Apóstolu 1:1-26
1 Iha livru primeiru neʼebé haʼu hakerek ba Ita, Teófilo, haʼu konta kona-ba buat hotu neʼebé Jesus komesa halo no hanorin+
2 toʼo loron neʼebé Maromak foti saʼe nia ba lalehan.+ Nia saʼe ba lalehan bainhira nia fó tiha matadalan liuhusi espíritu santu ba apóstolu sira neʼebé nia hili ona.+
3 Kuandu nia hetan tiha terus, nia moris fali, no nia mosu ba sira dala barak hodi fó prova neʼebé klaru katak nia moris-hiʼas ona.+ Sira haree nia durante loron 40 nia laran no nia koʼalia ba sira kona-ba Maromak nia Ukun.*+
4 Bainhira nia hasoru sira, nia haruka sira, hodi dehan: “Keta husik Jeruzalein,+ maibé kontinua hein buat neʼebé Aman promete ona,+ neʼebé imi rona ona husi haʼu.
5 Loloos, João fó batizmu* ho bee, maibé lakleur tan imi sei hetan batizmu ho espíritu santu.”+
6 Kuandu sira halibur hamutuk ona, sira husu ba nia: “Naʼi, Ita-Boot sei hadiʼa fali Izraél nia ukun iha tempu neʼe ka lae?”+
7 Nia dehan ba sira: “Imi la presiza hatene oras no tempu, tanba Aman deʼit mak iha direitu* atu deside.+
8 Maibé kuandu espíritu santu tun ba imi, imi sei simu kbiit,+ no imi sei sai haʼu-nia testemuña+ iha Jeruzalein,+ iha Judeia tomak no iha Samaria,+ no toʼo rai sira neʼebé dook liu* iha mundu.”+
9 Koʼalia tiha buat sira-neʼe, nia saʼe ba lalehan bainhira sira hateke hela, no kalohan ida taka netik nia hodi sira la haree tan nia.+
10 Bainhira sira hateke daudaun nia saʼe ba lalehan, derrepente deʼit mane naʼin-rua neʼebé hatais roupa mutin+ mosu hodi hamriik iha sira-nia sorin,
11 no dehan: “Ema Galileia sira, tanbasá mak imi hamriik hodi hateke ba lalehan? Jesus neʼebé saʼe ona ba lalehan, sei fila fali mai* iha dalan neʼebé hanesan imi haree nia saʼe ba lalehan.”
12 Tuirmai, sira fila fali ba Jeruzalein+ husi Foho Oliveira, neʼebé dook maizumenus kilómetru ida* husi Jeruzalein.
13 Kuandu sira toʼo ona Jeruzalein, sira saʼe ba kuartu iha andár leten neʼebé sira hela bá. Iha neʼebá iha Pedro, João, Tiago, André, Filipe, Tomé, Bartolomeu, Mateus, Alfeu nia oan-mane Tiago, Simão ida neʼebé laran-manas, no Tiago nia oan-mane Judas.+
14 Sira hotu neʼe laran ida deʼit hodi kontinua halo orasaun, no sira hamutuk ho feto balu+ no mós Jesus nia inan Maria, no Jesus nia alin-mane sira.+
15 Iha tempu neʼebá, kuandu ema maizumenus naʼin-120 halibur hamutuk, Pedro hamriik iha sira-nia klaran no dehan:
16 “Maun-alin sira, eskritura neʼebé espíritu santu fó-hatene nanis liuhusi David tenke kumpre duni. David koʼalia kona-ba Judas,+ ida neʼebé fó matadalan ba ema sira neʼebé atu kaer Jesus.+
17 Uluk nia mós sura ona hamutuk ho ita+ no hola parte ho ita iha serbisu neʼe.
18 Mane neʼe sosa toʼos ida ho osan husi ninia hahalok la loos,+ no nia monu ho ulun tun uluk, no ninia kabun nakfera* no ninia tee-oan hotu fakar sai.+
19 Ema hotu neʼebé hela iha Jeruzalein rona kona-ba buat neʼebé akontese, nuneʼe sira bolu toʼos neʼe iha sira-nia lian nuʼudar Akéldama, neʼe katak ‘Toʼos Raan nian’.
20 Iha livru Salmo hakerek nanis ona dehan: ‘Halo ninia hela-fatin sai mamuk, no keta husik ema ida atu hela iha neʼebá’,+ no: ‘Husik ema seluk kaer fali ninia knaar nuʼudar ulun-naʼin.’+
21 Tan neʼe, presiza duni ema ida atu troka Judas. Entaun, ita tenke hili ema ida husi ema hotu neʼebé sempre laʼo ho ami durante tempu hotu neʼebé Naʼi Jesus halaʼo ninia atividade hamutuk ho ami
22 hahú husi tempu neʼebé nia simu batizmu husi João+ toʼo loron neʼebé nia saʼe ba lalehan.+ Ema neʼe tenke sai testemuña hamutuk ho ami kona-ba Jesus nia moris-hiʼas.”+
23 Entaun, sira fó sujestaun kona-ba ema naʼin-rua, José neʼebé ema bolu Barsabás, neʼebé mós bolu Justo, no Matias.
24 Tuirmai, sira halo orasaun no dehan: “Oh Jeová,* Ita-Boot hatene ema hotu nia laran.+ Hatudu mai ami ema ida husi sira naʼin-rua neʼebé Ita hili ona
25 hodi simu knaar neʼe no sai apóstolu. Tanba Judas husik ona knaar neʼe hodi laʼo tuir ninia dalan rasik.”+
26 Entaun, sira dada sorteiu* kona-ba sira naʼin-rua neʼe,+ no neʼe monu ba Matias, no sira sura* nia hamutuk ho apóstolu naʼin-11.
Nota-rodapé
^ Ka “Reinu; Governu”.
^ Ka “iha podér”.
^ Ka “toʼo rai hotu”.
^ Orj., “sei mai”.
^ Orj., “dook hanesan viajen iha loron Sábadu”. Neʼe mak distánsia neʼebé ema Judeu sira bele laʼo iha loron Sábadu. Kompara ho Jos 3:4.
^ Ka “nakfera iha isin klaran”.
^ Haree “Dada sorteiu” iha Glosáriu.
^ Neʼe katak haree nia hanesan apóstolu naʼin-11.
