Primeiru Reis 11:1-43
11 Liurai Salomão hola ona Faraó nia oan-feto,+ maibé nia mós hadomi feto estranjeiru barak liután+ hanesan feto husi Moab,+ Ammon,+ Edom, Sidon,+ no feto Hetes.+
2 Feto sira-neʼe mai husi nasaun sira neʼebé Jeová hatete ona ba ema Izraél: “Imi labele kaben ho sira, no sira labele kaben ho imi,* tanba sira sei dada imi-nia laran hodi laʼo tuir sira-nia maromak sira.”+ Maibé Salomão sai besik liu ho sira* no hadomi sira.
3 Nia iha feen naʼin-700 neʼebé iha pozisaun nuʼudar ulun-naʼin no mós feen-kiʼik naʼin-300, no neineik-neineik ninia feen sira-neʼe dada ninia laran.*
4 Bainhira Salomão katuas ona,+ ninia feen sira book ninia laran* hodi adora maromak sira seluk,+ no nia la serbí* Jeová, ninia Maromak, ho laran tomak hanesan ninia aman David neʼebé serbí Maromak ho laran tomak.
5 Salomão adora fali ema Sidon nia maromak-feto Astoret,+ no ema Ammon nia maromak Milkom+ neʼebé Maromak loos hakribi.
6 No Salomão halo buat neʼebé aat tuir Jeová nia haree, no nia la halo tuir Jeová ho laran tomak hanesan ninia aman David neʼebé serbí Maromak ho laran tomak.+
7 Iha tempu neʼebá mak Salomão harii fatin aas+ ba ema Moab nia maromak Kemos, no ba ema Ammon nia maromak Molec,*+ neʼebé Maromak loos hakribi,+ nia harii neʼe iha foho ida iha Jeruzalein nia oin.
8 Nia mós halo fatin aas ba ninia feen estranjeiru hotu hodi sira hasaʼe sakrifísiu ba sira-nia maromak no sunu sakrifísiu hodi halo suar.
9 Jeová sai hirus hasoru Salomão, tanba Salomão hadook nia laran husi Jeová, Izraél nia Maromak,+ neʼebé mosu ba nia dala rua ona+
10 no fó avizu ona ba nia kona-ba ida-neʼe, katak nia labele serbí maromak sira seluk.+ Maibé nia la halo tuir buat neʼebé Jeová hatete ba nia.
11 Entaun Jeová dehan ba Salomão: “Tanba ó halo ona ida-neʼe no la kumpre haʼu-nia aliansa no ukun-fuan sira hanesan haʼu fó sai ona ba ó, entaun haʼu sei hasai tiha ukun nuʼudar liurai husi ó, no haʼu sei entrega neʼe ba ó-nia atan ida.+
12 Maibé haʼu sei la halo ida-neʼe durante ó-nia moris tanba haʼu hanoin ó-nia aman David. Haʼu sei hasai ukun neʼe husi ó-nia oan-mane nia liman,+
13 maibé haʼu sei la hasai podér hotu husi ninia ukun.+ Haʼu sei fó suku ida ba ó-nia oan-mane,+ tanba haʼu hanoin haʼu-nia atan David no hanoin Jeruzalein neʼebé haʼu hili ona.”+
14 Tuirmai Jeová hamosu inimigu ida kontra Salomão.+ Inimigu neʼe mak Hadad ema Edom, nia mak jerasaun husi liurai Edom.+
15 Uluk bainhira David manán ema Edom,+ Joab, xefe tropa nian, bá hakoi ema sira neʼebé mate, no nia koko atu oho mane Edom hotu.
16 Joab no tropa Izraél hotu hela iha neʼebá ba fulan neen toʼo nia oho mane hotu iha Edom.
17 Maibé Hadad halai ho ema Edom balu neʼebé mak ninia aman nia atan, no sira bá rai-Ejitu, iha tempu neʼebá Hadad sei kiʼik hela.
18 Entaun sira sai husi Midian no toʼo iha Paran. Sira lori mane balu husi Paran+ atu tuir sira no sira toʼo iha rai-Ejitu hodi hasoru Faraó, liurai Ejitu, no liurai fó uma, ai-han no rai ba Hadad.
19 Faraó kontente tebes ho Hadad toʼo fó ninia feen Tafnes nia alin-feto ba Hadad nuʼudar feen. Tafnes mak liurai-feto.*
20 Liutiha tempu balu, Tafnes nia alin-feto neʼe tuur-ahi oan-mane ida, no hanaran nia Genubat. Tafnes haboot oan neʼe* iha Faraó nia umakain, no Genubat kontinua hela iha Faraó nia uma hamutuk ho Faraó nia oan-mane sira.
21 Iha rai-Ejitu Hadad rona katak David mate ona*+ no Joab, xefe tropa nian, mós mate ona.+ Entaun, Hadad hatete ba Faraó: “Husik haʼu fila, hodi nuneʼe haʼu bele laʼo ba haʼu-nia rai.”
22 Maibé Faraó hatete ba nia: “Saida mak falta ba ó iha neʼe hodi halo ó hakarak atu fila ba ó-nia rai?” Nia hatán: “Haʼu la falta buat ida, maibé favór ida husik haʼu fila.”
23 Maromak mós hamosu tan inimigu ida kontra Salomão,+ neʼe mak Eliada nia oan-mane Rezon, neʼebé halai husi ninia naʼi Hadadezer,+ liurai husi Zoba.
24 Bainhira David manán* ema Zoba, Rezon kontinua bolu mane barak atu laʼo tuir nia no nia sai xefe grupu naʼok-teen nian.+ Entaun sira bá Damasku+ no hela iha neʼebá no komesa ukun iha Damasku.
25 No Rezon kontinua kontra Izraél durante Salomão nia moris, no lori susar ba Izraél hanesan Hadad mós halo, no nia hakribi Izraél bainhira nia ukun rai-Síria.
26 Nebat nia oan-mane Jeroboão+ mós komesa kontra* liurai.+ Nia mak Salomão nia atan,+ nia ema Efraim husi Zereda, ninia inan mak Zerua, neʼebé faluk ona.
27 Nia kontra liurai ho razaun tuirmai neʼe: Salomão harii ona Millo*+ no nia hametin moru sira iha ninia aman David nia Sidade.+
28 Jeroboão mak mane ida neʼebé matenek. Bainhira Salomão haree katak mane joven neʼe mak serbisu-naʼin neʼebé badinas, Salomão hili nia nuʼudar xefe+ neʼebé tau matan ba serbisu-naʼin hotu husi José nia umakain.
29 Durante tempu neʼe Jeroboão sai husi Jeruzalein, no profeta Ahias,+ ema Silo, hasoru nia iha dalan. Ahias hatais roupa foun ida, no sira naʼin-rua mesak deʼit iha rai-luan.
30 Ahias kaer ninia roupa foun neʼe no lees ba pedasuk 12.
31 Tuirmai nia dehan ba Jeroboão:
“Ó foti hena pedasuk sanulu, tanba Jeová, Izraél nia Maromak, dehan nuneʼe: ‘Haʼu sei hasai tiha ukun nuʼudar liurai husi Salomão nia liman, no haʼu sei entrega suku sanulu ba ó.+
32 Maibé suku ida sei sai nafatin ninian+ tanba haʼu hanoin haʼu-nia atan David+ no haʼu hanoin Jeruzalein, sidade neʼebé haʼu hili ona husi Izraél nia suku sira hotu.+
33 Haʼu sei halo nuneʼe tanba haʼu-nia povu husik ona haʼu+ hodi hakruʼuk fali ba ema Sidon nia maromak-feto Astoret, ema Moab nia maromak Kemos, no ema Ammon nia maromak Milkom. Sira la laʼo tuir haʼu-nia dalan sira hodi la halo buat neʼebé loos tuir haʼu-nia haree no la kumpre haʼu-nia ukun-fuan no haʼu-nia desizaun sira hanesan Salomão nia aman David halo.
34 Maibé haʼu sei la hasai podér hotu husi ninia liman, no haʼu sei husik nia sai nuʼudar ukun-naʼin ida durante ninia moris tomak, tanba haʼu hanoin haʼu-nia atan David neʼebé haʼu hili ona,+ tanba nia halo tuir haʼu-nia mandamentu no ukun-fuan sira.
35 Maibé haʼu sei hasai tiha podér balu nuʼudar liurai husi ninia oan-mane nia liman no entrega neʼe ba ó, katak entrega suku sanulu ba ó.+
36 Haʼu sei fó suku ida ba ninia oan-mane, atu nuneʼe haʼu-nia atan David sempre iha ahi-oan* ida iha haʼu-nia oin iha Jeruzalein,+ sidade neʼebé haʼu hili ona nuʼudar fatin atu lori haʼu-nia naran.
37 Haʼu sei hili ó, no ó sei ukun povu hotu neʼebé ó hakarak, no ó sei sai liurai ba Izraél.
38 No se ó halo tuir liafuan hotu neʼebé haʼu fó sai ba ó no laʼo iha haʼu-nia dalan sira no halo buat neʼebé loos tuir haʼu-nia haree hodi kumpre haʼu-nia ukun-fuan no mandamentu sira hanesan haʼu-nia atan David halo ona,+ haʼu mós sei hamutuk ho ó. Haʼu sei harii umakain ida ba ó neʼebé dura ba nafatin, hanesan haʼu harii ona umakain ida ba David,+ no haʼu sei entrega Izraél ba ó.
39 Ho ida-neʼe mak haʼu sei hamoe David nia bei-oan,+ maibé laʼós ba nafatin.’”+
40 Tan neʼe Salomão buka atu oho Jeroboão, maibé Jeroboão halai ba rai-Ejitu, ba Liurai Sisac+ iha Ejitu,+ no nia hela iha neʼebá toʼo Salomão mate.
41 Kona-ba Salomão nia istória sira seluk, no kona-ba buat hotu neʼebé nia halo no ninia matenek, neʼe hakerek ona iha livru istória kona-ba Salomão.+
42 Salomão ukun Izraél tomak husi Jeruzalein ba tinan 40.
43 Ikusmai Salomão mate* no hakoi iha ninia aman David nia Sidade; no ninia oan-mane Roboão+ mak sai liurai hodi troka nia.
Nota-rodapé
^ Ka “Imi labele tama iha sira-nia leet no sira labele tama iha imi-nia leet”.
^ Karik neʼe refere mós ba estátua sira.
^ Ka “ninia feen sira-neʼe kontrola ninia laran”.
^ Ka “ninia feen sira hadook ninia laran”.
^ Ka “hadomi”.
^ Nia mak liurai-feto maibé nia la ukun.
^ Ka karik “Tafnes haketak susu ba oan neʼe”.
^ Orj., “David latan hamutuk ho ninia beiʼala sira”.
^ Orj., “oho tiha”.
^ Orj., “hiʼit ninia liman hasoru”.
^ Neʼe katak jerasaun.
^ Orj., “latan hamutuk ho ninia beiʼala sira”.
