Deuteronómio 18:1-22
18 “Amlulik Levi sira no suku Levi tomak sei la hetan parte ka liman-rohan hanesan ema Izraél seluk. Sira sei han deʼit husi sakrifísiu sira neʼebé hasaʼe ona ho ahi ba Jeová, neʼebé mak nuʼudar ninia liman-rohan.+
2 Entaun sira labele simu liman-rohan iha sira-nia maun-alin nia leet. Jeová mak sira-nia liman-rohan* hanesan nia hatete ona ba sira.
3 “Amlulik sira-nia direitu neʼebé povu tenke fó mak tuirmai neʼe: Ema hotu neʼebé hasaʼe sakrifísiu ida, maski neʼe mak karau-aman ka bibi-malae ida, nia tenke fó ba amlulik animál neʼe nia kabaas, hasan-ruin no kabun.*
4 Imi tenke fó ba nia trigu* primeiru neʼebé imi koʼa ona, tua-uvas foun, mina, no bibi-fulun primeiru neʼebé tesi husi imi-nia bibi sira.+
5 Jeová, imi-nia Maromak, hili ona nia no ninia oan-mane sira husi imi-nia suku hotu nia leet atu nafatin serbí hodi reprezenta Jeová nia naran.+
6 “Maibé se ema Levi ida sai husi imi-nia sidade neʼebé nia hela bá iha Izraél+ no nia hakarak atu laʼo ba fatin neʼebé Jeová hili ona,*+
7 nia bele serbí iha neʼebá hodi reprezenta ninia Maromak Jeová nia naran hanesan ninia maun-alin sira seluk, katak ema Levi neʼebé halo serbisu iha Jeová nia oin.+
8 Nia sei simu ai-han ho parte neʼebé hanesan ho sira,+ maski nia hetan ona osan tanba faʼan ninia beiʼala sira-nia sasán.
9 “Bainhira imi tama ona ba rai neʼebé Jeová, imi-nia Maromak, sei fó ba imi, imi labele aprende atu halo tuir hahalok aat husi nasaun sira iha neʼebá.+
10 Iha imi-nia leet labele iha ema neʼebé sunu ninia oan-mane ka oan-feto iha ahi,*+ ema neʼebé siʼik futuru,*+ ema neʼebé halo masonik,+ ema neʼebé buka sinál oioin atu siʼik futuru,+ matan-dook,+
11 ema neʼebé fekit ema seluk, ema neʼebé husu ba ema neʼebé koko atu koʼalia ho ema mate+ ka husu ba ema neʼebé siʼik futuru,+ ka ema neʼebé husu ema mate.+
12 Tanba Jeová hakribi ema neʼebé halo buat sira-neʼe, no tanba hahalok aat sira-neʼe mak Jeová, imi-nia Maromak, sei duni sai sira husi imi-nia oin.
13 Imi tenke moris ho hahalok loos iha Jeová, imi-nia Maromak, nia oin.+
14 “Tanba nasaun sira neʼebé imi sei duni sai mak toman atu rona ba ema neʼebé halo masonik+ no ema neʼebé siʼik futuru,+ maibé Jeová, imi-nia Maromak, bandu imi atu labele halo buat sira hanesan neʼe.
15 Jeová, imi-nia Maromak, sei hili profeta ida hanesan haʼu husi imi-nia leet. Imi tenke rona ba nia.+
16 Jeová, imi-nia Maromak, sei halo nuneʼe tanba buat neʼebé imi husu ba nia iha Horeb+ bainhira povu neʼe dehan: ‘Keta husik ami rona Jeová, ami-nia Maromak, nia lian ka haree tan ahi boot neʼe, atu nuneʼe ami labele mate.’+
17 Tuirmai Jeová dehan ba haʼu: ‘Buat neʼebé sira hatete mak diʼak.
18 Haʼu sei hili profeta ida husi sira-nia leet hanesan ó,+ no haʼu sei tau haʼu-nia liafuan iha ninia ibun,+ no nia sei koʼalia ba sira buat hotu neʼebé haʼu haruka ba nia.+
19 Tuir loloos, se ema ruma la rona ba haʼu-nia liafuan neʼebé nia koʼalia hodi haʼu-nia naran, ema neʼe tenke hatán mai haʼu.+
20 “‘Se profeta ida sai brani liu no koʼalia ho foti an* hodi haʼu-nia naran maski haʼu la haruka nia atu koʼalia ida-neʼe, ka se nia koʼalia hodi maromak sira seluk nia naran, profeta neʼe tenke mate.+
21 Maibé, karik imi sei hanoin iha imi-nia laran: “Oinsá mak ami bele hatene katak Jeová la koʼalia liafuan neʼe?”
22 Kuandu profeta ida koʼalia hodi Jeová nia naran no liafuan neʼe la kumpre ka la sai loos, entaun neʼe katak Jeová la koʼalia liafuan sira-neʼe. Profeta neʼe mak sai brani liu no koʼalia ho foti an.* Imi labele taʼuk ba nia.’
Nota-rodapé
^ Ka “Jeová sei tau matan ba sira-nia presiza”.
^ Ka “estómagu”.
^ Neʼe inklui mós sevada.
^ Neʼe katak fatin neʼebé Jeová hili atu sai nuʼudar fatin adorasaun.
^ Orj., “halo ninia oan-mane ka oan-feto liu husi ahi”.
^ Neʼe katak koko atu buka-hatene kona-ba futuru ka buat seluk ho ajuda husi anju aat sira.
