Segundu Korinto 13:1-14
13 Ida-neʼe mak dala terseiru neʼebé haʼu prontu atu bá vizita imi. “Liuhusi sasin naʼin-rua ka tolu nia liafuan* mak bele hametin kazu hotu.”+
2 Maski agora haʼu la iha imi-nia leet, maibé haʼu sente hanesan haʼu iha neʼebá hamutuk ho imi ba dala segundu. Haʼu fó avizu nanis ba sira neʼebé uluk halo sala, no mós ba ema seluk hotu, katak se haʼu bá fali, haʼu sei la husik ema ida sees husi dixiplina,
3 hodi nuneʼe haʼu sei fó prova ba imi katak Kristu koʼalia liuhusi haʼu. Kristu la fraku iha imi-nia leet, maibé nia hatudu sai ninia kbiit boot.
4 Tanba tuir loloos, ema fó kastigu-mate ba nia iha ai-riin tanba fraku,* maibé nia moris fali tanba Maromak nia kbiit.+ Tuir loloos, ami mós sai fraku hamutuk ho nia, maibé ami sei moris hamutuk ho nia+ liuhusi Maromak nia kbiit neʼebé mós iha imi.+
5 Kontinua koko imi-nia an atu hatene se imi moris tuir fiar ka lae. Kontinua haree didiʼak imi ema oinsá.+ Imi hatene ka lae katak Jesus Kristu ida deʼit ho imi? Maibé se Maromak la simu ona imi, Kristu laʼós ida deʼit ho imi.
6 Haʼu hein namanas atu imi rekoñese katak Maromak simu ami.
7 Agora ami halo orasaun ba Maromak atu imi la halo sala ruma, neʼe laʼós atu ema seluk bele hanoin katak Maromak simu ami, maibé atu imi bele halo buat neʼebé diʼak maski ema hanoin katak Maromak la simu ami.
8 Tanba ami labele halo buat ida kontra lia-loos, maibé ami halo deʼit buat neʼebé apoia lia-loos.
9 Ami haksolok duni kuandu ami fraku no imi iha kbiit. No ami harohan katak imi sei hadiʼa imi-nia hanoin.
10 Tan neʼe mak haʼu hakerek buat sira-neʼe kuandu haʼu la iha imi-nia leet, atu nuneʼe kuandu haʼu vizita imi, haʼu la presiza uza haʼu-nia kbiit iha dalan neʼebé makaʼas, tanba Naʼi fó kbiit neʼe mai haʼu+ atu hametin laʼós atu harahun.
11 Ikusliu maun-alin sira, kontinua atu haksolok, atu hadiʼa imi-nia hanoin, atu simu kmaan,+ atu iha hanoin neʼebé hanesan,+ no atu moris iha dame laran.+ Hodi nuneʼe, Maromak domin no dame nian+ sei hamutuk ho imi.
12 Kumprimenta malu ho reʼi.*
13 Ema santu* hotu haruka sira-nia kumprimentus ba imi.
14 Haʼu harohan katak Naʼi Jesus Kristu nia laran-diʼak neʼebé boot, no Maromak nia domin, no espíritu santu neʼebé haraik tiha ba ita sei hamutuk ho imi hotu.
Nota-rodapé
^ Orj., “ibun”.
^ Neʼe tanba nia mak ema.
^ Orj., “reʼi santu”.
^ Haree “Ema santu” iha Glosáriu.
