• Ai-fuan primeiru.

  Neʼe mak ai-fuan primeiru iha tempu koʼa nian. Liafuan orijinál mós bele refere ba rezultadu primeiru husi toʼos, produtu ka oan primeiru sira. Jeová fó ukun-fuan ba nasaun Izraél atu fó ema no animál nia oan primeiru ba nia, no mós ai-han ho ai-fuan primeiru husi toʼos. Nuʼudar nasaun ida, ema Izraél hasaʼe produtu primeiru ba Maromak durante Festa Paun Fermentu-Laek nian no loron Pentekostes. Liafuan “ai-fuan primeiru” mós uza nuʼudar símbolu hodi refere ba Kristu no ninia dixípulu sira neʼebé iha esperansa atu bá lalehan.​—1Ko 15:23; Núm 15:21; Deu 26:10; Prv 3:9; Apk 14:4.

• Ai-henna.

  Ai-horis neʼebé ninia funan morin tebes. Ema halo tinta kór-mean no kór-kafé ho ninia tahan sira.

• Ai-hun koñesimentu kona-ba buat diʼak no aat.

  Ai-hun ida iha jardín Eden neʼebé Maromak uza nuʼudar símbolu ba ninia  direitu atu determina saida mak “diʼak” no “aat” ba ema.​—Gén 2:​9, 17.

• Ai-hun moris nian.

  Ai-hun ida iha jardín Eden. Bíblia la dehan katak ninia fuan bele fó moris ba ema; ai-hun neʼe reprezenta garantia husi Maromak atu fó moris rohan-laek ba ema sira neʼebé nia fó lisensa atu han ninia fuan.​—Gén 2:9; 3:22.

• Ai-isopu.

  Ai-horis ida neʼebé ninia sanak no tahan lotuk. Ema uza hodi hisik raan ka bee bainhira halaʼo serimónia hamoos nian. Karik neʼe mak ai-manjerona (Origanum maru; Origanum syriacum). Ai-isopu neʼebé temi iha João 19:29 karik refere ba ai-manjerona neʼebé kesi ba ai-sanak ida ka ba ai-sorgu (Sorghum vulgare), tanba ai-sorgu nia sanak naruk, nuneʼe bele tau esponja neʼebé habokon ho tua-uvas siin hodi lolo ba Jesus nia ibun.​—Éx 12:22; Sal 51:7.

• Ai-kásia.

  Neʼe mak ai-kanela oin ida (Cinnamomum cassia) ka refere ba produtu husi ai neʼe neʼebé uza atu halo mina-morin no mina santu.​—Éx 30:24; Sal 45:8; Eze 27:19.

• Ai-knanoik.

  Liafuan Gregu parabole, bele refere ba komparasaun, ezemplu ka istória badak. Baibain, neʼe mak istória neʼebé inventa deʼit hodi hanorin lia-loos kona-ba buat morál ka espirituál.​—Mt 13:34; Mc 13:28; Lc 5:36.

• Ai-leba.

  Neʼe mak ai-lolon neʼebé tau iha ema nia kabaas, no uza atu lori naha iha sorin-sorin, ka ai-lolon neʼebé tau ba animál rua nia kotuk bainhira sira halo serbisu hamutuk atu fila rai ka dada karrosa. Baibain atan sira mak uza ai-leba atu lori naha todan, tan neʼe liafuan neʼe reprezenta situasaun nuʼudar atan ka bainhira tenke hakruʼuk ba ema seluk, no mós reprezenta situasaun susar kuandu ema hanehan sira. Hasai tiha ka halo tohar ai-leba signifika katak sai livre ona husi dadur, susar, ka ema neʼebé hanehan.​—Lev 26:13; Mt 11:29, 30.

• Ai-loos sukat nian.

  Ai-loos sukat nian mak naruk kóvado neen. Se sukat tuir kóvado baibain, ninia naruk mak metru 2,67. Se sukat tuir kóvado naruk, entaun ai neʼe nia naruk mak metru 3,11. (Eze 40:​3, 5; Apk 11:1)​—Haree Ap. B14.

• Ai-riin.

  Nasaun balu uza ai-riin hodi fó kastigu-mate ka tara mate-isin hodi fó avizu ba ema ka atu hamoe ema. Ema Asíria, neʼebé baibain halo funu ho laran-aat, kaer ema no sona sira-nia hirus-matan ho ai neʼebé meik no husik deʼit vítima nia mate-isin iha ai neʼe nia leten. Tuir ema Judeu nia ukun-fuan, ema neʼebé halo hahalok kontra lei hanesan koʼalia aat Maromak, adora estátua, tenke tuda mate uluk (ka oho iha dalan seluk) mak tara sira-nia mate-isin iha ai-riin ka ai-hun hodi sai nuʼudar avizu ida ba ema. (Deu 21:22, 23; 2Sa 21:​6, 9) Ema Roma dala ruma kesi deʼit vítima ba ai-riin, nuneʼe vítima bele moris ba loron balu, depois neineik-neineik mate ho moras, hamrook, hamlaha ka habai loron. Dala ruma mós, sira prega vítima nia liman no ain ba ai-riin, hanesan bainhira fó kastigu-mate ba Jesus. (Lc 24:20; Jo 19:14-​16; 20:25; Aps 2:​23, 36)​—Haree AI-RIIN TERUS NIAN.

• Ai-riin lulik.

  Liafuan Ebraiku asheráh, refere ba (1) ai-riin lulik ida neʼebé reprezenta maromak-feto Axerá husi rai-Kanaan neʼebé tulun ema atu iha oan, ka (2) estátua maromak-feto Axerá. Ai-riin sira-neʼe hamriik loos, no ninia parte balu halo husi ai. Karik ai-riin sira-neʼe la bahat buat ida, ka neʼe mak ai-hun deʼit.​—Deu 16:21; Juí 6:​26; 1Rs 15:13.

• Ai-riin terus nian.

  Liafuan Gregu staurós, katak ai-riin neʼebé hamriik loos, hanesan ai ida neʼebé ema uza atu fó kastigu-mate ba Jesus. La iha evidénsia neʼebé hatudu katak liafuan Gregu neʼe signifika krús. Ema jentiu uza krús nuʼudar símbolu ba sira-nia adorasaun durante tinan atus ba atus molok Kristu. Fraze “ai-riin terus nian” tuir signifikadu husi liafuan Gregu orijinál staurós tanba liafuan neʼe mós uza atu hatudu katak Jesus nia dixípulu sira sei hetan terus no ema hamoe sira. (Mt 16:24; Ebr 12:2)​—Haree AI-RIIN.

• Ai-sedru.

  Iha Bíblia nia tempu, ai-sedru hun, liuliu ai-sedru husi Líbanu, mak koñesidu tebes no sai nuʼudar ai importante bainhira Salomão harii templu. Ai-sedru husi Líbanu mak ai-hun neʼebé boot, aas toʼo metru 37 no ninia abut naruk no forte.​—Núm 24:6; 1Rs 6:9.

• Ai-sikómoru.

  Ai neʼe nia fuan hanesan ho ai-figeira fuan, maibé kiʼik liu no kualidade ladún diʼak. Ninia tahan hanesan amora tahan. Ai-sikómoru nia tahan sempre matak, la hanesan ho ai-figeira baibain.

•  Ai-tahan neʼebé moruk.

  Bíblia uza liafuan neʼe nuʼudar símbolu ba rezultadu aat husi hahalok sala seksuál, hahalok neʼebé la justu, sai atan no mós ema neʼebé fila kotuk ba Maromak.​—Deu 29:18; Prv 5:4; Jer 9:​15; Am 5:7.

• Akaia.

  Iha Eskritura Lian Gregu, Akaia mak provínsia Roma nian ida iha Grésia nia parte súl, ninia sidade kapitál mak Korinto. Provínsia Akaia inklui mós Peloponeso tomak no parte sentrál husi rai-Grésia kontinentál. (Aps 18:12)​—Haree Ap. B13.

• Alabastru.

  Naran ba botir kiʼik neʼebé rai mina-morin. Ema halo ida-neʼe hodi uza fatuk husi área besik sidade Alabastron iha rai-Ejitu. Baibain botir neʼe nia matan kiʼik no taka metin atu mina-morin neʼebé folin-boot labele fakar sai. Ikusmai fatuk neʼe mós hanaran alabastru.​—Mc 14:3, nota.

• Alamot.

  Neʼe mak liafuan kona-ba múzika neʼebé signifika “feto-klosan; feto joven”. Karik neʼe refere ba feto joven nia lian sopranu, ka lian aas. Karik uza liafuan neʼe nuʼudar matadalan atu ema kanta ka toka ho nota neʼebé aas.​—1Kr 15:20; Sal 46:Int.

• Alfa no Ómega.

  Naran ba letra primeiru no letra ikus iha alfabetu lian Gregu neʼebé uza dala tolu iha livru Apokalipse nuʼudar Maromak nia títulu. Iha eskritura sira-neʼe, fraze neʼe signifika “primeiru no ikus”, “hun no rohan”.​—Apk 1:8; 21:6; 22:13.

• Aliansa.

  Akordu formál ka kontratu entre Maromak ho ema ka entre ema naʼin-rua ka liu, neʼebé promete malu atu halo ka la halo buat ruma. Dala ruma, parte ida deʼit iha responsabilidade atu kumpre promesa neʼe (neʼe mak aliansa unilaterál). Iha mós aliansa seluk neʼebé parte rua iha responsabilidade atu kumpre promesa neʼe (neʼe mak aliansa bilaterál). Bíblia la temi deʼit kona-ba aliansa neʼebé Maromak halo ho ema maibé mós temi kona-ba aliansa entre ema, suku, nasaun no grupu sira. Aliansa balu neʼebé iha efeitu boot liu mak aliansa neʼebé Maromak halo ho Abraão, David, nasaun Izraél (aliansa Ukun-Fuan) no ho Izraél Maromak nian (aliansa foun).​—Gén 9:​11; 15:18; 21:27; Éx 24:7; 2Kr 21:7.

• Altár.

  Neʼe mak plataforma ka fatin ida neʼebé halo husi rai, fatuk, fatuk boot ida, ka ai no fui ho riti. Ema hasaʼe sakrifísiu ka sunu insensu iha altár leten bainhira halo adorasaun. Iha kuartu oin husi tenda santu no templu, iha “altár husi osan-mean” neʼebé kiʼik no uza atu sunu insensu. Altár neʼe halo husi ai no taka tomak ho osan-mean. Iha pátiu, iha “altár husi riti” neʼebé boot no uza atu sunu sakrifísiu sira. (Éx 27:1; 39:38, 39; Gén 8:​20; 1Rs 6:​20; 2Kr 4:1; Lc 1:​11)​—Haree Ap. B5 no B8.

• Altár nia dikur.

  Altár balu iha buat ida hanesan dikur iha ninia sikun haat. (Lev 8:​15; 1Rs 2:​28)​—Haree Ap. B5 no B8.

• Amen.

  Neʼe katak “sai nuneʼe bá”, ka “loos duni”. Liafuan neʼe mai husi liafuan Ebraiku amán, neʼebé signifika “laran-metin; bele tau fiar”. Ema dehan “Amen” atu hatudu katak konkorda ho juramentu, orasaun, ka deklarasaun ida. Iha livru Apokalipse, “Amen” mak Jesus nia títulu.​—Deu 27:26; 1Kr 16:36; Apk 3:​14.

• Amlulik.

  Mane neʼebé halo knaar nuʼudar Maromak nia reprezentante, hodi hanorin povu kona-ba Maromak no ninia ukun-fuan sira. Amlulik mós reprezenta povu iha Maromak nia oin hodi hasaʼe sakrifísiu no halo orasaun ba povu nia diʼak. Antes fó sai Moisés nia Ukun-Fuan, ulun-naʼin iha umakain ida-idak mak sai amlulik ba ninia umakain rasik. Iha Moisés nia Ukun-Fuan okos, mane sira husi Arão nia umakain husi suku Levi mak sai amlulik. Mane Levi sira seluk sai ajudante ba amlulik sira. Bainhira aliansa foun foin sai vale, ema Izraél espirituál sai nasaun amlulik, no Jesus Kristu mak amlulik boot.​—Éx 28:41; Ebr 9:​24; Apk 5:​10.

• Amlulik boot.

  Iha Moisés nia Ukun-Fuan okos, amlulik boot mak amlulik prinsipál neʼebé reprezenta povu iha Maromak nia oin, nia mós tau matan ba amlulik sira seluk hotu. Iha Loron Hamoos Sala nian, nia mesak deʼit mak bele tama ba Fatin Santu Liu Hotu, neʼe katak kuartu laran liu iha tenda santu no iha templu. Liafuan “amlulik boot” mós refere ba Jesus Kristu.​—Lev 16:​2, 17; 21:10; 2Kr 26:20; Ezr 7:5; Mt 26:3; Ebr 4:​14.

• Animál kulit.

  Ema uza bibi-malae, bibi-timur no karau nia kulit hanesan surat-tahan atu hakerek. Neʼe dura liu se kompara ho duʼut-papiru. Uluk ema uza neʼe atu hakerek livru Bíblia nian. Paulo husu Timóteo atu lori livru neʼebé hakerek iha animál kulit, karik neʼe mak parte balu husi Eskritura Lian Ebraiku. Manuskritu husi Bíblia neʼebé ema hetan besik Tasi Mate, balu hakerek iha animál kulit.​—2Ti 4:​13.

•  Anin haat.

  Liafuan “anin haat” husi lalehan no rai refere ba diresaun hotu, norte, súl, leste no oeste.​—Mt 24:31, nota; Apk 7:1.

• Anju.

  Husi liafuan Ebraiku malákh no liafuan Gregu ággelos. Liafuan rua neʼe signifika “ida neʼebé lori mensajen”, maibé tradús nuʼudar “anju” bainhira refere ba kriatura espíritu neʼebé lori mensajen ka lia-menon. (Gén 16:7; 32:3; Tgo 2:​25, nota; Apk 22:8) Anju sira mak kriatura espíritu neʼebé forte. Maromak kria sira tempu kleur antes nia kria ema. Iha Bíblia mós dehan katak sira mak “anju santu sira rihun ba rihun”, “Maromak nia oan-mane sira” no “fitun dadeer nian”. (Deu 33:2; Job 1:6, nota; Job 38:7) Maromak la kria anju sira ho abilidade atu iha oan, nia kria sira ida-idak la hanesan. Sira hamutuk millaun atus ida resin. (Dan 7:​10) Bíblia hatudu katak sira ida-idak iha naran no hahalok la hanesan, maibé sira haraik an, lakohi kriatura seluk adora sira, no mós sira barak lakohi fó sai sira-nia naran. (Gén 32:29; Lc 1:​26; Apk 22:​8, 9) Sira-nia pozisaun la hanesan no sira halo knaar oioin hanesan serbí Jeová besik ninia kadunan, hatoʼo Jeová nia liafuan, ajuda Jeová nia atan sira iha rai, fó kastigu ba sira neʼebé Maromak tesi-lia ona, no apoia serbisu atu haklaken liafuan diʼak iha rai. (2Rs 19:35; Sal 34:7; Lc 1:​30, 31; Apk 5:​11; 14:6) Aban-bainrua, sira sei apoia Jesus halo funu Armagedon.​—Apk 19:14, 15.

• Anju aat.

  Kriatura espíritu neʼebé ema labele haree no iha kbiit boot liu fali ema. Iha nota-rodapé iha Génesis 6:2, sira mak “Maromak nia oan-mane” no iha Judas 6, sira mak “anju”, entaun bainhira Maromak kria sira, sira laʼós anju aat. Maibé sira mak halo sira-nia an rasik sai Maromak nia inimigu tanba sira la halo tuir Maromak iha Noé nia tempu, no sira apoia Satanás hodi kontra Jeová.​—Deu 32:17; Lc 8:​30; Aps 16:16; Tgo 2:​19.

• Anti-Kristu.

  Liafuan Gregu neʼe iha signifikadu rua. Ida primeiru mak kontra Kristu no ida segundu mak Kristu falsu neʼebé troka Kristu nia fatin. Anti-Kristu mak ema, organizasaun, grupu sira hotu neʼebé bosok hodi dehan katak sira reprezenta Kristu, ka sira mak Mesias, ka sira neʼebé kontra Kristu no ninia dixípulu.​—1Jo 2:22, nota.

• Apokalipse.

  Husi liafuan Gregu apokálypsis neʼebé signifika “loke”, “revelasaun”. Dala barak liafuan neʼe kona-ba fó sai ka hatudu sai buat espirituál ka Maromak nia hakarak no planu. (1Ko 14:6, 26; 2Ko 12:1; Apk 1:1) Uza naran Apokalipse ba livru ikus husi Bíblia mak diʼak tanba informasaun iha livru neʼe fó sai revelasaun kona-ba Maromak nia planu ba futuru.

• Apostazia.

  Liafuan Gregu apostasía mai husi verbu ida neʼebé signifika “hamriik dook”. Liafuan neʼe nia substantivu signifika “fila kotuk, husik hela, ka kontra”. Iha Eskritura Lian Gregu, liafuan neʼe liuliu refere ba ema neʼebé fila kotuk ba adorasaun neʼebé loos ka apóstata.​—Prv 11:9; Aps 21:21; 2Ts 2:3, nota.

• Apóstolu.

  Liafuan neʼe signifika “haruka bá”. Liafuan neʼe uza atu refere ba Jesus no ema balu tan neʼebé simu knaar atu bá serbí ema seluk. Dala barak liafuan neʼe refere ba dixípulu naʼin-12 neʼebé Jesus rasik hili nuʼudar grupu ida hodi sai ninia reprezentante.​—Mc 3:​14; Aps 14:14.

• Aram; Ema Aram.

  Ema Aram mak Sem nia oan-mane Aram nia jerasaun. Ema Aram hela iha Foho Líbanu toʼo Mezopotámia, no husi Foho Tauro neʼebé iha parte norte toʼo Damasku no área sira seluk neʼebé iha parte súl. Iha lian Ebraiku, área sira-neʼe uluk bolu Aram, depois mak ema hanaran fali Síria, no ema neʼebé hela iha área neʼe mak ema Síria.​—Gén 25:20; Deu 26:5; Os 12:12.

• Aramaiku; Lian Aramaiku.

  Neʼe mak língua neʼebé atu hanesan ho lian Ebraiku no uza alfabetu hanesan. Ulukliu ema Aram mak koʼalia língua neʼe, maibé neʼe sai língua internasionál ba negósiu no komunikasaun durante ema Asíria no mós ema Babilónia nia ukun. No durante ema Pérsia nia ukun, lian Aramaiku sai língua ofisiál. (Ezr 4:7) Parte balu husi livru Ezras, Jeremias no Daniel hakerek iha lian Aramaiku.​—Ezr 4:8–​6:​18; 7:​12-​26; Jer 10:11; Dan 2:4b–​7:​28.

• Arão nia oan-mane sira.

  Neʼe mak jerasaun husi Levi nia bei-oan Arão. Maromak hili Arão atu sai amlulik boot primeiru tuir Moisés nia Ukun-Fuan. Arão nia oan-mane sira halaʼo knaar nuʼudar amlulik iha tenda santu no iha templu.​—1Kr 23:28.

• Área foho Líbanu.

  Neʼe mak parte ida husi área foho iha rai-Líbanu. Neʼe iha sorin  parte oeste, no Antilíbanu mak iha sorin parte leste. Foho-leet neʼebé naruk mak haketak parte rua neʼe no ninia rai bokur loos. Área foho neʼe besik Tasi Mediterráneu, no foho-tutun sira aas metru 1.800 toʼo 2.100. Iha tempu uluk, Líbanu nakonu ho ai-sedru neʼebé boot, neʼebé nasaun viziñu sira gaba tebes. (Deu 1:7; Sal 29:6; 92:12)​—Haree Ap. B7.

• Areópago.

  Foho-oan ida iha Atenas, iha Akrópole nia parte norueste. Neʼe mós naran ba grupu konselleiru (tribunál) neʼebé halo enkontru iha neʼebá. Ema neʼebé fiar filozofia Estoiku no Epikureu lori apóstolu Paulo ba Areópago no haruka Paulo atu esplika ninia fiar.​—Aps 17:19.

• Arka Aliansa nian.

  Neʼe mak kaixote neʼebé halo husi ai-akásia no taka tomak ho osan-mean, no neʼe rai iha Fatin Santu Liu Hotu iha tenda santu no tuirmai tau iha Fatin Santu Liu Hotu iha templu neʼebé Salomão harii. Ninia matan tomak halo husi osan-mean no iha kerubín rua neʼebé hateke malu. Sasán prinsipál iha Arka laran mak fatuk-belar rua neʼebé iha Ukun-Fuan Sanulu. (Deu 31:26; 1Rs 6:​19; Ebr 9:4)​—Haree Ap. B5 no B8.

• Arka nia matan.

  Amlulik boot hisik raan husi animál ba sakrifísiu sala nian iha Arka matan neʼe nia oin iha Loron Hamoos Sala nian. Liafuan Ebraiku kona-ba Arka Aliansa nia matan mai husi verbu neʼebé signifika “atu taka (sala)” ka karik “hamoos (sala)”. Arka nia matan neʼe tomak halo husi osan-mean, no iha kerubín rua neʼebé tau iha sorin-sorin. (Éx 25:17-​22; 1Kr 28:11, nota; Ebr 9:5)​—Haree Ap. B5.

• Arkanju.

  Katak “xefe ba anju sira”. “Ark” signifika “xefe” ka “prinsipál”. Iha Bíblia, liafuan “arkanju” sempre singulár, neʼe katak iha arkanju ida deʼit. Bíblia fó sai katak arkanju neʼe nia naran mak Miguel.​—Dan 12:1; Jud 9; Apk 12:7.

• Armagedon.

  Husi liafuan Ebraiku Har Meghiddóhn, katak “Foho Megido”. Liafuan neʼe iha ligasaun ho “funu iha Maromak Kbiit Boot Liu Hotu nia loron boot”. Iha funu neʼe “liurai sira iha mundu tomak” sei halibur hamutuk atu halo funu hasoru Jeová. (Apk 16:14, 16; 19:11-​21)​—Haree TERUS BOOT.

• Arrepende.

  Iha Bíblia, liafuan neʼe hatudu kona-ba troka hanoin, sente triste no hakribi sala neʼebé halo ona, ka hakribi moris uluk nian, ka sente triste tanba la halo buat neʼebé tenkesér halo. Ema neʼebé arrepende an husi laran sei hatudu neʼe liuhusi hahalok, katak troka hahalok husi aat ba diʼak.​—Mt 3:8; Aps 3:​19; 2Pe 3:9.

• Asélgeia.​—

  Haree HAHALOK AAT TOʼO LA SENTE MOE.

• Astoret.

  Neʼe mak ema Kanaan nia maromak-feto. Ema Kanaan fiar katak maromak neʼe ajuda ema atu manán funu no atu iha oan. Nia mak maromak Baal nia feen.​—1Sa 7:3.

• Astrolojia.

  Estudu kona-ba oinsá loron, fulan no fitun sira halai hodi bele siʼik futuru.​—Dan 2:​27; Mt 2:1, nota.

• Asu-rapoza.

  Neʼe mak asu-fuik oin ida neʼebé ain badak, tilun-tahan boot no matan-moris.

• Asu-xakál.

  Neʼe mak asu-fuik oin ida neʼebé inus naruk, no ninia ikun fulun mahar no modelu hanesan asu-rapoza. Baibain moris iha fatin fuik neʼebé la iha ema.

• Atan ba kongregasaun.

  Neʼe mak tradusaun ba liafuan Gregu diakonos, no dala barak liafuan neʼe mós tradús nuʼudar “atan”. “Atan ba kongregasaun” refere ba ema neʼebé serbí nuʼudar ajudante ba grupu katuas iha kongregasaun. Nia tenke kumpre kritéria husi Bíblia atu hetan priviléjiu neʼe.​—1Ti 3:​8-​10, 12.

• Azazel.

  Naran ida iha lian Ebraiku neʼebé karik signifika “Bibi-timur neʼebé halai lakon”. Iha Loron Hamoos Sala nian, bibi-timur neʼebé hili ona nuʼudar Azazel nian tenke husik tama ba rai-fuik, neʼe reprezenta lori lakon tiha nasaun nia sala sira husi tinan kotuk.​—Lev 16:​8, 10.

• Ázia.

  Iha Eskritura Lian Gregu, Ázia mak provínsia Roma nian ida, ninia sidade kapitál mak Éfeso. Provínsia Ázia inklui rai-Turkia modernu nia parte oeste, no inklui mós illa balu hanesan Samos no Patmos. (Aps 20:16; Apk 1:4)​—Haree Ap. B13.

B

• Baal.

  Neʼe mak ema Kanaan nia maromak ida neʼebé sira fiar nuʼudar naʼin ba lalehan, fó udan, halo rai buras, no ajuda ema atu iha oan. Títulu “Baal” mós refere ba maromak oioin neʼebé ladún importante neʼebé ema adora tuir ema nia área. Liafuan Ebraiku neʼe signifika “naʼin; patraun”.​—1Rs 18:21; Rom 11:4.

•  Badaen rai-mean.

  Liafuan Ebraiku ba badaen rai-mean mak “ida neʼebé halo buat ruma”. Badaen rai-mean iha kbiit atu kontrola buat neʼebé nia halo hodi uza rai-mean, tan neʼe dala barak Bíblia kompara Jeová, Ukun-Naʼin Boot Liu Hotu, hanesan badaen rai-mean no ema ida-idak ka nasaun mak hanesan rai-mean.​—Isa 64:8; Rom 9:​21.

• Baku ho xikote.

  Iha Eskritura Lian Gregu, neʼe refere ba baku ho xikote nuʼudar kastigu. Xikote balu tau besi kabuar ka ruin neʼebé kroʼat iha tutun.​—Jo 19:1.

• Bálsamu; Mina-bálsamu.

  Mina-morin folin-boot neʼebé prodús husi ai-horis oioin. Neʼe uza nuʼudar ai-moruk no mós mina-morin.​—Gén 37:25; Jer 8:22.

• Batizmu.

  Liafuan neʼe katak “hatama” ka hoban iha bee laran. Jesus dehan katak ninia dixípulu sira tenke hetan batizmu. Eskritura mós koʼalia kona-ba batizmu seluk tan, hanesan João nia batizmu, batizmu ho espíritu santu, batizmu ho ahi, no seluk tan.​​—Mt 3:​11, 16; 28:19; Jo 3:​23; 1Pe 3:​21.

• Bato.

  Neʼe mak medida ida atu sukat líkidu. Bato ida maizumenus litru 22, neʼe tuir buat neʼebé arkeólogu sira hetan iha sanan-rai nia pedasuk neʼebé temi liafuan bato. Iha Bíblia, medida sira seluk atu sukat buat maran no been mós kalkula tuir bato. (1Rs 7:​38; Eze 45:14, nota)​—Haree Ap. B14.

• Belzebu.

  Naran ba Satanás, neʼebé nuʼudar ulun-naʼin, ka ukun-naʼin ba anju aat sira. Karik naran neʼe mak husi liafuan Baal-Zebub, maromak Baal neʼebé ema Filístia sira adora iha Ekron.​—2Rs 1:3; Mt 12:24.

• Bensaun.

  Lian Gregu katak “koʼalia diʼak kona-ba buat ruma”. Bensaun mak atu halo ka fó sai katak buat ruma mak santu; husu ba Maromak atu hatudu ninia laran-diʼak; fó ka simu buat diʼak; fó hahiʼi; koʼalia diʼak; proteje husi buat aat; no lori ksolok. Eskritura uza liafuan “bensaun” maizumenus iha dalan haat: (1) Jeová haraik bensaun ba ema; (2) ema fó hahiʼi ba Jeová; (3) ema fó hahiʼi ba Kristu; (4) ema fó bensaun ba ninia maluk.

• Besi-habit.

  Sasán neʼebé halo husi osan-mean, karik hanesan ho alkati, neʼebé uza iha tenda santu no templu atu hamate ahi neʼebé lakan iha ahi-oan fatin.​—Éx 37:23.

• Besi-makdadi.

  Neʼe mak besi todan kór-malahuk neʼebé fasil atu nabeen no dala barak uza nuʼudar xumbu ba kail nia talin no rede, no mós uza ba sanan matan neʼebé todan.

• Bibi-atan.

  Ema neʼebé tau matan, fó-han no proteje bibi sira. Liafuan neʼe uza nuʼudar símbolu atu refere ba Jeová, neʼebé tau matan ba ninia bibi-malae, katak ninia povu, ho domin. Nuneʼe mós, iha ai-knanoik ida, Jesus kompara ninia an hanesan “bibi-atan diʼak”. No mós, “bibi-atan” dala ruma refere ba ema Izraél nia ukun-naʼin sira, inklui sira neʼebé laran-metin no la laran-metin.

• Bibi-malae.

  Iha eskritura, dala barak “bibi-malae” reprezenta Jeová nia povu neʼebé laran-loos, la iha kbiit atu defende an, no neʼebé ema hanehan. Jesus kompara ninia dixípulu sira neʼebé haraik an no laran-metin nuʼudar bibi-malae.

• Bornál kiʼik.

  Hena ida neʼebé hanesan bolsu neʼebé enfeita ho fatuk-murak oioin. Amlulik boot ba nasaun Izraél tara bornál neʼe iha ninia hirus-matan, bainhira nia tama ba Fatin Santu. Neʼe hanaran “bornál kiʼik tesi-lia nian” tanba Urim no Tumim mak iha bornál laran. Urim no Tumim mak buat neʼebé uza atu buka-hatene Jeová nia desizaun sira. (Éx 28:15-​30)​—Haree Ap. B5.

• Brasa.

  Neʼe mak medida ida neʼebé uza atu sukat bee nia naruk, brasa ida mak metru 1,8. (Aps 27:28, nota)​—Haree Ap. B14.

• Bul, fulan.

  Fulan-8 tuir ema Judeu nia kalendáriu sagradu no fulan-segundu tuir kalendáriu sekulár. Naran Bul mai husi liafuan ida neʼebé signifika “fó fuan; rezultadu”. Hahú husi fulan-Outubru nia klaran toʼo fulan-Novembru nia klaran. (1Rs 6:​38)​—Haree Ap. B15.

C

• César.

  Neʼe mak ema Roma nia apelidu neʼebé ikusmai sai nuʼudar títulu ba liurai Roma nian. Bíblia temi César sira hanesan Augusto, Tibério no Cláudio. Maski Bíblia la temi César naran Nero, maibé koʼalia kona-ba nia. Iha Eskritura Lian Gregu, liafuan “César” mós reprezenta estadu ka governu nia podér.​—Mc 12:17; Aps 25:12.

D

• Dada sorteiu.

  Neʼe mak prosesu neʼebé ema uza fatuk ka ai-pedasuk kiʼik atu foti desizaun. Sira tau ai ka fatuk iha bolsu ka fatin ruma no tuirmai sira doko ida-neʼe. Ai ka  fatuk neʼebé monu sai ka dada sai mak determina sé mak manán. Baibain ema halo nuneʼe ho orasaun.​—Jos 14:2; Prv 16:33; Mt 27:35.

• Dagon.

  Ema Filístia nia maromak ida. Matenek-naʼin balu hanoin katak liafuan neʼe foti husi liafuan Ebraiku dagh (ikan).​—Juí 16:23; 1Sa 5:4.

• Darik.

  Osan-besi Pérsia nian neʼebé halo husi osan-mean, ho todan grama 8,4. (1Kr 29:7, nota)​—Haree Ap. B14.

• David nia Oan.

  Fraze neʼe refere ba Jesus, hodi hatudu katak nia mak iha direitu atu simu aliansa Ukun nian hodi kumpre liafuan neʼebé dehan katak David nia bei-oan ida mak sei simu ukun neʼe. ​—Mt 12:23; 21:9.

• David nia Sidade.

  Sidade neʼe uluk naran Jebus, maibé bainhira David manán tiha sidade neʼe, nia harii ninia palásiu iha neʼebá, no bolu nuʼudar David nia Sidade. Sidade neʼe mós naran Siaun. Neʼe iha Jeruzalein nia parte sudeste, no fatin neʼe mak antigu liu iha Jeruzalein.​—2Sa 5:7; 1Kr 11:​4, 5.

• Dekápolis.

  Ema Gregu nia sidade grupu ida neʼebé foufoun iha sidade sanulu (husi lian Gregu, deka, katak “sanulu”, polis, katak “sidade”). Sidade sira-neʼe barak liu mak iha Tasi Galileia no Mota Jordaun nia sorin parte leste, tan neʼe mak área neʼe mós hanaran Dekápolis. Sidade hirak-neʼe mak sentru ba kultura no negósiu ema Gregu nian. Jesus laʼo liu área neʼe maibé la iha evidénsia katak nia vizita sidade sira-neʼe. (Mt 4:​25; Mc 5:​20)​—Haree Ap. A7 no B10.

• Denáriu.

  Osan-besi Roma nian neʼebé halo husi osan-mutin, ho todan maizumenus grama 3,85. César nia dezeñu iha osan neʼe nia sorin ida. Denáriu ida mak osan neʼebé serbisu-naʼin ida simu nuʼudar kolen ba loron ida nian, no mós folin ba impostu neʼebé ema Judeu ida-idak selu ba ema Roma. (Mt 22:17; Lc 20:24)​—Haree Ap. B14.

• Devosaun ba Maromak.

  Neʼe katak respeitu, adora no halo serbisu ba Maromak Jeová, hodi hatudu laran-metin ba ninia direitu nuʼudar Ukun-Naʼin Boot Liu.​—1Ti 4:8; 2Ti 3:​12, nota.

• Diabu.

  Lian Gregu katak “ema neʼebé bosok hodi hafoʼer ema seluk nia naran”. Iha Eskritura Lian Gregu, liafuan neʼe refere ba Satanás. Satanás simu naran Diabu tanba nia mak ida neʼebé ulukliu atu bosok hodi duun matak no koʼalia aat kona-ba Jeová, Ninia Liafuan no Ninia naran santu.​—Mt 4:1; Jo 8:​44; Apk 12:9.

• Dikur.

  Neʼe refere ba animál nia dikur neʼebé ema uza nuʼudar kopu, fatin atu rai mina, tinta ka kozmétiku, no mós instrumentu múzika ka instrumentu atu fó avizu ruma. (1Sa 16:​1, 13; 1Rs 1:​39) Dala barak liafuan “dikur” mak símbolu ba kbiit boot, manán funu, ka vitória.​—Deu 33:17; Miq 4:​13; Zac 1:​19.

• Dirijente.

  Iha livru Salmo, liafuan Ebraiku neʼe karik refere ba ema neʼebé arranja knananuk no dirije ema Levi sira hodi treinu kanta. Ema neʼe mós dirije kantadór sira bainhira sira kanta iha serimónia ofisiál. Bíblia sira seluk tradús liafuan neʼe nuʼudar “mestre ba múzika” ka “dirijente ba koru”.​—Sal 4:Int; 5:Int.

• Dixiplina.

  Liafuan orijinál iha signifikadu luan, no refere ba treinu neʼebé fó matadalan, korrije no hanorin.​—Deu 11:2; Prv 1:2; Éf 6:4.

• Dixípulu.

  Neʼe mak ema neʼebé simu hanorin ka treinu husi ema seluk. Iha Eskritura Lian Gregu, liafuan neʼe liuliu refere ba ema neʼebé fiar no halo tuir Kristu nia hanorin. Liafuan neʼe mós refere ba ema neʼebé tuir João Batista ka ema Farizeu ka Moisés.​—Mt 10:1; 28:19; Lc 5:33; Jo 9:28.

• Domin neʼebé laran-metin.

  Liafuan Ebraiku, hésedh, refere ba domin kleʼan neʼebé motiva ho kompromisu, integridade, hahalok laran-metin no sentimentu neʼebé besik liu. Dala barak Bíblia uza liafuan neʼe atu koʼalia kona-ba Maromak nia domin ba ema, maibé ema mós bele hatudu domin hanesan neʼe ba malu.​—Éx 34:6; Rut 3:​10.

• Drakma.

  Iha Eskritura Lian Gregu, liafuan neʼe refere ba osan-besi neʼebé uza iha Grésia antigu, neʼebé halo husi osan-mutin ho todan grama 3,4. Iha Eskritura Lian Ebraiku, liafuan neʼe refere ba drakma osan-mean husi tempu Pérsia nian, neʼebé folin hanesan deʼit ho darik. (Ne 7:​70; Mt 17:24)​—Haree Ap. B14.

• Duʼut-kain; Ai lotuk.

  Liafuan neʼe refere ba ai-horis oioin neʼebé baibain moris iha fatin neʼebé iha bee. Iha versíkulu barak duʼut-kain neʼe mak Arundo donax. (Job 8:​11; Isa 42:3; Mt 27:29; Apk 11:1)​—Haree AI-LOOS SUKAT NIAN.

•  Duʼut-papiru.

  Duʼut aas neʼebé moris iha bee no baibain uza atu halo buat ruma hanesan raga, bote no bero. Duʼut neʼe mós uza atu halo surat-tahan atu hakerek, no livru barak mós halo husi duʼut-papiru.​—Éx 2:3.

E

• Ebraiku; Lian Ebraiku.

  Neʼe mak ema Ebreu nia língua. Iha Jesus nia tempu, lian Ebraiku kahur ona ho liafuan barak husi Aramaiku. Neʼe mak língua neʼebé Jesus no ninia dixípulu sira uza.​—Aps 26:14.

• Ebreu; Ema Ebreu.

  Primeiru, liafuan neʼe refere ba Abram (Abraão) atu halo nia la hanesan ho ninia viziñu ema Amoreu sira. Ikusmai, liafuan neʼe uza atu refere ba Abraão nia jerasaun liuhusi ninia bei-oan Jacob.​—Gén 14:13; Éx 5:3.

• Edom.

  Neʼe mak naran seluk ba Isaac nia oan-mane Esaú. Esaú nia jerasaun sira (ema Edom) hadau área Seir, katak área foho entre Tasi Mate no Golfu Akaba. Ikusmai área neʼe hanaran Edom. (Gén 25:30; 36:8)​—Haree Ap. B3 no B4.

• Efa.

  Neʼe mak medida ida atu sukat buat maran, no refere mós ba fatin sukat neʼe rasik atu sukat fini no ai-han. Efa ida hanesan deʼit ho bato ida, neʼe katak litru 22. (Éx 16:36; Eze 45:10)​—Haree Ap. B14.

• Efod.

  Amlulik sira-nia roupa neʼebé hanesan aventál. Amlulik boot hatais efod ida neʼebé espesiál, iha efod neʼe nia oin iha bornál kiʼik ida neʼebé enfeita ho fatuk-murak oioin hamutuk 12. (Éx 28:​4, 6)​—Haree Ap. B5.

• Efraim.

  Neʼe mak naran ba José nia oan-mane segundu. Ikusmai naran neʼe refere mós ba suku ida iha rai-Izraél. Nuʼudar suku neʼebé boot liu, Efraim reprezenta suku sanulu tomak bainhira nasaun Izraél fahe tiha ba rua.​—Gén 41:52; Jer 7:​15.

• Ekipamentu funu nian.

  Neʼe mak ekipamentu neʼebé soldadu sira uza atu proteje an, hanesan kapasete, sintu, roupa ho besi neʼebé proteje hirus-matan ho kotuk, no besi neʼebé proteje ain, no mós eskudu.​—1Sa 31:9, nota; Éf 6:​13-​17.

• Elul, fulan.

  Bainhira ema Judeu sai livre ona husi dadur iha Babilónia, neʼe mak naran ba fulan-6 tuir ema Judeu nia kalendáriu sagradu no fulan-12 tuir kalendáriu sekulár. Hahú husi fulan-Agostu nia klaran toʼo fulan-Setembru nia klaran. (Ne 6:​15)​—Haree Ap. B15.

• Ema Farizeu.

  Grupu ida husi relijiaun Judeu nian neʼebé iha ona iha Jesus nia tempu. Sira laʼós amlulik nia jerasaun maibé halo tuir Ukun-Fuan hotu, sira mós fiar katak lisan neʼebé tutan husi tempu uluk mak importante hanesan ho Moisés nia Ukun-Fuan. (Mt 23:23) Sira la simu kultura husi ema Gregu. Nuʼudar ema neʼebé estuda Ukun-Fuan no lisan, sira sai hanesan ulun-naʼin ba povu. (Mt 23:​2-6) Sira balu mak membru husi Sinédriu. Sira kontra beibeik Jesus tanba hanoin katak Jesus la halo tuir ukun-fuan kona-ba loron Sábadu, la tuir ema Judeu nia lisan, no ransu ho ema sala-naʼin no kobradór impostu. Sira balu sai ema Kristaun, inklui Saul husi Tarsu.​—Mt 9:​11; 12:14; Mc 7:5; Lc 6:2; Aps 26:5.

• Ema Judeu.

  Liafuan neʼe refere ba ema husi suku Judá bainhira nasaun Izraél nia suku sanulu naksobu ona. (2Rs 16:6) Bainhira ema Izraél livre ona husi rai-Babilónia, liafuan neʼe refere ba ema Izraél husi suku oioin neʼebé fila fali ba rai-Izraél. (Ezr 4:​12) Ikusmai, ema husi mundu tomak uza liafuan “ema Judeu” atu refere ba ema Izraél, atu halo diferensa ho nasaun jentiu sira. (Est 3:6) Apóstolu Paulo mós temi liafuan neʼe bainhira nia esplika katak ema nia rasa ka nasaun laʼós buat neʼebé importante iha kongregasaun Kristaun nia laran.​—Rom 2:​28, 29; Gal 3:​28.

• Ema livre; Ema neʼebé sai livre ona.

  Durante Roma nia ukun, “ema livre” mak ema ida neʼebé moris mai livre, ho direitu hotu nuʼudar sidadaun. Maibé “ema neʼebé sai livre ona” mak ema neʼebé uluk atan maibé sai livre husi situasaun neʼe. Ema neʼebé tuir prosesu formál atu sai livre bele sai sidadaun Roma nian, maibé nia labele hetan knaar polítiku. Ema neʼebé la tuir prosesu formál atu sai livre, nia la atan ona maibé la simu direitu sivíl tomak hanesan sidadaun ida.​—1Ko 7:​22.

• Ema Nazaré.

  Ema bolu Jesus ho naran neʼe tanba nia mai husi sidade Nazaré. Naran neʼe karik iha ligasaun ho liafuan Ebraiku iha Isaias 11:1 neʼebé dehan “ai-tubun”. Ikusmai liafuan “ema Nazaré” aplika mós ba Jesus nia dixípulu sira.​—Mt 2:​23; Aps 24:5.

• Ema Nazireu.

  Neʼe foti husi liafuan Ebraiku neʼebé signifika “ema neʼebé dedika ona”, “ema neʼebé haketak ona”. Ema Nazireu  iha grupu rua: grupu ida mak sira neʼebé ho hakarak rasik sai ema Nazireu no grupu seluk mak sira neʼebé Maromak hili atu sai ema Nazireu. Mane ka feto ida bele halo juramentu espesiál ba Jeová atu moris nuʼudar ema Nazireu ba tempu balu. Ema sira neʼebé ho hakarak rasik halo juramentu, sira tenke halo tuir ukun-fuan tolu: sira labele hemu tua no labele han ai-han ruma neʼebé halo husi uvas-fuan, labele tesi sira-nia fuuk, no labele kona mate-isin. Ema sira neʼebé Maromak hili atu sai ema Nazireu, sira sai ema Nazireu durante sira-nia moris tomak, no Jeová mak fó sai ukun-fuan espesífiku neʼebé sira tenke halo tuir.​—Núm 6:​2-7; Juí 13:5.

• Ema neʼebé siʼik futuru.

  Ema neʼebé dehan katak nia iha kbiit atu fó sai saida mak sei akontese iha futuru. Bíblia temi amlulik neʼebé halo masonik, siʼikdór, ka ema neʼebé estuda astrolojia no seluk tan nuʼudar ema neʼebé siʼik futuru.​—Lev 19:31; Deu 18:11; Aps 16:16.

• Ema Nefilím.

  Neʼe mak oan husi anju sira neʼebé nakfila an nuʼudar ema no hola feto sira iha mundu. Nefilím isin-boot no gosta violénsia. Sira moris antes Rai-Nabeen.​—Gén 6:4.

• Ema Netiním.

  Neʼe mak atan ka serbisu-naʼin iha templu neʼebé laʼós ema Izraél. Liafuan Ebraiku signifika “ema neʼebé fó ona”, neʼe katak fó ona sira hodi halo serbisu iha templu. Karik ema Netiním barak mak jerasaun husi ema Gibeão, neʼebé Josué fó knaar ‘nuʼudar atan atu hili ai no kuru bee ba povu no ba Jeová nia altár’.​—Jos 9:​23, 27; 1Kr 9:2; Ezr 8:​17.

• Ema Saduseu.

  Grupu relijiaun Judeu nian ida neʼebé naran-boot. Sira balu mak ema-boot nia família neʼebé riku no mós amlulik sira neʼebé iha kbiit boot neʼebé tau matan ba serbisu sira iha templu. Sira la simu lisan barak neʼebé ema Farizeu halo no mós Farizeu nia hanorin seluk tan. Sira la fiar moris-hiʼas no la fiar katak anju sira iha. Sira kontra Jesus.​—Mt 16:1; Aps 23:8.

• Ema Samaria.

  Foufoun liafuan neʼe refere ba ema Izraél husi suku sanulu iha nasaun parte norte, maibé bainhira ema Asíria manán tiha Samaria iha tinan 740 AEC, liafuan neʼe mós refere ba ema estranjeiru neʼebé ema Asíria lori mai hodi hela iha Samaria. Iha Jesus nia tempu, ema uza liafuan neʼe laʼós atu refere ba rasa ka nasaun, maibé refere ba ema sira neʼebé sai parte ba grupu relijiaun neʼebé iha área besik sidade Siquém no Samaria iha tempu uluk. Relijiaun neʼe kaer metin ba fiar balu neʼebé la hanesan ho fiar ema Judeu nian. (Jo 8:​48)​—Haree SAMARIA.

• Ema santu.

  Iha Eskritura Lian Gregu, ema neʼebé iha relasaun diʼak ho Maromak liuhusi aliansa foun mak sai santu, hamoos tiha, no haketak ona atu halo deʼit Maromak nia serbisu liuhusi “raan aliansa nian”, katak Jesus Kristu nia raan neʼebé fakar ona. (Ebr 10:29; 13:20) Liafuan “ema santu” aplika ba ema hotu neʼebé sai ida deʼit ho Kristu no atu ukun hamutuk ho nia. Dala barak “ema santu” mak Kristu nia alin espirituál hotu iha kongregasaun.​—Rom 1:7; 1Ko 1:2.

• Enxofre.

  Fatuk kinur ka fatuk-uut neʼebé fasil atu ahi han no ninia suar dois. Neʼe uza iha Bíblia laran nuʼudar símbolu kona-ba halakon buat ruma.

• Eskriba.

  Ema neʼebé kopia Eskritura Lian Ebraiku. Iha tempu neʼebé Jesus mai iha rai, liafuan “eskriba sira” refere ba grupu ida neʼebé estuda kona-ba Ukun-Fuan. Ema sira-neʼe kontra Jesus.​—Ezr 7:6; Mc 12:38, 39; 14:1.

• Eskritura.

  Maromak nia Liafuan sagradu neʼebé hakerek tiha ona. Iha Eskritura Lian Gregu deʼit mak temi liafuan neʼe.​—Lc 24:27; 2Ti 3:16.

• Espelta.

  Trigu oin ida neʼebé kualidade ladún diʼak (Triticum spelta), ninia kulit susar atu haketak husi ninia musan.​—Éx 9:​32.

• Espiritizmu.

  Neʼe mak fiar katak ema mate iha klamar no bele koʼalia ho ema moris. Sira koʼalia liuhusi ema ida neʼebé sira hakarak hakbesik. Liafuan Gregu ba “espiritizmu” mak farmakia, liafuan neʼe signifika “ai-moruk” ka “droga”. Liafuan neʼe ikusmai liga ho matan-dook nia atividade tanba iha tempu uluk baibain ema uza ai-moruk ka droga bainhira buka kbiit husi anju aat hodi bele halaʼo espiritizmu.​—Gal 5:​20; Apk 21:8.

• Espíritu.​—

  Haree RUAH no PNEUMA.

• Espíritu santu.

  Maromak nia forsa ka kbiit neʼebé ema nia matan la haree. Maromak uza forsa neʼe atu kumpre ninia hakarak.  Forsa neʼe “santu” tanba mai husi Jeová, Maromak neʼebé moos no loos liu, no tanba Maromak uza forsa neʼe atu halo hahalok neʼebé santu.​—Lc 1:​35; Aps 1:8.

• Etanim, fulan.

  Fulan-7 tuir ema Judeu nia kalendáriu sagradu no fulan-primeiru tuir kalendáriu sekulár. Hahú husi fulan-Setembru nia klaran toʼo fulan-Outubru nia klaran. Bainhira ema Judeu fila fali ona husi Babilónia, fulan neʼe hanaran Tisri. (1Rs 8:2)​—Haree Ap. B15.

• Etiópia.

  Nasaun antigu ida neʼebé iha rai-Ejitu nia sorin parte súl. Rai-Etiópia antigu nia área inklui parte súl husi rai-Ejitu modernu no rai-Sudaun modernu. Dala ruma liafuan neʼe refere ba liafuan Ebraiku “Kus”.​—Est 1:1.

• Eufrates; Mota Eufrates.

  Mota neʼebé naruk liu no importante liu iha Ázia sudueste. Neʼe mak mota ida husi mota rua neʼebé koñesidu iha Mezopotámia. Mota neʼe nia naran temi dala primeiru iha Génesis 2:14 hamutuk ho mota tolu seluk iha Eden. Dala barak Bíblia temi deʼit “Mota” kuandu refere ba Mota Eufrates. (Gén 31:21, nota) Mota neʼe sai nuʼudar Izraél nia fronteira iha sorin parte norte. (Gén 15:18; Apk 16:12)​—Haree Ap. B2.

• Eunuku.

  Neʼe refere ba mane neʼebé kapa ona. Dala barak mane hanesan neʼe serbisu iha liurai nia palásiu nuʼudar atan, ka tau matan ba liurai-feto no mós liurai nia feen-kiʼik sira. Liafuan neʼe mós bele refere ba mane neʼebé la kapa no serbí nuʼudar ulun-naʼin iha liurai nia palásiu. Liafuan “eunuku ba Reinu” mós uza nuʼudar símbolu ba ema neʼebé kontrola an atu bele halo serbisu barak liután ba Maromak.​—Mt 19:12; Est 2:​15; Aps 8:​27, nota.

• Ezíliu.

  Neʼe katak duni sai ema husi sira-nia rai rasik no obriga sira atu hela iha rai seluk. Kuandu nasaun seluk manán rai ida, sira fó orden atu haruka povu sai husi sira-nia rai. Iha lian Ebraiku, liafuan neʼe katak “sai ona”. Nasaun Izraél sai dadur iha rai seluk ba dala rua. Nasaun Izraél nia suku sanulu iha parte norte tenke sai husi sira-nia rai no sai dadur ka ezíliu iha Asíria, no depois neʼe suku rua iha parte súl mós sai husi sira-nia rai no sai dadur ka ezíliu iha Babilónia. Ema restu husi grupu rua neʼe ikusmai fila fali ba sira-nia rai bainhira liurai Ciro husi Pérsia mak ukun fali sira.​—2Rs 17:6; 24:16; Ezr 6:​21.

F

• Faraó.

  Neʼe mak títulu ba liurai sira iha rai-Ejitu. Bíblia temi faraó naʼin-lima nia naran, neʼe mak Sisac, So, Tiraka, Neco no Hofra. Maibé faraó sira seluk nia naran la temi, inklui mós Faraó neʼebé koʼalia ho Abraão, Moisés no José.​—Éx 15:4; Rom 9:​17.

• Fatin aas.

  Fatin adorasaun neʼebé baibain iha foho-oan nia tutun, iha foho leten ka iha palku neʼebé ema harii. Dala ruma ema uza fatin aas hodi adora Maromak, maibé dala barak ema uza fatin aas hodi adora maromak falsu sira.​—Núm 33:52; 1Rs 3:2; Jer 19:5.

• Fatin ba ahi-oan nia kabas; Ahi-anar fatin.

  Sasán neʼebé halo husi osan-mean, osan-mutin ka riti, uza iha tenda santu no templu hodi hasai ahi-anar husi altár sakrifísiu nian no hasai ahi-oan nia kabas neʼebé motuk ona husi ahi-oan fatin.​—Éx 27:3; 37:23.

• Fatin públiku.

  Neʼe mak área luan ida, baibain besik sidade nia portaun. Ema hasoru malu iha fatin neʼe atu halo negósiu ka rona Maromak nia ukun-fuan neʼebé ema lee no esplika. (Gén 23:10-18; Ne 8:1-3; Jer 5:1) Katuas sira mós hasoru malu iha fatin neʼe atu koʼalia hamutuk kona-ba kazu sira.​—Rut 4:1, 2, 11.

• Fatin sagradu.

  Baibain liafuan neʼe refere ba fatin neʼebé haketak tiha ba adorasaun, fatin neʼebé santu. Maibé dala barak liu, neʼe refere ba tenda santu ka templu iha Jeruzalein. Liafuan neʼe mós uza atu refere ba Maromak nia hela-fatin iha lalehan.​—Éx 25:​8, 9; 2Rs 10:25; 1Kr 28:10; Apk 11:19.

• Fatin sama trigu nian.​—

  Haree SAMA TRIGU.

• Fatin sama uvas nian.

  Neʼe mak tanke boot rua neʼebé halo husi fatuk-ahu, tanke ida aas liu tanke ida seluk, no liga ho kanu kiʼik. Bainhira ema sama ka harahun uvas-fuan iha tanke neʼebé aas liu, uvas-been suli ba tanke ida neʼebé iha okos. Liafuan neʼe uza nuʼudar komparasaun kona-ba Maromak nia tesi-lia ba ema.​—Isa 5:2; Apk 19:15.

• Fatin Santu.

  Fatin ida iha tenda santu no iha templu, fatin neʼe boot liu Fatin Santu Liu Hotu. Iha tenda santu, ahi-oan fatin neʼebé halo husi osan-mean, altár insensu neʼebé halo husi osan-mean, meza atu rai paun santu no mós sasán seluk neʼebé halo husi  osan-mean tau iha Fatin Santu. Iha Fatin Santu iha templu laran, iha altár neʼebé halo husi osan-mean, ahi-oan fatin sanulu neʼebé halo husi osan-mean, no meza sanulu atu tau paun santu. (Éx 26:33; Ebr 9:2)​—Haree Ap. B5 no B8.

• Fatin Santu Liu Hotu.

  Kuartu laran liu iha tenda santu no iha templu, neʼebé rai Arka Aliansa nian. Kuartu neʼe mós hanaran Fatin Santu neʼebé Santu Liu Hotu. Tuir Moisés nia Ukun-Fuan, amlulik boot deʼit mak bele tama ba kuartu neʼe. Kada tinan, iha Loron Hamoos Sala nian deʼit mak amlulik boot bele tama ba fatin neʼe.​—Éx 26:33; Lev 16:​2, 17; 1Rs 6:​16; Ebr 9:3.

• Fatuk dulas trigu nian.

  Fatuk kabuar rua neʼebé tula malu no uza atu deʼut trigu-musan. Iha ai ida neʼebé tau iha fatuk neʼebé iha kraik nia klaran hodi dulas fatuk ida iha leten. Iha Bíblia nia tempu, feto sira uza liman hodi dulas fatuk atu deʼut trigu. Ema barak iha fatuk dulas trigu nian iha uma. Moisés nia Ukun-Fuan bandu ema atu labele foti sira-nia maluk nia fatuk dulas trigu nian tomak ka fatuk ida iha leten nuʼudar garantia ba debe, tanba ema presiza atu halo paun loroloron. Iha mós fatuk dulas trigu nian neʼebé boot ho modelu hanesan neʼe, no baibain uza animál mak dulas fatuk neʼe hodi deʼut trigu.​—Deu 24:6; Mc 9:​42.

• Fatuk lulik.

  Riin neʼebé baibain halo husi fatuk, nuʼudar símbolu ba mane nia oin-lulik no uza hodi adora Baal ka maromak falsu seluk.​—Éx 23:24.

• Fatuk prinsipál.

  Neʼe mak fatuk boot neʼebé tau iha uma nia lidun. Fatuk neʼe importante atu hametin didin rua neʼebé kona malu. Fatuk-inan neʼebé tau iha uma nia fundasaun mak fatuk prinsipál. Baibain ema hili fatuk neʼebé boot no toos bainhira harii uma públiku no moru sidade nian. Bíblia uza liafuan neʼe atu kompara Maromak kria mundu hanesan tau fatuk-inan, no kompara kongregasaun Kristaun hanesan uma ida, no Jesus hanesan “fatuk prinsipál iha fundasaun”.​—Éf 2:​20; Job 38:6.

• Fatuk-oniks.

  Fatuk-murak ida neʼebé kór oioin (kór-metan, kór-kafé, kór-mean, kór-malahuk, ka kór-matak) no iha dalas kór-mutin. Fatuk neʼe uza iha amlulik boot nia roupa espesiál.​—Éx 28:​9, 12; 1Kr 29:2; Job 28:16.

• Feen-kiʼik.

  Dala barak feen-kiʼik mak atan-feto neʼebé sai ninia naʼi nia feen.​—Éx 21:8; 2Sa 5:​13; 1Rs 11:3.

• Fermentu.

  Buat ida neʼebé kahur ho trigu ka atu halo fermentasaun ba líkidu ruma. Baibain ema rai hela masa uitoan neʼebé iha fermentu atu uza fali. Dala barak Bíblia uza liafuan “fermentu” nuʼudar símbolu ba sala no hahalok aat, no dala ruma sai nuʼudar símbolu ba buat ida neʼebé ema nia matan la haree, neʼebé sai boot ba beibeik.​—Éx 12:20; Mt 13:33; Gal 5:9.

• Festa.

  Iha Eskritura, liafuan “festa” bele signifika selebrasaun ruma, no mós bele refere ba tempu neʼebé deside ona ka refere ba fatin neʼebé povu halibur hamutuk.

• Festa Barraka nian.

  Hanaran mós Festa Tenda nian, ka Festa Halibur Ai-Han nian. Halaʼo iha loron 15 toʼo 21 fulan-Etanim, hodi selebra tinan agrikultura neʼebé remata ona iha rai-Izraél no povu halibur hotu ona ai-han oioin. Festa neʼe mak tempu kontente no povu fó agradese ba Jeová tanba nia haraik bensaun ba sira-nia toʼos. Durante loron festa nian hotu, povu sira hela iha barraka, atu fó-hanoin ba sira kona-ba tempu neʼebé ema Izraél sai husi rai-Ejitu. Neʼe mak festa ida husi festa tolu neʼebé mane Izraél hotu tenke bá tuir iha Jeruzalein.​—Lev 23:34; Ezr 3:4.

• Festa Dedikasaun nian.

  Selebrasaun atu komemora tempu neʼebé hamoos fali templu tanba Antíoco Epifánio hafoʼer templu neʼe. Festa neʼe halaʼo tinan-tinan ba loron ualu, hahú husi loron 25 fulan-Kislev.​—Jo 10:22.

• Festa Koʼa Ai-Han Primeiru nian; Festa Semana nian.​—

  Haree PENTEKOSTES.

• Festa Paun Fermentu-Laek nian.

  Festa primeiru husi festa tolu neʼebé importante ba ema Izraél. Festa neʼe halaʼo ba loron hitu, hahú husi loron 15 fulan-Nisan, loron ida depois Festa Páskua. Durante festa neʼe, povu tenke han deʼit paun neʼebé la iha fermentu, hodi hanoin-hetan fali tempu neʼebé ema Izraél sai husi rai-Ejitu.​—Éx 23:15; Mc 14:1.

• Filístia; Ema Filístia.

  Neʼe mak área iha rai-Izraél nia parte súl iha tasi ninin neʼebé ikusmai hanaran Filístia. Imigrante sira husi Kreta hela iha área neʼe, no ikusmai hanaran ema Filístia. David manán sira, maibé sira kontinua ukun an rasik no nafatin  sai nuʼudar Izraél nia inimigu. (Éx 13:17; 1Sa 17:4; Am 9:7)​—Haree Ap. B4.

• Filozofia Epikureu.

  Filozofia husi ema Gregu ida naran Epicuro (341-​270 AEC). Filozofia neʼe bazeia ba ideia katak importante liu ba ema ida-idak atu buka ksolok iha moris.​—Aps 17:18.

• Filozofia Estoiku.

  Ema Gregu nia filozofia neʼebé dehan katak atu sai kontente, ema tenke moris hodi uza kbiit atu hanoin no moris tuir natureza. Tuir sira-nia hanoin, ema neʼebé matenek la hanoin barak kona-ba terus ka kontente.​—Aps 17:18.

• Fitun dadeer nian.

  Neʼe mak fitun neʼebé mosu ikusliu iha lalehan parte leste antes loro-matan saʼe. Bainhira fitun neʼe mosu, neʼe hatudu katak loron foun atu hahú ona.​—Apk 22:16; 2Pe 1:​19.

• Fó prezente ho laran-sadiʼa.

  Prezente neʼebé fó ba ema neʼebé presiza ajuda. Prezente sira-neʼe la temi iha Eskritura Lian Ebraiku, maibé Ukun-Fuan fó mandamentu ba ema Izraél kona-ba sira-nia obrigasaun atu ajuda ema kiak sira.​—Mt 6:2, nota.

• Folin atu sosa fali.

  Neʼe mak folin neʼebé tenke selu atu halo livre ema husi dadur, kastigu, terus, sala, ka obrigasaun ruma. Folin neʼe dala ruma laʼós deʼit kona-ba osan. (Isa 43:3) Tuir ukun-fuan, iha situasaun oioin neʼebé ema presiza selu folin atu sosa fali buat ruma. Porezemplu, ema Izraél nia oan-mane primeiru hotu ka animál nia oan primeiru mak Jeová nian, entaun tenke selu folin atu sosa fali hodi halo sira livre husi obrigasaun atu uza iha Jeová nia serbisu. (Núm 3:​45, 46; 18:15, 16) Se ema ruma la tau matan ba karau neʼebé siʼak no karau neʼe oho ema ida, karau nia naʼin tenke selu folin ruma atu bele halo nia livre husi kastigu-mate tuir lei. (Éx 21:29, 30) Maski nuneʼe, labele selu folin atu sosa fali ema neʼebé oho ema seluk ho neon. (Núm 35:31) Bíblia hatudu katak folin neʼebé Jesus selu liuhusi ninia sakrifísiu atu salva ema laran-metin husi sala no mate mak folin neʼebé importante liu hotu.​—Sal 49:​7, 8; Mt 20:28; Éf 1:7.

• Fui mina.

  Liafuan Ebraiku signifika “kose ho líkidu”. Ema Ebreu fui mina ba ukun-naʼin ka amlulik nia ulun nuʼudar konfirmasaun ba ema neʼe nia knaar. Fui mina ka kose mina ba sasán mak hanesan símbolu katak sasán neʼe dedika ona hodi uza ba serbisu espesiál ida. Iha Eskritura Lian Gregu, liafuan neʼe mós katak haraik espíritu santu ba ema sira neʼebé hetan esperansa atu saʼe ba lalehan.​—Éx 28:41; 1Sa 16:13; 2Ko 1:​21, nota.

• Fulan-foun.

  Neʼe mak loron primeiru fulan-fulan iha ema Judeu nia kalendáriu. Iha loron neʼe, ema Izraél halibur hamutuk, han hamutuk no hasaʼe sakrifísiu espesiál. Ikusmai, loron neʼe sai nuʼudar nasaun nia loron festa nian neʼebé importante, no ema labele halo serbisu iha loron neʼe.​—Núm 10:10; 2Kr 8:​13; Kol 2:​16.

G

• Gafañotu.

  Neʼe mak insetu neʼebé semo nuʼudar grupu ida bainhira sira muda fatin ka halo migrasaun. Tuir Moisés nia Ukun-Fuan, insetu neʼe mak moos no ema bele han. Insetu neʼe lubun ida bele han ai-horis hotu neʼebé sira semo liu, nuneʼe estraga buat barak, no neʼe bele hamosu dezastre boot.​—Éx 10:14; Mt 3:4.

• Gehena.

  Naran iha lian Gregu ba Foho-Leet Hinom, neʼebé iha sidade Jeruzalein antigu nia parte súl no sudueste. (Jer 7:​31) Iha profesia temi foho-leet neʼe nuʼudar fatin neʼebé soe ema nia mate-isin. (Jer 7:​32; 19:6) La iha evidénsia katak ema soe animál ka ema ba fatin neʼe atu sunu moris deʼit ka fó-terus. Tan neʼe, Gehena la reprezenta fatin neʼebé mate-klamar sira terus iha ahi laran ba nafatin. Maibé, Jesus no ninia dixípulu sira temi Gehena atu representa kastigu ba nafatin ka “mate segundu”, neʼe katak mate ba nafatin, nunka moris fali.​—Apk 20:14; Mt 5:​22; 10:28.

• Gera.

  Gera ida nia todan mak grama 0,57. Neʼe hanesan ho siklo 1/20. (Lev 27:25, nota)​—Haree Ap. B14.

• Gilead.

  Neʼe mak área iha Mota Jordaun nia sorin parte leste, hahú husi Foho-Leet Jabok nia sorin parte norte toʼo sorin parte súl, no área neʼe iha rai bokur. Dala ruma, liafuan neʼe mós refere ba ema Izraél nia rai tomak iha Mota Jordaun nia sorin parte leste, neʼebé suku Ruben, suku Gad no suku Manasés nia sorin balu hela bá. (Núm 32:1; Jos 12:2; 2Rs 10:33)​—Haree Ap. B4.

• Gomor.

  Neʼe mak medida ida atu sukat sasán maran. Gomor ida mak litru 2,2 ka efa 1/10. (Éx 16:16, 18)​—Haree Ap. B14.

•  Governadór.

  Iha Bíblia nia tempu, baibain governadór iha podér militár no judisiál, no iha responsabilidade atu tau matan ba distritu sira iha provínsia neʼebé nia ukun hodi povu tenke selu taxa, impostu ka rendimentu ba liurai ka ukun-naʼin boot liu. Governadór barak hatodan povu atu fó ai-han ba sira no sira-nia atan.​—Ne 5:14, 15; Lc 2:1, 2.

• Gregu; Lian Gregu.

  Neʼe mak língua neʼebé ema Gregu koʼalia; no mós refere ba ema neʼebé mai husi rai-Grésia ka ninia família husi neʼebá. Iha Eskritura Lian Gregu, liafuan neʼe mós iha signifikadu seluk no bele refere ba ema hotu neʼebé laʼós ema Judeu ka sira neʼebé hetan influénsia husi língua ka kultura Gregu nian.​—Joe 3:6; Jo 12:20.

• Guarda.

  Ema neʼebé iha knaar atu hein fatin ida ka ema, liuliu iha kalan. Se guarda ida haree perigu ruma atu akontese, nia fó avizu ho lian makaʼas. Dala barak, guarda sira hein iha moru sidade nian, ka iha uma aas hodi bele haree dook no hatene sé mak mai daudaun. Iha Bíblia, kompara profeta sira hanesan guarda tanba sira fó avizu ba nasaun Izraél kona-ba susar neʼebé atu kona nasaun.​—2Rs 9:​20; Eze 3:​17.

• Guarda Pretoriana.

  Grupu tropa Roma nian neʼebé serbisu nuʼudar guarda ba liurai Roma. Grupu guarda neʼe ikusmai hetan podér polítiku nian neʼebé boot no uza neʼe atu apoia ka hatún liurai neʼebé ukun.​—Flp 1:​13, nota.

H

• Hadame malu ho Maromak.​—

  Haree HAMOOS SALA.

• Hades.

  Neʼe mak liafuan Gregu neʼebé iha signifikadu hanesan ho liafuan Ebraiku siol. Neʼe tradús nuʼudar “rate”. Neʼe refere ba fatin simbóliku ba ema mate, ka kondisaun ema mate nian. (Aps 2:​31)​—Haree RATE.

• Hahalok aat toʼo la sente moe.

  Husi liafuan Gregu asélgeia, fraze neʼe refere ba hahalok sala sériu neʼebé kontra Maromak nia ukun-fuan. Hahalok neʼebé hatudu atitude brani ka la sente moe, hahalok neʼebé la iha respeitu ka kontra ema neʼebé iha podér, kontra ukun-fuan no norma. Fraze neʼe laʼós kona-ba hahalok sala neʼebé kiʼik.​—Gal 5:​19; 2Pe 2:7.

• Hahalok loos; Ema laran-loos.

  Iha Eskritura, liafuan neʼe refere ba buat neʼebé loos neʼebé Maromak mak determina no tuir norma husi Maromak. Liafuan neʼe mós dala ruma tradús nuʼudar “ema loos”, “buat neʼebé loos” no “justisa”.​—Gén 15:6; Deu 6:​25; Prv 11:4; Sof 2:3; Mt 6:​33; 2Pe 3:​13.

• Hahalok matan-dook.

  Neʼe mak hahalok neʼebé la baibain neʼebé uza kbiit husi espíritu aat.​—2Kr 33:6.

• Haliri.

  Bainhira ema sama tiha ona trigu-fulin, ninia musan haketak tiha husi ninia kulit no trigu-kain. Entaun, ema uza kanuru ka garfu boot atu hisik buat hotu ba leten hodi anin huu sai tiha ninia kain no kulit, no trigu-musan neʼebé todan mak monu fali ba fatin sama trigu nian.

• Halo santu.

  Neʼe mak prosesu atu haketak ema ka sasán ruma hodi uza ba Maromak Jeová nia serbisu. Bíblia mós uza liafuan neʼe atu refere ba kondisaun ka situasaun neʼebé santu ka moos ona.

• Hamoos sala; Hadame malu ho Maromak.

  Iha Eskritura Lian Ebraiku, liafuan neʼe iha ligasaun ho sakrifísiu neʼebé ema hasaʼe hodi bele hakbesik no adora Maromak. Tuir Moisés nia Ukun-Fuan, ema tenke hasaʼe sakrifísiu, liuliu iha Loron Hamoos Sala nian tinan-tinan, hodi nuneʼe ema ida-idak ka nasaun tomak bele hadame malu ho Maromak maski sira halo ona sala. Sakrifísiu sira-neʼe reprezenta Jesus nia sakrifísiu neʼebé hamoos ema nia sala iha dalan neʼebé kompletu dala ida deʼit ba nafatin, no ida-neʼe fó oportunidade ba ema atu hadame malu ho Jeová.​—Lev 5:​10; 23:28; Kol 1:​20; Ebr 9:​12.

• Hena karón.

  Hena mahar neʼebé uza hodi halo saku, karón atu tau ai-han. Baibain hena neʼe soru husi bibi-timur fulun neʼebé kór-metan. Ema hatais hena neʼe bainhira triste hela tanba ema mate, no bainhira arrepende an tanba halo ona sala.​—Gén 37:34; Lc 10:13.

• Hermes.

  Ema Gregu nia maromak ida. Hermes mak Zeus nia oan-mane. Iha Listra, ema hanoin sala katak Paulo mak Hermes tanba Hermes nia knaar mak atu koʼalia sai maromak sira-nia lia-menon no Hermes mós iha matenek boot atu koʼalia.​—Aps 14:12.

• Herodes.

  Apelidu husi família ida neʼebé ukun ema Judeu. Governu Roma mak  hili família neʼe atu sai ukun-naʼin. Herodes Boot sai koñesidu tanba harii fali templu iha Jeruzalein no fó orden atu oho hotu labarik sira, tanba hakarak oho Jesus. (Mt 2:​16; Lc 1:5) Herodes Boot nia oan-mane sira, Herodes Arkelau no Herodes Antipas, hetan knaar atu ukun sira-nia aman nia rai balu. (Mt 2:​22) Antipas mak ukun-naʼin tetrarka, ema barak bolu nia “liurai”, nia ukun durante tempu neʼebé Kristu halaʼo serbisu haklaken ba tinan tolu ho balu toʼo tempu neʼebé temi iha Apóstolu kapítulu 12. (Mc 6:​14-​17; Lc 3:​1, 19, 20; 13:31, 32; 23:​6-​15; Aps 4:​27; 13:1) Liutiha neʼe, Maromak nia anju oho Herodes Boot nia bei-oan, Herodes Agripa I, neʼebé ukun ba tempu badak deʼit. (Aps 12:​1-6, 18-​23) Ninia oan-mane, Agripa II sai ukun-naʼin toʼo tempu neʼebé ema Judeu kontra governu Roma.​—Aps 23:35; 25:13, 22-​27; 26:​1, 2, 19-​32.

• Herodes nia partidu.

  Grupu ida neʼebé luta atu hetan independénsia ba sira-nia nasaun tanba hadomi nasaun Judeu nian, no apoia família Herodes neʼebé ukun ema Judeu iha ema Roma nia ukun okos. Karik ema Saduseu balu mak membru ba partidu ida-neʼe. Ema husi grupu neʼe ho ema Farizeu sira la gosta Jesus.​—Mc 3:6.

• Higaion.

  Liafuan atu dirije múzika. Iha Salmo 9:​16, karik liafuan neʼe katak pauza bainhira toka arpa ho nota neʼebé tun no neineik, ka pauza atu bele hanoin kona-ba múzika neʼe.

• Hili restu.

  Hili trigu ka sevada restu neʼebé toʼos-naʼin sira la koʼa. Tuir Moisés nia Ukun-Fuan, bainhira toʼos-naʼin sira koʼa trigu ka sevada, sira labele koʼa hotu, maibé tenke husik hela balu iha toʼos ninin, no mós labele kuʼu hotu uvas no oliveira fuan. Ai-han sira-neʼe tenke husik hela atu nuneʼe ema kiak ka ema neʼebé iha terus laran, oan kiak, feto-faluk no ema estranjeiru sira bele hili. Neʼe mak sira-nia direitu, neʼebé Maromak fó ba sira.​—Rut 2:7.

• Him.

  Neʼe mak medida ida atu sukat líkidu, no refere mós ba fatin sukat neʼe rasik. Him ida mak litru 3,67. Neʼe bazeia ba matenek-naʼin ida kona-ba istória naran Josefo nia komentáriu katak him ida hanesan deʼit ho ema Atenas nia koro rua. (Éx 29:40, nota)​—Haree Ap. B14.

• Horeb; Foho Horeb.

  Área foho neʼebé haleʼu Foho Sinai. Naran seluk ba Foho Sinai. (Éx 3:1; Deu 5:2)​—Haree Ap. B3.

I

• Idolatria.

  Neʼe mak hahalok atu hahiʼi, hadomi no halo adorasaun ba ídolu.​—1Ko 10:14, nota.

• Ídolu.

  Estátua, imajen, ka buat naran deʼit neʼebé reprezenta buat ruma. Neʼe mós inklui buat neʼebé ema haree ka imajina deʼit, no uza atu halaʼo adorasaun.​—Sal 115:4; Aps 17:16, nota.

• Ilas.

  Buat neʼebé reprezenta, haleno ka hanesan ho ema ka sasán ida. Maromak nia oan-mane mesak neʼebé ikusmai sai nuʼudar ema no hanaran Jesus, mak ilas husi ninia Aman.​—2Ko 4:4.

• Ilíriko.

  Roma nia provínsia ida iha rai-Grésia nia sorin parte norueste. Paulo laʼo-rai toʼo provínsia neʼe, maibé Bíblia la fó-hatene se nia haklaken iha Ilíriko, ka haklaken toʼo deʼit neʼebá. (Rom 15:19)​—Haree Ap. B13.

• Impostu; Prezente.

  Neʼe mak buat neʼebé nasaun ida ka ukun-naʼin ida tenke selu ba ukun-naʼin seluk nuʼudar sinál atu hatudu hakruʼuk an, atu bele iha dame nafatin no bele hetan protesaun. (2Rs 3:4; 18:14-16; 2Kr 17:11) Liafuan neʼe mós refere ba taxa neʼebé ema ida-idak selu.​—Ne 5:4; Rom 13:7.

• Insensu.

  Ai-been morin sira neʼebé kahur hamutuk ona ho bálsamu. Baibain ahi han insensu neineik-neineik, no hasai suar neʼebé morin. Ema halo insensu espesiál husi buat morin haat hodi uza iha tenda santu no templu. Ema tenke sunu insensu neʼe dadeer no kalan iha altár insensu nian iha Fatin Santu, no mós tenke sunu iha Fatin Santu Liu Hotu nia laran iha Loron Hamoos Sala nian. Ema Kristaun sira la presiza halo tuir ukun-fuan kona-ba sunu insensu. Insensu reprezenta ema laran-metin nia orasaun neʼebé Maromak simu.​—Éx 30:34, 35; Lev 16:13; Apk 5:8.

• Insensu-fatin.

  Sasán neʼebé halo husi osan-mean, osan-mutin ka riti. Uza iha tenda santu no templu hodi sunu insensu.​—2Kr 26:19; Ebr 9:4.

• Insetu.

  Animál kiʼik neʼebé isin iha parte tolu, ulun, karas no kabun. Insetu iha ain neen, antena pár ida, no baibain iha liras rua ka haat.​—Deu 28:42; Isa 18:1.

•  Integridade.

  Neʼe refere ba morál neʼebé diʼak no kompletu, laran-loos, moris ho hahalok loos. Liafuan neʼe mós bele signifika kaer metin ba justisa ho laran tomak. Bíblia uza liafuan neʼe atu hatudu katak importante tebes atu hatudu nafatin laran-metin ka devosaun ba Maromak Jeová no ba ninia hakarak, no devosaun neʼe labele kotu.​—Jos 24:14; Job 27:5; Sal 26:1, nota.

• Introdusaun.

  Liafuan badak atu hahú salmo sira. Neʼe fó sai informasaun kona-ba hakerek-naʼin mak sé, ema hasoru situasaun hanesan saida, atu fó-hatene matadalan kona-ba múzika nian, fó sai objetivu ka oinsá atu uza salmo ida.​—Haree introdusaun iha Salmo 3, 4, 5, 6, 7, 30, 38, 60, 92, 102.

• Izraél.

  Naran neʼebé Maromak fó ba Jacob. Ikusmai naran neʼe refere ba ninia jerasaun hotu. Jacob nia oan-mane nain-12 nia jerasaun, dala barak bolu nuʼudar Izraél nia oan-mane, umakain Izraél, povu Izraél, ka ema Izraél. Bíblia mós uza liafuan Izraél nuʼudar naran ba suku sanulu iha parte norte neʼebé haketak an husi parte súl, ikusmai naran neʼe mós refere ba ema Kristaun neʼebé Maromak hili ona ho espíritu santu, neʼe mak “Izraél Maromak nian”.​—Gal 6:​16; Gén 32:28; 2Sa 7:​23; Rom 9:6.

J

• Jacob.

  Isaac no Rebeca nia oan-mane. Bainhira nia katuas ona, Maromak hanaran nia Izraél, no ninia jerasaun mak nasaun Izraél (ema Izraél no ikusmai ema Judeu). Ninia oan-mane naʼin-12 hamutuk ho sira-nia jerasaun sai nasaun Izraél nia suku 12. Jacob nia naran mós refere ba nasaun Izraél ka povu Izraél.​—Gén 32:28; Mt 22:32.

• Jedutum.

  Liafuan neʼe ita la hatene ho loloos ninia signifikadu, liafuan neʼe uza iha Salmo 39, 62, no 77 nia introdusaun neʼebé fó matadalan kona-ba oinsá atu kanta ka atu toka instrumentu múzika ida-neʼebé. Iha Bíblia, temi kona-ba tokadór Levi ida naran Jedutum. Tan neʼe, karik liafuan neʼe refere ba nia ka ninia oan-mane sira-nia dalan atu kanta ka toka instrumentu múzika.

• Jejún.

  Neʼe katak la han buat ida ba tempu balu. Ema Izraél sira halo jejún iha Loron Hamoos Sala nian, iha tempu susar, no kuandu presiza matadalan husi Maromak. Ema Judeu halo jejún dala haat iha tinan ida nia laran atu komemora tempu triste iha sira-nia nasaun nia istória. La iha ukun-fuan neʼebé dehan katak ema Kristaun tenke halo jejún.​—Ezr 8:21; Isa 58:6; Lc 18:12.

• Jeová.

  Liafuan neʼe tradús ba lian Tetun husi Tetragrama (letra Ebraiku haat ba Maromak nia naran), neʼebé mosu dala 7.000 liu iha tradusaun Bíblia ida-neʼe.​—Haree Ap. A4 no A5.

• Jitit.

  Neʼe mak liafuan múzika nian, no ema la hatene ho loloos ninia signifikadu. Karik neʼe mai husi liafuan Ebraiku gath. Tuir ema balu nia hanoin, karik neʼe mak melodia ba knananuk sira kona-ba halo tua-uvas, tanba liafuan gath refere ba fatin sama uvas nian.​—Sal 81:Int.

• Judá.

  Jacob no Lea nia oan-mane númeru haat. Bainhira Jacob besik ona atu mate, nia fó sai profesia katak iha futuru sei mosu ukun-naʼin ida neʼebé forte no ninia ukun mak ba nafatin. Nia mai husi Judá nia liña família nian. Bainhira Jesus moris iha rai, nia mak Judá nia jerasaun. Naran Judá mós refere ba suku ida iha Izraél, no mós nasaun ida. Nasaun Judá mak iha parte súl. Suku Judá no suku Benjamim mak forma nasaun neʼe, no neʼe inklui mós amlulik no ema Levi sira. Judá nia rai mak iha rai-Izraél nia parte súl no inklui mós Jeruzalein no templu.​—Gén 29:35; 49:10; 1Rs 4:​20; Ebr 7:​14.

• Juís.

  Mane neʼebé Jeová hili atu salva ninia povu husi susar durante tempu neʼebé ema Izraél seidauk iha liurai.​—Juí 2:16.

• Juramentu.

  Deklarasaun atu hametin katak buat ruma mak loos, ka promesa atu halo ka la halo buat ruma. Dala barak ema halo juramentu ba ema neʼebé pozisaun aas liu, ka ba Maromak. Bainhira Jeová halo aliansa ho Abraão, nia hametin ninia liafuan hodi jura.​—Gén 14:22; Núm 6:2; Ecl 5:4; Mt 5:33; Ebr 6:​16, 17.

K

• Kabo.

  Neʼe mak medida ida atu sukat sasán maran. Kabo ida mak litru 1,22. Kabo nia medida bazeia no kalkula tuir bato. (2Rs 6:​25, nota)​—Haree Ap. B14.

• Kadeira tesi-lia nian.

  Baibain neʼe mak palku iha uma liʼur neʼebé iha eskada atu saʼe. Ulun-naʼin sira tuur iha palku neʼe hodi koʼalia ba ema-lubun no fó sai sira-nia desizaun. Liafuan “Maromak nia kadeira tesi-lia  nian” no “Kristu nia kadeira tesi-lia nian” mak símbolu neʼebé reprezenta Jeová nia arranju atu tesi-lia ba ema hotu.​—Rom 14:10; 2Ko 5:​10; Jo 19:13.

• Kadeli selus.

  Neʼe mak selus neʼebé ema tau iha liman-fuan ka tau iha tali, karik atu tara iha kakorok. Neʼe mak símbolu ba ukun-naʼin ka ema-boot ida nia autoridade. (Gén 41:42)​—Haree SELUS.

• Kaldeia; Ema Kaldeia.

  Uluk liafuan neʼe refere ba rai no ema neʼebé hela iha área rai-tetuk besik Mota Tigris no Mota Eufrates. Ikusmai liafuan sira-neʼe refere ba rai-Babilónia tomak no ema Babilónia. “Ema Kaldeia” mós refere ba grupu ema matenek sira neʼebé estuda siénsia, istória, língua no astronomia, maibé sira mós halo masonik no estuda astrolojia.​—Ezr 5:​12; Dan 4:7; Aps 7:4.

• Kanaan.

  Noé nia bei-oan, no Ham nia oan-mane númeru haat. Suku 11 neʼebé husi Kanaan nia jerasaun, ikusmai hela iha área parte leste husi Tasi Mediterráneu entre rai-Ejitu no rai-Síria. Área neʼe bolu nuʼudar “rai-Kanaan”. (Lev 18:3; Gén 9:​18; Aps 13:19)​—Haree Ap. B4.

• Kaneta.

  Neʼe mak sasán neʼebé uza atu hakerek iha buat ruma hanesan rai-mean ka lilin. (Sal 45:1; Isa 8:1; Jer 8:8) Kaneta halo husi besi ka buat ruma neʼebé toos hodi bele uza atu bahat letra iha fatuk ka besi.​—Job 19:24; Jer 17:1.

• Katuas.

  Neʼe katak mane neʼebé idade maduru ona, maibé iha Eskritura, neʼe refere liu ba mane sira neʼebé iha pozisaun ka responsabilidade ruma iha povu ka nasaun nia leet. Iha livru Apokalipse, liafuan neʼe mós uza atu koʼalia kona-ba kriatura sira iha lalehan. Liafuan Gregu presbiteros tradús nuʼudar “katuas” bainhira neʼe refere ba mane sira neʼebé iha responsabilidade atu dirije kongregasaun. (Éx 4:​29; Prv 31:23; 1Ti 5:​17; Apk 4:4) Sira mós tau matan no sai nuʼudar bibi-atan ba kongregasaun. Ideia báziku husi liafuan Gregu episkopos mak tau matan hodi proteje. Liafuan neʼe no liafuan presbiteros refere ba pozisaun neʼebé hanesan iha kongregasaun Kristaun nia laran. Liafuan presbiteros kona-ba hahalok maduru husi ema neʼebé hetan knaar neʼe, no liafuan episkopos kona-ba responsabilidade husi ninia knaar.​—Aps 20:28; 1Ti 3:​2-7; 1Pe 5:2.

• Kemos.

  Ema Moab nia maromak prinsipál.​—1Rs 11:33.

• Kerubín.

  Anju neʼebé iha pozisaun aas no iha knaar espesiál. Anju sira-neʼe la hanesan ho serafín.​—Gén 3:​24; Éx 25:20; Isa 37:16; Ebr 9:5.

• Kislev, fulan.

  Bainhira ema Judeu fila fali ona husi Babilónia, neʼe mak naran ba fulan-9 tuir ema Judeu nia kalendáriu sagradu no fulan-3 tuir kalendáriu sekulár. Hahú husi fulan-Novembru nia klaran toʼo fulan-Dezembru nia klaran. (Ne 1:1; Zac 7:1)​—Haree Ap. B15.

• Knananuk bainhira saʼe ba sidade.

  Neʼe mak liafuan sira iha Salmo 120-134 nia introdusaun. Maski ema iha hanoin oioin kona-ba liafuan neʼe nia signifikadu, maibé ema barak dehan katak ema Izraél kanta salmo 15 neʼe ho haksolok nuʼudar sira saʼe daudaun ba Jeruzalein, neʼebé iha Judá nia área foho, atu tuir festa tolu neʼebé halaʼo tinan-tinan iha neʼebá.

• Knananuk triste nian; Lamentasaun.

  Knananuk ka poezia neʼebé ema halo atu hatudu sentimentu triste tanba belun ka família ida mate.​—2Sa 1:​17; Sal 7:Int.

• Komiñu.

  Neʼe mak ai-horis neʼebé koñesidu ho ninia musan neʼebé morin. Ema iha Médiu Oriente no nasaun sira seluk uza nuʼudar temperus atu kahur ba paun, dose, sopa no tua.

• Kongregasaun.

  Grupu ida neʼebé halibur hamutuk ho objetivu ida ka atu halo atividade ruma. Iha Eskritura Lian Ebraiku, liafuan neʼe refere ba nasaun Izraél. Iha Eskritura Lian Gregu, liafuan neʼe refere ba kongregasaun Kristaun ida-idak, maibé dala barak mós refere ba ema Kristaun iha mundu tomak.​—1Rs 8:​22; Aps 9:​31; Rom 16:5.

• Konxiénsia.

  Neʼe mak kbiit iha ema nia laran neʼebé ajuda sira rekoñese saida mak loos no sala, saida mak tenke halo no labele halo. Liafuan Gregu orijinál signifika koñesimentu iha ema nia laran. Neʼe katak konxiénsia bele tesi-lia kona-ba ita-nia an, hodi duun ita kona-ba hahalok sala neʼebé ita halo ona, ka halo ita sente diʼak tanba halo hahalok loos. Konxiénsia mós bele fó avizu ba ita kona-ba desizaun neʼebé sala.​—Rom 2:14, 15; 9:1.

• Korál.

  Buat toos ida hanesan fatuk neʼebé forma husi animál kiʼik nia ruin iha tasi laran. Iha Tasi Mean iha korál barak  ho kór oioin hanesan mean, mutin no metan. Iha Bíblia nia tempu, korál mean mak folin-boot, no ema uza hodi halo morteen-musan no sasán murak seluk.​—Prv 8:​11.

• Koro.

  Neʼe mak medida ida atu sukat sasán maran no mós líkidu. Koro ida mak litru 220. Koro nia medida bazeia no kalkula tuir bato. (1Rs 5:​11, nota)​—Haree Ap. B14.

• Kortina.

  Hena furak neʼebé soru tiha no borda ho dezeñu kerubín sira, neʼebé haketak Fatin Santu husi Fatin Santu Liu Hotu iha tenda santu no mós iha templu. (Éx 26:31; 2Kr 3:​14; Mt 27:51; Ebr 9:3)​—Haree Ap. B5.

• Kóvado.

  Neʼe mak medida ida atu sukat distánsia. Maizumenus distánsia husi liman-sikun toʼo liman-fuan klaran nia tutun. Ema Izraél baibain sukat hodi uza kóvado ho distánsia neʼebé maizumenus sentímetru 44,5, maibé sira mós sukat hodi uza kóvado naruk, maizumenus sentímetru 51,8. (Gén 6:​15; Lc 12:25, nota)​—Haree Ap. B14.

• Kristaun.

  Neʼe mak naran neʼebé Maromak fó ba Jesus Kristu nia dixípulu sira.​—Aps 11:26; 26:28.

• Kristu.

  Neʼe mak Jesus nia títulu neʼebé husi liafuan Gregu Kristos neʼebé signifika hanesan ho liafuan Ebraiku “Mesias” ka “Ida neʼebé hili ona; Ida neʼebé nia fui ona mina”.​—Mt 1:​16; Jo 1:​41.

• Kuda-freun.

  Tali ida neʼebé kesi haleʼu kuda nia kakorok no ibun hodi bele kontrola kuda.

• Kuda-karreta.

  Karreta ho roda rua neʼebé kuda mak dada, no liuliu uza ba funu.​—Éx 14:23; Juí 4:​13; Aps 8:​28.

• Kulapur.

  Neʼe mak buat ida neʼebé mosu iha ai-horis tanba fungu. Ema balu dehan katak kulapur neʼebé temi iha Bíblia mak moras ida iha ai-horis naran puccinia graminis.​—1Rs 8:​37.

L

• La moos.

  Neʼe bele refere ba isin neʼebé foʼer ka kontra lei kona-ba morál. Maibé, iha Bíblia, liafuan neʼe dala barak refere ba buat neʼebé la diʼak, ka foʼer, tuir Moisés nia Ukun-Fuan. (Lev 5:2; 13:45; Mt 10:1, nota; Aps 10:14; Éf 5:5)​—Haree MOOS.

• Lamentasaun.​—

  Haree KNANANUK TRISTE NIAN.

• Laran.

  Liafuan Ebraiku no Gregu neʼebé tradús nuʼudar “laran” bele signifika ema nia fuan-laran. Maibé, dala barak liu liafuan “laran” uza atu reprezenta buat neʼebé iha ema nia laran neʼebé hatudu sai iha ninia hahalok hotu no ninia hakarak no sentimentu sira, no buat seluk tan.

• Laran-diʼak neʼebé boot.

  Liafuan Gregu iha ideia kona-ba buat neʼebé halo ema gosta ka kontente. Liafuan neʼe dala barak refere ba prezente neʼebé ema fó ho laran-diʼak ka hahalok diʼak. Bainhira koʼalia kona-ba Maromak nia laran-diʼak neʼebé boot, neʼe hatudu kona-ba prezente neʼebé Maromak fó ho laran-luak no la presiza selu. Ho ida-neʼe, liafuan neʼe hatudu katak Maromak fó ho gratuitu no ho domin neʼebé laran-luak no laran-diʼak ba ema. Liafuan Gregu neʼe mós dala ruma tradús ‘prezente laran-diʼak’. Ema simu prezente neʼe laʼós ho sira-nia hakaʼas an rasik, maibé tanba Maromak mak fó ho laran-luak.​—2Ko 6:1; Éf 1:7.

• Lees roupa.

  Lees roupa mak sinál triste nian neʼebé ema Judeu baibain hatudu. Dala barak sira lees deʼit sira-nia roupa parte leten, hodi hatudu uitoan sira-nia hirus-matan. Neʼe laʼós lees hotu sira-nia roupa toʼo labele uza tan.​—Gén 37:34; Est 4:1; Aps 14:14.

• Lejiaun.

  Neʼe mak Roma antigu nia grupu tropa neʼebé iha soldadu maizumenus naʼin-4.000 toʼo 6.000. Liafuan “lejiaun” iha Eskritura sira refere ba númeru barak no sura labele.​—Mt 26:53, nota; Mc 5:9; Lc 8:30.

• Lelir; Tanis.

  Neʼe mak espresaun triste neʼebé ema hatudu tanba ema mate ka hetan susar ruma. Iha Bíblia nia tempu, ema iha toman atu hatudu triste ba tempu ruma. Durante tempu neʼe, sira tanis ho lian makaʼas, uza roupa espesiál, tau ahi-kadesan iha sira-nia ulun, lees sira-nia roupa, no tuku sira-nia hirus-matan. Dala ruma ema selu ema seluk neʼebé profisionál atu tanis lelir bainhira hakoi ema mate.​—Gén 23:2; Est 4:3; Apk 21:4.

• Lepton.

  Neʼe mak ema Judeu nia osan-besi kiʼik liu neʼebé halo husi riti ka bronze iha tempu Eskritura Lian Gregu nian. (Mc 12:42; Lc 21:2; nota)​—Haree Ap. B14.

• Levi; Ema Levi.

  Neʼe mak Jacob no Lea nia oan-mane terseiru, no refere mós ba suku ida iha Izraél. Ninia oan-mane naʼin-tolu  mak komesa grupu tolu husi ema Levi. Dala ruma, liafuan “ema Levi” refere ba suku tomak, maibé baibain la inklui Arão nia família neʼebé serbí nuʼudar amlulik. Suku Levi la simu liman-rohan iha rai neʼebé Maromak promete ona maibé sira simu sidade 48 iha suku seluk nia rai.​—Deu 10:8; 1Kr 6:1; Ebr 7:​11.

• Leviatan.

  Neʼe mak animál neʼebé baibain iha bee laran. Iha Job 3:8 no 41:1, karik leviatan refere ba lafaek ka kriatura seluk neʼebé boot no forte iha bee laran. Iha Sal 104:26, karik leviatan mak ikan-baleia oin ida. Iha versíkulu sira seluk liafuan neʼe uza hanesan símbolu no la refere ba animál ruma.​—Sal 74:14; Isa 27:1, nota.

• Lia-dadolin.​—

  Haree PROVÉRBIOS.

• Liafuan diʼak.

  Iha Eskritura Lian Gregu, neʼe refere ba liafuan diʼak kona-ba Maromak nia Ukun no salvasaun liuhusi fiar ba Jesus Kristu.​—Lc 4:​18, 43; Aps 5:​42; Apk 14:6.

• Liman-sukat.​—

  Haree NARUK HUSI LIMAN-FUAN BOOT TOʼO LIMAN-FUAN KIʼIK.

• Liurai nia ai-tonka.

  Ai-lolon ka besi-lolon neʼebé ukun-naʼin kaer atu hatudu ninia pozisaun ka podér nuʼudar liurai.​—Gén 49:10; Ebr 1:8.

• Liurai-Feto Lalehan nian.

  Neʼe mak títulu ba maromak-feto neʼebé ema Izraél adora bainhira sira sai apóstata iha Jeremias nia tempu. Ema balu dehan katak neʼe refere ba ema Babilónia nia maromak-feto Istar (Astarte). Ninia naran neʼe hanesan ho ema Sumer nia maromak-feto naran Inana, neʼebé signifika “Liurai-Feto Lalehan nian”. Nia mak maromak ba lalehan no mós maromak neʼebé fó bensaun ba ema atu iha oan barak. Iha sasán antigu balu iha rai-Ejitu temi Astarte nia naran nuʼudar “Naʼi-Feto Lalehan nian”.​—Jer 44:19.

• Log.

  Iha Bíblia laran, neʼe mak medida ida neʼebé kiʼik liu atu sukat líkidu. Ema Judeu nia livru Talmud esplika katak log ida mak hanesan ho him 1/12, entaun bazeia ba informasaun neʼe, log ida mak mililitru 310. (Lev 14:10, nota)​—Haree Ap. B14.

• Loron Hamoos Sala nian.

  Loron santu neʼebé importante liu ba ema Izraél, neʼebé halaʼo iha loron 10 fulan-Etanim. Loron neʼe mós bolu nuʼudar Yom Kippur, husi lian Ebraiku yohm hakkippurim, neʼebé signifika “loron atu taka”. Iha tinan ida nia laran, iha loron neʼe deʼit mak amlulik boot bele tama ba Fatin Santu Liu Hotu iha tenda santu no ikusmai iha templu. Iha neʼebá nia hasaʼe raan husi sakrifísiu sira atu hamoos ninia sala rasik, ema Levi seluk nia sala no povu nia sala. Neʼe mak tempu atu halaʼo reuniaun boot santu, halaʼo Sábadu, no labele halo serbisu baibain.​—Lev 23:27, 28.

• Loron ikus sira.

  Fraze neʼe no mós fraze sira seluk hanesan “loron sira-neʼe nia rohan”, uza iha Bíblia hodi refere ba tempu bainhira akontesimentu ruma toʼo ona rohan. (Eze 38:16; Dan 10:14; Aps 2:​17) Iha profesia balu, liafuan neʼe bele refere ba tinan balu ka barak. Dala barak Bíblia uza fraze neʼe atu refere ba “loron ikus sira” ba mundu ka sistema ohin neʼe nian, durante tempu neʼebé Jesus toʼo ona mai no ukun nuʼudar liurai.​—2Ti 3:1; Tgo 5:3; 2Pe 3:3.

• Loron Preparasaun.

  Neʼe mak loron antes loron Sábadu. Durante tempu neʼe, ema Judeu halo preparasaun. Loron neʼe remata kuandu loro-matan tun iha loron neʼebé agora ita hanaran loron-sesta, no tuirmai hahú loron-sábadu. Ema Judeu nia loron komesa husi kalan ida toʼo kalan tuirmai.​—Mc 15:42; Lc 23:54.

• Loron Tesi-Lia nian.

  Neʼe mak “loron” ka tempu ida, bainhira Maromak tesi-lia ba grupu, nasaun ka ema hotu. Dala ruma liafuan sira-neʼe koʼalia kona-ba tempu neʼebé Maromak fó kastigu-mate ba ema neʼebé hetan ona tesi-lia. Liafuan neʼe mós uza atu koʼalia kona-ba tempu neʼebé Maromak fó oportunidade ba ema balu atu hetan salvasaun, no hetan moris rohan-laek. Bainhira Jesus Kristu no ninia apóstolu sira koʼalia kona-ba “Loron Tesi-Lia nian”, neʼe refere ba tempu iha futuru atu tesi-lia ba ema moris no mós ema neʼebé mate ona.​—Mt 12:36.

M

• Maalat.

  Neʼe mak liafuan kona-ba múzika, neʼebé hakerek iha Salmo 53 no 88 nia introdusaun. Karik liafuan neʼe liga ho verbu Ebraiku neʼebé signifika “sai fraku; sai moras”, entaun neʼe atu hatudu katak knananuk rua neʼe mak knananuk triste, no mós liafuan sira husi knananuk rua neʼe mak liafuan triste.

• Majistradu tribunál.

  Iha governu Babilónia nia okos, majistradu mak administradór sivíl iha provínsia sira, neʼebé hatene lei no iha podér uitoan nuʼudar juís.  Iha rai neʼebé governu Roma mak ukun, majistradu sivíl mak administradór ba governu. Sira-nia knaar inklui mantein unidade, kontrola osan, tesi-lia ba ema neʼebé kontra lei, no fó orden atu kastigu ema.​—Dan 3:2; Aps 16:20.

• Malisan; Fó-malisan.

  Neʼe katak fó ameasa ka koʼalia aat ema ida ka buat ida. Neʼe la hanesan ho liafuan tolok ka hirus makaʼas. Dala barak malisan mak deklarasaun formál ka profesia katak buat aat sei akontese. Bainhira Maromak ka ema ruma neʼebé iha podér mak fó-malisan, neʼe mak profesia neʼebé sei akontese duni.​—Gén 12:3; Núm 22:12; Gal 3:​10.

• Malkam.

  Karik hanesan ho Molec, neʼebé nuʼudar ema Ammon nia maromak boot. (Sof 1:5)​—Haree MOLEC.

• Maná.

  Ai-han neʼebé ema Izraél han durante tinan 40 iha rai-fuik. Jeová mak hamosu maná neʼe liuhusi milagre. Loroloron maná neʼe mosu mesak deʼit iha rai iha mahobeen okos, só loron Sábadu deʼit mak la mosu. Bainhira ema Izraél foin haree ida-neʼe ba dala primeiru, sira dehan: “Saida mak neʼe?” ka, lian Ebraiku “man huʼ?” (Éx 16:13-​15, 35) Iha eskritura seluk temi nuʼudar “ai-han husi lalehan” (Sal 78:24) “paun husi lalehan” (Sal 105:40, nota) no “kbiit-naʼin sira-nia ai-han”. (Sal 78:25) Jesus mós temi maná nuʼudar símbolu.​—Jo 6:​49, 50.

• Manu-avestrús.

  Manu neʼe mak manu neʼebé boot, ninia aas liu metru rua no todan toʼo kilograma 140. Ninia ulun kiʼik no matan boot. Ninia kakorok naruk maizumenus metru ida.

• Manu-falkaun.

  Neʼe mak manu ida neʼebé hanesan manu-makikit maibé kiʼik liu manu-makikit. Nia han samea, lagartu sira, animál kiʼik seluk, no mós manu sira seluk.

• Manu-pelikanu.

  Husi manu hotu neʼebé semo, manu neʼe mak boot loos no ninia liras loke luan maizumenus metru 2,5 ka liu. Ninia ibun kór-kinur uitoan no ninia ibun parte okos boot hanesan saku. Manu neʼe kaer ikan atu han.

• Manu-poupa.

  Neʼe mak manu ida neʼebé boot hanesan manu-pombu, no iha ibun naruk, iha kór moris oioin.

• Manu-segoña.

  Neʼe mak manu boot neʼebé ain naruk. Dala barak ninia fulun mutin. Manu-segoña neʼebé boot ona aas metru 1,2. Manu neʼe tau matan didiʼak ba ninia oan sira, no mós ninia liras forte loos no bainhira loke, neʼe luan metru 2.​—Job 39:13.

• Manu-sizne.

  Neʼe mak manu boot tasi nian neʼebé furak, ho kakorok lotuk no naruk. Manu-sizne balu todan kilograma 18 no kuandu loke liras, neʼe luan maizumenus metru 2,5.

• Manu-tasi garsa.

  Neʼe mak manu neʼebé moris besik bee-lihun, debu no mota. Sira-nia kakorok lotuk no naruk, no sira-nia ain lotuk tebes.

• Marfín.

  Buat folin-boot neʼebé foti husi elefante no animál seluk nia nehan boot neʼebé naruk.​—1Rs 10:18; Am 3:15; Apk 18:12.

• Maromak loos.

  Neʼe tradús husi fraze Ebraiku Ha-Elohim no Ha-El. Dala barak liafuan neʼe uza atu halo diferensa entre Maromak loos mesak deʼit no maromak falsu sira. Liafuan “Maromak loos” uza hodi fó sai ideia neʼebé kompletu husi lian Ebraiku.​—Gén 5:22, 24; 46:3; Deu 4:39.

• Maromak nia Ukun; Reinu.

  Fraze neʼe refere ba Maromak nia governu neʼebé ninia oan Kristu Jesus mak sai nuʼudar liurai. Governu neʼe reprezenta Maromak nia pozisaun aas liu hotu nuʼudar ukun-naʼin.​—Mt 12:28; Lc 4:​43; 1Ko 15:50.

• Masedónia.

  Neʼe mak área iha rai-Grésia nia sorin parte norte. Área neʼe sai naran-boot iha Alexandre Boot nia tempu, no ema iha área neʼe kontinua ukun an rasik toʼo tempu neʼebé Roma manán. Masedónia sai ona Roma nia provínsia ida iha tempu neʼebé apóstolu Paulo vizita Europa ba dala primeiru. Paulo vizita área neʼe dala tolu. (Aps 16:9)​—Haree Ap. B13.

• Maskil.

  La hatene ho loloos signifikadu ba liafuan Ebraiku neʼe. Liafuan neʼe mosu dala 13 iha livru Salmo nia introdusaun. Karik liafuan neʼe signifika “poezia atu hanoin kleʼan”. Tuir ema balu nia hanoin, liafuan neʼebé tradús nuʼudar ‘serbí ho matenek’ karik liga ho liafuan neʼe.​—2Kr 30:22; Sal 32:Int.

• Matan-dook.​—

  Haree HAHALOK MATAN-DOOK.

• Maun-alin.

  Mane sira neʼebé inan ka aman hanesan. Neʼe laʼós deʼit kona-ba relasaun família nuʼudar maun-alin rasik. Liafuan neʼe mós aplika ba sira neʼebé sai grupu  ida neʼebé iha hanoin ida deʼit no iha hakarak no objetivu neʼebé hanesan.​—2Sa 19:12, 13; Rom 1:13.

• Média.

  Ema Média mak jerasaun husi Jafet nia oan-mane Madai. Sira hela iha área foho iha Iran neʼebé ikusmai sai rai-Média. Ema Média hamutuk ho ema Babilónia halo funu hodi manán rai-Asíria. Iha tempu neʼebá, Pérsia mak provínsia ida neʼebé Média mak ukun, maibé Ciro kontra Média nia ukun. Ikusmai Média no Pérsia sai ida deʼit nuʼudar nasaun Média-Pérsia. Sira manán Neo-Babilónia nia ukun iha tinan 539 AEC. Iha loron Pentekostes tinan 33 EC, ema Média balu mós iha Jeruzalein hodi tuir festa neʼe. (Dan 5:​28, 31; Aps 2:9)​—Haree Ap. B9.

• Mediadór.

  Neʼe mak ema neʼebé iha parte rua nia klaran hodi ajuda sira atu hadame malu. Iha Eskritura, liafuan neʼe refere ba Moisés no Jesus. Moisés mak mediadór ba aliansa Ukun-Fuan nian no Jesus mak mediadór ba aliansa foun.​—Gal 3:​19; 1Ti 2:5.

• Merodak.

  Neʼe mak sidade Babilónia nia maromak boot. Bainhira liurai Hammurabi husi rai-Babilónia, neʼebé mós halo ukun-fuan sira, harii ona sidade Babilónia atu sai sidade kapitál, Merodak (ka Marduk) komesa sai maromak neʼebé importante, ikusmai Merodak troka maromak sira seluk antes nia no sai maromak neʼebé boot liu maromak sira seluk neʼebé ema Babilónia adora. Liutiha tempu balu, naran Merodak (ka Marduk) troka fali ho títulu “Belu” (katak “naʼin”), no baibain ema temi Merodak nuʼudar Bel.​—Jer 50:2.

• Mesias.

  Iha lian Ebraiku, liafuan neʼe signifika “ida neʼebé hili ona”. Liafuan neʼe hanesan ho “Kristu”, neʼebé tradús husi liafuan Gregu.​—Dan 9:​25; Jo 1:​41.

• Miktam.

  Neʼe mak liafuan Ebraiku neʼebé mosu iha Salmo nia introdusaun hamutuk dala neen. (Sal 16, 56-60) La hatene ho loloos signifikadu husi liafuan neʼe, maibé karik liafuan neʼe liga ho “letra neʼebé bahat”.

• Milagre; Buat kmanek oioin.

  Hahalok ka akontesimentu neʼebé boot liu fali forsa neʼebé ema hatene, no ema hanoin katak neʼe mai husi forsa neʼebé la baibain. Iha Bíblia laran, liafuan “sinál” no “buat kmanek” dala ruma iha signifikadu neʼebé hanesan.—Éx 4:​21; Aps 4:​22; Ebr 2:4.

• Milkom.

  Neʼe mak ema Ammon nia maromak, karik neʼe hanesan ho maromak Molec. (1Rs 11:​5, 7) Bainhira Salomão nia ukun besik atu remata, nia harii fatin aas atu adora maromak falsu neʼe.​—Haree MOLEC.

• Milla.

  Neʼe mak medida ida atu sukat distánsia, no mosu dala ida deʼit iha Eskritura Lian Gregu iha Mateus 5:41 (nota), karik neʼe refere ba milla Roma nian neʼebé naruk metru 1.479,5.​—Haree Ap. B14.

• Millo.

  Neʼe mak lia­fuan Ebraiku neʼebé signifika “enxe”. Bíblia Septuajinta tradús liafuan neʼe nuʼudar “palásiu”. Neʼe mak fatin aas ida ka buat ida neʼebé ema harii iha David nia Sidade. Karik neʼe refere ba rai neʼebé bou hamutuk ka buat seluk neʼebé ema harii atu apoia moru, maibé ita labele hatene ho loloos.​—2Sa 5:9; 1Rs 11:27.

• Mina.

  Neʼe mak medida ida kona-ba todan no osan nia valór. Ninia naran seluk mak manei iha Ezequiel. Tuir evidénsia husi arkeólogu, mina ida mak siklo 50, no siklo ida mak grama 11,4, no mina iha Eskritura Lian Ebraiku nia todan mak grama 570. Karik iha mós mina liurai nian, hanesan mós ho kóvado. Iha Eskritura Lian Gregu, mina ida mak drakma 100. Ninia todan mak grama 340. Mina 60 hanesan ho talentu ida. (Ezr 2:​69; Lc 19:13, nota)​—Haree Ap. B14.

• Mina-morin nardu.

  Neʼe mak mina-morin neʼebé karun no kór-mean uitoan. Mina-morin neʼe halo husi ai-horis (Nardostachys jatamansi). Tanba mina-morin neʼe karun, entaun dala barak ema kahur mina neʼe ho mina neʼebé baratu, no dala ruma ema halo mina-morin nardu neʼebé falsu. Marcos no João hakerek kona-ba “mina-morin nardu orijinál” neʼebé kose ba Jesus.​—Mc 14:3; Jo 12:3.

• Mirra.

  Neʼe mak ai-been morin neʼebé foti husi ai-hun tarak oioin no mós ai kiʼik sira neʼebé husi família commiphora. Mirra mak buat ida neʼebé kahur ho mina santu atu fui ba ema nia ulun atu fó knaar ba sira. Mirra mós uza atu halo morin ema nia roupa ka kama, no ema mós aumenta mirra ba mina atu kumu isin no kose ba isin. Ema uza mirra atu prepara mate-isin atu hakoi.​—Éx 30:23; Prv 7:​17; Jo 19:39.

• Moisés nia Ukun-Fuan.

  Neʼe mak Ukun-Fuan neʼebé Jeová fó ba ema Izraél liuhusi Moisés iha rai-fuik Sinai iha tinan 1513 AEC. Livru lima primeiru iha Bíblia  dala barak bolu nuʼudar Ukun-Fuan.​—Jos 23:6; Lc 24:44.

• Molec.

  Neʼe ema Ammon nia maromak ida. Karik neʼe hanesan ho Malkam, Milkom no Moloc. Karik neʼe mak títulu deʼit, laʼós naran ba maromak ida. Tuir Moisés nia Ukun-Fuan, ema neʼebé hasaʼe ninia oan ba Molec nuʼudar sakrifísiu tenke hetan kastigu-mate.​—Lev 20:2; Jer 32:35; Aps 7:​43.

• Moloc.​—

  Haree MOLEC.

• Moos; Hamoos.

  Iha Bíblia, liafuan neʼe bele refere ba isin moos, no bele refere ba mantein ka hadiʼa kondisaun ruma hodi nuneʼe la iha marka, noda no buat seluk neʼebé hafoʼer ka halo aat iha dalan morál ka espirituál nian. Tuir Moisés nia Ukun-Fuan, liafuan “moos” refere ba sai moos tuir serimónia.​—Lev 10:10; Sal 51:7; Mt 8:2; 1Ko 6:11.

• Moras-lepra.

  Neʼe mak moras kulit nian neʼebé perigozu tebes. Iha eskritura sira, moras-lepra la refere deʼit ba moras neʼebé ema hatene ohin loron, maibé refere ba moras-lepra neʼebé kona ema, no mós kona roupa no uma.​—Lev 14:54, 55; Lc 5:12.

• Moras-peste.

  Iha Eskritura Lian Ebraiku, liafuan neʼe refere ba moras todan neʼebé daʼet lalais toʼo sai epidemia no halo ema barak mate, neʼebé dala barak liga ho Maromak nia tesi-lia no kastigu. Liafuan neʼe mós bele refere ba moras ka terus ka dezastre neʼebé Jeová fó nuʼudar kastigu.​—Núm 14:12; 16:49; Eze 38:22, 23; Am 4:​10.

• Moris-hiʼas.

  Moris fali husi mate. Lian Gregu anastasis signifika “hadeer; hamriik”. Iha Bíblia laran temi istória sia kona-ba moris-hiʼas, inklui Maromak Jeová halo Jesus moris-hiʼas. Maski ema hanesan Elias, Eliseu, Jesus, Pedro no Paulo halo ema moris-hiʼas, maibé sira halo milagre sira-neʼe ho Maromak nia forsa. Moris-hiʼas iha rai ba “ema neʼebé hatudu hahalok loos no mós ema neʼebé hatudu hahalok la loos” mak importante atu kumpre Maromak nia hakarak. (Aps 24:15) Bíblia mós temi moris iha lalehan, hodi uza fraze hanesan moris-hiʼas “uluk nian” ka “primeiru”, neʼebé envolve Jesus nia alin sira neʼebé hili liuhusi espíritu santu.​—Flp 3:​11; Apk 20:​5, 6; Jo 5:​28, 29; 11:25.

• Mundu.

  Liafuan Gregu kosmos bele signifika (1) ema hotu, (2) ema nia situasaun moris, ka (3) ema hotu neʼebé ketak husi Jeová nia atan sira neʼebé nia simu.​—Jo 3:16; 15:19; 1Ko 7:31.

• Mut-laben.

  Neʼe mak liafuan iha Salmo 9 nia introdusaun, neʼebé signifika “kona-ba oan-mane neʼebé mate”. Ema balu dehan katak neʼe mak naran ka karik liafuan primeiru husi melodia neʼebé ema barak hatene ona hodi uza bainhira kanta salmo neʼe.

N

• Naʼi.

  Neʼe bele refere ba ema neʼebé ema seluk konsidera nuʼudar naʼi, naʼin ka ema respeitu. Iha Eskritura, títulu neʼe bele refere ba ema, Jesus Kristu, ka Jeová, hodi tuir kontestu.

• Naʼi nia Dalan.

  Iha Eskritura, kompara “dalan” hanesan hahalok ka lalaʼok neʼebé Jeová simu ka la simu. Ema sira neʼebé sai Jesus Kristu nia dixípulu tuir “Naʼi nia Dalan”, neʼe katak dalan neʼebé sira halaʼo sira-nia moris tuir Jesus Kristu nia ezemplu tanba sira fiar ba Jesus.​—Aps 19:9.

• Naʼi nia Han-Kalan.

  Neʼe mak han-kalan neʼebé ema han paun la iha fermentu neʼebé reprezenta Kristu nia isin no hemu tua-uvas neʼebé reprezenta Kristu nia raan; kalan neʼe atu komemora Jesus nia mate. Eskritura dehan katak ema Kristaun tenke komemora kalan neʼe, atu hanoin-hetan Jesus nia sakrifísiu, tan neʼe ema balu mós bolu ida-neʼe “Memoriál”.​—1Ko 11:20, 23-​26.

• Naʼi-Ulun.

  Lian Gregu signifika “ulun-naʼin prinsipál”. Neʼe refere ba Jesus Kristu nia knaar neʼebé importante. Hodi halo knaar neʼe, nia sei halo ema sira neʼebé laran-metin ba Maromak sai livre husi sala no lori sira atu hetan moris rohan-laek.​—Aps 3:​15; 5:​31; Ebr 2:​10; 12:2.

• Naruk husi liman-fuan boot toʼo liman-fuan kiʼik.

  Neʼe mak medida ida atu sukat distánsia husi liman-fuan boot toʼo liman-fuan kiʼik ho liman neʼebé nakloke. Ninia naran seluk mak liman-sukat. Neʼe naruk sentímetru 22,2 bazeia ba kóvado neʼebé sentímetru 44,5. (Éx 28:16; 1Sa 17:4, nota)​—Haree Ap. B14.

• Nefes.

  Iha Bíblia liafuan Ebraiku nefes refere ba (1) ema (2) animál, ka (3) ema no animál nia moris. (Gén 1:20; 2:7; Núm 31:28) La hanesan relijiaun barak nia hanorin kona-ba liafuan neʼe, Bíblia esplika  katak nefes refere ba kriatura iha rai neʼebé ema bele haree, bele kaer no bele mate. Iha Bíblia neʼe, liafuan nefes baibain tradús tuir ninia signifikadu iha eskritura ida-idak, no uza liafuan sira hanesan “moris”, “kriatura”, “ema”, “laran tomak”, ka dala ruma uza deʼit pronome (porezemplu “haʼu”). Iha eskritura balu, liafuan nefes bele refere ba kriatura sira-nia hakarak ka kaan hahán. Liafuan neʼe mós bele refere ba ema neʼebé mate ona ka mate-isin.​—Núm 6:6; Prv 23:2; Isa 56:11; Ag 2:​13.

• Neilot.

  Liafuan neʼe mosu iha Salmo 5 nia introdusaun, no la hatene ho loloos ninia signifikadu. Ema balu dehan katak neʼe refere ba instrumentu neʼebé ema huu, no liga ho liafuan Ebraiku chalil (flauta). Maibé, karik liafuan neʼe refere ba melodia ida.

• Nisan, fulan.

  Bainhira ema Judeu sai livre ona husi dadur iha Babilónia, neʼe mak naran foun ba fulan-Abib. Neʼe mak fulan-primeiru tuir ema Judeu nia kalendáriu sagradu no fulan-7 tuir kalendáriu sekulár. Hahú husi fulan-Marsu nia klaran toʼo fulan-Abríl nia klaran. (Ne 2:1)​—Haree Ap. B15.

O

• Oan primeiru; Oan-mane primeiru.

  Baibain, neʼe refere ba oan-mane primeiru husi aman (laʼós oan primeiru husi inan). Iha Bíblia nia tempu, oan-mane primeiru iha pozisaun espesiál iha família no sai ulun ba umakain bainhira aman mate ona. Oan primeiru mós bele refere ba animál nia oan primeiru neʼebé aman.​—Éx 11:5; 13:12; Gén 25:33; Kol 1:​15.

• Oan-Mane husi Ema.

  Iha Evanjellu sira, fraze neʼe mosu maizumenus dala 80, no refere deʼit ba Jesus Kristu. Neʼe hatudu katak Maromak nia Oan-Mane sai duni nuʼudar ema ida, laʼós nuʼudar kriatura espíritu neʼebé nakfila an. Fraze neʼe mós hatudu katak Jesus sei kumpre profesia iha Daniel 7:​13, 14. Iha Eskritura Lian Ebraiku, fraze “oan-mane husi ema” refere ba Ezequiel no Daniel, atu hatudu katak ema neʼebé hatoʼo mensajen la hanesan ho Maromak neʼebé fó sai ninia mensajen ba sira.​—Eze 3:​17; Dan 8:​17; Mt 19:28; 20:28.

• Olíbanu.

  Neʼe mak ai-been neʼebé sai maran ona, husi ai-horis espésie Boswellia. Bainhira ema sunu, neʼe morin tebes. Ema kahur olíbanu ho buat morin oioin atu halo insensu santu neʼebé uza iha tenda santu no iha templu. Ema hasaʼe olíbanu hamutuk ho sakrifísiu trigu nian no mós tau iha paun santu liña rua nia leten iha Fatin Santu.​—Éx 30:34-​36; Lev 2:1; 24:7; Mt 2:​11.

• Omer.

  Neʼe mak medida ida atu sukat sasán maran no hanesan ho koro. Medida neʼe bazeia ba no kalkula tuir bato nia medida. Omer ida mak litru 220. (Lev 27:16)​—Haree Ap. B14.

P

• Paraízu.

  Neʼe mak jardín neʼebé furak. Paraízu primeiru mak iha Eden, neʼebé Jeová halo hodi fó ba kaben-naʼin primeiru. Bainhira Jesus koʼalia ba ema aat neʼebé iha ai-riin leten iha ninia sorin, nia hatudu sai katak rai tomak sei sai paraízu. Iha 2 Korinto 12:4, liafuan paraízu refere ba paraízu iha futuru, no iha Apokalipse 2:7, refere ba paraízu iha lalehan.​—Kna 4:​13, nota; Lc 23:43.

• Parousia.

  Parte balu iha Eskritura Lian Gregu uza liafuan Gregu neʼe atu refere ba tempu neʼebé Jesus Kristu toʼo mai no komesa sai nuʼudar liurai Mesias toʼo loron ikus sira ba mundu aat neʼe. Tempu neʼebé Kristu “toʼo ona mai”, neʼe laʼós katak nia mai no fila fali kedas, maibé neʼe mak tempu naruk.​—Mt 24:3.

• Páskua.

  Kada tinan, festa neʼe halaʼo iha loron 14 fulan-Abib (ikusmai Abib hanaran Nisan) atu komemora tempu neʼebé ema Izraél sai livre husi rai-Ejitu. Iha loron neʼe, ema Izraél oho bibi-malae (ka bibi-timur) ida, depois neʼe sira tunu no han hamutuk ho modo-tahan neʼebé moruk no paun neʼebé la iha fermentu.​—Éx 12:27; Jo 6:4; 1Ko 5:7.

• Pátiu.

  Área ida neʼebé haleʼu tenda santu, no ema tara hena hanesan didin haleʼu área neʼe. Ikusmai neʼe refere ba área neʼebé haleʼu edifísiu prinsipál iha templu, no ema halo moru haleʼu área neʼe. Altár ba sakrifísiu sunu nian tau iha pátiu laran besik tenda santu no iha pátiu kiʼik templu nian. (Haree Ap. B5, B8, B11.) Bíblia mós temi pátiu sira iha ema nia uma no palásiu sira.​—Éx 8:​13; 27:9; 1Rs 7:​12; Est 4:​11; Mt 26:3.

• Paun santu.

  Neʼe mak paun fuan 12 neʼebé tau iha fatin rua. Paun fuan neen hada iha fatin ida-idak no tau iha meza iha Fatin  Santu iha tenda santu no templu. Kada loron Sábadu sempre troka ho paun foun hodi hasaʼe nuʼudar sakrifísiu ba Maromak. Baibain amlulik deʼit mak bele han paun neʼebé hasai ona husi meza iha Fatin Santu. (2Kr 2:4; Mt 12:4; Éx 25:30; Lev 24:5-9; Ebr 9:2)​—Haree Ap. B5.

• Peñór.

  Objetu ka sasán privadu neʼebé ema ida entrega ba ema neʼebé fó debe ba nia. Neʼe sai nuʼudar garantia katak nia sei selu fali ninia debe iha futuru. Moisés nia Ukun-Fuan iha arranju kona-ba sasán neʼebé ema ida fó nuʼudar peñór no arranju neʼe atu proteje ema kiak no ema neʼebé fraku iha nasaun neʼe.​—Éx 22:26; Eze 18:7, nota.

• Pentekostes.

  Neʼe mak festa segundu husi festa tolu neʼebé mane Judeu hotu tenke bá Jeruzalein atu selebra. Liafuan Pentekostes signifika “limanulu (loron limanulu)”. Eskritura Lian Gregu uza liafuan Pentekostes hodi koʼalia kona-ba Festa Koʼa Ai-Han Primeiru nian, ka Festa Semana nian neʼebé temi iha Eskritura Lian Ebraiku. Festa neʼe halaʼo iha loron 50 sura husi loron 16 fulan-Nisan.​—Éx 23:16; 34:22; Aps 2:1.

• Pérola.

  Neʼe mak fatuk-murak kabuar neʼebé ema hetan husi sipu tasi nian balu. Pérola barak liu mak kór-mutin no moos loos.

• Pérsia.

  Rai no ema Pérsia baibain temi hamutuk ho Média. Iha tempu antigu, ema Pérsia okupa deʼit parte sudueste husi rai-tetuk Iraun nian. Bainhira Ciro Boot mak ukun, ema Pérsia domina ema Média, maski nuneʼe sira kontinua ukun hamutuk. Matenek-naʼin balu kona-ba istória dehan katak Ciro nia aman mak ema Pérsia no ninia inan mak ema Média. Ciro manán rai-Babilónia iha tinan 539 AEC no fó lisensa ba ema Judeu atu sai livre hodi fila fali ba sira-nia rai. Rai neʼebé Pérsia ukun hahú husi Mota Indo iha parte leste toʼo Tasi Egeu iha parte oeste. Pérsia kontinua ukun ema Judeu toʼo Alexandre Boot manán tiha ema Pérsia iha tinan 331 AEC. Daniel haree nanis vizaun kona-ba Pérsia, no livru Ezras, Neemias no Ester konta istória kona-ba Pérsia nia ukun. (Ezr 1:1; Dan 5:​28; 8:20)​—Haree Ap. B9.

• Pim.

  Neʼe mak medida ida atu sukat todan no mós folin neʼebé ema Filístia husu atu selu bainhira kadi kroʼat sasán oioin. Arkeólogu sira hetan fatuk balu iha Izraél neʼebé iha letra konsoante Ebraiku “pim”. Pim ida nia todan mak grama 7,8, neʼebé maizumenus siklo 2/3.​—1Sa 13:20, 21, nota.

• Pneuma.

  Liafuan Gregu neʼe dala barak tradús tuir ninia signifikadu. Liafuan neʼe refere ba buat neʼebé ema nia matan labele haree maibé iha prova katak neʼe iha duni. Liafuan Gregu neʼe uza atu refere ba (1) anin, (2) kriatura moris hotu iha rai nia forsa moris nian, (3) forsa neʼebé book ema nia laran hodi nia koʼalia ka halo buat ruma, (4) liafuan husi ida neʼebé ema nia matan labele haree, (5) kriatura espíritu, no (6) Maromak nia espíritu santu.​—Mt 12:43, nota; Lc 11:13.

• Porku-espiñu.

  Neʼe mak animál neʼebé hanesan ho laho boot no iha fulun tarak iha ninia isin-lolon.

• Porneia.​—

  Haree SALA SEKSUÁL.

• Porsentu sanulu.

  Neʼe mak buat neʼebé ema tenke fó ka selu nuʼudar impostu, liuliu liga ho adorasaun. (Mal 3:​10; Deu 26:12; Mt 23:23) Tuir Moisés nia Ukun-Fuan, porsentu sanulu husi buat neʼebé ema hetan husi ninia toʼos ka porsentu sanulu husi ema nia bibi ka karau neʼebé aumenta tenke fó ba ema Levi tinan-tinan atu apoia sira. Ema Levi fó porsentu sanulu ba amlulik husi Arão nia umakain hodi apoia sira. Iha mós porsentu sanulu kona-ba buat seluk. Ema Kristaun la presiza fó porsentu sanulu.

• Profesia.

  Mensajen husi Maromak atu fó-hatene no fó sai ninia hakarak. Profesia mós signifika katak hanorin husi Maromak kona-ba buat neʼebé diʼak ka la diʼak, atu fó sai Maromak nia mandamentu ka tesi-lia, ka atu fó-hatene nanis kona-ba buat neʼebé sei akontese.​—Eze 37:​9, 10; Dan 9:​24; Mt 13:14; 2Pe 1:​20, 21.

• Profeta.

  Neʼe mak ema neʼebé Maromak uza atu fó sai ninia hakarak ba ema seluk. Profeta sira reprezenta Maromak hodi fó sai Jeová nia hanorin, mandamentu, desizaun no mós fó-hatene nanis buat neʼebé sei akontese iha futuru.​—Am 3:7; 2Pe 1:​21.

• Prokonsul.

  Neʼe mak governadór neʼebé tau matan ba provínsia neʼebé Senadu Roma (konsellu-naʼin boot sira iha Roma) mak dirije. Nia iha podér nuʼudar juís no kontrola tropa. Maski nia tenke hatán ba Senadu kona-ba buat neʼebé nia halo, maibé nia  iha podér tomak atu tau matan ba provínsia ida.​—Aps 13:7; 18:12, nota.

• Prostituta; Prostituisaun.

  Prostituta mak feto neʼebé halo relasaun seksuál ho ema neʼebé laʼós ninia kaben, liuliu hodi manán osan. (Liafuan Gregu ba “prostituta” mak porne, mai husi liafuan neʼebé signifika “atu faʼan”.) Bíblia mós uza liafuan “prostitutu” atu refere ba mane neʼebé faʼan an. Moisés nia Ukun-Fuan bandu ema atu labele halo prostituisaun, no kolen neʼebé ema simu hodi halo prostituisaun labele fó nuʼudar kontribuisaun ba Jeová nia fatin sagradu, maibé ema neʼebé adora maromak falsu, sira halo prostituisaun iha templu hodi manán osan. (Deu 23:17, 18; 1Rs 14:24, nota) Bíblia mós uza liafuan neʼe iha dalan simbóliku hodi refere ba ema, nasaun, ka organizasaun sira neʼebé adora estátua ka ídolu maibé sira dehan katak sira adora Maromak loos. Porezemplu, iha livru Apokalipse, bolu grupu relijiaun naran “Babilónia Boot” nuʼudar “feto-aat” ka prostituta tanba nia serbisu hamutuk ho ukun-naʼin sira iha mundu neʼe atu hetan podér no rikusoin.​—Apk 17:​1-5; 18:3; 1Kr 5:​25, nota.

• Provérbios; Lia-dadolin.

  Neʼe mak liafuan matenek ka istória badak neʼebé hanorin lisaun ruma ka fó sai lia-loos ho liafuan uitoan deʼit. Lia-dadolin iha Bíblia dala ruma hanesan ai-sasiʼik ka liafuan neʼebé presiza hanoin kleʼan atu komprende. Lia-dadolin baibain fó sai lia-loos ho espresaun neʼebé moris, no dala barak uza komparasaun. Lia-dadolin balu sai hanesan liafuan neʼebé ema uza baibain atu goza ka hatún ema ruma.​—Ecl 12:9; 2Pe 2:​22.

• Prozélitu.

  Ema neʼebé troka ona relijiaun. Iha Bíblia, neʼe refere ba ema neʼebé simu relijiaun Judeu nian. Mane sira neʼebé simu relijiaun Judeu nian tenke hetan sirkunsizaun.​—Mt 23:15; Aps 13:43, nota.

• Psiké.

  Liafuan Gregu psiké refere ba (1) ema, (2) animál, ka (3) ema ka animál nia moris. (1Pe 3:20) Bíblia hatudu katak se psiké uza ba kriatura iha rai, liafuan neʼe refere ba buat neʼebé ema bele kaer, realidade, bele haree ho matan, no bele mate. Iha tradusaun neʼe, liafuan orijinál neʼe dala barak tradús tuir ninia signifikadu iha kontestu ida-idak hodi uza liafuan hanesan “moris”, “kriatura”, “ema”, “laran tomak”, ka “moris tomak”.​—Mt 22:37.

• Purim.

  Neʼe mak festa neʼebé ema Judeu halaʼo tinan-tinan iha loron 14 no 15 fulan-Adar atu komemora tempu neʼebé sira sai livre husi kastigu-mate iha Liurai-Feto Ester nia tempu. Língua seluk nia liafuan purim signifika katak “sorteiu”. Festa neʼe naran Festa Purim, ka Festa Dada Sorteiu, tanba Haman dada Pur (Sorteiu) atu deside loron hodi kumpre ninia planu atu oho ema Judeu hotu.​—Est 3:7; 9:​26.

R

• Raab.

  Iha livru Job, Salmo no Isaias uza liafuan neʼe iha dalan simbóliku. Raab neʼe la hanesan ho feto naran Raab neʼebé temi iha livru Josué. Iha livru Job, informasaun hatudu katak liafuan Raab refere ba animál boot iha tasi. Iha eskritura seluk, animál boot iha tasi neʼe reprezenta rai-Ejitu.​—Job 9:​13; Sal 87:4; Isa 30:7; 51:​9, 10.

• Rate.

  Neʼe bele refere ba ema ida nia rate. No mós bele refere ba fatin simbóliku ba ema mate ka kondisaun ema mate nian. Liafuan Ebraiku mak siol no liafuan Gregu mak hades. Tuir Bíblia, ema neʼebé iha fatin neʼe labele halo buat ida no la hanoin buat ida.​—Gén 47:30; Ecl 9:​10; Aps 2:​31.

• Rate memória nian.

  Fatin hakoi mate-isin. Neʼe mai husi liafuan Gregu mnemeion, neʼebé signifika “atu fó-hanoin”, neʼe katak hanoin-hetan ema neʼebé mate ona.​—Jo 5:28, 29, nota.

• Riin.

  Neʼe mak koluna ka buat neʼebé hamriik loos atu tahan uma. Ema harii riin balu atu komemora istória ka akontesimentu. Templu no uma sira neʼebé Salomão harii, iha riin sira. Ema neʼebé la adora Maromak loos, sira harii fatuk lulik neʼebé modelu hanesan riin, neʼebé iha ligasaun ho sira-nia relijiaun falsu, no dala ruma ema Izraél mós halo hanesan neʼe. (Juí 16:29; 1Rs 7:​21; 14:23)​—Haree FATUK LULIK.

• Riin nia ulun.

  Neʼe mak parte boot neʼebé enfeita riin rua nia tutun. Riin rua neʼe naran Jakin no Boaz neʼebé harii iha Salomão nia templu oin. (1Rs 7:​16)​—Haree Ap. B8.

• Ró Tarsis.

  Foufoun liafuan neʼe uza ba ró sira neʼebé halo viajen ba Tarsis iha tempu antigu (agora rai-España). Maibé ikusmai liafuan neʼe refere ba ró boot neʼebé bele halo viajen dook. Salomão no Jeosafát uza ró sira hanesan neʼe atu halo negósiu.​—1Rs 9:​26; 10:22; 22:48.

•  Romaun-fuan.

  Ai-fuan neʼebé modelu hanesan masán. Amlulik boot nia roupa kór-azúl nia ninin okos enfeita ho romaun-fuan neʼebé halo husi kabas, no mós iha riin rua iha templu oin naran Jakin no Boaz nia tutun enfeita ho dezeñu romaun-fuan.​—Éx 28:34; Núm 13:23; 1Rs 7:​18.

• Ruah.

  Liafuan Ebraiku neʼe dala barak tradús tuir ninia signifikadu. Liafuan neʼe refere ba buat neʼebé ema nia matan labele haree maibé iha prova katak neʼe iha duni. Liafuan Ebraiku neʼe uza atu refere ba (1) anin, (2) kriatura moris hotu iha rai nia forsa moris nian, (3) forsa neʼebé book ema nia laran hodi nia koʼalia ka halo buat ruma, (4) liafuan husi ida neʼebé ema nia matan labele haree, (5) kriatura espíritu, no (6) Maromak nia espíritu santu.​—Éx 35:21; Sal 104:29, nota.

S

• Sábadu.

  Husi liafuan Ebraiku neʼebé signifika “atu deskansa; atu para”. Neʼe mak loron hitu husi ema Judeu nia semana (komesa husi loro-matan monu iha loron-sesta toʼo loro-matan monu iha loron-sábadu). Loron festa nian balu kada tinan, no mós kada tinan 7 no kada tinan 50, bolu nuʼudar Sábadu. Iha loron Sábadu, ema labele halo serbisu, só amlulik sira deʼit mak halo serbisu iha fatin sagradu. Iha tinan Sábadu, ema labele halo toʼos no ema Ebreu labele obriga sira-nia maluk atu selu debe. Iha Moisés nia Ukun-Fuan okos, ukun-fuan kona-ba loron Sábadu mak la susar, maibé neineik-neineik ulun-naʼin relijiaun sira aumenta tan ukun-fuan, tan neʼe iha Jesus nia tempu susar ba ema barak atu halaʼo loron neʼe.​—Éx 20:8; Lev 25:4; Lc 13:14-​16; Kol 2:​16.

• Sakrifísiu.

  Neʼe mak buat neʼebé hasaʼe ba Maromak nuʼudar símbolu atu hatudu agradese, rekoñese sala, no atu hadiʼa fali relasaun ho nia. Komesa husi Abel, ema hasaʼe sakrifísiu oioin ho hakarak rasik, inklui sakrifísiu animál, toʼo Moisés nia Ukun-Fuan halo neʼe nuʼudar regra ida. Ema la presiza tan hasaʼe sakrifísiu animál nian bainhira Jesus entrega ona ninia moris rasik nuʼudar sakrifísiu neʼebé perfeitu, maski nuneʼe ema Kristaun kontinua hasaʼe sakrifísiu espirituál ba Maromak.​—Gén 4:4; Ebr 13:15, 16; 1Jo 4:​10.

• Sakrifísiu agradese nian.

  Neʼe mak sakrifísiu dame nian neʼebé ninia objetivu mak atu hahiʼi Maromak tanba buat neʼebé nia fó no ninia domin neʼebé laran-metin. Ema tenke han naʼan husi animál neʼebé hasaʼe iha sakrifísiu neʼe hamutuk ho paun neʼebé iha fermentu no la iha fermentu. Ema tenke han naʼan husi animál neʼe iha loron neʼebé sira hasaʼe sakrifísiu neʼe.​—2Kr 29:31.

• Sakrifísiu dame nian.

  Sakrifísiu neʼebé hasaʼe ba Jeová hodi husu atu bele hadame malu ho nia. Ema neʼebé fó sakrifísiu neʼe, hamutuk ho ninia umakain, amlulik neʼebé hasaʼe sakrifísiu no amlulik sira seluk neʼebé serbisu, sira hotu han sakrifísiu neʼe. Jeová simu suar husi naʼan bokur neʼebé amlulik sunu, nuʼudar buat neʼebé halo nia kontente. Raan neʼebé reprezenta moris, mós fó ba Jeová. Amlulik no ema neʼebé fó sakrifísiu, sira hanesan han hamutuk ho Jeová hodi hatudu katak sira hadame malu ona ho Nia.​—Lev 7:​29, 32; Deu 27:7.

• Sakrifísiu doko bá-mai nian.

  Atu hasaʼe sakrifísiu neʼe, amlulik tau liman iha ema nia liman okos no ema neʼe kaer hela sakrifísiu neʼebé nia fó, no doko sira-nia liman bá-mai; ka amlulik mesak mak doko sakrifísiu neʼe bá-mai. Doko bá-mai hatudu katak sira aprezenta sakrifísiu neʼe ba Jeová.​—Lev 7:​30.

• Sakrifísiu hemu nian.

  Neʼe mak sakrifísiu tua-uvas neʼebé fui iha altár leten no hasaʼe hamutuk ho sakrifísiu sira seluk. Paulo kompara ninia an hanesan sakrifísiu hemu nian hodi hatudu katak nia prontu atu fó ninia an hodi serbí ninia maluk Kristaun sira.​—Núm 15:​5, 7; Flp 2:​17.

• Sakrifísiu juramentu nian.

  Neʼe mak sakrifísiu neʼebé ema fó ho hakarak rasik neʼebé akompaña ho juramentu ruma.​—Lev 23:38; 1Sa 1:21.

• Sakrifísiu sala nian.

  Neʼe mak sakrifísiu neʼebé ema hasaʼe ba sala neʼebé sira halo la ho neon, tanba sira mak ema la perfeitu. Sira bele hasaʼe animál oioin, hanesan karau ka manu-pombu, hodi tuir sira-nia pozisaun ka sira-nia situasaun.​—Lev 4:27, 29; Ebr 10:8.

• Sakrifísiu sunu nian.

  Neʼe mak sakrifísiu animál nian neʼebé sunu iha altár nuʼudar sakrifísiu neʼebé hasaʼe hotu ba Maromak, no ema neʼebé fó sakrifísiu neʼe sei la rai hela parte ida husi animál sira hanesan karau-aman, bibi-malae aman, bibi-timur  aman, manu-lakateu, ka manu-pombu.​—Éx 29:18; Lev 6:9.

• Sakrifísiu taka sala nian.

  Sakrifísiu neʼebé hasaʼe ba ema ida nia sala. Neʼe la hanesan ho sakrifísiu sala nian sira seluk. Ema tenke hasaʼe sakrifísiu neʼe atu bele hetan fali ninia direitu sira husi aliansa, direitu neʼebé uluk lakon ona tanba nia halo sala, no mós atu bele sai livre husi kastigu.​—Lev 7:​37; 19:22; Isa 53:10.

• Sakrifísiu trigu nian.

  Neʼe mak sakrifísiu neʼebé ema hasaʼe hodi uza trigu ka sevada uut neʼebé diʼak, trigu ka sevada neʼebé sona tiha ona, ka paun hanesan kelu ka paun mihis neʼebé tunu ona, tunu iha besi belar, ka tunu iha taxu.​—Lev 2:​1-15.

• Sala seksuál.

  Husi liafuan Gregu porneia, neʼe mak liafuan neʼebé uza iha Bíblia atu refere ba hahalok seksuál balu neʼebé Maromak bandu. Neʼe inklui adultériu, prostituisaun, relasaun seksuál entre ema neʼebé seidauk kaben, relasaun seksuál entre mane ho mane ka feto ho feto, no relasaun seksuál ho animál. Iha livru Apokalipse bolu grupu relijiaun ida naran “Babilónia Boot” nuʼudar feto-aat neʼebé halo sala seksuál tanba nia serbisu hamutuk ho ukun-naʼin sira iha mundu neʼe atu hetan podér no rikusoin. (Apk 14:8; 17:2; 18:3; Mt 5:32; Aps 15:29; Gal 5:19)​—Haree PROSTITUTA.

• Salmo.

  Knananuk atu hahiʼi Maromak. Fiar-naʼin sira kanta salmo sira-neʼe hodi akompaña ho múzika. Sira mós kanta salmo sira-neʼe kuandu adora Maromak Jeová iha ninia templu iha Jeruzalein.​—Lc 20:42; Aps 13:33; Tgo 5:​13, nota.

• Salomão nia Pórtiku.

  Iha Jesus nia tempu, iha laʼo fatin ida iha templu nia pátiu boot nia parte leste, ema barak fiar katak laʼo fatin neʼe mak husi Salomão nia templu. Iha “tempu malirin” Jesus laʼo iha neʼebá no ema Kristaun sira mós halibur iha neʼebá hodi adora Maromak. (Jo 10:22, 23; Aps 5:12)​—Haree Ap. B11.

• Sama trigu; Fatin sama trigu nian.

  Neʼe mak prosesu atu hasai trigu-musan husi ninia fulin ka kulit. Fatin neʼebé halo serbisu neʼe hanaran fatin sama trigu nian. Ema baibain halo neʼe ho liman hodi uza ai. Maibé se trigu mak barak tebes, sira uza ekipamentu espesiál ruma hanesan ai-kabelak sama trigu nian, ka fatuk neʼebé animál dulas. Ekipamentu sira-neʼe tau iha trigu nia leten hodi hanehan trigu sira neʼebé iha fatin sama trigu nian, neʼebé baibain iha fatin aas no tetuk hodi anin bele huu kona.​—Lev 26:5; Isa 41:15; Mt 3:​12.

• Samaria.

  Neʼe mak sidade kapitál husi rai-Izraél nia suku sanulu neʼebé iha parte norte ba tinan 200. Samaria mós refere ba nasaun neʼe nia área tomak. Sidade Samaria harii iha Foho Samaria nia leten. Iha Jesus nia tempu, Samaria mak naran ba área ida entre Galileia no Judeia. Galileia iha parte norte no Judeia iha parte súl. Baibain Jesus lakohi bá haklaken iha área neʼe, maibé dala balu nia koʼalia ho ema neʼebé hela iha área neʼe bainhira nia laʼo liu. Pedro uza xave segundu ba Ukun lalehan nian iha tempu neʼebé ema Samaria sira simu espíritu santu. (1Rs 16:24; Jo 4:7; Aps 8:​14)​—Haree EMA SAMARIA no Ap. B10.

• Santu.

  Neʼe mak Jeová nia hahalok neʼebé labele haketak husi nia. Santu signifika katak iha morál neʼebé moos no sagradu. (Éx 28:36; 1Sa 2:2; Prv 9:​10; Isa 6:3) Bainhira liafuan neʼe refere ba ema (Éx 19:6; 2Rs 4:9), animál (Núm 18:17), sasán (Éx 28:38; 30:25; Lev 27:14, nota), fatin (Éx 3:5; Isa 27:13), tempu (Éx 16:23; Lev 25:12) no atividade (Éx 36:4), liafuan Ebraiku orijinál fó ideia kona-ba haketak, espesiál, ka halo santu ba Maromak neʼebé santu, ka haketak tiha atu serbí Jeová. Iha Eskritura Lian Gregu, liafuan neʼebé tradús nuʼudar “santu” iha signifikadu hanesan, neʼe katak haketak tiha ba Maromak. Liafuan neʼe mós uza atu refere ba ema nia hahalok neʼebé moos.​—Mc 6:​20; 2Ko 7:1; 1Pe 1:​15, 16.

• Satanás.

  Liafuan Ebraiku signifika “kontradór”. Liafuan neʼe refere ba Diabu, Maromak nia inimigu boot.​—Job 1:6; Mt 4:​10; Apk 12:9.

• Sátrapa.

  Neʼe mak governadór ba provínsia ida iha Babilónia no Pérsia nia ukun. Liurai mak hili sátrapa nuʼudar xefe ba ulun-naʼin sira.​—Ezr 8:​36; Dan 6:1, nota.

• Sea.

  Neʼe mak medida ida atu sukat sasán maran. Sea ida mak litru 7,33. Medida neʼe bazeia no kalkula tuir bato neʼebé uza atu sukat líkidu. (2Rs 7:1)​—Haree Ap. B14.

• Sebat, fulan.

  Bainhira ema Judeu sai livre ona husi dadur iha Babilónia, neʼe mak fulan-11 tuir ema Judeu nia kalendáriu  sagradu no fulan-5 tuir kalendáriu sekulár. Hahú husi fulan-Janeiru nia klaran toʼo fulan-Fevereiru nia klaran. (Zac 1:7)​—Haree Ap. B15.

• Segredu santu.

  Neʼe mak segredu neʼebé mai husi Maromak no parte husi Maromak nia hakarak. Segredu neʼe la fó sai toʼo ninia tempu, no neʼe hatudu sai deʼit ba ema sira neʼebé Maromak hili ona.​—Mc 4:​11; Kol 1:​26.

• Seita.

  Grupu neʼebé halo tuir doutrina ka ulun-naʼin ida, no moris tuir sira-nia fiar rasik. Ezemplu mak grupu Farizeu no grupu Saduseu neʼebé haketak an husi relijiaun Judaízmu. Ema seluk bolu ema Kristaun nuʼudar “seita”, “grupu” ka “Ema Nazaré”, tanba haree sira nuʼudar grupu neʼebé haketak an husi relijiaun Judaízmu. Ikusmai grupu ka seita oioin mosu iha kongregasaun Kristaun, porezemplu “grupu Nicolau nian” neʼebé temi iha livru Apokalipse.​—Aps 5:17; 15:5; 24:5; 28:22; Apk 2:6; 2Pe 2:1, nota.

• Sela.

  Neʼe mak liafuan múzika ka poezia nian. Liafuan neʼe mosu iha livru Salmo no Habakuk. Karik liafuan neʼe signifika pauza bainhira kanta ka toka múzika atu bele medita ka atu tau énfaze ba liafuan neʼebé foin fó sai. Bíblia Septuajinta Gregu tradús liafuan neʼe nuʼudar diapsalma, neʼebé signifika “múzika para ba tempu badak”.​—Sal 3:4; Hab 3:3.

• Selus.

  Neʼe mak sasán neʼebé uza atu halo marka iha rai-mean ka iha lilin-been atu hatudu sé mak naʼin, atu legaliza, ka atu halo akordu. Iha tempu uluk selus halo husi sasán neʼebé toos hanesan fatuk, marfín, ka ai, no letra ka dezeñu ruma bahat iha selus neʼe. Bíblia uza selus hanesan símbolu ba buat ruma neʼebé legaliza ona ho karimbu, ka nuʼudar marka atu hatudu sé mak naʼin, ka nuʼudar buat ruma neʼebé subar hela no segredu.​—Éx 28:11; Ne 9:38; Apk 5:1; 9:4, nota.

• Seminit.

  Liafuan múzika nian neʼebé signifika “ualu”. Karik neʼe refere ba notas neʼebé tun liu, ka refere ba arranju múzika nian ida. Se koʼalia kona-ba instrumentu múzika, liafuan neʼe karik refere ba instrumentu neʼebé halo lian baixu. Se koʼalia kona-ba knananuk, karik liafuan neʼe refere ba múzika neʼebé akompaña ho notas sira neʼebé tun liu no kanta ho notas neʼebé hanesan.​—1Kr 15:21; Sal 6:Int; 12:Int.

• Serafín.

  Neʼe mak anju sira neʼebé serbí besik Jeová nia kadunan iha lalehan. Liafuan Ebraiku seraphim signifika “sira neʼebé lakan”.​—Isa 6:​2, 6.

• Serbisu sagradu.

  Neʼe mak knaar ka serbisu neʼebé sagradu, neʼebé iha ligasaun ho adorasaun ba Maromak.​—Rom 12:1; Apk 7:​15.

• Sevada.

  Neʼe mak produtu ida iha rai neʼebé Maromak promete ba ema Izraél. (Deu 8:8) Sevada mak ai-horis ida neʼebé bele tahan tempu rai-maran no klima oioin. Bainhira boot ona, ninia aas maizumenus metru ida, no ninia tahan sira boot liu fali trigu tahan. Sevada nia folin baratu liu fali trigu.

• Siaun; Foho Siaun.

  Neʼe mak naran ba ema Jebus nia sidade neʼebé metin iha foho-oan Jeruzalein nia parte sudeste. Bainhira David manán tiha sidade neʼe, nia harii liurai nia hela-fatin iha neʼebá, no ikusmai hanaran “David nia Sidade”. (2Sa 5:​7, 9) Siaun sai hanesan foho santu ba Jeová bainhira David lori Arka bá neʼebá. Ikusmai, Siaun mós refere ba área templu nian iha Foho Moria, no dala ruma Siaun refere ba sidade Jeruzalein tomak. Iha Eskritura Lian Gregu, liafuan Siaun dala barak uza nuʼudar símbolu.​—Sal 2:6; 1Pe 2:6; Apk 14:1.

• Sidade protesaun nian.

  Ema Levi nia sidade sira neʼebé sai fatin mahon ba ema neʼebé oho ema la ho neon, hodi fó protesaun husi vítima nia família neʼebé bele oho fali nia. Iha sidade protesaun neen neʼebé Moisés no Josué hili iha fatin oioin iha rai neʼebé Maromak promete, hodi tuir Maromak nia matadalan. Kuandu ema oho ema ida la ho neon, nia tenke halai ba sidade protesaun, no fó sai ninia kazu ba katuas sira iha sidade nia portaun, no katuas sira sei simu nia ho laran-diʼak. Atu ema ohodór labele aproveita deʼit arranju neʼe, ema neʼebé buka protesaun tenke hetan tesi-lia iha sidade neʼebé nia oho ema, no fó prova katak nia la halo sala. Se iha prova katak nia la sala, nia tenke bá fali sidade protesaun, no labele sai husi sidade neʼe nia baliza durante ninia moris tomak ka toʼo tempu neʼebé amlulik boot mate ona.​—Núm 35:​6, 11-​15, 22-​29; Jos 20:​2-8.

• Sidi.

  Iha Eskritura Lian Gregu, liafuan “sidi” baibain uza iha dalan simbóliku no bele iha signifikadu ida ka liu depende ba kontestu.  Dala barak, liafuan neʼe fó ideia kona-ba halo ema seluk monu ba sala, ka bele refere mós ba halo ema ida lakon fiar no husik hela ida neʼebé nia tenke tau fiar no halo tuir, ka bele refere ba sente an no hirus toʼo husik tiha ninia fiar.

• Siklo.

  Neʼe mak medida ida neʼebé ema Ebreu uza atu sukat buat ruma nia todan ka nuʼudar osan nia valór. Siklo ida nia todan mak grama 11,4. Karik fraze “siklo santu” atu tau énfaze ba todan neʼebé tenke loloos ka tenke tetu tuir dasin-fuan neʼebé rai iha tenda santu. Ita tempu uluk karik iha mós liurai nia siklo neʼebé diferente ho siklo baibain ka karik dasin-fuan neʼebé rai hela iha liurai nia palásiu.​—Éx 30:13, nota.

• Sinagoga.

  Liafuan neʼe signifika “halibur hamutuk”, maibé iha eskritura barak, liafuan neʼe refere ba uma ka fatin neʼebé ema Judeu sira halibur hamutuk atu lee Eskritura, simu hanorin, haklaken no halo orasaun. Iha Jesus nia tempu, iha sinagoga ida iha sidade ida-idak iha rai-Izraél, maibé sidade sira neʼebé boot liu baibain iha sinagoga rua ka liu. ​—Lc 4:​16; Aps 13:14, 15.

• Sinál.

  Objetu, hahalok, situasaun, ka buat la baibain neʼebé iha signifikadu importante atu hatudu kona-ba buat ruma iha tempu agora ka iha futuru.​—Gén 9:​12, 13; 2Rs 20:9; Mt 24:3; Apk 1:1.

• Sinál santu dedikasaun nian.

  Osan-mean belar neʼebé nabilan, bahat ho liafuan “Jeová mak santu” iha lian Ebraiku. Sinál neʼe tau iha amlulik boot nia turbante oin. (Éx 39:30)​—Haree Ap. B5.

• Sinédriu.

  Tribunál Judeu nian neʼebé aas liu iha Jeruzalein. Iha Jesus nia tempu, iha membru naʼin-71 iha tribunál neʼe, inklui mós amlulik boot no sira neʼebé uluk serbí nuʼudar amlulik boot, amlulik boot nia família, katuas no eskriba sira.​—Mc 15:1; Aps 5:​34; 23:​1, 6.

• Siol.

  Neʼe mak liafuan Ebraiku neʼebé signifikadu hanesan ho liafuan Gregu hades. Neʼe tradús nuʼudar “rate”. Neʼe refere ba fatin simbóliku ba ema mate ka kondisaun ema mate nian. (Gén 37:35; Sal 16:10, nota)​—Haree RATE.

• Síria; Ema Síria.​—

  Haree ARAM; EMA ARAM.

• Sirkunsizaun.

  Hasai tiha kulit iha mane nia oin-lulik tutun. Abraão no ninia jerasaun tenke halo sirkunsizaun nuʼudar obrigasaun, maibé ema Kristaun la presiza halo. Iha versíkulu balu, liafuan sirkunsizaun refere ba buat seluk.​—Gén 17:10; 1Ko 7:​19; Flp 3:3.

• Sirte.

  Neʼe mak tasi badak iha tasi ninin iha rai-Líbia, iha Áfrika Norte. Iha tempu uluk ró-naʼin barak la brani atu liu fatin neʼe tanba laloran lori rai-henek barak bá-mai. (Aps 27:17)​—Haree Ap. B13.

• Sistema.

  Liafuan neʼe tradús husi liafuan Gregu aion. Liafuan neʼe bele refere ba tempu neʼebé buat boot ida akontese ka kuandu ema importante ida moris ka koʼalia kona-ba períodu ruma, no bele mós refere ba hahalok ka hanoin neʼebé ema hatudu iha tempu ida. Bíblia mós uza liafuan neʼe atu refere ba situasaun iha mundu, ka ema nia moris neʼebé la halo tuir Maromak. (2Ti 4:​10, nota) Liuhusi aliansa Ukun-Fuan nian, Maromak komesa ema Izraél, ka ema Judeu, nia períodu ka sistema. Liuhusi Jesus Kristu nia sakrifísiu, Maromak uza nia atu komesa sistema seluk, neʼebé envolve kongregasaun husi ema sira neʼebé Maromak hili ho espíritu santu. Neʼe marka períodu foun, neʼebé kumpre buat neʼebé reprezenta husi Ukun-Fuan. Bainhira temi “sistema sira”, fraze neʼe refere ba sistema oioin, ka situasaun neʼebé akontese ona ka sei akontese.​—Mt 24:3; Mc 4:​19; Rom 12:2; 1Ko 10:11, nota.

• Sistema neʼe nia rohan.

  Neʼe refere ba períodu antes sistema neʼe remata, neʼe katak sistema, ka mundu, neʼebé Satanás mak domina. Períodu neʼe mós laʼo durante tempu neʼebé “Kristu toʼo ona mai”. (Haree PAROUSIA.) Jesus sei haruka anju sira “haketak ema aat husi ema laran-loos” no halakon ema aat. (Mt 13:40-​42, 49) Jesus nia dixípulu sira hakarak hatene “rohan” neʼe mak bainhira loos. (Mt 24:3) Antes Jesus fila fali ba lalehan, nia promete ba ninia dixípulu sira katak nia sei hamutuk ho sira toʼo tempu neʼe.​—Mt 28:20.

• Sivan, fulan.

  Bainhira ema Izraél sai livre ona husi dadur iha Babilónia, neʼe mak naran ba fulan-3 tuir ema Judeu nia kalendáriu sagradu no fulan-9 tuir kalendáriu sekulár. Hahú husi fulan-Maiu nia klaran toʼo fulan-Juñu nia klaran. (Est 8:9)​—Haree Ap. B15.

• Surat-tahan lulun.

  Surat-tahan naruk neʼebé halo husi animál kulit ka husi papiru,  no baibain ema hakerek iha sorin ida no lulun iha ai lotuk. Ema sempre uza surat-tahan sira-neʼe bainhira hakerek no halo kópia ba Eskritura sira iha tempu antigu.​—Jer 36:​4, 18, 23; Lc 4:​17-​20; 2Ti 4:​13 (Haree mós nota).

T

• Tabernákulu.​—

  Haree TENDA SANTU.

• Talentu.

  Neʼe mak medida ida neʼebé ema Ebreu uza atu sukat buat ruma nia todan ka nuʼudar osan nia valór neʼebé boot liu. Talentu ida nia todan mak kilograma 34,2. Talentu Gregu nian mak kiʼik liu, ninia todan maizumenus kilograma 20,4. (1Kr 22:14, nota; Mt 18:24)​—Haree Ap. B14.

• Tali-baku.

  Neʼe mak tali neʼebé halo husi animál nia kulit, ka homan hamutuk animál nia uat, animál fulun no duʼut-kain. Iha tali neʼe nia klaran iha parte ida atu tau fatuk. Tali nia rohan ida bobar ba liman laran ka liman-fukun, no liman seluk kaer hela tali nia rohan seluk hodi tuda. Tropa iha nasaun sira iha tempu uluk uza tali-baku.​—Juí 20:16; 1Sa 17:50.

• Tamuz.

  (1) Neʼe mak maromak ida nia naran. Feto Ebreu sira iha Jeruzalein neʼebé husik ona adorasaun loos tanis ba maromak neʼe. Ema dehan katak Tamuz mak liurai ida nia naran no depois liurai neʼe mate tiha, ema halo nia sai nuʼudar maromak ida. Iha ema Sumer nia livru ida, Tamuz hanaran Dumuzi no livru neʼe konta katak nia mak maromak-feto Inana nia doben. Inana mak maromak neʼebé ajuda ema atu iha oan. Inana mak Istar neʼebé ema Babilónia adora. (Eze 8:​14) (2) Depois ema Izraél sai livre ona husi dadur iha Babilónia, Tamuz mak naran ba fulan-4 tuir ema Judeu nia kalendáriu sagradu no fulan-10 tuir kalendáriu sekulár. Hahú husi fulan-Juñu nia klaran toʼo fulan-Jullu nia klaran.​—Haree Ap. B15.

• Tanke.

  Iha eskritura balu, liafuan tanke refere ba fatin neʼebé ema keʼe atu rai bee. Ema uza tanke neʼe atu halibur udan-been ka bee neʼebé suli husi bee-matan no baibain ema taka tanke nia ibun.​—2Kr 26:10.

• Tártaro.

  Iha Eskritura Lian Gregu, liafuan neʼe hatudu kona-ba situasaun hanesan komarka, neʼebé Maromak soe anju sira neʼebé kontra nia iha Noé nia tempu. Iha 2 Pedro 2:4, uza verbu tartaroo (atu “soe ba Tártaro”), neʼe la signifika katak Tártaro mak komarka iha rai-okos no fatin neʼebé nakukun ba maromak sira neʼebé la iha folin tuir relijiaun falsu iha tempu uluk fiar. Maibé, eskritura neʼe signifika katak Maromak hasai tiha anju aat sira husi sira-nia hela-fatin iha lalehan no hasai sira-nia knaar no taka sira-nia hanoin kona-ba Maromak nia hakarak. Eskritura sira hatudu katak sira-nia futuru nakukun tebes tanba sira sei lakon ba nafatin hamutuk ho sira-nia ulun-naʼin, Diabu Satanás. Tan neʼe, Tártaro hatudu katak situasaun neʼebé aat liu ba anju sira neʼebé kontra Maromak. Liafuan neʼe la hanesan ho “rai-kuak neʼebé kleʼan tebes” neʼebé temi iha Apokalipse 20:​1-3.

• Tasi neʼebé iha ahi-lakan.

  Neʼe mak fatin simbóliku neʼebé “ahi lakan makaʼas ho enxofre”, no mós bolu nuʼudar “mate segundu”. Ema neʼebé la arrepende sira-nia sala, Diabu no mate ho rate sei soe tiha ba laran. Neʼe mak fatin simbóliku deʼit, no laʼós fatin terus nian, maibé reprezenta lakon ba nafatin, tanba ahi labele han mohu kriatura espíritu no mós mate no hades.​—Apk 19:20; 20:14, 15; 21:8.

• Tau liman.

  Ema tau liman ba ema seluk atu hili nia hodi halaʼo knaar espesiál ruma ka hili nia atu simu bensaun, atu fó isin-diʼak, ka fó espíritu santu nuʼudar prezente. Dala ruma ema tau liman iha animál nia leten antes hasaʼe nuʼudar sakrifísiu.​—Éx 29:15; Núm 27:18; Aps 19:6; 1Ti 5:​22.

• Teatru.

  Fatin neʼebé ema halibur an atu haree drama sira no haree ema toka ka kanta. Iha tempu antigu, teatru boot iha Éfeso iha tuur-fatin neʼebé halo husi fatuk-belar ba ema naʼin-25.000.

• Tebet, fulan.

  Bainhira ema Izraél sai livre ona husi dadur iha Babilónia, neʼe mak naran ba fulan-10 tuir ema Judeu nia kalendáriu sagradu no fulan-4 tuir kalendáriu sekulár. Hahú husi fulan-Dezembru nia klaran toʼo fulan-Janeiru nia klaran. Baibain fulan neʼe temi deʼit nuʼudar “fulan-sanulu”. (Est 2:​16)​—Haree Ap. B15.

• Templu.

  Neʼe mak uma permanente neʼebé harii iha Jeruzalein hodi troka tenda santu no sai nuʼudar fatin adorasaun ba ema Izraél. Salomão mak harii templu primeiru no ikusmai ema Babilónia harahun tiha. Zorobabel mak harii templu segundu bainhira fila husi dadur iha Babilónia,  no ikusmai Herodes Boot mak harii fali. Iha Eskritura, baibain bolu templu nuʼudar Jeová nia “uma”. (Ezr 1:3; 6:​14, 15; 1Kr 29:1; 2Kr 2:4; Mt 24:1)​—Haree Ap. B8 no B11.

• Tenda reuniaun nian.

  Liafuan neʼe refere ba Moisés nia tenda no mós tenda santu neʼebé harii iha rai-fuik.​—Éx 33:7; 39:32.

• Tenda santu; Tabernákulu.

  Neʼe mak tenda neʼebé ema Izraél uza ba adorasaun bainhira sira sai tiha husi rai-Ejitu. Tenda neʼe bele sobu no lori ba fatin seluk atu harii fali. Tenda neʼe iha Jeová nia Arka Aliansa nian, neʼebé reprezenta Maromak iha sira-nia leet, no tenda neʼe mak fatin atu hasaʼe sakrifísiu no adora Maromak. Tenda neʼe mós dala ruma bolu nuʼudar “tenda reuniaun nian”. Tenda neʼe halo husi arus sira no taka ho hena-liñu neʼebé borda ho dezeñu kerubín. Tenda neʼe fahe ba kuartu rua, kuartu primeiru hanaran Fatin Santu, no kuartu segundu hanaran Fatin Santu Liu Hotu. (Jos 18:1; Éx 25:9)​—Haree Ap. B5.

• Terafín.

  Neʼe mak família nia maromak sira ka estátua sira, dala ruma ema buka sinál liuhusi terafín. (Eze 21:21, nota) Estátua terafín balu nia medida no modelu hanesan ema, maibé balu kiʼik. (Gén 31:34; 1Sa 19:13, 16) Buat neʼebé arkeólogu sira hetan iha Mezopotámia hatudu katak ema neʼebé iha estátua terafín iha direitu atu simu família nia liman-rohan. Karik tan razaun neʼe mak Raquel foti ninia aman nia estátua terafín. Maibé ema Izraél la halo tuir toman hanesan neʼe, maski ema neʼebé fila kotuk ba Maromak uza estátua terafín iha tempu juís nian no mós iha tempu liurai sira-nian. Liurai Josias, neʼebé laran-metin ba Jeová, harahun estátua terafín sira hamutuk ho buat sira seluk.​—Juí 17:5; 2Rs 23:24; Os 3:4.

• Terus boot.

  Lian Gregu, liafuan “terus” signifika hanoin barak ka sente susar tanba situasaun neʼebé hatodan ita-nia moris. Jesus koʼalia kona-ba “terus boot” neʼebé sei kona Jeruzalein no liuliu sei kona ema hotu iha futuru bainhira nia ‘mai ho glória’. (Mt 24:21, 29-​31) Apóstolu Paulo esplika katak Maromak hatudu justisa liuhusi terus neʼe hodi fó kastigu ba “sira neʼebé la hatene Maromak no ba sira neʼebé la halo tuir liafuan diʼak” kona-ba Jesus Kristu. Apokalipse kapítulu 19 esplika katak Jesus mak lori tropa lalehan nian hodi halo funu hasoru “animál fuik no liurai sira iha rai no mós sira-nia tropa”. (2Ts 1:​6-8; Apk 19:11-​21) “Ema-lubun boot” sei moris liu terus neʼe. (Apk 7:​9, 14)​—Haree ARMAGEDON.

• Testemuñu.

  Baibain liafuan “Testemuñu” refere ba Ukun-Fuan Sanulu neʼebé Maromak hakerek iha fatuk-belar rua no fó ba Moisés.​—Éx 31:18, nota.

• Tinan Livre nian.

  Neʼe refere ba tinan 50, sura husi tempu neʼebé ema Izraél tama ba rai neʼebé Maromak promete. Durante Tinan Livre nian neʼe, ema labele kuda fini ka halo toʼos, no tenke husik livre atan Ebreu sira. Liman-rohan neʼebé faʼan ona tenke fó fali ba ninia naʼin. Tinan Livre nian tomak mak hanesan festa ida, neʼe mak tinan liberdade nian neʼebé nasaun nia kondisaun fila fali ba tempu neʼebé Maromak foin harii nasaun neʼe.​—Lev 25:10.

• Tisri, fulan.​—

  Haree ETANIM no Ap. B15.

• Torre.

  Torre mak fatin aas neʼebé ema harii iha sidade nia moru, no torre sira neʼebé importante mak harii iha moru sikun no iha portaun sorin ho objetivu atu halo seguransa. Torre neʼebé iha rai-fuik mak fatin protesaun ba bibi-atan sira no ema seluk. Dala ruma torre mós sai nuʼudar fatin neʼebé guarda sira uza atu hein toʼos-uvas, atu nuneʼe animál no naʼok-teen labele tama.

• Trigu-kulit.

  Bainhira ema baku no haliri trigu (ka sevada), sira hasai ninia kulit. Liafuan neʼe uza nuʼudar símbolu ba buat neʼebé la iha folin no ema la simu.​—Sal 1:4; Mt 3:​12.

• Trombeta.

  Neʼe mak instrumentu neʼebé halo husi besi no ema huu atu fó sinál ka atu toka múzika. Tuir Números 10:2, Jeová fó matadalan oinsá halo trombeta rua neʼebé sei uza atu fó sinál espesífiku atu halibur povu, atu sobu tenda, ka atu fó sai kona-ba funu. Karik trombeta sira-neʼe mak trombeta neʼebé loos deʼit, la hanesan ho “dikur” neʼebé kleʼuk. Iha mós trombeta seluk neʼebé uza hamutuk ho instrumentu múzika oioin iha templu, no Bíblia la fó sai ho loloos trombeta sira-neʼe halo husi saida. Dala barak trombeta nia lian sai hanesan símbolu neʼebé akompaña ho Jeová nia mensajen tesi-lia  nian ka akontesimentu importante ruma neʼebé Maromak hamosu.​—2Kr 29:26; Ezr 3:10; 1Ko 15:52; Apk 8:7-11:15.

• Tua-fatin.

  Neʼe mak fatin ida neʼebé halo husi animál kulit, hanesan bibi-timur ka bibi-malae nia kulit, no uza atu rai tua-uvas. Baibain ema tau tua-uvas foun iha tua-fatin neʼebé foun, tanba kuandu tua fermenta daudaun, neʼe hamosu gás dióksidu-karbonu neʼebé halo presaun ba tua-fatin neʼe. Tua-fatin foun bele sai boot liu, maibé tua-fatin neʼebé tuan bele nakfera bainhira hetan presaun.​—Jos 9:4; Mt 9:​17.

• Turbante.

  Neʼe mak hena neʼebé bobar haleʼu ulun ka uza nuʼudar xapeu. Amlulik boot uza turbante neʼebé halo husi hena-liñu, no sinál belar husi osan-mean kesi iha turbante neʼe nia oin hodi uza tali kór-azúl. Liurai uza turbante no tau ninia koroa iha leten. Job uza liafuan neʼe hanesan símbolu bainhira nia dehan katak ninia hahalok justisa mak hanesan turbante.​—Éx 28:36, 37; Job 29:14; Eze 21:26.

U

• Uádi.

  Rai entre foho-leet ka mota maran neʼebé bee tun iha tempu udan deʼit. Liafuan neʼe mós bele refere ba mota neʼebé suli. Mota kiʼik balu simu bee husi bee-matan, no tan neʼe suli nafatin durante tinan tomak. Iha kontestu balu, liafuan uádi tradús nuʼudar “mota”.​—Gén 26:19; Núm 34:5; Deu 8:7; 1Rs 18:5; Job 6:15.

• Ukun-Fuan.

  Bainhira hakerek ho letra boot, liafuan neʼe dala barak refere ba Moisés nia Ukun-Fuan ka refere ba livru lima primeiru iha Bíblia. Bainhira hakerek ho letra kiʼik, neʼe refere ba ukun-fuan ida-idak husi Moisés nia Ukun-Fuan ka prinsípiu husi ukun-fuan.​—Núm 15:16; Deu 4:8; Mt 7:​12; Gal 3:​24.

• Ulun-naʼin amlulik.

  Iha Eskritura Lian Gregu, liafuan neʼe refere ba amlulik sira neʼebé importante liu, neʼe karik inklui mós eis amlulik boot sira no ulun-naʼin ba amlulik sira iha grupu 24.​—Mt 2:4; Mc 8:​31.

• Unuk.

  Neʼe mak roupa neʼebé hanesan batina neʼebé naruk toʼo ain-tuur ka ain-fukun.

• Urim no Tumim.

  Neʼe mak sasán neʼebé amlulik boot uza iha dalan neʼebé hanesan ho dada sorteiu atu determina Maromak nia hakarak bainhira pergunta ruma mosu neʼebé kona nasaun tomak no presiza resposta husi Jeová. Urim no Tumim tau iha bornál kiʼik neʼebé tara iha amlulik boot nia hirus-matan bainhira nia tama ba tenda santu. Bainhira ema Babilónia harahun tiha Jeruzalein, ema la uza tan Urim no Tumim.​—Éx 28:30; Ne 7:65.

V

• Vidente.

  Neʼe mak ema neʼebé Maromak fó kbiit atu komprende Maromak nia hakarak. Ema neʼebé haree ka komprende buat neʼebé ema baibain la hatene. Liafuan Ebraiku foti husi liafuan neʼebé signifika “atu haree”. Baibain ema husu ba vidente atu hetan konsellu matenek ba problema neʼebé sira hasoru daudaun.​—1Sa 9:9, nota.

• Vizaun.

  Buat neʼebé ema haree ka akontesimentu neʼebé Maromak hatudu ba ema. Ida-neʼe mosu iha dalan neʼebé la baibain, no iha Bíblia nia tempu, dala ruma ema simu vizaun neʼe iha kalan ka iha loron bainhira sira dukur hela ka mehi.​—Gén 46:2; Dan 8:2; Aps 10:3; 11:5; 16:9.

X

• Xave metin ain.

  Neʼe mak dalan atu fó kastigu ba ema. Baibain sira uza instrumentu balu neʼebé xave metin deʼit ain, maibé iha mós instrumentu neʼebé xave metin isin tomak, karik hodi hatama ain, liman no kakorok iha instrumentu neʼe.​—Jer 20:2; Aps 16:24.

Z

• Zeus.

  Neʼe mak ema Gregu nia maromak neʼebé boot liu maromak seluk neʼebé sira adora. Iha Listra, ema dehan katak Barnabé mak Zeus. Arkeólogu hetan letra antigu besik Listra neʼebé temi “Zeus nia amlulik sira” no “Zeus, maromak loro-matan”. Paulo saʼe ró husi illa Malta no ró neʼe nia ulun iha letra “Zeus nia oan-mane sira”, neʼe refere ba maun-alin kaduak naran Castor no Pólux.​—Aps 14:12; 28:11.

• Ziv, fulan.

  Neʼe mak naran orijinál ba fulan-segundu tuir ema Judeu nia kalendáriu sagradu no fulan-8 tuir kalendáriu sekulár. Hahú husi fulan-Abríl nia klaran toʼo fulan-Maiu nia klaran. Fulan neʼe hanaran Iar iha ema Judeu nia livru Talmude no iha livru sira seluk neʼebé hakerek bainhira ema Izraél sai livre ona husi dadur iha Babilónia. (1Rs 6:​37)​—Haree Ap. B15.