Segundu Samuel 23:1-39
23 David nia liafuan ikus+ sira mak tuirmai neʼe:
“Liafuan husi Jessé nia oan-mane David,+No liafuan husi mane neʼebé Maromak foti aas tiha,+Ema neʼebé Jacob nia Maromak hili* ona,+Kantadór diʼak neʼebé kanta Izraél nia knananuk sira.*+
2 Jeová nia espíritu koʼalia liuhusi haʼu;+Ninia liafuan iha haʼu-nia nanál.+
3 Izraél nia Maromak mak koʼalia ona;Izraél nia Fatuk Boot+ dehan ba haʼu:
‘Kuandu ukun-naʼin iha hahalok loos,+No ukun hodi hamtaʼuk Maromak,+
4 Neʼe hanesan naroman iha dadeer kuandu loro-matan nabilan,+Dadeer-saan neʼebé la iha kalohan.
Neʼe hanesan naroman depois udan hotu ona,Neʼebé halo moris duʼut sira husi rai.’+
5 Haʼu-nia umakain mak hanesan neʼe iha Maromak nia oin, loos ka lae?
Tanba nia halo ona aliansa rohan-laek nian ho haʼu,+Nia arranju parte ida-idak no halo metin aliansa neʼe.
Tanba ho aliansa neʼe mak haʼu sei hetan salvasaun no ksolok,Nia sei halo haʼu-nia umakain sai boot.+
6 Maibé ema folin-laek hotu soe tiha ona+ hanesan ai-tarak,Tanba labele foti sira ho liman-tanan.
7 Ema ida neʼebé kaer sira,Tenke iha armas funu nian husi besi no diman,No tenke sunu sira hotu iha sira-nia fatin.”
8 David nia asuwaʼin kbiit boot+ sira-nia naran mak tuirmai neʼe: Joseb-Basebet ema Takemon,* neʼebé serbí nuʼudar ulun-naʼin ba asuwaʼin kbiit boot naʼin-tolu.+ Iha tempu ida nia uza ninia diman hodi oho mane naʼin-800.
9 Depois nia mak Dodo+ nia oan-mane Eleazar,+ Ahohi nia bei-oan. Eleazar mós ida husi asuwaʼin kbiit boot naʼin-tolu neʼebé hamutuk ho David bainhira sira sadik ema Filístia. Iha tempu neʼebá sira halibur atu halo funu, no bainhira mane Izraél sira hakiduk,
10 Eleazar hamriik metin no kontinua oho ema Filístia toʼo ninia liman sai kole no toos, tanba nia nafatin kaer surik iha ninia liman.+ Entaun iha loron neʼebá, Jeová fó salvasaun boot* ba sira,+ no povu fila mai iha ninia kotuk hodi hadau sasán husi ema neʼebé nia oho tiha ona.
11 Depois nia mak Agé nia oan-mane Samá, ema Harari. Ema Filístia halibur hamutuk iha Lehi, iha toʼos ida neʼebé iha lentilla barak; no povu halai tanba ema Filístia.
12 Maibé Samá hamriik iha toʼos neʼe nia klaran no defende toʼos neʼe hodi kontinua oho ema Filístia, nuneʼe Jeová fó salvasaun boot* ba ema Izraél.+
13 Durante tempu koʼa nian, mane naʼin-tolu husi ulun-naʼin naʼin-30 bá hasoru David iha fatuk-kuak Adulam,+ no ema Filístia nia tropa grupu ida halibur hamutuk* iha Rai-Tetuk Refaim.+
14 Iha tempu neʼebá David hela iha fatin seguru,+ no tropa Filístia sira hein postu iha Belein.
15 Tuirmai David fó sai ninia hakarak, hodi dehan: “Haʼu hakarak tebes atu hemu bee husi tanke* neʼebé besik portaun Belein!”
16 Rona tiha neʼe, asuwaʼin kbiit boot naʼin-tolu neʼe tama ba tropa Filístia nia hela-fatin no kuru bee husi tanke neʼebé besik portaun Belein no lori ba David. Maibé David lakohi hemu no nia fakar bee neʼe ba rai iha Jeová nia oin.+
17 David hatete: “Oh Jeová, haʼu sei nunka hemu bee neʼe! Haʼu sei la hemu raan+ husi mane sira neʼebé tau sira-nia moris iha perigu laran hodi kuru bee neʼe ba haʼu.” Ho ida-neʼe, nia lakohi hemu. Neʼe mak buat neʼebé asuwaʼin kbiit boot naʼin-tolu halo.
18 Zeruia nia oan-mane+ Abisai,+ Joab nia maun, mak sai ulun-naʼin ba asuwaʼin naʼin-tolu seluk. Iha tempu ida nia uza ninia diman hodi oho mane naʼin-300, no ninia naran-boot hanesan ho asuwaʼin kbiit boot naʼin-tolu.+
19 Maski Abisai mak naran-boot liu husi asuwaʼin naʼin-tolu neʼe, no nia mak sira-nia xefe, maibé ninia pozisaun la boot liu asuwaʼin kbiit boot naʼin-tolu.
20 Jeoada nia oan-mane Benaias+ mak mane neʼebé aten-brani,* nia halo buat barak iha Kabzeel.+ Nia oho Ariel ema Moab nia oan-mane naʼin-rua, no loron ida durante tempu neʼebé jelu-rahun monu nia tama ba bee-posu ida no oho leaun ida.+
21 Nia mós oho mane Ejitu ida neʼebé isin-boot loos. Maski mane Ejitu neʼe kaer hela diman, maibé Benaias bá kontra mane neʼe ho ai-tonka ida no hadau tiha diman husi mane Ejitu neʼe nia liman no oho mane neʼe ho ninia diman rasik.
22 Neʼe mak buat sira neʼebé Jeoada nia oan-mane Benaias halo, no nia naran-boot hanesan ho asuwaʼin kbiit boot naʼin-tolu.
23 Maski Benaias iha naran-boot liu fali ulun-naʼin naʼin-30, maibé ninia pozisaun la boot liu asuwaʼin kbiit boot naʼin-tolu. Maski nuneʼe, David foti nia nuʼudar ulun ba ninia guarda.
24 Joab nia alin Asael+ mak ida husi ulun-naʼin naʼin-30, no sira-nia naran mak tuirmai neʼe: Elanan, nia mak Dodo ema Belein nia oan-mane;+
25 Samá ema Harod; Elika ema Harod;
26 Helez+ ema Palti; Ira,+ nia mak Ikes ema Tekoa nia oan-mane;
27 Abi-Ezer+ ema Anatot;+ Mebunai ema Husa;
28 Zalmon ema Ahohi; Maarai+ ema Netofa;
29 Heleb, nia mak Baaná ema Netofa nia oan-mane; Itai, nia mak Ribai nia oan-mane, ema Gibea husi suku Benjamim;
30 Benaias+ ema Piraton; Hidai husi mota* sira iha Gaas;+
31 Abi-Albon ema Araba; Azmavet ema Baurim;
32 Eliaba ema Saalbim; Jasen nia oan-mane sira; Jonatan;
33 Samá ema Harari; Ahiam, nia mak Sarar ema Harari nia oan-mane;
34 Elifelet, nia mak Ahasbai nia oan-mane, ema Maakat nia jerasaun; Eliam, nia mak Ahitofel+ ema Gilo nia oan-mane;
35 Hezro ema Karmel; Paarai ema Arab;
36 Igal, nia mak Natan ema Zoba nia oan-mane; Bane ema Gad;
37 Zelek ema Ammon; Naarai ema Beerot, neʼebé lori Zeruia nia oan-mane Joab nia armas;
38 Ira ema Itri; Gareb ema Itri;+
39 no Urias+ ema Hetes. Sira hotu hamutuk mane naʼin-37.
Nota-rodapé
^ Ka “Ema diʼak husi Izraél nia knananuk sira”.
^ Orj., “fui mina”. Haree “Fui mina” iha Glosáriu.
^ Neʼe katak Hakmoni nia jerasaun.
^ Ka “manán boot”.
^ Ka “manán boot”.
^ Ka “ema Filístia harii tenda”.
^ Orj., “ema aten-brani nia oan-mane”.
