Primeiru Pedro 5:1-14
5 Tan neʼe, nuʼudar maluk katuas ida, neʼebé sai sasin ba Kristu nia terus no hola parte iha glória neʼebé sei hatudu sai iha futuru,+ haʼu husu ho laran* ba katuas sira iha imi-nia leet kona-ba buat tuirmai neʼe:
2 Tau matan ba Maromak nia bibi-lubun+ neʼebé iha imi-nia liman, serbí nuʼudar katuas,* laʼós hodi obriga an, maibé ho hakarak rasik iha Maromak nia oin,+ laʼós tanba hakarak manán buat ruma ho laran-makerek,+ maibé ho laran tomak,
3 laʼós hodi domina Maromak nia ema sira neʼebé nia entrega ona ba imi,+ maibé sai ezemplu ba bibi-lubun.+
4 No kuandu bibi-atan boot+ hatudu sai ninia an, imi sei simu koroa glória nian neʼebé sei nunka mohu.+
5 Nuneʼe mós mane joven sira, hakruʼuk ba katuas sira.+ Maibé imi hotu tenke haraik an ba malu,* tanba Maromak kontra ema neʼebé loko an, maibé nia hatudu ninia laran-diʼak neʼebé boot ba ema neʼebé haraik an.+
6 Tan neʼe, haraik an bá iha Maromak nia liman okos,* atu nuneʼe nia bele foti aas imi iha tempu loloos,+
7 no iha tempu hanesan, entrega imi-nia laran-susar* hotu ba nia,+ tanba nia hanoin imi.+
8 Proteje imi-nia neon no matan-moris bá!+ Imi-nia inimigu, Diabu, laʼo bá-mai hanesan leaun ida neʼebé hasai lian makaʼas no buka atu han ema ruma.+
9 Maibé hamriik metin bá hodi kontra nia+ ho fiar neʼebé metin, tanba imi hatene katak imi-nia maluk fiar-naʼin* iha mundu tomak mós tahan terus neʼebé hanesan imi-nian.+
10 Maibé bainhira imi hetan tiha terus ba tempu uitoan, Maromak neʼebé nakonu ho laran-diʼak neʼebé boot, neʼebé bolu imi atu hetan ninia glória neʼebé ba nafatin+ hamutuk ho Kristu, nia rasik sei halo kompletu imi-nia treinu. Nia sei hametin imi,+ nia sei halo imi forte,+ nia sei halo imi hamriik metin.
11 Nia mak iha kbiit ba nafatin. Amen.
12 Liuhusi Silvano,*+ neʼebé haʼu respeitu nuʼudar maluk fiar-naʼin neʼebé laran-metin, haʼu hakerek liafuan balu ba imi, atu fó aten-brani ba imi no atu fó sasin ho loloos katak Maromak hatudu duni ninia laran-diʼak neʼebé boot ba imi. Kaer metin ba laran-diʼak neʼe.
13 Feto neʼebé iha Babilónia, neʼebé Maromak hili ona hanesan imi, haruka ninia kumprimentus ba imi, nuneʼe mós ho haʼu-nia oan Marcos.+
14 Kumprimenta malu ho reʼi domin nian.
Haʼu hein katak imi hotu neʼebé ida deʼit ho Kristu sei iha dame.
Nota-rodapé
^ Ka “haʼu fó konsellu”.
^ Ka “tau matan didiʼak ba bibi-lubun”.
^ Ka “imi tenke tau haraik an hanesan roupa hodi hatudu haraik an ba malu”.
^ Ka “liman neʼebé forte nia okos”.
^ Ka “laran-taridu; neon-susar”.
^ Ka “imi-nia maun-alin sira”.
^ Ninia naran seluk mak Silas.
