Apóstolu 14:1-28
14 Iha Ikónio, Paulo ho Barnabé tama ba ema Judeu sira-nia sinagoga no koʼalia ho matenek toʼo ema-lubun husi ema Judeu no ema Gregu sai fiar-naʼin.
2 Maibé ema Judeu sira neʼebé la fiar, sira book ema husi nasaun seluk hodi hanoin aat no kontra maun-alin sira.+
3 Tan neʼe, Paulo no Barnabé uza tempu barak tan hodi haklaken ho aten-brani liuhusi Jeová* nia kbiit. No Maromak uza sira atu halo sinál no milagre oioin atu hatudu katak mensajen neʼebé sira haklaken mak kona-ba Maromak nia laran-diʼak neʼebé boot.+
4 Maibé ema iha sidade neʼe haketak malu, balu apoia ema Judeu sira no balu apoia apóstolu sira.
5 Tuirmai, ema husi nasaun seluk, ema Judeu no mós sira-nia ukun-naʼin sira koko atu halo aat no tuda Paulo no Barnabé.+
6 Maibé ema fó-hatene neʼe ba Paulo no Barnabé, entaun sira halai ba sidade Likaónia, Listra no Derbe no ba knua sira neʼebé besik.+
7 Sira kontinua haklaken liafuan diʼak iha neʼebá.
8 Iha Listra iha mane ida neʼebé ain-kudeʼik. Nia ain-kudeʼik husi moris mai kedas no nia nunka laʼo. Nia tuur hela
9 hodi rona Paulo koʼalia. Paulo hateke didiʼak ba nia no haree katak nia iha fiar atu sai isin-diʼak,+
10 no Paulo koʼalia ho lian makaʼas: “Hamriik loos bá.” Mane neʼe haksoit no hahú laʼo.+
11 Kuandu ema-lubun haree buat neʼebé Paulo halo, sira hakilar iha lian Likaónia nian, hodi dehan: “Maromak sira sai ona hanesan ema no tun tiha mai ita!”+
12 Sira hahú bolu Barnabé nuʼudar Zeus no Paulo nuʼudar Hermes tanba Paulo mak koʼalia barak ba sira.
13 Tanba templu maromak Zeus nian besik sidade neʼe, entaun amlulik Zeus nian lori karau-aman no koroa neʼebé halo husi ai-tahan, no nia mai iha sidade nia portaun no hakarak atu oho karau sira-neʼe hodi hasaʼe nuʼudar sakrifísiu ba Paulo no Barnabé.
14 Maibé kuandu apóstolu Barnabé no Paulo rona kona-ba neʼe, sira lees sira-nia roupa no halai tama ba ema-lubun nia leet, no koʼalia ho lian makaʼas, hodi dehan:
15 “Maluk sira, tanbasá mak imi halo buat sira-neʼe? Ami mós ema no iha fraku hanesan imi.+ Ami fó sai liafuan diʼak ba imi atu imi bele hasees an husi buat sira-neʼe neʼebé la iha folin no adora fali Maromak neʼebé moris, neʼebé kria lalehan, rai, tasi, no buat hotu neʼebé iha laran.+
16 Iha tempu uluk, nia husik nasaun hotu atu laʼo tuir deʼit sira-nia dalan rasik.+
17 Maski nuneʼe, nia fó sasin kona-ba nia an+ liuhusi buat diʼak neʼebé nia halo. Nia fó udan husi lalehan no fó ai-fuan tuir ninia tempu,+ hodi fó ai-han barak ba imi no halo nakonu imi-nia laran ho ksolok.”+
18 Maski sira koʼalia liafuan sira-neʼe, maibé sira presiza hakaʼas an liután toʼo ikusmai sira konsege hanetik ema-lubun neʼebé hakarak hasaʼe sakrifísiu ba sira.
19 Maibé ema Judeu sira toʼo mai husi Antiokia no Ikónio. Sira soran ema-lubun,+ no sira tuda Paulo no lori sai nia ba sidade nia liʼur tanba sira hanoin katak nia mate ona.+
20 Maibé kuandu dixípulu sira halibur haleʼu Paulo, nia hamriik no tama ba sidade laran. Loron tuirmai nia no Barnabé husik fatin neʼe hodi bá Derbe.+
21 Bainhira haklaken tiha liafuan diʼak iha sidade neʼe no ajuda ona ema barak atu sai dixípulu, sira fila fali ba Listra, Ikónio no Antiokia.
22 Sira hametin dixípulu sira+ iha neʼebá no anima sira atu laran-metin nafatin iha fiar, hodi dehan: “Ita tenke tama ba Maromak nia Ukun* liuhusi susar barak.”+
23 Liután neʼe, sira hili katuas sira iha kongregasaun ida-idak.+ Sira halo orasaun no halo jejún,+ tuirmai sira entrega katuas sira-neʼe ba Jeová* neʼebé sira fiar ona.
24 Tuirmai, sira laʼo liu Pisídia no toʼo iha Pamfília,+
25 no kuandu haklaken tiha Maromak nia liafuan iha Perga, sira tun ba Atália.
26 Husi neʼebá, sira saʼe ró hodi bá Antiokia. Antiokia mak sidade neʼebé uluk maun-alin sira husu Maromak nia laran-diʼak neʼebé boot ba Paulo no Barnabé atu bele halo serbisu neʼebé agora sira halo hotu ona.+
27 Kuandu sira toʼo iha Antiokia no halibur tiha kongregasaun hamutuk, sira konta buat barak neʼebé Maromak halo ona liuhusi sira, no fó sai katak Maromak loke ona odamatan ba nasaun sira atu sai fiar-naʼin.+
28 Entaun, sira hela kleur ho dixípulu sira.
