Génesis 6:1-22
6 Bainhira ema sai barak ona iha rai no iha mós oan-feto sira,
2 anju sira*+ hahú haree katak ema nia oan-feto sira bonita. Tan neʼe, sira komesa hili feto hotu neʼebé sira hakarak hodi sai sira-nia feen.
3 Entaun Jeová dehan: “Haʼu* sei la hatudu pasiénsia nafatin ba ema,+ tanba sira mak isin deʼit.* Tan neʼe, sira sei moris toʼo tinan 120 deʼit.”+
4 Hahú husi tempu neʼebá, ema Nefilím* mak iha rai. Durante tempu neʼebá Maromak loos nia anju sira halo relasaun seksuál ho ema nia oan-feto sira, no feto sira-neʼe tuur-ahi oan-mane sira. Oan sira-neʼe iha kbiit boot no naran-boot iha tempu uluk.
5 Entaun, Jeová haree katak ema nia hahalok aat sai barak tebes iha rai no ema nia hanoin hotu iha laran mak aat deʼit iha tempu hotu.+
6 Jeová sente triste tanba nia kria ona ema iha rai, no nia sente laran-kanek tebes.+
7 Tan neʼe Jeová dehan: “Haʼu sei halakon ema neʼebé haʼu kria ona husi rai leten, ema hamutuk ho animál neʼebé maus, animál neʼebé semo no animál seluk,* tanba haʼu sente triste hodi kria sira.”
8 Maibé Jeová haree Noé nuʼudar ema neʼebé monu loos ba ninia laran.
9 Tuirmai neʼe mak istória kona-ba Noé.
Noé mak ema neʼebé laran-loos.+ Nia moris ho hahalok loos iha ninia jerasaun nia leet. Noé laʼo ho Maromak loos.+
10 Noé iha oan-mane naʼin-tolu: Sem, Ham no Jafet.+
11 Maibé tuir Maromak loos nia haree, rai sai aat ona no nakonu ho violénsia.
12 Sin, Maromak hateke ba rai, no neʼe aat ona;+ ema hotu halo hahalok neʼebé aat iha rai.+
13 Depois neʼe, Maromak dehan ba Noé: “Haʼu deside ona atu halakon kriatura hotu, tanba ema halo rai neʼe nakonu ho violénsia, tan neʼe haʼu sei halakon ema no rai.+
14 Nuneʼe, halo ró* ida ba ó-nia an, halo neʼe ho ai-rezinoza.+ Ó tenke halo kuartu sira iha ró nia laran no taka ró nia laran no liʼur ho alkatraun.+
15 Ó tenke halo ró hanesan tuirmai neʼe: Ninia naruk metru 133 ho balu, luan metru 22 no aas metru 13.*
16 Ó tenke halo janela* ba ró neʼe sentímetru 45* husi leten hodi naroman bele tama. Ó tenke tau odamatan ba ró neʼe iha ninia sorin+ no ó tenke halo andár iha okos, andár segundu no andár terseiru.
17 “Kona-ba haʼu, haʼu sei halo rai-nabeen akontese+ iha mundu hodi halakon kriatura hotu neʼebé iha iis* moris nian iha mundu.* Buat hotu iha rai sei lakon.+
18 No haʼu sei halo aliansa ho ó, no ó hamutuk ho ó-nia oan-mane sira, ó-nia feen, no ó-nia feto-foun sira tenke tama ba ró laran.+
19 Ó tenke lori animál rua-rua husi animál oioin,+ inan ida no aman ida,+ ba ró laran hodi sira bele kontinua moris hamutuk ho ó.
20 Kona-ba animál neʼebé semo tuir sira-nia modelu, animál neʼebé maus tuir sira-nia modelu, no animál seluk hotu iha rai tuir sira-nia modelu, animál rua-rua husi modelu hotu sei tama ba ró hamutuk ho ó hodi sira bele kontinua moris.+
21 Kona-ba ó, ó tenke halibur no lori ai-han oioin atu han,+ ai-han sira-neʼe ba ó no mós ba animál sira.”
22 Noé halo tuir mandamentu hotu neʼebé Maromak fó ba nia. Nia halo nuneʼe duni.+
Nota-rodapé
^ Orj., “Maromak nia oan-mane sira”.
^ Orj., “Haʼu-nia espíritu”. Haree “Ruah” iha Glosáriu.
^ Ka “tanba sira-nia hahalok tuir deʼit isin”.
^ Karik naran neʼe katak “Halo monu”, neʼe katak sira neʼebé halo ema seluk monu. Haree “Ema Nefilím” iha Glosáriu.
^ Orj., “kaixote”. Neʼe refere ba ró neʼebé boot no karik modelu hanesan kaixote.
^ Lian Ebraiku, tsohar. Karik neʼe katak kakuluk ka janela.
^ Orj., “kóvado 1”.
^ Haree “Ruah” iha Glosáriu.
^ Orj., “iha lalehan okos”.
