Primeiru Reis 2:1-46
2 Bainhira David besik ona atu mate, nia fó mandamentu tuirmai neʼe ba ninia oan-mane Salomão:
2 “Haʼu besik ona atu mate. Tan neʼe, sai forte+ no sai aten-brani bá.*+
3 Ó tenke halo tuir ó-nia obrigasaun ba Jeová, ó-nia Maromak, hodi laʼo tuir ninia dalan sira no halo tuir ninia lei, mandamentu, desizaun no avizu sira hanesan hakerek ona iha Moisés nia Ukun-Fuan.+ Ho ida-neʼe mak ó sei hetan susesu* iha buat hotu neʼebé ó halo no iha fatin hotu neʼebé ó bá.
4 No Jeová sei kumpre ninia promesa neʼebé nia halo ona kona-ba haʼu, hodi dehan: ‘Se ó-nia oan-mane sira kuidadu didiʼak sira-nia hahalok no laʼo tuir haʼu-nia dalan ho laran-metin nafatin iha haʼu-nia oin ho sira-nia laran tomak no moris tomak,+ entaun sei iha nafatin mane ida husi ó-nia jerasaun neʼebé sei tuur iha kadunan atu ukun Izraél.’+
5 “Ó mós hatene ho didiʼak buat neʼebé Zeruia nia oan-mane Joab halo ba haʼu, no buat neʼebé nia halo ba tropa Izraél nia xefe naʼin-rua, Ner nia oan-mane Abner+ no Jeter nia oan-mane Amasa.+ Nia oho sira+ hodi fakar raan funu nian bainhira la iha funu, no halo raan funu nian neʼe kona ninia sintu iha ninia knotak no ninia sandálias iha ninia ain.
6 Ó tenke uza ó-nia matenek no keta husik nia mate ho tinan boot.*+
7 “Maibé kona-ba Barzilai+ ema Gilead nia oan-mane sira, ó tenke hatudu domin neʼebé laran-metin ba sira, no sira tenke han hamutuk ho imi iha ó-nia meza, tanba sira halo diʼak mai haʼu no apoia nafatin haʼu+ bainhira haʼu halai husi ó-nia maun Absalão.+
8 “Gera nia oan-mane Simei, ema Benjamim husi Baurim, mós hela iha neʼe besik ó. Nia ho laran-aat fó-malisan+ ba haʼu iha loron neʼebé haʼu bá Manaim.+ Maibé bainhira nia mai hasoru haʼu iha Mota Jordaun, haʼu jura ba nia hodi Jeová nia naran, dehan: ‘Haʼu sei la oho ó ho surik.’+
9 Agora keta husik deʼit nia atu la hetan kastigu,+ ó mak mane neʼebé matenek no ó hatene saida mak ó tenke halo ba nia. Keta husik nia mate ho tinan boot.”*+
10 Tuirmai David mate* no ema hakoi nia iha David nia Sidade.+
11 David ukun Izraél durante tinan 40. Nia ukun ba tinan 7 iha Hebron,+ no nia ukun ba tinan 33 iha Jeruzalein.+
12 Depois neʼe, Salomão tuur iha ninia aman David nia kadunan, no neineik-neineik ninia pozisaun nuʼudar liurai sai metin liután.+
13 Liutiha tempu balu, Hagite nia oan-mane Adonias mai hasoru Salomão nia inan Bat-Seba. No Bat-Seba husu: “Ó mai ho dame ka?” Nia hatán: “Haʼu mai ho dame.”
14 Tuirmai Adonias dehan: “Haʼu hakarak husu buat ruma ba Ita.” Bat-Seba hatán: “Koʼalia bá.”
15 Adonias hatutan tan: “Ita rasik hatene katak pozisaun nuʼudar liurai mak haʼu-nian, no ema Izraél hotu hein atu haʼu sai liurai.+ Maibé haʼu-nia alin mak hetan fali pozisaun nuʼudar liurai, tanba nia simu pozisaun neʼe husi Jeová.+
16 Maibé agora haʼu husu Ita buat ida deʼit. Favór ida, fó mai haʼu buat neʼebé haʼu husu.” Entaun Bat-Seba dehan: “Koʼalia bá.”
17 Adonias dehan: “Favór ida, husu ba Liurai Salomão atu fó Abisag,+ feto husi Sunem, mai haʼu atu sai haʼu-nia feen, tanba liurai sei fó buat neʼebé Ita husu.”
18 Ho ida-neʼe, Bat-Seba dehan: “Diʼak! Haʼu sei koʼalia ba liurai kona-ba neʼe.”
19 Entaun Bat-Seba bá hasoru Liurai Salomão atu koʼalia ba nia kona-ba Adonias nia hakarak. Ho ida-neʼe, liurai hamriik kedas atu hasoru Bat-Seba no hakruʼuk ba nia. Tuirmai liurai tuur iha ninia kadunan no haruka ema tau kadunan ida tan ba ninia inan, atu nuneʼe ninia inan bele tuur iha ninia liman-loos.
20 Bat-Seba dehan: “Haʼu atu husu buat kiʼik ida ba ó. Favór ida, fó mai haʼu buat neʼebé haʼu husu.” Entaun liurai hatán ba nia: “Amá, koʼalia bá, tanba haʼu sei fó buat neʼebé Ita husu.”
21 Bat-Seba dehan: “Fó Abisag, feto husi Sunem, ba ó-nia maun Adonias atu sai ninia feen.”
22 Liurai Salomão hatán ba ninia inan: “Tanbasá mak Ita husu Abisag, feto husi Sunem, atu fó ba Adonias? Diʼak liu husu deʼit pozisaun nuʼudar liurai hodi fó ba nia,+ tanba nia mak haʼu-nia maun,+ no amlulik Abiatar no Zeruia nia oan-mane+ Joab+ mós apoia nia.”
23 Ho ida-neʼe, Liurai Salomão jura hodi Jeová nia naran, dehan: “Husik Maromak fó kastigu ba haʼu no aumenta tan kastigu neʼe se Adonias la mate, tanba nia husu ida-neʼe mai haʼu.
24 Agora, haʼu jura hodi Jeová, Maromak neʼebé moris, ida neʼebé halo haʼu tuur iha haʼu-nia aman David nia kadunan no hametin haʼu-nia pozisaun+ nuʼudar liurai no harii uma* ida ba haʼu+ hanesan nia promete ona, ohin Adonias tenke mate.”+
25 Liurai Salomão haruka kedas Jeoada nia oan-mane Benaias+ bá ataka Adonias no oho nia.
26 Liurai dehan ba amlulik Abiatar:+ “Fila fali ba ó-nia rai iha Anatot!+ Ó merese mate, maibé ohin haʼu sei la oho ó tanba ó lori ona Jeová, Naʼi Ukun-Naʼin Boot Liu, nia Arka iha haʼu-nia aman David nia oin+ no tanba ó mós hola parte iha haʼu-nia aman nia terus bainhira nia hetan terus.”+
27 Entaun Salomão duni sai Abiatar hodi la serbí tan nuʼudar Jeová nia amlulik, neʼe kumpre Jeová nia liafuan neʼebé fó sai ona kontra umakain Eli+ iha Silo.+
28 Bainhira Joab rona kona-ba neʼe, nia halai ba Jeová nia tenda+ no kaer metin ba altár nia dikur sira, tanba Joab apoia Adonias+ maski uluk nia la apoia Absalão.+
29 Tuirmai ema fó-hatene ba Liurai Salomão, hodi dehan: “Joab halai ona ba Jeová nia tenda, no nia besik altár.” Entaun Salomão haruka Jeoada nia oan-mane Benaias, hodi dehan: “Bá, oho nia!”
30 Entaun Benaias bá Jeová nia tenda no dehan ba Joab: “Liurai dehan nuneʼe: ‘Sai mai!’” Maibé Joab hatán: “Lae! Haʼu sei mate iha neʼe.” Benaias fó-hatene fali ba liurai, hodi dehan: “Joab hatete nuneʼe, no nia hatán nuneʼe mai haʼu.”
31 Tuirmai liurai hatete: “Halo tuir buat neʼebé nia dehan. Oho nia no hakoi nia. Hamoos tiha raan husi haʼu no husi haʼu-nia aman nia umakain, katak ema laran-moos nia raan neʼebé Joab fakar ona.+
32 Jeová sei halo nia lori todan ba ninia sala,* tanba nia ataka ho surik no oho mane naʼin-rua neʼebé laran-loos liu fali nia no diʼak liu fali nia, maski haʼu-nia aman David la hatete kona-ba neʼe. Nia oho Ner nia oan-mane Abner,+ xefe tropa Izraél nian,+ no oho Jeter nia oan-mane Amasa,+ xefe tropa Judá nian.+
33 Joab no ninia bei-oan sira mak sei lori todan ba mane sira-neʼe nia raan ba nafatin.+ Maibé David, ninia bei-oan sira, ninia umakain no ninia kadunan sei iha dame husi Jeová ba nafatin.”
34 Entaun Jeoada nia oan-mane Benaias bá ataka Joab no oho nia, no ema hakoi nia iha ninia uma rasik iha rai-fuik.
35 Tuirmai liurai hili Jeoada nia oan-mane Benaias+ nuʼudar xefe tropa nian hodi troka Joab, no liurai foti amlulik Zadoc+ hodi troka Abiatar.
36 Depois neʼe, liurai bolu Simei+ no dehan: “Harii uma ida ba ó-nia an rasik iha Jeruzalein, no hela iha neʼebá. Keta sai husi neʼebá hodi bá fatin seluk.
37 Se ó sai no laʼo liu Foho-Leet Sedron,+ ó sei mate duni. Ó sei lori todan ba ó-nia sala rasik.”*
38 Simei hatán ba liurai: “Buat neʼebé Ita dehan mak loos. Ita-nia atan sei halo tuir naʼi liurai nia liafuan.” Entaun Simei hela iha Jeruzalein ba tempu kleur.
39 Maibé iha tinan terseiru nia rohan, Simei nia atan naʼin-rua halai ba Liurai Aquis+ husi Gat. Aquis mak Maaka nia oan-mane. Bainhira ema fó-hatene ba Simei, hodi dehan: “Ó-nia atan sira iha Gat”,
40 Simei tau kedas sela ba ninia kuda-burru no bá hasoru Aquis iha Gat atu buka ninia atan sira. Bainhira Simei fila fali husi Gat hamutuk ho ninia atan sira,
41 ema fó-hatene ba Salomão, hodi dehan: “Simei sai husi Jeruzalein hodi bá Gat no agora nia fila fali ona.”
42 Ho ida-neʼe, liurai bolu Simei no dehan ba nia: “Haʼu haruka ó jura hodi Jeová nia naran no fó avizu ba ó, dehan: ‘Se ó sai husi neʼe hodi bá fatin seluk, ó sei mate iha loron neʼe.’ No ó rasik hatete mai haʼu: ‘Buat neʼebé Ita dehan mak loos. Haʼu sei halo tuir.’+
43 Entaun, tanbasá mak ó la halo tuir ó-nia juramentu ba Jeová no la halo tuir mandamentu neʼebé haʼu fó ba ó?”
44 Liurai mós hatete ba Simei: “Ó rasik hatene buat aat hotu neʼebé ó halo ona ba haʼu-nia aman David,+ no Jeová sei lori fali buat sira-neʼe ba ó-nia ulun leten.+
45 Maibé Liurai Salomão sei hetan bensaun,+ no David nia kadunan sei sai metin liután iha Jeová nia oin ba nafatin.”
46 Ho ida-neʼe, liurai haruka Jeoada nia oan-mane Benaias bá ataka no oho nia.+
Nuneʼe ukun neʼe sai metin liután iha Salomão nia liman.+
Nota-rodapé
^ Ka “no hatudu katak ó mane duni”.
^ Ka “sei hatudu matenek”.
^ Orj., “keta husik nia lori ninia fuuk mutin tun ba rate ho dame”. Haree “Siol” iha Glosáriu.
^ Orj., “Ó tenke lori ninia fuuk mutin ho raan tun ba rate”. Haree “Siol” iha Glosáriu.
^ Orj., “latan hamutuk ho ninia beiʼala sira”.
^ Ka “umakain liurai nian”.
^ Orj., “sei tau ninia raan iha ninia ulun leten”.
^ Orj., “Ó-nia raan sei iha ó-nia ulun leten”.
